Amuata si Sökhi Abölö Ebua Mbölinia moroi ba Berlian

So samösa zanuriaigö si lö mubayagö idanö moroi ba Armenia sotöi Haykanush. Samuza inötö isöndra paspor ahatö ba nomonia. Ba paspor andre so mato haʼuga ngawua kartu debit hegöi kefe sebua. Iʼombakhaʼö göi zi no isöndra andrö khö woʼomonia ira matua, sanuriaigö si lö mubayagö idanö nasa.

Hewaʼae tosasa ira ba gefe ba so gömöra ba niha, lahalö gangetula ba wofuli kefe nisöndrara andrö ba alamat si no tesura ba paspor. Ahöli-höli dödö zokhö paspor hegöi ösi nomonia. Itutunö Haykanush hegöi foʼomonia wa omasi ira latörö zindruhu börö me no lafahaʼö ira ba Zura Niʼamoniʼö. Aefa daʼö, laʼogunaʼö ginötö daʼö ba wahuhuosa sanandrösa khö ndra Samaduhuʼö Yehowa ba labeʼe khöra mbuku.

Omasi nösi nomo andrö wameʼe kefe khö Haykanush si tobali tandra wangandröra saohagölö, hizaʼi lö itema. Mahemolunia, möi woʼomo ndra matua sokhö paspor andrö ba nomo Haykanush. Ifaso Haykanush ba wangaʼi laeduru berlian si tobali tandra wa iʼandrö sibai saohagölö.

Simane ösi nomo andrö, ato göi niha sahöli-höli dödö börö me lö falimo Haykanush hegöi foʼomonia. Hizaʼi, hadia ahöli-höli dödö Yehowa? Hewisa dödönia me latörö zindruhu? Hadia so gunania khöra me no latörö zindruhu?

AMUATA SABÖLÖ EBUA BÖLI MOROI BA HARATO

Lö abua wanema li moroi ba zinofu-nofu andrö mege. Hadia mbörö? Laʼila ono mbanua Lowalangi wa abölö omasi Yehowa na taʼoʼö gamuatania moroi na taʼofönaiʼö wangalui berlian, anaʼa hegöi harato tanö böʼö. Faböʼö zabölö moguna ba wamaigi Yehowa moroi ba wamaigi niha böʼö. (Yesaya 55:8, 9) Abölö moguna ba dödö nono mbanua Yehowa wangodödögö foloʼö amuatania.

Tola taʼila daʼa moroi ba Zura Niʼamoniʼö sanandrösa ba waʼaboto ba dödö hegöi faʼatua-tua. Imane Gamaedola 3:13-15, ”Yaʼahowu zanöndra faʼatua-tua, awö niha sogamö faʼaboto ba dödö. Fanöndra yaʼia, ba no tohude moroi ba wanöndra firö, ba hare ba khönia, ba italuʼi ganaʼa. Si sökhi moroi ba mani-mani ia, ba fefu ngawalö mbarasi khöu, ba lö fagölö-gölö khönia.” Ba wamaigi Yehowa, ebua mböli gamuata si sökhi moroi ba harato.

Hewisa zanandrösa ba wanörö sindruhu?

Itörö zindruhu Yehowa. ”Lö mofaya” ia. (Tito 1:2) Ibeʼe gehehania khö Waulo ba wanura sura ba niha Keriso Heberaiʼo me döfi si föföna, ”Miʼangandrö salahima, noa sa faduhu dödöma, wa lö iteguga tödöma, me si sökhi manö zedöna matörö, fefu, hadia ia.”​—Heberaiʼo 13:18.

No ibeʼe khöda duma-duma si sökhi Yesu ba wanörö sindruhu. Duma-dumania, me iwaʼö khönia Ere Sebua sotöi Kayafa, ”Ubeʼe ba hölu ndraʼugö, khö Lowalangi sauri andrö, enaʼö öwaʼö khöma, na Keriso andrö ndraʼugö, Ono Lowalangi”, itörö zindruhu Yesu ba ifatunö wa yaʼia andrö Mesia. Ifatunö zindruhu hewaʼae no ifobahulu ia Sanhedrin tobali sanandrawaisi Lowalangi, ba tola manö labunu ia.​—Mataiʼo 26:63-67.

Hewisa göi ita? Duma-dumania, so zangoʼou yaʼita falimo mazui tafuyuʼö zindruhu enaʼö tasöndra hare sebua. Hadia taʼoʼö niwaʼönia andrö mazui tatörö zindruhu?

HANA WA ABUA WAMALUA YAʼIA

Abua khöda wanörö sindruhu ba ngaluo safuria andre börö me ato niha ”ha tana khöra laʼalui, somasi anaʼa ira”. (II Timoteo 3:2) Na tosasa niha ba gefe mazui abua wangalui halöwö, ato zanagö, falimo, mazui lafalua gamuata wa lö manörö sindruhu. No toʼölö wangera-ngera simane daʼa. Ato zangumaʼö wa tola manö isöndra hare sebua na lö latörö zindruhu. So ösa niha Keriso zangaʼi angetula si lö sökhi ba ”sangalui anaʼa si lö atulö”. Lua-luania, obou döira ba mbanua niha Keriso.​—I Timoteo 3:8; Tito 1:7.

Ato niha Keriso zoloʼö Yesu. Laʼila wa abölö moguna na muʼokhögö gamuata somasi Lowalangi moroi na mugohi waʼakayo mazui hare, gofu hadia ia. Daʼö mbörö wa lö manali ndraono niha Keriso si bohou ebua ha enaʼö lasöndra fote sebua. (Gamaedola 20:23) Tatu manö, lö ero-ero tatema zulö na tatörö zindruhu simane nifalua Haykanush. Hizaʼi, omasi Lowalangi na tatörö zindruhu enaʼö so khöda dödö side-ide sohau-hau, sabölö ebua böli moroi ba danö böʼö.

Oroma daʼa moroi ba zalua khö Gagik. Imane, ”Fatua lö tobali ndraʼo niha Keriso, mohalöwödo ba perusahaan sebua. Lö omasi ibuʼa pajak sokhö perusahaan daʼö. Ha maʼifu hare perusahaan niʼombakhaʼönia. Börö me direktur ndraʼodo, lö tola löʼö ’falulu fohalöwö’ ndraʼo ba zotema pajak, ubeʼe khöra zölö-sölö. Lua-luania, lafotöi ndraʼo niha si lö manörö sindruhu. Me ufahaʼö ndraʼo ba zindruhu, ubato wamalua daʼö saʼae hewaʼae ebua gazigu labeʼe. Ba gafuriatania, ubokai usahagu samösa. Ufasuraʼö döi perusahaan nifasindrogu ba ubuʼa fefu pajak.”​—II Korindro 8:21.

Imane Gagik, ”Tenga mai alö zinöndragu, lua-luania abua khögu wangalui soguna ba nomo. Hizaʼi, usöndra waʼohahau dödö iadaʼa. So khögu dödö side-ide sohau-hau föna Yehowa. Tobali ndraʼo göi duma-duma si sökhi ba ndraonogu ono matua si darua ba tebeʼe khögu halöwö si sökhi ba gangowuloa. Laʼila göi ndraʼo wa utörö zindruhu ira sotema pajak hegöi ira awögu wohalöwö.”

ITOLO ITA YEHOWA

Iʼomasiʼö Yehowa niha samosumange yaʼia, soloʼö amuatania si sökhi simane fanörö sindruhu. (Tito 2:10) Na tafalua daʼa, no ifabuʼu Yehowa wa itolo ita. Imane Razo Dawido, ”Me iraono ndraʼo föna ba me satua ndraʼo maʼökhö, ba lö urai uʼila, numana zatulö tödö, ba lö urai uʼila mangandrö gö maʼuwunia.”​—Zinunö 37:25.

Oroma daʼa ba zalua khö Ruti. Lö faröi ia khö ninania matuania si no atua sotöi Naʼemi. Findra Ruti ba mbanua Gizaraʼeli ba ba daʼö ifosumange Lowalangi sindruhu. (Ruti 1:16, 17) Itörö zindruhu ba wangowuloi si toröi mbua nowi simane niwaʼö ba Goroisa Lowalangi ba niha si numana. Hulö simane salua khö Dawido ba gafuriata, lö irai iröi Ruti hegöi Naʼemi Yehowa. (Ruti 2:2-18) Ibönökhi zoguna khöra ba ifili Ruti enaʼö moroi ba ngaʼötönia tumbu Razo Dawido hegöi Mesia si no tefabuʼu!​—Ruti 4:13-17; Mataiʼo 1:5, 16.

Tola manö abua ba nono mbanua Yehowa wangalui kefe ba wombönökhi soguna khöra. Hizaʼi lö laʼalui lala saoha, latörö zindruhu, laʼodödögö wohalöwö ba owölö-ölö ira. Me no lafalua daʼa, laforomaʼö wa abölö ebua mböli gamuata Lowalangi simane fanörö sindruhu moroi ba harato.​—Gamaedola 12:24; Efeso 4:28.

Simane Ruti, mamati niha Keriso ba zi sagörö ulidanö wa itolo ira Yehowa. Faduhu dödöra ba Zameʼe buʼusa li, ”Löʼö manö faröido khöu, ba löʼö manö uʼositengagö ndraʼugö.” (Heberaiʼo 13:5) No haʼuga kali iforomaʼö Yehowa wa tola ba omasi ia wanolo niha sanörö sindruhu sagötö faʼara. Ifalua zi no ifabuʼu ba wombönökhi soguna ba nono mbanuania.​—Mataiʼo 6:33.

Tola manö ebua mböli berlian hegöi harato tanö böʼö ba dödö niha. Hizaʼi, faduhu dödöda wa ebua mböli wanörö sindruhu hegöi amuata si sökhi ba wamaigi Namada ba zorugo moroi ba harato tanö böʼö!