Tola Ösöndra Waʼauri si Lö Aetu—Hewisa Lalania?

1. Hewisa dödö niha sanandrösa ba waʼauri si lö aetu?

ATO niha samorege enaʼö lö mofökhö ira. Laʼa gö si so gizi ba asese lalau faʼolahraga. Hizaʼi, lafalua daʼö tenga enaʼö tola auri ira sagötö faʼara. Ba wamaigira tebai laʼokhögö waʼauri simane daʼö. Aboto ba dödöra wa itugu oya gabula dödö nirasoira na no itugu atua ira. Hewaʼae simanö, itutunö Yesu wa tola laʼokhögö waʼauri si lö aetu niha gulidanö. Ifatunö daʼö ba Yohane 3:16 hegöi 5:24.

2. Hadia nitutunö Yohane 6:​39, 40 sanandrösa ba waʼauri si lö aetu?

² Samuza maʼökhö, ifalua dandra sahöli-höli dödö Yesu ba wangaʼasogö roti hegöi iʼa balazo niha si hauga ribu faʼato.a No sahöli-höli dödö niha daʼö. Hizaʼi, mahemolunia so nasa zabölö ahöli-höli dödö nifaʼemania. Me laʼoʼö ia ira niha sato andrö irugi ba Gafanauma, banua sahatö ba Galilaia, ifatunö khöra ba daʼö wa tola tesusugi niha si no mate ba lasöndra waʼauri si lö aetu. (Baso Yohane 6:​39, 40.) Khalaigö hadia geluahania daʼö ba nösi nomou mazui si fahuwu khöu si no mate. Tola tesusugi ira ba fao ira khöu sagötö faʼara! Hizaʼi, ato niha me luo daʼö hegöi ba götöda iadaʼa si lö mangila eluaha wehede Yesu aefa daʼö si so ba Yohane faza 6. Datatutunö.

3. Hadia niwaʼö Yesu ba Yohane 6:51?

³ Me no ifalua dandra sahöli-höli dödö Yesu ba wangaʼasogö roti, itörö tödö niha sato andrö me ifalua dandra sahöli-höli dödö Yehowa ba wangaʼasogö mana khö ndra tuara. Ifotöi mana andrö Sura Niʼamoniʼö ”roti moroi ba zorugo”. (Si. 105:40; Yoh. 6:31) Iʼogunaʼö mana andrö Yesu tobali dane-dane ba wamahaʼö yaʼira ngawalö danö böʼönia. Hewaʼae moroi khö Lowalangi mana, hizaʼi ba gafuriata lö tebulö mate fefu niha si manga yaʼia. (Yoh. 6:49) Faböʼö moroi ba mana, ifotöi samösa ia Yesu ”roti sindruhu moroi ba zorugo”, ”roti moroi khö Lowalangi” hegöi ”roti fangorifi”. (Yoh. 6:​32, 33, 35) Ba wanutunö gamaehuta sebua ba mana hegöi faʼaurinia, imane Yesu, ”Yaʼodo roti sauri si otarai zorugo. Dozi si manga roti daʼa auri sagötö faʼara.” (Baso Yohane 6:51.) Lö aboto ba dödö niha Yahudi wehedenia andrö. Hana wa ifotöi ia Yesu ”roti” si otarai ba zorugo, ba hana wa abölö sökhi roti daʼa moroi ba mana nibeʼe Lowalangi khö ndra tuara? Imane khöra Yesu, ”Roti nibeʼegu yaʼia daʼö nagolegu.” Hadia geluahania? Dataʼalui wanema linia enaʼö aboto ba dödöda hewisa wa tola taʼokhögö waʼauri si lö aetu, ba simanö göi niha niʼomasiʼöda.

”ROTI FANGORIFI” HEGÖI ”NAGOLE NONO NIHA”

4. Hadia mbörö wa so ösa niha si tokea me larongo wehede Yesu?

⁴ So ösa niha si tokea me larongo wa ibeʼe ’nagolenia Yesu enaʼö lasöndra waʼauri niha gulidanö’. Te so ba dödöra wa sindruhu-ndruhu omasi Yesu na laʼa nagolenia. (Yoh. 6:52) Baero daʼö, abölö tokea nasa ira me larongo wehede Yesu aefa daʼö. Imane, ”Na lö miʼa nagole Nono niha ba mibadu ndronia, lö misöndra waʼauri.”—Yoh. 6:53.

5. Hadia omasi Yesu na sindruhu-ndruhu labadu ndronia? Tutunö.

⁵ Ba götö Noakhi, lö itehegö Yehowa wemanga do. (1 Mo. 9:​3, 4) Ifuli isura daʼö ba goroisa nibeʼenia ba ndraono Gizaraʼeli. Imane, ”Mibunu niha si manga do.” (3 Mo. 7:27) Iʼoʼö Yesu zi no musura ba Goroisa andrö. (Mat. 5:​17-19) Börö daʼö, tatu lö iʼandrö ba niha Yahudi enaʼö sindruhu-ndruhu laʼa nagolenia ba labadu ndronia. Sindruhunia, ba wehedenia andrö omasi ia ifahaʼö ira hewisa lala ba wanöndra ’faʼauri si lö aetu’.—Yoh. 6:54.

6. Hezo taʼila wa fehede Yesu sanandrösa ba nagole hegöi donia ha amaedola?

⁶ Tatu manö, ha amaedola me iwaʼö Yesu sanandrösa ba nagole hegöi donia. No göi irai iʼogunaʼö gamaedola me ifahaʼö ndra alawe Zamaria. Imane, ”Gofu haniha zamadu idanö nibeʼegu andre dania, lö irasoi waʼowökhi dödö. Idanö nibeʼegu andrö tobali umbu nidanö ba dödönia ba sameʼe faʼauri si lö aetu.” (Yoh. 4:​7, 14)b Tenga daʼö geluaha wehede Yesu wa hasambalö itema waʼauri si lö aetu ira alawe Zamaria andrö na ibadu nidanö moroi ba mbaʼa. Simane daʼö göi, tenga daʼö geluahania wa tola laʼokhögö waʼauri si lö aetu ira niha sato sowulo ba Gafanauma andrö, na sindruhu-ndruhu laʼa nagole ba labadu ndro Yesu.

FEHEDE SI FAKHILI HIZAʼI LÖ FAGÖLÖ

7. Hadia rahu-rahu nihalö niha moroi ba wehede Yesu ba Yohane 6:53?

⁷ So ösa niha sangumaʼö wa fehede Yesu ba Yohane 6:53 itutunö sanandrösa ba nifalua ba Mbongi Watomesa Zoʼaya. Lawaʼö zimane daʼö börö me fakhili-khili wehede Yesu ba ayati daʼa ba wehedenia me mufalua Mbongi Watomesa Zoʼaya. (Mat. 26:​26-28) Lahalö rahu-rahu wa fefu niha sangondrasi Bongi Watomesa Zoʼaya, lö tola löʼö laʼa roti ba labadu nagu nifatörö fönara. Hadia atulö daʼö? Moguna taʼalui zindruhu, börö me ero röfi tafalua wanörö tödö andrö ba zi sagörö ulidanö, ba zuta niha si fao khöda. Nehegö hadia manö gamaehuta wehede Yesu ba Yohane 6:53 faoma fehedenia me mufalua Mbongi Watomesa Zoʼaya.

8. Hadia gamaehuta zalua fatua lö iwaʼö wehedenia Yesu ba Yohane 6:53 faoma fehedenia me mufalua Mbongi Watomesa Zoʼaya? (Faigi göi gambara.)

⁸ Si oföna, nehegö hezo ba hamega fahuhuo Yesu. Ifaʼema wehedenia Yesu nisura ba Yohane 6:​53-56 me döfi 32 M ba Galilaia. Ifalua daʼö te mato döfi fatua lö ifalua Mbongi Watomesa Zoʼaya ba Yeruzalema. Si dua, nehegö haʼökhö fahuhuo Yesu. Arakhagö fefu zamondrongo huhuonia ba Galilaia no laʼosambuaʼö dödöra ba zoguna khöra ba mboto, tenga soguna ba wamati. (Yoh. 6:26) Me so zi lö aboto ba dödöra ba wehede Yesu, alio sibai taya wamatira. So ösa göi moroi ba gotalua ndra nifahaʼönia zondröi yaʼia. (Yoh. 6:​14, 36, 42, 60, 64, 66) Faböʼö sibai nifaluara moroi ba nifalua ndra sinenge si 11 niha si lö faröi, si fao khö Yesu ba Mbongi Watomesa Zoʼaya me döfi 33 M. Hewaʼae lö fefu ahori aboto ba dödöra wamahaʼö nifaʼema Yesu, hizaʼi lö laröi ia. Faduhu dödöra wa Yesu andrö Ono Lowalangi si otarai zorugo. (Mat. 16:16) Börö daʼö, isuno ira Yesu imane, ”Yaʼami niha si lö faröi khögu me göna ndraʼo fanandraigö.” (Luk. 22:28) Amaehuta si dombua andre sindruhunia no ibönö tobali tandra samaduhuʼö wa fehede Yesu ba Yohane 6:​53, lö manandrösa ia ba Mbongi Watomesa Zoʼaya. Hizaʼi, so nasa dandra tanö böʼö.

ELUAHANIA KHÖU

9. Haʼökhö manö moguna wehede Yesu ba Mbongi Watomesa Zoʼaya?

⁹ Ba Mbongi Watomesa Zoʼaya, ifatörö Yesu roti si lö mufaruka ragi föna ndra sinengenia ba itutunö wa no amedola mbotonia daʼö. Aefa daʼö ifatörö göi fönara agu ba itutunö wa no amaedola ”do wawuʼusa li” daʼö. (Mrk. 14:​22-25; Luk. 22:20; 1 Ko. 11:24) Na tanehegö, lö ifazökhi mbuʼusa li si bohou Yesu ba niha sato, hizaʼi ha ba Gizaraʼeli ba wamati, yaʼia daʼö sambua ngawawa niha si fao mamatörö ba Wamatörö Lowalangi. (Heb. 8:​6, 10; 9:15) Me luo daʼö, lö nasa aboto ba dödö ndra sinenge geluahania. Hizaʼi, lö ara aefa daʼö, tebayoini ira eheha niʼamoniʼö ba farahu ira ba mbuʼusa li si bohou irege tola fao ira khö Yesu ba zorugo.—Yoh. 14:​2, 3.

10. Hadia nasa gamaehuta wehede Yesu ba Mbongi Watomesa Zoʼaya hegöi fehedenia ba Galilaia? (Faigi göi gambara.)

¹⁰ Ba ginötö ifalua Mbongi Watomesa Zoʼaya, iʼosambuaʼö dödönia Yesu khö ndra ”ngawawa si lö atoto”. Ba wamobörö, ngawawa daʼa ha ira sinenge si lö faröi si fao khönia ba nahia daʼö. (Luk. 12:32) Yaʼira zi manga roti ba samadu agu nifaʼema Yesu. Aefa daʼö, so göi niha tanö böʼö si farahu ba ngawawa andrö, laʼa göi roti ba labadu nagu. Fao ira awö Yesu ba zorugo. Ba daʼa taʼila wa fehede Yesu niwaʼönia khö ndra sinengenia ba Mbongi Watomesa Zoʼaya, faböʼö moroi ba wehedenia khö ndra niha sato ba Galilaia. Fehedenia ba Mbongi Watomesa andrö, ha ba ngawawa si lö atoto manandrösa ia, hizaʼi fehedenia ba Galilaia manandrösa ia ba niha sato.

11. Hadia wehede Yesu ba Galilaia sangoromaʼö wa tenga ba niha si lö atoto manandrösa huhuonia?

¹¹ Ba Galilaia me döfi 32 M, fahuhuo Yesu ba niha Yahudi somasi manema roti moroi khönia. Iforege wanolo yaʼira enaʼö laʼosambuaʼö dödöra ba zabölö moguna moroi ba gö, si tola mameʼe khöra faʼauri si lö aetu. Aefa daʼö, itutunö Yesu wa tola mususugi niha si no mate ba ngaluo safuria ba isöndra waʼauri si lö aetu. Nitutunönia andrö lö manandrösa ia ba dötönafö niʼokhögö niha si lö atoto si no mufili, simane nitutunönia ba Mbongi Watomesa Zoʼaya lö ara aefa daʼö. Nitutunönia iadaʼa, yaʼia daʼö tötönafö si tola laʼokhögö niha gulidanö maʼafefu. Imane, ”Dozi si manga roti daʼa auri sagötö faʼara. . . . Roti nibeʼegu yaʼia daʼö nagolegu, enaʼö lasöndra waʼauri niha gulidanö.”—Yoh. 6:51.c

12. Hadia zinangea lafalua niha enaʼö lasöndra waʼauri si lö aetu?

¹² Lö niwaʼö Yesu khö ndra niha Yahudi si so ba Galilaia wa fefu niha, he si no mate mazui si lö nasa si tumbu, lasöndra waʼauri si lö aetu. Tebeʼe waʼauri si lö aetu ha ba ’niha si manga roti andre’, yaʼia daʼö niha samati khö Yesu. Ato niha sangotöigö niha Keriso lawaʼö tödöra wa hasambalö teʼorifi ira asala faduhu dödöra khö Yesu ba latemaʼö ia tobali sangorifi yaʼira. (Yoh. 6:29) Hizaʼi, sindruhunia tenga ha daʼö. Ato niha samondrongo huhuo Yesu ba Galilaia, ba wamobörö faduhu dödöra khönia. Hizaʼi, ba gafuriata laröi manö ia. Hadia mbörö?

13. Hadia zinangea mufalua enaʼö tobali nifahaʼö Yesu?

¹³ Arakhagö fefu niha samondrongo huhuo Yesu me luo daʼö, laʼoʼö ia ha börö me so zomasi dödöra. Omasi ira tefadöhö moroi ba dandra sahöli-höli dödö, so zameʼe göra, ba omasi ira lafondrondrongo wamahaʼö si möi fangomuso dödöra. Hizaʼi, ifatunö khöra Yesu wa möi ia ba gulidanö tenga ha ba wombönökhi soguna khöra ba mboto. Möi ia ba wamahaʼö hadia zinangea lafalua niha enaʼö tobali ira nifahaʼönia. Moguna laʼameʼegö tödö wogaoni me iwaʼö khöra Yesu, ”Miʼondrasi ndraʼo”, eluahania latemaʼö ba lafalua fefu nifahaʼönia.—Yoh. 5:40; 6:44.

14. Hadia zinangea tafalua enaʼö tatema mbua moroi ba nagole hegöi do Yesu?

¹⁴ Itandrösaigö huhuonia Yesu ba niha sato wa moguna sibai laforomaʼö wamati. Moguna mamati ira wa nagole hegöi do nibeʼenia, daʼö zamokai lala khöra ba wanöndra faʼauri si lö aetu. Moguna sibai wamati simane daʼö khö ndra niha Yahudi hegöi khöda iadaʼa. (Yoh. 6:40) Simane nitutunö ba Yohane 6:​53, moguna mamati ita ba höli nibeʼe Yesu enaʼö tatema mbua moroi ba nagole hegöi donia. Ba daʼa taʼila wa tebeʼe ginötö ba niha sato ba wanöndra faʼauri si lö aetu.—Ef. 1:7.

15-16. Hadia manö wamahaʼö sabölö moguna nifahaʼöda yaʼita moroi ba Yohane faza 6?

¹⁵ Oya sibai wamahaʼö sabölö moguna nihalöda ba Yohane faza 6. Tola taʼila wa iʼameʼegö tödö sibai niha Yesu. Ba Galilaia, ifadöhö niha sofökhö, ifahaʼö niha sanandrösa ba Zura Niʼamoniʼö, ba ibeʼe gö niha sato si lö balazo. (Luk. 9:11; Yoh. 6:​2, 11, 12) Sabölö tohude, ifahaʼö ira wa yaʼia andrö ”roti fangorifi”.—Yoh. 6:​35, 48.

¹⁶ Niha si farahu ba ”mbiri-biri tanö böʼö”, lö laʼa roti ba lö labadu nagu nifaʼema ba ginötö mufalua Mbongi Watomesa Zoʼaya ero röfi. (Yoh. 10:16) Hizaʼi, tola latema mbua moroi ba nagole hegöi do Yesu Keriso na mamati ira ba höli nibeʼenia. (Yoh. 6:53) Baero daʼö, na mufalua Mbongi Watomesa Zoʼaya, laʼa roti ba labadu nagu ira niha nibayoini. Daʼö zangoromaʼö wa no fao ira ba mbuʼusa li si bohou ba fao ira mamatörö awö Yesu ba Wamatörö Lowalangi. Tobali, fefu ita, he niha nibayoini hegöi biri-biri tanö böʼö, moguna tafahaʼö ita ba Yohane faza 6. Ba daʼö, ifarou ita enaʼö taʼokhögö wamati irege tasöndra waʼauri si lö aetu.