Hadia Öʼila Hewisa Enaʼö ’Ahono Dödöu ba zi No So’?

1. Hewisa niha sahono tödö ba zi no so?

HADIA ahono dödömö ba waʼaurimö iadaʼa? Niha sahono tödö ba zi no so, iʼosambuaʼö dödönia ba ngawalö zi sökhi si no iʼokhögö. Buania, irasoi waʼahono dödö ba faʼomuso dödö. Lö abao dödönia mazui mofönu ia börö me so zi tebai iʼokhögö. Hizaʼi, niha sahono tödö ba zi no so, tenga daʼö geluahania wa ilau zahono-hono. Moguna idouʼö ia ba wamalua halöwö ba wamati. (Rom. 12:1; 1 Ti. 3:1) Hewaʼae simanö, lö afatö dödöda na lö nasa tatema halöwö somasi ita.

2. Hadia manö zi lö sökhi si tola alua börö me lö ahono dödöda ba zi no so?

² Na lö ahono dödöda ba zi no so, tola manö alua khöda zi lö sökhi. Duma-dumania, niha si lö ahono tödö ba zi no so, te ibunu-bunu ia wohalöwö ba wangalui si lö moguna sibai khönia. Tenga ha daʼö. So göi ösa niha Keriso sanagö ha enaʼö laʼokhögö zomasi dödöra. Te lamane tödöra, ’No sinangea uʼokhögö daʼa,’ ’No iʼotarai mböröta omasido sibai gama-gama daʼa,’ mazui ’Hasambalö ufuli ugati dania gefenia.’ Hizaʼi, gofu hadia mbörö wa lafalua daʼö, lö irai omuso dödö Yehowa na managö niha ba möi fangobousi döinia daʼö. (Amd. 30:9) Baero daʼö, so zafatö tödö börö me lö latema nasa halöwö somasi ira irege laböhöli wamosumange Yehowa. (Gal. 6:9) Hadia mbörö wa tola ifalua daʼö si samösa niha si no molulu faʼaurinia khö Yehowa? Tola manö börö me lö ahono dödönia ba zi no so, ba itehegö mowaʼa bakha ba dödönia daʼö.

3. Hadia zi faduhu dödöda moroi ba Wilifi 4:​11, 12?

³ Tola tafahaʼö ita enaʼö ahono dödöda ba zi no so. Ifatunö khöda Faulo wa no ’ifahaʼö ia enaʼö ahono dödönia ba zi no so gofu hadia ia zalua’. (Baso Wilifi 4:​11, 12.) Me luo daʼö, bakha ba gurunga so Waulo. Hewaʼae simanö, lö tebulö irasoi waʼomuso dödö börö me no ifahaʼö ia ’hewisa enaʼo ahono dödönia ba zi no so’. Börö daʼö, na abua khöda worasoi faʼahono dödö ba zi no so, fehede hegöi salua khö Waulo zamaduhuʼö khöda wa tola tarasoi waʼahono dödö, gofu hadia zalua khöda. Sindruhu sa wa lö tohare manö waʼahono dödö simane daʼö. Tobali, datatutunö hewisa enaʼö ahono dödöda ba zi no so.

TADOUʼÖ WANGANDRÖ SAOHAGÖLÖ

4. Na tadouʼö wangandrö saohagölö khö Lowalangi, hana wa möi fanoloda daʼö enaʼö ahono dödöda ba zi no so? (1 Tesalonika 5:18)

⁴ Na tadouʼö wangandrö saohagölö, abölö aoha khöda ba worasoi faʼahono dödö ba zi no so. (Baso 1 Tesalonika 5:18.) Duma-dumania, na sindruhu-ndruhu tadouʼö wangandrö saohagölö börö me no tebönökhi zoguna khöda, lö talafo taʼangeragö ngawalö zi lö moguna khöda sindruhunia. Na taʼandrö göi saohagölö ba halöwö nibeʼe khöda bakha ba organisasi, tola taʼosambuaʼö dödöda ba wamalua fondrege zi sökhi, ba lö taʼera-era halöwö tanö böʼö sabölö omasi ita. Daʼö mbörö wa iʼamenesi ita Sura Niʼamoniʼö enaʼö tafaʼema wangandrö saohagölö khö Yehowa ba wangandrö. Na tafalua daʼö, tola tarasoi ’waʼohahau dödö andrö khö Lowalangi, sabölö moroi ba gera-era niha fefu’.—Fil. 4:​6, 7.

5. Hana wa sinangea mangandrö saohagölö ndraono Gizaraʼeli? (Faigi göi gambara.)

⁵ Nehegö duma-duma ndraono Gizaraʼeli. Asese sibai latahigö Yehowa börö me omasi ira laʼa gö si no irai laʼa ba Miserai me mböröta. (4 Mo. 11:​4-6) Atulö wa faʼamarase weʼaso ba danö si mate. Hizaʼi sindruhunia, tola larasoi waʼahono dödö na laʼangerönusi ngawalö nifalua Yehowa khöra ba laʼandrö saohagölö ba daʼö. Me toröi ira ba Miserai, lafakao-kao ira ba laʼosawuyu. Hizaʼi, ifatörö zi Fulu Wamakao Lowalangi Yehowa ba niha Miserai enaʼö teʼefaʼö ndraono Gizaraʼeli. Me no teʼefaʼö ira, ”larabu niha Miserai” ba lahalö gama-gama nifazökhi moroi ba ganaʼa hegöi firö, simanö göi mbaru. (2 Mo. 12:​35, 36, nis.) Aefa daʼö, me lagohi ndraono Gizaraʼeli ira saradadu Waraʼo ba teʼuʼu ira ba zinga Nasi Soyo, ifabali nasi andrö Yehowa. Ba sagötö feʼasora ba danö si mate, ihenaigö zoguna khöra Yehowa yaʼia daʼö mana. Na simanö, hadia mbörö wa fatahi-tahi ira? Tenga börö waʼambö soguna khöra, hizaʼi lö khöra faʼahono dödö ba zi no so, ba lö laʼandrö saohagölö ba zi no tebeʼe khöra.

6. Hewisa enaʼö so khöda wangandrö saohagölö?

⁶ Hewisa enaʼö so khöda wangandrö saohagölö? Si oföna, databeʼe ginötöda ero maʼökhö ba woʼangerönusi ngawalö zi sökhi si no tatema. Tola tasura dombua mazui tölu ngawalö niʼandröda saohagölö ba zi maʼökhö daʼö. (Nge. 3:​22, 23) Si dua, taforomaʼö wangandrö saohagölö. Moguna taʼandrö saohagölö ba niha si no manolo yaʼita, ba mendrua manö taʼandrö saohagölö khö Yehowa ero maʼökhö. (Si. 75:1) Si tölu, tafili nawöda somasi mangandrö saohagölö. Na asese mangandrö saohagölö zi fahuwu khöda, tola tedönisi dödöda ba wangoromaʼö amuata simane daʼö. Hizaʼi, na lö laʼila mangandrö saohagölö ira si fahuwu khöda, tola manö göi taʼoʼö zimane daʼö. (5 Mo. 1:​26-28; 2 Ti. 3:​1, 2, 5) Na lö tebulö taforomaʼö wangandrö saohagölö, abölö aoha khöda worasoi faʼahono dödö ba zi no so.

7. Hewisa Aci wamahaʼönia yaʼia ba worasoi faʼahono dödö ba zi no so?

⁷ Nehegö zi no irai alua khö dalifusöda ira alawe sotöi Aci si toröi ba Indonesia. Imane, ”Sagötö COVID-19, ibörögö ufaedo-faedogö zalua khögu ba khö ndra talifusöda sato. Lö urasoi waʼahono dödö ba waʼaurigu.” (Gal. 6:4) Hewisa lalania ba wombulöʼö fangera-ngerania? Imane Aci, ”Ibörögö uʼangeragö hadia manö howu-howu nitemagu ero maʼökhö. Uʼangerönusi göi ngawalö zi sökhi si no urasoi me no farahu ndraʼo ba organisasi Yehowa. Börö daʼö, uʼandrö saohagölö khö Yehowa ba wangandrö. Buania, sindruhu-ndruhu urasoi waʼahono dödö ba waʼaurigu.” Na lö khöu faʼahono dödö ba zi no so, hadia tola öʼoʼö duma-duma dalifusöda andre?

OSAMBUAʼÖ DÖDÖU BA GOHITÖ DÖDÖ YEHOWA BA BÖI TEBULÖ SO KHÖU WANGIDE-NGIDEʼÖ

8. Hadia zalua khö Mbarukhi?

⁸ Sekretaris Yeremia sotöi Barukhi, no irai lö khönia faʼahono dödö ba waʼauri. Tebeʼe khönia halöwö sabua yaʼia daʼö ba wanolo Yeremia ba wamaʼema turia fanguhuku ba ndraono Gizaraʼeli si lö mangila mangandrö saohagölö. Hizaʼi samuza maʼökhö, abölö iʼera-era zomasi-masi dödönia Barukhi moroi ba gohitö dödö Yehowa. Andrö wa ifatenge Yeremia Lowalangi Yehowa ba wamangelama Barukhi, imane, ”Lö aetu öʼalui zohare ndraʼugö. Böi alui saʼae zimane daʼö.” (Yer. 45:​3-5) Mazui tola tawaʼö, imane Yehowa, ”Honogö dödöu ba zi so khöu iadaʼa.” Ifalua mene-mene daʼö Barukhi ba lö aetu ifahowuʼö ia Yehowa.

9. Hadia zi tobali famahaʼö khöda moroi ba 1 Korindro 4:​6, 7? (Faigi göi gambara.)

⁹ Itaria so nono mbanua Yehowa sangumaʼö tödönia wa sinangea na labeʼe khönia halöwö daʼö börö me onekhe ia, no iforege wohalöwö mazui börö me no ara ia ba wangai halöwö khö Yehowa. Hizaʼi ba niha böʼö tebeʼe halöwö somasi ia andrö. Na simanö, hadia zanolo yaʼia enaʼö lö abao dödönia? Tola iʼangerönusi wehede Waulo andre nisurania ba 1 Korindro 4:​6, 7. (Baso.) Ifatunö khöda ba ayati daʼö wa moroi khö Yehowa fefu halöwö hegöi faʼatua-tua niʼokhögöda. Ibeʼe khöda daʼö, tenga börö me tohude ita moroi ba niha böʼö, hizaʼi börö waʼasökhi dödö sebua moroi khönia.—Rom. 12:​3, 6; Ef. 2:​8, 9.

10. Hewisa lala enaʼö taʼokhögö wangide-ngideʼö?

¹⁰ Tola tafahaʼö ita sanandrösa ba wangide-ngideʼö na taʼangerönusi duma-duma Yesu. Duma-dumania, isasai gahe ndra nifahaʼönia hewaʼae na ono Lowalangi ia ba no tebeʼe khönia kuaso sebua. Imane sinenge sotöi Yohane, ”Börö me aboto ba dödö Yesu wa [1] no ibeʼe fefu hadia ia ba dangania Ama, [2] mendrua manö me khö Lowalangi iʼotarai, ba [3] mangawuli zui ia khö Lowalangi, . . . ibörögö isasai gahe ndra nifahaʼönia.” (Yoh. 13:​3-5) Tola manö iwaʼö tödönia Yesu wa ira sinengenia menaʼö zinangea manasai ahenia. Hizaʼi sagötö feʼasonia ba gulidanö, lö irai so ba dödö Yesu wa no sinangea ohahau dödönia ba waʼauri ba kayo ia. (Luk. 9:58) Sindruhu-ndruhu wa mangide-ngideʼö ba ahono dödö Yesu ba zi no iʼokhögö. No ibeʼe ia duma-duma soʼahonoa khöda.—Yoh. 13:15.

11. Hadia zanolo Dennis enaʼö ahono dödönia ba zi no so?

¹¹ Samösa dalifusöda moroi ba Belanda sotöi Dennis, iforege ba woloʼö duma-duma Yesu sanandrösa ba wangide-ngideʼö hewaʼae na abua khönia wamalua daʼö. Imane, ”Itaria abao dödögu na uʼila labeʼe halöwö somasido ba niha böʼö, börö me uwaʼö tödögu wa yaʼodo menaʼö zanema halöwö daʼö. Ba wolawa fangera-ngera daʼö, ufalua riset sanandrösa ba wangide-ngideʼö. Ba aplikasi JW Library^®, utandrai mato hauga ngawua ayati ba ubeʼe ia ba kategori ”fangide-ngideʼö”. Tobali, ba ginötö omasido ubaso ayati daʼö zui, alio usöndra. U-download ösa huhuo sanandrösa ba wangide-ngideʼö ba asese ufondrondrongo.a Ufahaʼö ndraʼo wa gofu hadia halöwö nifaluada, tafalua ia ba wamolakhömi Yehowa tenga enaʼö lasuno ita. Börö waʼasökhi dödö Yehowa wa ibeʼe khöda halöwö ba organisasinia, ba börö ia wa tola mofozu fefu daʼö.” Na ibörögö örasoi walöʼahono dödö ba halöwö si no tebeʼe khöu, forege enaʼö itugu öforomaʼö wangide-ngideʼö. Na öfalua daʼö, itugu aro wahuwusamö khö Yehowa ba örasoi waʼahono dödö ba zi no so.—Yak. 4:​6, 8.

ANGERÖNUSI MBUʼUSA LI YEHOWA

12. Hadia manö dötönafö si tola manolo yaʼita enaʼö ahono dödöda ba zi no so? (Yesaya 65:​21-25)

¹² Tola tarasoi waʼahono dödö ba zi no so na taʼangerönusi dötönaföda ba zi so miföna. Ifatunö khöda buku Yesaya wa iʼila Yehowa hewisa waʼatosasa salua khöda iadaʼa. No göi ifabuʼu wa iheta dania ngawalö gabula dödö nitaögöda. (Baso Yesaya 65:​21-25.) Ba daʼö dania so nomoda hegöi halöwö si möi fangomuso dödöda, ba taʼa gö si sökhi sami sibai. Lö saʼae aombö dödöda wa so zi lö sökhi salua khöda mazui ba ndraonoda. (Yes. 32:​17, 18; Hez. 34:25) Sökhi sibai zalua khöda ba zi so miföna, ba hasambalö alua daʼö!

13. Hawaʼara moguna taʼangerönusi dötönaföda? Beʼe duma-duma.

¹³ Moguna tahaogö taʼangerönusi dötönaföda, mendrua manö iadaʼa. Hadia mbörö? Börö me no so ita ba ”ngaluo safuria” safönu abula dödö ”sabua fanaögö”. (2 Ti. 3:1) Hewaʼae simanö, ero maʼökhö ibeʼe khöda wanuturu lala Yehowa hegöi faʼabölö sanolo yaʼita enaʼö anau gölöda. (Si. 145:14) Baero daʼö, tobali göi fanoloda dötönafö andrö ba wanaögö abula dödö salua khöda. Duma-dumania, börö me tosasa ita, te tafatö-fatö dölada ba wangalui soguna khöda. Hadia simane-mane daʼö manö waʼaurida? Tenga. No ifabuʼu Yehowa wa hasambalö fahöna wameʼenia soguna khöda ba Waradaiso. (Si. 9:18; 72:​12-14) Mazui duma-duma tanö böʼö, tefakao waʼaurimö börö me alawa ndröfimö, fawuka gera-eramö mazui göna ndraʼugö fökhö sabölö-bölö. Hadia sagötö faʼara örasoi daʼö? Löʼö. Ba gulidanö si bohou dania, lö hadöi saʼae fökhö hegöi faʼamate. (Fam. 21:​3, 4) Tötönafö andrö zanolo yaʼita enaʼö lö fatahi mazui mofönu ita börö zalua ba waʼaurida. Tola tarasoi waʼahono dödö hewaʼae na göna ita abula dödö, duma-dumania faʼamate niha niʼomasiʼöda mazui na lafalua khöda zi lö atulö. Hadia mbörö? Börö me aboto ba dödöda wa ”lö abölö-bölö wamakaoda andrö ba lö arara”. Ba zi lö ara tö, aheta fefu wamakao nitaögöda sagötö faʼara.—2 Ko. 4:​17, 18.

14. Hewisa enaʼö lö taya ba duduma höröda dötönafö andrö?

¹⁴ Tötönafö zi tola manolo yaʼita irege tarasoi waʼahono dödö ba zi no so. Hewisa enaʼö lö taya ba duduma höröda dötönafö andrö? Angeragö daʼa: Na omasi zi samösa niha oroma nifaiginia ba zaröu, te moguna ifake zörömi hörö. Simane daʼö göi, so zinangea tafalua enaʼö lö taya ba duduma höröda dötönafö andrö yaʼia daʼö Faradaiso. Duma-dumania, na aombö dödöda sanandrösa ba gefe, tola takhalaigö hewisa waʼaurida dania na lö hadöi saʼae faʼatosasa ba wangalui soguna irege lö moguna khöda gefe. Mazui, na afatö dödöda börö me lö tebeʼe khöda halöwö somasi ita, tola takhalaigö wa lö eluaha dania waʼafatö dödöda andrö na tafaomagö ia ba waʼauri soʼahonoa niʼokhögöda dania. (1 Ti. 6:19) Sindruhu sa, wa abua khöda wokhalaigö faʼaurida ba zi so miföna na oya sibai niʼaombösida tödö. Hizaʼi, na asese takhalaigö waʼauri nifabuʼu Yehowa ba zi so miföna, itugu aoha khöda wanaögö abula dödö salua iadaʼa.

15. Hadia wamahaʼönia khöu zalua khö Christa?

¹⁵ Nehegö hewisa wa tola tobali fanolo dötönafö andrö khö Christa, foʼomo Dennis nitutunö moroi yawa. Imane Christa, ”Göna ndraʼo fökhö sabölö-bölö. Ufake gurusi roda ba asese sibai ufadölö ndraʼo ba naha wemörö. Ero maʼökhö mangarö-ngarö ndraʼo. Barö-barö daʼa, ifatunö khögu doto wa tenga itugu alö wökhögu. Hizaʼi, iʼanemaiʼö imane tödögu, ’Lö aboto ba dödönia mbuʼusa li Yehowa ba zi so miföna’. Lö uböhöli woʼangerönusi tötönafögu, ba daʼö zameʼe khögu faʼahono dödö. Sindruhu sa wa uforege wanaögö fökhögu iadaʼa, hizaʼi omuso-muso dödögu dania ba gulidanö si bohou!”

”LÖ AMBÖ HADIA IA BA NIHA SANGATAʼUFI YAʼIA”

16. Hadia mbörö wa iwaʼö Razo Dawido, ’Lö ambö hadia ia ba niha sangataʼufi Yehowa’?

¹⁶ Hewaʼae tarasoi waʼahono dödö börö me no tobali ita ono mbanua Yehowa, tenga daʼö geluahania wa lö göna ita abula dödö. Nehegö ngawalö gabula dödö salua khö Razo Dawido. Si löʼö-löʼönia, no irai göna ia abula dödö yaʼia me mate ndraononia si datölu. No irai göi laböbögö khönia zi lö duhu, laröi ia ba tobali ia niha nigohi-gohi sagötö zi hauga fakhe. Hewaʼae simanö, imane Dawido, ”Lö ambö hadia ia ba niha sangataʼufi [Yehowa].” (Si. 34:​9, 10) Hadia mbörö wa iwaʼö zimanö? Hewaʼae na oya ngawalö wamakao salua khönia, aboto ba dödönia wa lö tebulö ibönökhi zoguna khönia Yehowa. (Si. 145:16) Simane Dawido, faduhu göi dödöda wa itolo ita Yehowa enaʼö anau gölöda. Börö daʼö, tola tarasoi waʼahono dödö ba zi no so gofu hadia gabula dödö salua khöda.

17. Hana wa omasiʼö öfahaʼö ndraʼugö hewisa lala enaʼö ahono dödöu ba zi no so?

¹⁷ Omasi Yehowa na örasoi waʼahono dödö ba waʼaurimö. (Si. 131:​1, 2) Börö daʼö, böi böhöli wamahaʼö yaʼugö hewisa lala enaʼö ahono dödöu ba zi no so. Na öforege ba wangandrö saohagölö, öʼosambuaʼö dödöu ba gohitö dödö Yehowa, öʼokhögö wangide-ngideʼö, ba öʼangerönusi dötönafö niʼokhögömö, tatu tola öwaʼö wehede daʼa, ”Ahono dödögu.”—Si. 16:​5, 6.