ʼIfadöhö Yehowa Niha si No Arasa Tödö’

1. Hewisa dödö Yehowa ba nono mbanuania?

IʼAMEʼEGÖ TÖDÖ Yehowa fefu zalua ba nono mbanuania. Iʼila na omuso dödöda hegöi na abu dödöda. (Si. 37:18) Na taforege wamosumange yaʼia ba ginötö göna ita abula dödö, lö irai iʼolifugö daʼö Yehowa. Omasi sibai ia ituhini ba ibeʼe khöda wondrara dödö.

2. Hadia nifalua Yehowa ba ginötö arasa dödöda, ba hewisa enaʼö tatema mbuania?

² Ifatunö khöda ba Zinunö 147:3 wa ’ibalugö Yehowa zokho’ niha sarasa tödö. Ihaogö-haogö wondrorogö yaʼita Yehowa ba ginötö arasa dödöda. Hizaʼi, so zinangea tafalua enaʼö tatema mbuania. Nehegö duma-duma daʼa. Samösa doto sonekhe, tatu oya zi tola ifalua ba wamadöhö niha sesokho. Hizaʼi, enaʼö döhö niha daʼö, moguna ihaogö woloʼö fanuturu lala nibeʼe doto. Börö daʼö, ba artikel daʼa dania tatutunö hadia manö wehede Yehowa si so ba Zura Niʼamoniʼö nibeʼenia ba niha si no arasa tödö. Tatutunö göi hadia manö zinangea tafalua ba woloʼö fanuturu lala safönu faʼomasi nibeʼenia.

IFADUHUʼÖ KHÖDA YEHOWA WA EBUA SIBAI MBÖLIDA

3. Hana wa so ösa niha sorasoi wa lö eluaha waʼaurira?

³ Ato sibai niha ba gulidanö iadaʼa si lö mangokhögö faʼomasi. Lua-luania, ato zorasoi wa lö eluaha waʼaurira. Imane talifusöda ira alawe sotöi Helen,a ”Teʼebuaʼö ndraʼo ba nösi nomo si lö faʼomasi. Lö sökhi gamuata Bapagu, ba ero maʼökhö iwaʼö wa lö moguna ndraʼaga.” Hadia no irai alua khöu zimane salua khö dalifusöda Helen? Te so niha samalua khöu si lö sökhi, asese itahi-tahigö ndraʼugö mazui so nifaluania irege örasoi wa lö eluaha waʼaurimö. Te daʼö mbörö wa lö faduhu dödöu wa sindruhu-ndruhu so niha sangomasiʼö yaʼugö.

4. Ba Zinunö 34:​18, hadia nifaduhuʼö Yehowa khöda?

⁴ Hewaʼae no irai lafalua khöu zi lö sökhi, yafaduhu dödöu wa iʼomasiʼö ba iʼameʼegö tödö ndraʼugö Yehowa. ”Ahatö [ia] ba niha sarasa tödö.” (Baso Zinunö 34:18.) Na örasoi ’waʼide-ide dödö’, böi olifuʼö wa si sökhi nifaigi-faigi Yehowa ba waʼaurimö, ba yaʼia samösa zondröni yaʼugö khönia. (Yoh. 6:44) No ifaʼanö ia ba wanolo yaʼugö börö me sindruhu-ndruhu iʼomasiʼö ndraʼugö.

5. Hadia wamahaʼö nihalöda moroi ba nifalua Yesu khö ndra niha niʼaohasi ba dödö?

⁵ Tola taʼila hewisa dödö Yehowa na tanehegö nifalua Yesu me so ia ba gulidanö. Iʼameʼegö tödö ba iʼomasiʼö niha niʼaohasi ba dödö. (Mat. 9:​9-12) Samuza maʼökhö, so samösa ndra alawe somasi tefadöhö moroi ba wökhönia, irege ibabaya gahe mbaru Yesu. Me manizi-nizi ndra alawe daʼö börö waʼataʼu, irara dödönia Yesu ba isuno ia börö wamatinia. (Mrk. 5:​25-34) Moʼahonoa woloʼö Yesu amuata Namania. (Yoh. 14:9) Tobali, yafaduhu dödöu wa iʼameʼegö tödö ndraʼugö Yehowa ba inehegö zi sökhi si so ba waʼaurimö, farahu ba daʼö wamati hegöi faʼomasimö khönia.

6. Hewisa wolawada fangera-ngera wa lö eluaha waʼaurida?

⁶ Hewisa na lö aetu-aetu so ba dödöu wa lö eluaha waʼaurimö mazui itaria ifuli tumbu ia ba dödöu? Baso ayati sangaʼaroʼö faʼafaduhu dödömö wa ebua mbölimö föna Yehowa, ba angerönusi daʼö.b (Si. 94:19) Böi huku ndraʼugö samösa na so gohitö dödöu si tebai ökhamö mazui na örasoi waʼide-ide dödö börö me tebai öfalua zimane faʼoya nifalua niha böʼö. Iʼila Yehowa zi tola öfalua, ba lö iʼandrö zi töra moroi ba daʼö. (Si. 103:​13, 14) Na no irai lafakao ndraʼugö, böi tahigö ndraʼugö samösa. Böi waʼö tödöu wa no sinangea lafalua khöu daʼö. Törö tödöu, si fasala ba wamaigi Yehowa tenga niha nifakao, hizaʼi niha samalua daʼö. (1 Fe. 3:12) Imane Sandra, si no irai muböbözi me ide-ide, ”Asese uʼandrö wanolo khö Yehowa enaʼö tola uʼokhögö lala wangera-ngera satulö sanandrösa khögu, simane lala wamaiginia yaʼo.”

7. Hadia mbörö wa moguna khöda ba wamosumange Yehowa fefu zi no irai alua ba waʼaurida?

⁷ Tola iʼogunaʼö ndraʼugö Yehowa ba wanolo niha böʼö. No ibeʼe khöu döi sebua tobali si falulu fohalöwö khönia ba wanuriaigö. (1 Ko. 3:9) Salua ba waʼaurimö tola daʼö zanolo yaʼugö enaʼö abölö ötöfaigö ba dödöu hewisa dödö niha si göna abula dödö irege tola sindruhu-ndruhu öbeʼe khöra wanolo. Helen, nitutunö moroi yawa, ba gafuriata itema wanolo, ba tola itolo niha böʼö iadaʼa. Imane, ”Me mböröta, uwaʼö tödögu wa lö moguna waʼaurigu. Hizaʼi, itolo ndraʼo Yehowa enaʼö urasoi wa laʼomasiʼö ba moguna ndraʼodo andre.” Iadaʼa, irasoi waʼomuso dödö Helen wangai halöwö tobali perintis biasa.

OMASI YEHOWA NA TATEMAʼÖ WANGEFA HORÖ NIBEʼENIA

8. Hadia nifaʼema Yehowa ba Yesaya 1:18?

⁸ So ösa nono mbanua Yehowa, itahi-tahigö manö ira tödöra börö horö nifaluara ba zilalö, te fatua mazui me no aefa tebayagö ira idanö. Hizaʼi, böi olifu ita wa no ihenaigö höli Yehowa börö me iʼomasiʼö ita. Omasi ia na tatemaʼö mbuala daʼö. Ifaduhuʼö khöda Yehowa wa sindruhu-ndruhu iʼefaʼö zalada na no ’taʼatulöʼö ita’ khönia.c (Baso Yesaya 1:18.) Lö saʼae itörö-törö tödönia horö si no tafalua. Baero daʼö, lö göi olifu ia gamuatada si sökhi. Sindruhu-ndruhu wa no sebua faʼomasi Yehowa.—Si. 103:​9, 12; Heb. 6:10.

9. Hadia mbörö wa lö moguna tatörö-törö manö tödöda zala si no tafalua ba zilalö?

⁹ Na itahi-tahigö manö ndraʼugö tödömö, forege wangosambuaʼö tödömö ba waʼaurimö iadaʼa hegöi ba zi so miföna, tenga faʼaurimö ba zilalö. Nehegö duma-duma zinenge sotöi Faulo. Maniasa ia börö me no ifakao ndra niha Keriso me abad siföföna, hizaʼi aboto ba dödönia wa no iʼefaʼö zalania Yehowa. (1 Ti. 1:​12-15) Tatu manö lö saʼae iʼangera-ngeragö manö zala si no ifalua ba zilalö, fagölö simane me lö saʼae iʼangera-ngeragö manö waʼamofozu nikhamönia me tobali ia Farizaiʼo. (Fil. 3:​4-8, 13-15) Hizaʼi, ifalua halöwönia Faulo si fao faʼowölö-ölö ba iʼosambuaʼö dödönia ba zi so miföna. Simane Faulo, tebai öbulöʼö hadia zi no alua ba zilalö. Hizaʼi, tola öfolakhömi Yehowa iadaʼa ba öʼosambuaʼö dödömö ba dötönafö si sökhi si no ifabuʼu khöu ba zi so miföna.

10. Hadia zinangea tafalua na no irai taʼafökhöiʼö dödö niha böʼö?

¹⁰ Hewisa na itahi-tahigö manö ndraʼugö tödöu börö me no irai öʼafökhöiʼö dödö niha böʼö? Moguna soroi ba dödö öʼandrö khönia waʼebolo dödö ba forege enaʼö ifuli atulö ami. (2 Ko. 7:11) Andrö khö Yehowa enaʼö itolo niha si no öʼafökhöiʼö tödö andrö. Tola itolo ndraʼugö Yehowa hegöi niha daʼö enaʼö anau gölömi ba ifuli mirasoi waʼahono dödö.

11. Hadia wamahaʼö nihalöda moroi ba duma-duma Yona samaʼeleʼö? (Faigi göi gambara.)

¹¹ Fahaʼö ndraʼugö moroi ba zala si no öfalua, ba falua hadia niʼandrö Yehowa khöu. Nehegö duma-duma Yona samaʼeleʼö. Me iʼandrö khönia Lowalangi weʼamöi ba Niniwe, moloi ia isawa mbanua böʼö. Börö daʼö, ibeʼe khönia wotu Yehowa, ba ifahaʼö ia Yona moroi ba zala nifaluania. (Yon. 1:​1-4, 15-17; 2:​7-10) Lö iheta Yona tobali samaʼeleʼö khönia. Me ifuli ibeʼe ginötö khö Yona weʼamöi ba Niniwe, iʼanemaiʼö ifalua daʼö Yona. Hewaʼae itahi-tahigö ia tödönia, hizaʼi lö ibaliʼö daʼö taha-tahania ba wanemaʼö halöwö nibeʼe Yehowa khönia.—Yon. 3:​1-3.

IRARA DÖDÖDA YEHOWA FAOMA EHEHANIA NIʼAMONIʼÖ

12. Hewisa wameʼe Yehowa khöda fondrara dödö na göna ita abula dödö sebua? (Filifi 4:​6, 7)

¹² Ba ginötö göna ita abula dödö sebua, irara dödöda Yehowa faoma ehehania niʼamoniʼö. Nehegö duma-duma salua khö Ron hegöi Carol. Afatö sibai dödöra me ibunu samösa ia onora matua. Lamane, ”No oya gabula dödö nitaögöma, hizaʼi abölö abua nasa daʼa. Asese lö maʼila mörö, andrö wa mangandrö ndraʼaga khö Yehowa. Sindruhu-ndruhu wa marasoi waʼahono dödö simane nisurania ba Wilifi 4:​6, 7.” (Baso.) Na arasa dödöu börö me alua gabula dödö sebua, faehagö nösi dödöu khö Yehowa ba wangandrö. Hasambalö ifondrondrongo wangandrömö Yehowa, hewaʼae na asese öʼohe daʼö ba wangandrö ba anau sibai wangandrömö. (Si. 86:3; 88:1) Böi böhöli wangandrö eheha niʼamoniʼö moroi khö Yehowa. Lö iʼaohasi ba dödö wangandrömö andrö.—Luk. 11:​9-13.

13. Hewisa geheha niʼamoniʼö wanolonia yaʼita enaʼö lö faröi ita wamosumange Yehowa? (Efeso 3:16)

¹³ Hadia alua khöu iadaʼa gabula dödö sebua ba öwaʼö tödöu wa lö faʼabölömö saʼae? Tola iʼabölöʼö ndraʼugö eheha niʼamoniʼö enaʼö lö faröi ndraʼugö ba wamosumange Yehowa. (Baso Efeso 3:16.) Nehegö duma-duma dalifusöda ira alawe sotöi Flora. Yaʼia hegöi foʼomonia mangai halöwö ira tobali utusan injil. Hizaʼi, faröi woʼomonia khönia, ba fabali ira moloʼö huku. Imane Flora, ”Afökhö sibai dödögu me faröi ia khögu, ba ha daʼö manö zi so ba wangera-ngeragu. Uʼandrö geheha niʼamoniʼö khö Yehowa enaʼö ibeʼe khögu waʼanau gölö. Hewaʼae ba wamobörö lö sagu khögu wanaögö yaʼia, hizaʼi ibeʼe Yehowa hadia zoguna khögu enaʼö ifuli abölö ndraʼo.” Daʼö mbörö wa itugu iʼodaligö Yehowa ba faduhu dödönia wa hasambalö itolo ia Yehowa ba wanaögö fefu gabula dödö salua khönia. Imane nasa, ”Nirasoigu fagölö simane niwaʼö ba Zinunö 119:​32, ’Omasido sibai woloʼö oroisamö börö me öʼeboloʼö dödögu.’”—Si. 119:​32, nisura ba gahe zura.

14. Hewisa enaʼö mohalöwö geheha niʼamoniʼö ba waʼaurida?

¹⁴ Hadia zinangea öfalua na no aefa öʼandrö geheha niʼamoniʼö? Falua zi tola manolo yaʼugö enaʼö mohalöwö geheha niʼamoniʼö ba waʼaurimö. Duma-dumania, böi böhöli weʼamöi ba gangowuloa hegöi ba wamalua fanuriaigö. Baso Daromali Lowalangi ero maʼökhö enaʼö fakhili-khili lala wangera-ngeramö ba lala wangera-ngera Yehowa. (Fil. 4:​8, 9) Na öbaso Zura Niʼamoniʼö, nehegö hadia gabula dödö nitaögö niha nitutunö ba daʼö ba hewisa wameʼe Yehowa khöra fanolo enaʼö anau gölöra. Sandra, nitötöi moroi yawa, oya sibai gabula dödö sebua salua ba waʼaurinia. Hizaʼi, imane, ”Adöni sibai dödögu waö-waö waʼauri Yosefo. Oya gabula dödö salua khönia ba lafalua göi khönia zi lö atulö. Hizaʼi, lö itehegö daʼö fefu tobali fangawuwu wahuwusania khö Yehowa.”—1 Mo. 39:​21-23.

IʼOGUNAʼÖ NDRA TALIFUSÖDA YEHOWA BA WONDRARA TÖDÖDA

15. Haniha zi tola mameʼe khöda fondrara dödö, ba hewisa wamaluara daʼö? (Faigi göi gambara.)

¹⁵ Ba ginötö göna ita abula dödö, tola tobali ’umbu wondrara dödöda’ ndra talifusöda. (Kol. 4:11) Iʼogunaʼö ira Yehowa ba wangoromaʼö faʼomasinia khöda. Lahaogö lafondrondrongo ba ginötö tatutunö khöra nösi dödöda. Itaria, no terara sibai dödöda hewaʼae na nifaluara ha laʼagö zingada. Tola manö göi labeʼe khöda zi sambua ayati mazui fao ira khöda ba wangandrö.d (Rom. 15:4) Te so ndra talifusöda samasugi ba dödöda lala wangera-ngera Yehowa irege tarasoi waʼahono dödö. Baero daʼö, tola manö göi laʼasogö zoguna khöda, duma-dumania labeʼe göda ba ginötö fawuka gera-erada börö gabula dödö salua.

16. Hadia zinangea tafalua enaʼö tatema wanolo?

¹⁶ Laʼomasiʼö ita ira talifusöda, ba omasi göi ira latolo ita. (Amd. 17:17) Hizaʼi, tola manö lö laʼila hadia zi so ba dödöda mazui hadia zoguna khöda. (Amd. 14:10) Börö daʼö, enaʼö tatema wanolo moroi khö ndra talifusöda, moguna tafatunö khöra daʼö. Na örasoi waʼafökhö dödö, tutunö nösi dödömö khö zi fahuwu khöu saro ba wamati. Fatunö khöra hadia zi tola manolo yaʼugö. Tola göi fahuhuo ndraʼugö khö zi samösa mazui darua zatua sokubaloi nifaduhusimö tödö. So ösa ndra talifusöda ira alawe sanöndra fondrara dödö me fahuhuo ira khö dalifusöda ira alawe tanö böʼö saro ba wamati.

17. Hadia mbörö wa tola manö tafandröndröu ita khö ndra talifusöda, ba hadia zinangea tafalua?

¹⁷ Ba ginötö göna ndraʼugö abula dödö, tola manö lö omasiʼö falukha mazui fahuhuo ba niha böʼö. Hizaʼi, moguna ölawa gaoloma dödö ba wangoniagö yaʼugö. Itaria, so manö ndra talifusöda si fasala lala wangera-ngera-ngera mazui si fasala ba wehede ba ginötö fahuhuo ira khöu. (Yak. 3:2) Böi tehegö daʼö tobali famandröndröumö khöra, börö me tola iʼogunaʼö ira Yehowa ba wamarou tödömö. Imane Gavin, samösa satua sokubaloi si no irai morasoi faʼafawuka wangera-ngera, ”Asese sibai lö omasido falukha mazui fahuhuo khö ndra awö-awögu.” Hizaʼi, ilawa wangera-ngera daʼö Gavin, ba itema mbua börö me fariawö ia khö ndra talifusöda. Imane göi talifusöda ira alawe sotöi Amy, ”Börö zi lö sökhi salua khögu ba zilalö, andrö wa abua khögu wamaduhusi tödö niha böʼö. Hizaʼi, ufahaʼö ndraʼo ba wangomasiʼö hegöi ba wamaduhusi tödö ira talifusöda simane nifalua Yehowa. Uʼila wa möi fangomuso dödö Yehowa daʼa, ba omuso göi dödögu.”

MÖI FONDRARA DÖDÖDA MBUʼUSA LI YEHOWA

18. Hadia zi lö ara tö alua, ba hadia zi tola tafalua iadaʼa?

¹⁸ Ba zi lö ara tö, ifadöhö fefu zokhoda Yehowa, he sokho ba mboto hegöi ba dödö. (Fam. 21:​3, 4) Ba ginötö daʼö, ’lö saʼae irai tumbu ba dödö niha’ fefu zi möi börö wangafökhö dödö. (Yes. 65:17) Hewaʼae simanö, na göna ita abula dödö iadaʼa, hasambalö itolo ba irorogö ita Yehowa. Si fao faʼomasi, oya nihenaigönia ba wondrara tödöda hegöi ba wamahea noro dödöda. Börö daʼö, ogunaʼö fefu zi no ihenaigö andrö. Yafaduhu dödöu ’so so sa dödönia ita’.—1 Fe. 5:7.