Lala ba Wanöndra Mene-Mene si Sökhi

1. Hewisa enaʼö tola tahalö gangetula si sökhi ba mofozu niʼera-erada? (Amaedola 13:10; 15:22)

TATU omasi ita ba wangai angetula si sökhi ba mofozu niʼera-erada. Börö daʼö, ifarou ita Sura Niʼamoniʼö wa moguna taʼandrö mene-mene.—Baso Gamaedola 13:10; 15:22.

2. Hadia nifabuʼu Yehowa khöda?

² Tola tasöndra mene-mene si sökhi moroi khö Namada sotöi Yehowa. No ifabuʼu khöda me imane, ”Ubeʼe khöu wotu ba uʼameʼegö tödö wamaigi yaʼugö.” (Si. 32:8) Fehede daʼö zangoromaʼö wa tenga ha asala ibeʼe khöda mene-mene Yehowa. Hizaʼi, sindruhu-ndruhu iʼameʼegö tödö ita ba omasi ia itolo ita ba woloʼö mene-mene nibeʼenia.

3. Hadia nitutunöda ba artikel daʼa?

³ Ba artikel daʼa, taʼalui dania wanema li moroi ba Zura Niʼamoniʼö moroi ba zi öfa ngawua fanofu andre: (1) Hadia gamuata sinangea uʼokhögö enaʼö usöndra mbua moroi ba mene-mene nitemagu? (2) Haniha zi tola mameʼe khögu mene-mene si sökhi? (3) Hewisa wangoromaʼögu wa omasido utema mene-mene? (4) Hadia mbörö wa tebai uʼandrö ba niha böʼö enaʼö yaʼira zangai angetula khögu?

HADIA GAMUATA SINANGEA UʼOKHÖGÖ?

4. Hadia gamuata sinangea taʼokhögö na omasi ita tasöndra mbua moroi ba mene-mene nitemada?

⁴ Na omasi ita tasöndra mbua moroi ba mene-mene nitemada, moguna taʼokhögö wangide-ngideʼö ba lö fayawa. Moguna aboto ba dödöda wa itaria tebai tahalö gangetula si sökhi na taʼodaligö waʼatua-tuada samösa mazui si no irai tatörö ba zilalö. Na lö khöda fangide-ngideʼö, lö itolo ita Yehowa. Lua-luania, gofu hadia mene-mene nibasoda moroi ba Zura Niʼamoniʼö, lö taʼila hewisa wamalua mene-mene daʼö. (Mi. 6:8; 1 Fe. 5:5) Hizaʼi, na so khöda wangide-ngideʼö, omasi ita tafondrondrongo mene-mene moroi ba Zura Niʼamoniʼö ba tatema mbuania.

5. Hadia mbörö wa tola manö menaʼö so waʼasiliyawa khö Razo Dawido?

⁵ Nehegö duma-duma Razo Dawido. Ara fatua lö mufataro ia tobali razo, no tehöngö Dawido tobali sonekhe ba musik. Laʼandrö khönia enaʼö itika harafa föna razo. (1 Sa. 16:​18, 19) Me no aefa ifili ia Yehowa tobali razo ba Gizaraʼeli, mohalöwö geheha niʼamoniʼö ba waʼaurinia irege itugu abölö ia. (1 Sa. 16:​11-13) Tehöngö göi ia börö me ato nikalaisinia udu ndraono Gizaraʼeli, farahu ba daʼö zi samösa nadaoya sotöi Goliato. (1 Sa. 17:​37, 50; 18:7) Ba daʼa taʼila wa onekhe sibai Dawido ba oya zahöli-höli dödö si tola ifalua. Daʼa menaʼö mbörö wa tola manö asiliyawa ia ba iwaʼö tödönia wa lö moguna khönia mene-mene. Hizaʼi, tenga simane daʼö Dawido.

6. Hezo taʼila wa omasi Dawido ba wamondrondrongo mene-mene? (Faigi göi gambara .)

⁶ Me no aefa tobali ia razo, lö aetu fahuwu Dawido ba niha sameʼe khönia mene-mene. (1 Ng. 27:​32-34) Iʼotarai me föna, omasi ia wamondrondrongo mene-mene moroi ba niha böʼö. Duma-dumania, ifondrondrongo mene-mene moroi khö zi samösa ira alawe sotöi Abigaila. Abigaila andre foʼomo moroi khö ndra matua samuʼi, si lö mangila mangandrö saohagölö, ba sangalui tana khönia. Hizaʼi, tenga simane foʼomo Abigaila andrö, si fao fangide-ngideʼö ifondrondrongo Dawido mene-mene si sökhi nifaʼema Abigaila. Buania, telumöʼö ia irege lö ifalua zala sebua.—1 Sa. 25:​2, 3, 21-25, 32-34.

7. Hadia wamahaʼö nihalöda moroi khö Dawido? (Sangombakha 4:13) (Faigi göi gambara.)

⁷ Hadia wamahaʼö nihalöda moroi khö Dawido? Te so nekhe-nekhe danga niʼokhögöda mazui oya zi no tatörö ba waʼaurida. Hizaʼi, böi so ba dödöda wa no oya zi no taʼila irege lö moguna saʼae khöda mene-mene. Moguna taʼoʼö Dawido somasi mamondrondrongo mene-mene si sökhi, gofu haniha zameʼe yaʼia. (Baso Zangombakha 4:13.) Na tafalua daʼö, tola telumöʼö ita irege lö tafalua zala sebua si tobali abula dödöda samösa mazui niha böʼö.

HANIHA ZI TOLA MAMEʼE KHÖGU MENE-MENE SI SÖKHI?

8. Hana wa tola ibeʼe mene-mene si sökhi Yonata khö Dawido?

⁸ Nehegö wamahaʼö tanö böʼö si tola tahalö moroi khö Dawido. Iʼandrö mene-mene ba niha si fahuwu khö Yehowa hegöi sangila abula dödö salua khönia. Duma-dumania, me omasi ia iʼila hadia tola ifuli teʼazökhi wahuwusania khö Razo Saulo, iʼandrö mene-mene moroi khö Yonata, ono Zaulo. Hana wa tola ibeʼe khönia mene-mene si sökhi Yonata? Börö me aro wahuwusa Yonata khö Yehowa, ba sindruhu-ndruhu aboto ba dödönia sanandrösa khö namania Saulo. (1 Sa. 20:​9-13) Na simanö, hewisa woloʼöda Dawido?

9. Haniha zi tola mameʼe khöda mene-mene si sökhi? Beʼe duma-duma. (Amaedola 13:20)

⁹ Na moguna khöda mene-mene, moguna taʼandrö daʼö ba niha si fahuwu khö Yehowa ba sangila abula dödö salua khöda.a (Baso Gamaedola 13:20.) Duma-dumania, na so samösa dalifusöda sawuyu-wuyu somasi mangowalu, haniha zi tola mameʼe khönia mene-mene si sökhi? Tola ibeʼe khönia mene-mene si sökhi si teʼodane-dane ba Zura Niʼamoniʼö awönia si lö sangowalu. Hizaʼi, tola manö isöndra mene-mene sabölö sökhi ba sabölö moguna moroi ba niha si no ara maʼifu mangowalu, saro ba wamati ba sangila yaʼia.

10. Hadia nasa nitutunöda?

¹⁰ No tatutunö dombua gamuata sinangea taʼokhögö ba haniha zi tola mameʼe khöda mene-mene si sökhi. Iadaʼa, datatutunö hewisa wangoromaʼöda wa omasi ita tatemaʼö mene-mene ba hadia tola taʼandrö ba niha böʼö ba wangai angetula khöda.

HEWISA WANGOROMAʼÖGU WA OMASIDO UTEMAʼÖ MENE-MENE?

11-12. (a) Hadia zi tebai tafalua? (b) Hadia nifalua Razo Rehabeamo me laʼandrö khönia iraono Gizaraʼeli ba wangalösi norora?

¹¹ Te so niha sangandrö mene-mene, hizaʼi sindruhunia no oföna ihalö gangetula. Somasi ia iʼalui yaʼia daʼö niha sotuhini angetulania andrö. Niha simane daʼö, tenga sindruhu-ndruhu omasi ia mene-mene. Moguna ifahaʼö ia moroi ba zalua khö Rehabeamo.

¹² Mamatörö Rehabeamo tobali razo ba Gizaraʼeli me no mate namania Selomo. Me luo daʼö, ohahau dödö niha ba soi Gizaraʼeli. Hizaʼi lawaʼö tödöra wa oya sibai niʼandrö Zelomo khöra. Lafalukhaisi Rehabeamo ba laʼandrö khönia iraono Gizaraʼeli enaʼö iʼalösi norora. Iwaʼö khöra Rehabeamo enaʼö labeʼe khönia ginötö fatua lö ihalö gangetula. Ba wamobörö, atulö nifaluania yaʼia me iʼandrö mene-mene moroi khö ndra satua mbanua, si no toʼölö mameʼe mene-mene khö Zelomo mböröta. (1 Ra. 12:​2-7) Hizaʼi lö omasi ia iʼoʼö mene-mene nibeʼera andrö. Hadia mbörö? Hadia no oföna ihalö gangetula ba ha omasi ia iʼalui niha sotuhini angetulania andrö? Börö daʼö, me iʼandrö mene-mene khö ndra si bohou ebua si fagölö döfi khönia ba fao dödöra ba niʼera-erania, iʼoʼö mene-mene nibeʼera. (1 Ra. 12:​8-14) Iʼotarai daʼö, fabali soi Gizaraʼeli ba lö aetu gabula dödö si göna khö Rehabeamo.—1 Ra. 12:​16-19.

13. Hadia wanofu sinangea taʼangeragö?

¹³ Hadia wamahaʼö si tola tahalö moroi khö Rehabeamo? Na taʼandrö mene-mene ba niha böʼö, moguna taforomaʼö wa sindruhu-ndruhu taʼameʼegö tödö mene-mene nibeʼenia. Tenga ha mene-mene si tefaudu ba zomasi ita nifondrondrongoda. Börö daʼö tandraigö angeragö daʼa, ’Na uʼandrö mene-mene, hadia iʼanemaiʼö utimbagö daʼö na lö tefaudu ia ba zomasi dödögu?’

14. Ba ginötö tatema mene-mene, hadia zi tebai taʼolifugö? Beʼe duma-duma. (Faigi göi gambara.)

¹⁴ Duma-dumania, so samösa dalifusöda ira matua nibeʼe halöwö sebua gazi. Fatua lö itema halöwö daʼö, iʼandrö ua mene-mene moroi khö zi samösa satua sokubaloi. Ifatunö talifusöda andrö wa lö tola löʼö iröi nösi nomonia ba ara awena mangawuli ia na itema halöwö daʼö. Ifasugi ba dödönia satua sokubaloi andrö wa moloʼö Sura Niʼamoniʼö, noro dödö zi samösa högö yomo ba nomo yaʼia daʼö ba wombönökhi soguna ba wamati ba nösi nomonia. (Ef. 6:4; 1 Ti. 5:8) Lö omasi dalifusöda andrö mene-mene daʼö. Itohugö wangandrö mene-mene khö ndra talifusö tanö böʼö irege isöndra mene-mene si tefaudu ba dödönia. Na simanö, hadia sindruhu-ndruhu mangalui mene-mene dalifusöda andrö? Mazui sindruhunia no oföna ihalö gangetula ba ha omasi ia iʼalui zotuhini angetula nihalönia? Böi olifu ita wa no tefuyu dödöda. (Yer. 17:9) Itaria, mene-mene soguna khöda yaʼia daʼö mene-mene si lö omasi ita.

HADIA TOLA UʼANDRÖ BA NIHA BÖʼÖ ENAʼÖ YAʼIRA ZANGAI ANGETULA KHÖGU?

15. Hadia zi tebai tafalua, ba hadia mbörö?

¹⁵ Omasi Yehowa na yaʼita samösa zangai angetula. (Gal. 6:​4, 5) Simane si no tatutunö moroi yawa, niha satua-tua iʼalui mene-mene moroi ba Zura Niʼamoniʼö hegöi khö ndra talifusö saro ba wamati, fatua lö ihalö gangetula. Hizaʼi, böi taʼandrö ba niha böʼö enaʼö yaʼira zangai angetula khöda. Te so zamalua daʼö yaʼia na manofu ia ba niha nifaduhusinia tödö, ”Na khöu menaʼö alua daʼa, hadia gangetulamö?” So göi zoloʼö angetula niha böʼö hewaʼae na lö niʼera-erania.

16. Hadia gabula dödö salua ba mbanua niha Keriso ba Gorindro, ba haniha zinangea mangai angetula ba daʼö? (1 Korindro 8:7; 10:​25, 26)

¹⁶ Nehegö gabula dödö salua ba mbanua niha Keriso ba Gorindro me abad siföföna sanandrösa ba wemanga nagole si no labeʼe sumange nadu. Ifaʼoheʼö khöra zura Faulo ba imane, ”Aboto ba dödöda wa lö eluaha nadu andrö ba ha samösa Lowalangi.” (1 Ko. 8:4) Börö daʼö, so ösa niha Keriso zangai angetula wa tola laʼa nagole niʼölira ba fasa hewaʼae na no mubeʼe daʼö sumange nadu. Hizaʼi, so ösa zangai angetula wa lö laʼa nagole daʼö börö me itegu-tegu ira tödöra side-ide. (Baso 1 Korindro 8:7; 10:​25, 26.) Lö irai ibeʼe mene-mene Faulo khö ndra niha Keriso ba Gorindro enaʼö lahalö gangetula ba niha böʼö mazui laʼoʼö nifalua niha böʼö. Yaʼira samösa ”zanema li föna Lowalangi”. (Rom. 14:​10-12) Börö daʼö, yaʼira samösa zinangea mangai angetula.

17. Hadia zi tola alua na ha asala taʼoʼö gangetula niha böʼö? Beʼe duma-duma. (Faigi göi gambara.)

¹⁷ Hewisa göi wa tola alua zimane daʼö ba götöda iadaʼa? Duma-dumania, fefu niha Keriso yaʼira samösa zangai angetula hadia latema fraksi-fraksi darah mazui löʼö.b Tatu manö abua wangai angetula ba zimane daʼa. Hewaʼae simanö, yaʼita samösa zangai angetula si teʼodane-dane ba Zura Niʼamoniʼö. (Rom. 14:4) Na ha asala taʼoʼö gangetula niha böʼö tola manö afuru dödöda side-ide. Awai tola tafahaʼö dödöda side-ide na yaʼita samösa zangai angetula. (Heb. 5:14) Na simanö, hawaʼara tola taʼandrö mene-mene khö ndra talifusöda saro ba wamati? Na no tafalua riset, hizaʼi lö nasa saboto ba dödöda hadia goi-goi Zura Niʼamoniʼö si tefaudu ba zalua khöda, tola taʼandrö mene-mene moroi khöra.

BÖI BÖHÖLI WANGANDRÖ MENE-MENE

18. Hadia zi no ifalua khöda Yehowa?

¹⁸ No iforomaʼö khöda Yehowa wa ifaduhusi tödö ita, yaʼia me itehegö khöda ba wangai angetula samösa. Enaʼö tola tahalö gangetula si sökhi, ibeʼe khöda Zura Niʼamoniʼö hegöi si fahuwu sanolo yaʼita enaʼö aboto ba dödöda goi-goi Zura Niʼamoniʼö. Sindruhu-ndruhu iʼameʼegö tödö ita Yehowa, simane ama safönu faʼomasi. (Amd. 3:​21-23) Hewisa wangoromaʼöda wa taʼandrö khönia saohagölö?

19. Hewisa enaʼö lö taböhöli wangomusoiʼö tödö Yehowa?

¹⁹ Tatu manö omuso sibai dödö zatua na iʼila itugu ebua-bua nononia ba tobali ira ono mbanua Yehowa satua-tua. Simane daʼö göi, omuso sibai dödö Yehowa na iʼila tedou ita ba wamati, taʼandrö mene-mene, ba tahalö gangetula samolakhömi töinia.