Lala ba Wameʼe Mene-Mene si Sökhi

1. Haniha zinangea mameʼe mene-mene, ba hadia mbörö?

HEWISA dödömö na laʼandrö khöu wameʼe mene-mene? So zomasi mamalua daʼö, hizaʼi so göi zalawö-lawö mazui sataʼu. Hewaʼae simanö, fefu ita moguna tabeʼe mene-mene. Hadia mbörö? No iwaʼö Yesu wa tehöngö ndra nifahaʼönia börö me faoma laʼomasiʼö nawöra. (Yoh. 13:35) Sambua lala ba wangoromaʼö faʼomasi khö ndra talifusöda yaʼia daʼö na tabeʼe mene-mene ba ginötö moguna. Baero daʼö, no ifatunö khöda Sura Niʼamoniʼö wa tumbu ”wahuwusa si sökhi börö mene-mene soroi ba dödö”.—Amd. 27:9.

2. Hadia zi lö tola löʼö laʼila ira satua sokubaloi, ba hadia mbörö? (Faigi göi kotak ”Mene-Mene ba Gangowuloa Barö Migu”.)

² Moguna sibai laʼila ira satua sokubaloi hewisa lala ba wameʼe mene-mene si sökhi. Hadia mbörö? Yehowa hegöi Yesu, no labeʼe noro dödö khö ndra satua sokubaloi ba wokubaloi banua niha Keriso. (1 Fe. 5:​2, 3) Sambua lala ba wamaluara daʼö yaʼia na labeʼe mene-mene si teʼodane-dane ba Zura Niʼamoniʼö ba ginötö lafaʼema huhuo ba mbanua niha Keriso. Moguna göi labeʼe mene-mene khö ndra talifusöra maʼafefu mendrua manö zi no fandröndröu moroi ba ngawawa zato. Hewisa lala ndra satua sokubaloi hegöi yaʼita fefu ba wameʼe mene-mene si sökhi?

3. (a) Hewisa enaʼö tola tabeʼe mene-mene si sökhi? (Yesaya 9:6; faigi göi kotak ”Oʼö Yesu ba Ginötö Öbeʼe Mene-Mene”.) (b) Hadia nitutunöda ba artikel daʼa?

³ Oya zi tobali famahaʼö khöda sanandrösa ba wameʼe mene-mene na tafahaʼö ita moroi khö ndra niha nitutunö ba Zura Niʼamoniʼö. Duma-duma sabölö ebua yaʼia daʼö Yesu, mufotöi ia ”Sanuturu Lala Satua-tua”. (Baso Yesaya 9:6.) Ba artikel daʼa, tatutunö dania hewisa lalada ba wameʼe mene-mene ba ginötö laʼandrö khöda wamalua daʼö mazui na lö laʼandrö. Tatutunö göi wa moguna sibai tabeʼe mene-mene ba ginötö hegöi ba lala si tefaudu.

BA GINÖTÖ LAʼANDRÖ KHÖDA WAMEʼE MENE-MENE

4-5. Hadia zi oföna taʼangeragö na laʼandrö khöda mene-mene? Beʼe duma-duma.

⁴ Na so zangandrö khöda mene-mene, tatu manö omuso dödöda börö me taʼila wa ifaduhusi tödö ita. Omasi ita iʼanemaiʼö tatolo ia. Hizaʼi fatua lö tabeʼe mene-mene, moguna taʼangeragö daʼa: ’Hadia tefaudu na yaʼo zameʼe mene-mene ba zalua khönia andrö?’ Itaria, lala sabölö tefaudu ba wanolo yaʼia tenga na tabeʼe khönia mene-mene, hizaʼi tatolo ia ba wangalui niha sabölö mangila abula dödö salua khönia.

⁵ Duma-dumania, so samösa zi fahuwu khöu si göna fökhö sabölö-bölö. No ifalua riset ba ngawalö dalu-dalu si no tehenaigö, ba isofu khöu hezo dalu-dalu sabölö sökhi. Tola manö so zomasiʼö lala wameʼe dalu-dalu, hizaʼi öʼila wa tenga doto ndraʼugö. Na simane daʼö zalua, lala sabölö sökhi ba wanolo si fahuwu khömö andrö yaʼia na öʼalui doto si tola manolo yaʼia.

6. Hana wa sökhi na lö iʼanemaiʼö tabeʼe mene-mene?

⁶ Hewaʼae tawaʼö tödöda wa tefaudu na yaʼita zameʼe mene-mene khö zi samösa niha, abölö sökhi na lö iʼanemaiʼö tafalua daʼö. Hadia mbörö? Imane ba Gamaedola 15:​28, ”Tödö niha satulö iʼangeragö fatua lö mohede ia.” Hizaʼi, hewisa na tawaʼö wa no taʼila hadia mene-mene si tefaudu khönia? Te moguna nasa tafalua riset, mangandrö ita ba tahaogö taʼera-era hadia zinangea tawaʼö. Na tafalua daʼö, itugu faduhu dödöda wa tefaudu mene-mene nibeʼeda ba lala wangera-ngera Yehowa.

7. Hadia wamahaʼö nihalömö moroi khö Natano samaʼeleʼö?

⁷ Nehegö duma-duma salua khö Natano samaʼeleʼö. Me fahuhuo Razo Dawido khö Natano, itutunö wa omasi sibai ia wamazökhi osali khö Yehowa. Iʼanemaiʼö ifarou ia Natano wamalua daʼö. Sindruhunia, moguna menaʼö manofu Natano khö Yehowa. Hadia mbörö? Börö me tenga Dawido nifili Yehowa ba wamazökhi osali. (1 Ng. 17:​1-4) Moroi ba daʼa, tafahaʼö ita wa abölö sökhi na lö ’tafahulö wehede’ ba ginötö laʼandrö khöda mene-mene.—Yak. 1:19.

8. Hadia nasa lua-luania na lö fakhamö taʼangeragö wehededa ba ginötö tabeʼe mene-mene?

⁸ Hadia nasa lua-luania na lö fakhamö taʼangeragö wehededa ba ginötö tabeʼe mene-mene khö zi samösa niha? Na alua khönia gabula dödö börö wanuturu lala nibeʼeda, lua-luania khöda tezofu-zofu. Börö daʼö, datahaogö taʼangeragö fatua lö tabeʼe mene-mene.

BA GINÖTÖ LÖ LAʼANDRÖ KHÖDA WAMEʼE MENE-MENE

9. Hadia zinangea latatugöi ira satua sokubaloi fatua lö labeʼe mene-mene? (Galatia 6:1)

⁹ Itaria moguna labeʼe mene-mene ira satua sokubaloi khö zi samösa talifusöda ’sanörö lala si sala’ hewaʼae na lö iʼandrö. (Baso Galatia 6:1.) Niha sanörö lala si sala yaʼia daʼö sangai angetula sambö tefaudu si tola mondrönisi tödönia ba wamalua horö sebua. Daʼö mbörö wa moguna latolo ia ira satua sokubaloi faböi iröi lala satulö saekhu ba waʼauri si lö aetu. (Yak. 5:​19, 20) Hizaʼi, fatua lö labeʼe mene-mene, moguna latatugöi ira satua sokubaloi hadia sindruhu-ndruhu no itörö lala si sala si samösa niha andrö. Hadia mbörö? Börö me no itehegö khöda Yehowa ba wangai angetula samösa si teʼodane-dane ba dödöda side-ide. (Rom. 14:​1-4) Hewisa na sindruhu-ndruhu no fasala zi samösa niha andrö ba moguna labeʼe khönia mene-mene?

10-12. Hadia zinangea lafalua ira satua sokubaloi na moguna labeʼe mene-mene hewaʼae na lö muʼandrö khöra? Beʼe duma-duma. (Faigi göi gambara.)

¹⁰ Sindruhu sa wa abua khö ndra satua sokubaloi ba wameʼe mene-mene, mendrua manö na lö niʼandrö khöra wamalua daʼö. Simane niwaʼö Waulo, te lö aboto ba dödö zi samösa talifusöda wa no ifalua zala. Tola manö manofu-nofu dödönia hadia mbörö wa labeʼe khönia mene-mene. Börö daʼö, moguna laforege ira satua sokubaloi ba wanolo talifusöda andrö enaʼö ifaʼanö dödönia irege aoha dania khönia wanemaʼö mene-mene.

¹¹ Nehegö duma-duma andre. So samösa zananö sinanö ba danö sabeʼe. Fatua lö itanö danömö zinanö, moguna ua ifaku mazui ifowukho dambu ba awena itanö zinanö andrö. Aefa daʼö, ihawui faoma idanö enaʼö alio tumbu zinanö nitanönia. Simane daʼö göi, fatua lö labeʼe mene-mene si lö muʼandrö ira satua sokubaloi, moguna lafaʼanö dödö dalifusöda andrö. Duma-dumania, ifaigi ginötö si tefaudu hawaʼara fahuhuo ira ba ifaduhuʼö wa sindruhu-ndruhu iʼameʼegö tödö dalifusöda andrö. Na laʼila ira talifusöda wa sebua faʼomasi zatua sokubaloi andrö ba sökhi dödönia, aoha khö ndra talifusöda wanemaʼö mene-mene nibeʼenia.

¹² Ba ginötö fahuhuo zatua sokubaloi khö dalifusöda andrö, hulö amaedola no ifowukho danö na itutunö wa fefu ndra talifusöda tanö böʼö göi no irai lafalua zala ba moguna mubeʼe khöra mene-mene. (Rom. 3:23) Aefa daʼö, si fao fehede si sökhi, tola iʼogunaʼö Zura Niʼamoniʼö ba wangombakha khö dalifusöda andrö wa no ihalö gangetula si fasala. Me no ifaduhuʼö talifusöda andrö wa fasala ia, awena ibörögö ”itanö danömö zinanö” satua sokubaloi andrö. Ihaogö wanutunö hadia manö zinangea ifalua talifusöda andrö enaʼö ifuli ia ba lala satulö. Aefa daʼö, amaedola zi no ”ihawui danömö zinanö” andrö na isuno dalifusöda daʼö ba fao ira wangandrö.—Yak. 5:15.

13. Hewisa wotatugöi ndra satua sokubaloi wa no aboto ba dödö zi samösa talifusöda mene-mene nibeʼera?

¹³ Itaria, lö aboto ba dödö zi samösa niha hadia geluaha mene-mene nibeʼe khönia. Enaʼö lö alua zimane daʼö, hadia nifalua ndra satua sokubaloi? Tola lahaogö wanofu-nofu si fao faʼasökhi dödö irege laʼila lahalö gangetula wa no aboto ba dödö dalifusöda andrö mene-mene nibeʼera ba iʼila hadia zinangea ifalua.—Sango. 12:11.

MAMEʼE MENE-MENE BA GINÖTÖ HEGÖI BA LALA SI TEFAUDU

14. Hana wa tebai tabeʼe mene-mene ba ginötö mofönu ita?

¹⁴ Börö me niha si lö moʼahonoa ita, tola manö tafalua mazui tafaʼema wehede si tetutu ba dödö niha böʼö. (Kol. 3:13) Ifatunö göi khöda Sura Niʼamoniʼö wa itaria mofönu ita börö wehede mazui nifalua niha böʼö. (Ef. 4:26) Ba ginötö simane daʼö, tebai tabeʼe mene-mene. Hadia mbörö? ”Börö me fönu niha andrö, lö iʼasogö waʼatulö ba wamaigi Lowalangi.” (Yak. 1:20) Na tabeʼe mene-mene ba ginötö mofönu ita, tola manö itugu lö sökhi zalua. Sindruhu sa wa tenga tebai tawaʼö zi so ba dödöda ba niha sangandrö fönuda. Hizaʼi, abölö sökhi tafatunö ia na no alö waʼaukhu dödöda.

15. Hadia wamahaʼönia khöda moroi khö Gelihu? (Faigi göi gambara.)

¹⁵ Nehegö duma-duma Gelihu me ibeʼe mene-mene khö Yobi. Sagötö zi hauga hari, ifondrondrongo manö Elihu wehede Yobi me ibuʼa ba hulunia niböbögö khönia. Ahakhö dödö Gelihu khö Yobi. Hizaʼi, mofönu göi ia börö me iwaʼö wehede si lö tefaudu Yobi sanandrösa khö Yehowa ba talafo iʼera-era ia samösa. Hewaʼae simanö, ifaigi ginötö si tefaudu Elihu ba wameʼe mene-mene khö Yobi. Me iʼamenesi Yobi, ihaogö wehede si fao faʼasökhi dödö. (Yob. 32:2; 33:​1-7) Hadia wamahaʼönia khöda? Sökhi sibai zi sambua mene-mene na mufaʼema ia ba ginötö hegöi ba lala si tefaudu, yaʼia daʼö si fao faʼomasi ba faʼasökhi dödö.—Sango. 3:​1, 7.

BÖI BÖHÖLI WAMEʼE HEGÖI BA WANEMA MENE-MENE

16. Hadia wamahaʼö si tola tahalö moroi ba Zinunö 32:8?

¹⁶ Ayati si tobali tuho moroi ba artikel daʼa iwaʼö wa ’ibeʼe khöda wotu Yehowa ba iʼameʼegö tödö wamaigi yaʼita’. (Baso Zinunö 32:8.) Eluahania, tenga ha asala ibeʼe khöda mene-mene Yehowa, hizaʼi lö iböhöli wanolo yaʼita ba wamalua mene-menenia. Moguna göi taʼoʼö nifalua Yehowa ba ginötö tebeʼe khöda halöwö si tohude ba wameʼe mene-mene ba niha böʼö. Na no aefa tabeʼe mene-mene, böi taböhöli wamarou tödö ba tatolo ia wamalua mene-mene andrö.

17. Hezo tola mufaomagö ndra satua sokubaloi sameʼe mene-mene moroi ba Zura Niʼamoniʼö, ba hadia mbörö? (Yesaya 32:​1, 2)

¹⁷ Ba ginötö safuria andre, moguna sibai tatema ba tabeʼe göi mene-mene. (2 Ti. 3:1) Ira satua sokubaloi sameʼe mene-mene si teʼodane-dane ba Zura Niʼamoniʼö, tola muʼamaedolagö ira simane ”gelea nidanö ba danö sabeʼe”. (Baso Yesaya 32:​1, 2.) Sindruhu si fahuwu iʼila hadia mene-mene somasi ita, hizaʼi ibeʼe khöda mene-mene soguna khöda. Mene-menera andrö ”simane apel anaʼa ba wiga firö”. (Amd. 25:11) Yalötebulö tafahaʼö ita ba wameʼe hegöi ba wanemaʼö mene-mene si sökhi.