Fanofu Zombaso

Haniha ’ndra malaʼika si no mufili’ nitutunö ba 1 Timoteo 5:21?

Imane Faulo khö nawönia satua sokubaloi sotöi Timoteo: ”Föna Lowalangi ba föna Keriso Yesu hegöi ira malaʼika si no mufili, ubeʼe khömi goroisa enaʼö miʼoʼö wanuturu lala andre ba böi so wanahö-nahö tödö ba faʼebua dödö zambuana.”—1 Ti. 5:21.

Haniha ’ndra malaʼika si no mufili andrö’? Si no tatu, ira malaʼika andrö tenga si 144.000 niha nibayoini. Me ifaʼoheʼö zurania Faulo khö Dimoteo, lö hadöi niha Keriso nibayoini si no tesusugi ba zorugo. Börö daʼö, me luo daʼö lö nasa si tobali boto eheha ndra sinenge hegöi ira niha nibayoini.—1 Ko. 15:​50-54; 1 Te. 4:​13-17; 1 Yo. 3:2.

”Ira malaʼika si no mufili” göi andrö tenga ira malaʼika samadaö khö Lowalangi fatua lö Anönö Danö Idanö. Faʼawö ndra malaʼika daʼö khö Zatana ba tobali ira malaʼika si lö sökhi si faʼudu khö Yesu. (1 Mo. 6:2; Luk. 8:​30, 31; 2 Fe. 2:4) Ba zi so miföna, tetiboʼö ira ba mbaho sabakha sibai sagötö zi 1.000 fakhe ba awena dania tehori ira fao khö Zatana.—Yud. 6; Fam. 20:​1-3, 10.

Ba ayati daʼö göi, itötöi Faulo sanandrösa khö ’Lowalangi ba Keriso Yesu’. Tobali, ”ira malaʼika si no mufili” andrö eluahania ira malaʼika si so ba zorugo si falulu fohalöwö khöra.

Ato sibai ndra malaʼika si lö faröi. (Heb. 12:​22, 23) Faduhu dödöda wa no faböʼö-böʼö halöwö nibeʼe Yehowa khöra. (Fam. 14:​17, 18) Duma-dumania, no irai ifatenge samösa malaʼikania Yehowa ba wamunu si 185.000 zaradadu Asiria. (2 Ra. 19:35) Tola manö so ösa göi ndra malaʼika nifatenge ”ba wangowuloi niha sanawö huku ba samobörö horö ba niha böʼö. Lafofanö fefu ndra niha daʼa moroi ba Wamatörö [Yesu]”. (Mat. 13:​39-41) So göi ndra malaʼika tanö böʼö nifatenge ”ba wangowuloi niha nifili” ba zorugo. (Mat. 24:31) Ba so göi nifatenge ba ’wondrorogö yaʼita ba lala nitöröda’.—Si. 91:11; Mat. 18:10; baso göi Mataiʼo 4:11; Luka 22:43.

”Ira malaʼika si no mufili” nitötöi ba 1 Timoteo 5:21 te ira malaʼika nibeʼe halöwö ba wanolo banua niha Keriso. Sindruhunia ba faza daʼa, ibeʼe mene-mene Faulo enaʼö lafosumange ndra satua sokubaloi ira talifusöda ba mbanua niha Keriso. Baero daʼö, ”böi so wanahö-nahö tödö ba faʼebua dödö zambuana” khö ndra satua sokubaloi na lafalua noro dödöra. Tebai göi lahalö gangetula ba waʼaösö. Iwaʼö Faulo wa moguna laʼoʼö mene-mene daʼa ira satua sokubaloi börö me lafalua noro dödöra andrö ”föna Lowalangi ba föna Keriso Yesu hegöi ira malaʼika si no mufili”. Ba daʼa taʼila wa so ndra malaʼika si no mufataro ba wanolo banua niha Keriso, duma-dumania ba wolumöʼö ono mbanua Lowalangi, ba wamaigi-maigi halöwö fanuriaigö hegöi ba wamatunö khö Yehowa hadia zalua.—Mat. 18:10; Fam. 14:6.