Taʼandrö Sibai Saohagölö ba Wangefaʼö Horö Nibeʼe Yehowa

1-2. Hadia zalua ba niha gulidanö si fagölö simane salua khö nono matua nitutunö ba ngenoli 1?

KHALAIGÖ so samösa nono matua niʼebuaʼö ba nösi nomo niha si kayo. Samuza maʼökhö, mate ndra satuania. Tokea ba abu sibai dödönia ba zalua andrö. Hizaʼi, tenga ha ndrege daʼö. Iʼila ba gafuriata wa no lahorigö gokhötara ira satuania ba laröi woʼömö sebua sibai. Iadaʼa, tenga okhöta niröi ndra satuania khönia, hizaʼi foʼömö. Tohare ndra sanugi ba lafaso ia wamuʼa foʼömö andrö ba waʼalio. Börö me ebua sibai woʼömö andrö, tebai ibuʼa sandrohu faʼaurinia.

² Hulö simane daʼö zalua khöda iadaʼa. Ba wamobörö, satuada si oföna yaʼia daʼö Adamo faoma Khawa, moʼahonoa ira ba toröi ira ba Waradaiso si sökhi. (1 Mo. 1:27; 2:​7-9) Tola laʼokhögö waʼauri si sökhi sagötö faʼara. Hizaʼi, tebulö fefu zalua andrö me aekhu ira ba horö. Tebai saʼae toröi ira ba Waradaiso ba lö laʼokhögö waʼauri si lö aetu. Iadaʼa, hadia gondröita niröira ba ngaʼötöra? Imane Sura Niʼamoniʼö, ”Simane böröta horö andrö, ha samösa niha zamobörö [yaʼia daʼö Adamo] ba faʼamate andrö börö horö, andrö wa ikhamö fefu niha faʼamate börö me no dozi samazökhi horö ira.” (Rom. 5:12) Ondröita niröi Gadamo khöda yaʼia daʼö horö, ba lua-luania faʼamate. Daʼa gondröita si no amaedola woʼömö ba samösa lö niha si tola mamuʼa daʼö.—Si. 49:8.

3. Hana wa muʼamaedolagö horö andrö simane ”foʼömö”?

³ Iʼamaedolagö horö andrö Yesu simane ”foʼömö”. (Mat. 6:12; Luk. 11:​4, nisura ba gahe zura) Ba ginötö tafalua horö, hulö amaedola moʼömö ita khö Yehowa. Lö tola löʼö tabuʼa woʼömö andrö. Na lö tabuʼa ia, awena aheta ita moroi ba daʼö na mate ita.—Rom. 6:​7, 23.

4. (a) Na lö fanolo moroi khö Yehowa, hadia zalua ba niha gulidanö maʼafefu samalua horö? (Sinunö 49:​7-9) (b) Ba Zura Niʼamoniʼö, hadia geluahania ”horö”? (Faigi göi kotak ”Horö”.)

⁴ Hadia tola ifuli taʼokhögö mangawuli hadia zi no itayaigö Adamo hegöi Khawa? Na taʼodaligö waʼabölöda samösa, tatu manö tebai. (Baso Zinunö 49:​7-9.) Na lö fanolo moroi khö Yehowa, lö khöda fanötöna faʼauri si lö aetu mazui fanusugi. Simane urifö, mate ita ba tebai saʼae ifuli auri.—Sango. 3:19; 2 Fe. 2:12.

5. Hadia nifalua Namada safönu faʼomasi ba wanolo yaʼita? (Faigi gambara.)

⁵ Fuli atö angeragö nono matua nitutunö ba wamobörö artikel daʼa. Hewisa dödönia na so ndra matua si kayo saoha ölö ba wamuʼa foʼömönia andrö maʼafefu? Tatu omuso dödönia ba iʼandrö sibai saohagölö. Simane ira matua si kayo andrö, so nifalua Namada Yehowa safönu faʼomasi enaʼö tola abuʼa woʼömö mazui horö si no iröi Adamo. Imane Yesu, ”Simanö sa waʼomasi Lowalangi nösi gulidanö, itehegö Nononia si ha sambua, enaʼö lö tekiko dozi samati khönia, ba lasöndra waʼauri si lö aetu.” (Yoh. 3:16) Me ifalua daʼö Yehowa, no ibeʼe khöda ginötö enaʼö tola ifuli taʼokhögö wahuwusa si sökhi khönia.

6. Hadia nitutunöda ba artikel daʼa, ba hadia mbörö?

⁶ Buala Yehowa sahöli-höli dödö andrö, tola möi famuʼa woʼömöda mazui tobali fangefa horöda. Hizaʼi, hewisa enaʼö tatema mbua moroi ba daʼö? Enaʼö taʼila wanema linia, datatutunö ösa wamahaʼö moroi ba Zura Niʼamoniʼö sanandrösa ba mbuala andrö. Na taʼangerönusi ia, tola itugu taʼandrö saohagölö ba zi no ifalua Yehowa ba wangefaʼö horöda.

OHITÖ DÖDÖ: TOLA IFULI ATULÖ NIHA KHÖ YEHOWA

7. (a) Me aekhu ba horö Gadamo hegöi Khawa, hadia nitayaigöra? (b) Börö me ngaʼötö Gadamo ba Khawa ita, hadia zoguna khöda? (Roma 5:​10, 11)

⁷ Tenga ha faʼauri si lö aetu nitayaigö Gadamo hegöi Khawa, hizaʼi taya göi wahuwusara si sökhi khö Namara sotöi Yehowa. Ba zilalö, yaʼira andre ösi nomo Lowalangi. (Luk. 3:38) Hizaʼi, börö me lö khöra foloʼö, tebai saʼae tobali ira ösi nomonia. Alua daʼö fatua lö tumbu ngaʼötöra. (1 Mo. 3:​23, 24; 4:1) Börö me ngaʼötöra ita, moguna teʼatulöʼö ita khö Yehowa. (Baso Roma 5:​10, 11.) Eluahania, moguna ifuli tafakhai wahuwusa si sökhi khönia. Moloʼö sambua referensi, ngawua wehede Yunani nifoʼeluaha tobali ”teʼatulöʼö”, tola göi mufoʼeluaha ia ”tabaliʼö awöda niha si faʼudu khöda ba zilalö”. Sahöli-höli dödöda, no iʼofönaiʼö ia Yehowa ba wangatulöʼö yaʼita khönia enaʼö tola taʼokhögö wahuwusa si sökhi. Hadia nifalua Yehowa?

AMAKHOITA: FANGATULÖ

8. Hadia nihenaigö Yehowa?

⁸ Ifazökhi gamakhoita fangatulö Yehowa enaʼö niha safönu horö tola ifuli laʼokhögö wahuwusa si sökhi khönia. Hewisa gamakhoita daʼö? Enaʼö ifuli taʼokhögö hadia zi no itayaigö Adamo, moguna ihenaigö Yehowa zi fagölö böli ba daʼö. Eluahania, hulö ifalua wamalali Yehowa. Buania, tola ”atulö” ita khönia ba taʼokhögö göi wahuwusa si sökhi.—Rom. 3:25.

9. Hadia gamakhoita nibeʼe Yehowa enaʼö tola teʼefaʼö horö ndraono Gizaraʼeli me föna?

⁹ Me föna, ifazökhi gamakhoita si lö arara Yehowa enaʼö tola teʼefaʼö horö ndraono Gizaraʼeli ba laʼokhögö wahuwusa si sökhi khönia. Ba Ngaluo Wangatulö nifalua sakali ba zi döfi, lö tola löʼö itunu zumange ere sebua salahi soi daʼö maʼafefu. Tatu manö, urifö nibeʼe sumange me luo daʼö, lö moʼahonoa wangehetania horöra, börö me abölö ebua mböli niha moroi ba gurifö. Hewaʼae simanö, na lafalalini gera-erara iraono Gizaraʼeli ba labeʼe zumange si no muhonogöi, hasambalö omasi Yehowa ba wangefaʼö horöra. (Heb. 10:​1-4) Baero daʼö, amakhoita nifalua ba Ngaluo Wangatulö hegöi sumange fameta horö sasese labeʼe, daʼö zanolo yaʼira enaʼö laʼila wa no raʼiö ira ba horö, ba moguna khöra zumange sabölö ebua böli si tola mangeheta horöra maʼafefu.

10. Hadia gamakhoita nibeʼe Yehowa enaʼö sindruhu-ndruhu teʼefaʼö horö niha gulidanö?

¹⁰ Enaʼö sindruhu-ndruhu teʼefaʼö horö niha gulidanö, itatugöi Yehowa enaʼö Ono niʼomasiʼönia ”ha sakali mate ia irugi zi lö aetu ba wangefaʼö horö niha sato”. (Heb. 9:28) Ibeʼe ”nosonia [Yesu] höli zato”. (Mat. 20:28) Hadia geluahania höli?

BÖLI NIBUʼA: HÖLI

11. (a) Moloʼö Sura Niʼamoniʼö, hadia geluaha höli? (b) Haniha zinangea mombuʼa höli?

¹¹ Ba Zura Niʼamoniʼö, höli eluahania böli sinangea mubuʼa enaʼö teʼatulöʼö mazui ifuli sökhi gamakhaita.a No ihonogöi Yehowa enaʼö so höli irege tola ifuli tasöndra hadia zi no itayaigö Adamo, yaʼia daʼö faʼauri soʼahonoa hegöi inötö ba wangokhögö faʼauri si lö aetu. Börö daʼö, faʼebua mböli höli lö tola löʼö fagölö ia ba zi no mutayaigö. (1 Ti. 2:6) Tobali, sinangea mamuʼa höli yaʼia daʼö ira matua (1) soʼahonoa, (2) si tola mangokhögö faʼauri si lö aetu ba gulidanö, ba (3) sanehegö faʼaurinia salahida. Na iʼokhögö fefu daʼö si samösa niha, tola tobali ia fangatulö mazui sangöhöli faʼauri si no taya.

12. Hana wa tola ibuʼa Yesu mböli höli?

¹² Datanehegö zi tölu dane-dane hadia mbörö wa Yesu zi tola mamuʼa höli. (1) Moʼahonoa ia, ”lö nifaluania horö”. (1 Fe. 2:22) (2) Börö daʼö, tola iʼokhögö waʼauri si lö aetu ba gulidanö. (3) Itehegö mate ia ba ibeʼe waʼaurinia salahida. (Heb. 10:​9, 10) Moʼahonoa Yesu, fagölö ia simane niha siföföna sotöi Adamo fatua lö ifalua horö. (1 Ko. 15:45) Tobali, me mate Yesu salahida, no ihöli mazui ibuʼa fefu mböli zi no itayaigö Adamo. (Rom. 5:19) Tobali ia ”Adamo safuria”. Börö daʼö, lö saʼae moguna so niha soʼahonoa tanö böʼö ba wamuʼa höli. Mate Yesu ”sakali irugi zi lö aetu”.—Heb. 7:27; 10:12.

13. Hewisa enaʼö tola taʼokhögö gamakhaita si sökhi khö Yehowa?

¹³ Hewisa enaʼö tola taʼokhögö gamakhaita si sökhi khö Yehowa? No ifazökhi gamakhoita fangatulö Yehowa enaʼö tola teʼefaʼö horöda ba taʼokhögö gamakhaita si sökhi khönia. Hizaʼi, enaʼö tola alua daʼö, moguna so höli sinangea mubeʼe. Mubuʼa höli andrö me teduwagö salahida ndro Yesu sebua böli.—Ef. 1:7; Heb. 9:14.

BUANIA: FANGEFA BA TEFADUHUʼÖ WA ATULÖ

14. Hadia nitutunöda iadaʼa, ba hadia mbörö?

¹⁴ Hadia mbua moroi ba gamakhoita fangatulö nifazökhi Yehowa? Ba wangila fanema linia, datatutunö zi dombua ngawua wehede nitutunö Zura Niʼamoniʼö sanolo yaʼita irege taʼila hewisa enaʼö tatema mbua moroi ba wangefaʼö horö nibeʼe Yehowa.

15-16. (a) Börö me so höli, hezo tola teʼefaʼö ita? (b) Hewisa dödöda me taʼila wa no teʼefaʼö ita?

¹⁵ Itutunö khöda Sura Niʼamoniʼö wa no tebeʼe khöda wangefa börö me no mubuʼa höli. Imane sinenge sotöi Fetero sanandrösa ba daʼa, ”No tehöli [mazui ”teʼefaʼö”] ami moroi ba lala waʼauri si möi zaya-zaya gölö niröi ndra tuami, ba miʼila wa sangefaʼö yaʼami tenga si taya, tenga firö mazui anaʼa, hizaʼi do Keriso sebua böli, si hulö ndro nono mbiri-biri si lö taʼunö ba si lö sinegu.”—1 Fe. 1:​18, 19, nis.

¹⁶ Börö me no mubeʼe höli, tola teʼefaʼö ita moroi ba horö hegöi faʼamate sangaʼasogö abula dödö sebua sibai. (Rom. 5:21) Tatu taʼandrö sibai saohagölö khö Yehowa hegöi khö Yesu ba ngawalö zi no latehegö irege tola tatema wangefa.—1 Ko. 15:22.

17-18. (a) Hadia geluahania tefaduhuʼö wa atulö? (b) Hadia mbuania khöda daʼö?

¹⁷ Ifatunö khöda Sura Niʼamoniʼö wa ono mbanua Yehowa tefaduhuʼö wa atulö ira. Eluahania, lö saʼae fasala ita ba lö iʼandrö khöda ba wamuʼa horö si no tafalua. Hizaʼi, hadia daʼö göi geluahania wa isawö goi-goinia sanandrösa ba waʼatulö? Löʼö. Tefaduhuʼö wa atulö ita tenga börö me no sinangea tatema daʼö, ba tenga göi börö me fao dödönia ba horö nifaluada. So dane-dane saro khö Yehowa ba wangefaʼö horöda, yaʼia daʼö börö me mamati ita ba zi no ifalua hegöi ba nifalua Nononia ba wangehenaigö höli.—Rom. 3:24; Gal. 2:16.

¹⁸ Hadia mbuania khöda me no ifaduhuʼö Yehowa wa atulö ita? Niha nifilinia samatörö awö Yesu ba zorugo, tefaduhuʼö wa atulö ira ba tobali ono Lowalangi. (Tit. 3:7; 1 Yo. 3:1) No teʼefaʼö horöra. Lö saʼae fasala ira fönania irege tola möi ira ba Wamatörö Lowalangi. (Rom. 8:​1, 2, 30) Niha sangokhögö tötönafö faʼauri ba gulidanö, tefaduhuʼö wa atulö ira ba tobali ira si fahuwu khö Lowalangi. No göi teʼefaʼö horöra. (Yak. 2:​21-23) Ngawawa sato, si no teʼefaʼö moroi ba Hamagedo, tebeʼe khöra ginötö ba wangokhögö faʼauri ba lö latörö waʼamate. (Yoh. 11:26) Niha ”satulö” hegöi ”si lö atulö” si no mate, hasambalö wa tesusugi ira. (Hal. 24:15; Yoh. 5:​28, 29) Ba gafuriata, fefu nono mbanua Yehowa si lö faröi ba gulidanö ”latema wangefa solakhömi simane nitema ndraono Lowalangi”. (Rom. 8:21) Sindruhu-ndruhu wa no sahöli-höli dödö mbua moroi ba gamakhoita nibeʼe Yehowa andre. Tola taʼokhögö wahuwusa si tohude khö Namada Yehowa!

19. Hewisa wa tola tebulö zalua khöda? (Faigi göi kotak ”Fangefaʼö Horö Nibeʼe Yehowa”.)

¹⁹ Ono matua nitutunö ba wamobörö artikel no mege, taya fefu niʼokhögönia ba toröi khönia woʼömö sebua sibai si tebai ibuʼa sandrohu faʼaurinia. Me föna, hulö simane daʼö göi zalua khöda. Hizaʼi, taʼandrö saohagölö börö me itolo ita Yehowa. Tebulö zalua khöda börö me ihenaigö gamakhoita fangatulö hegöi höli. Na mamati ita khö Yesu Keriso, tola teʼefaʼö ita mazui tehöli ita moroi ba horö hegöi faʼamate. Tola göi teʼefaʼö horöda, ba hulö zi lö irai tafalua daʼö. Sabölö tohude, iadaʼa tola taʼokhögö wahuwusa si sökhi khö Namada safönu faʼomasi, Yehowa.

20. Hadia nitutunöda ba artikel aefa daʼa?

²⁰ Tatu itugu ebua wangandröda saohagölö khö Yehowa hegöi Yesu na taʼangerönusi fefu zi no lafalua khöda. (2 Ko. 5:15) Na lö hadöi fanolo moroi khöra, sindruhu-ndruhu lö tötönaföda. Börö daʼö, ba artikel aefa daʼa, tatutunö dania hadia manö duma-duma sangoromaʼö bua nitemada ba wangefaʼö horö nibeʼe Yehowa khöda.