Foromaʼö Wamatimö ba Nifabuʼu Yehowa

1. Hewisa zinangeania dödöda ba wamatida?

LÖ DOZI niha mangokhögö famati. (II Tesalonika 3:2) Hizaʼi, ibeʼe wamati Yehowa ba niha samosumange yaʼia. (Roma 12:3; Galatia 5:22) Tatu taʼandrö sibai saohagölö khö Yehowa me no ibeʼe khöda wamati!

2, 3. (a) Hadia gunania na taʼokhögö wamati? (b) Hadia manö wanofu-nofu nitutunöda?

² Ibeʼe Nono omasiʼönia Yehowa enaʼö dozi niha sangoromaʼö famati khö Yesu tola teʼefaʼö horönia. Daʼa zameʼe fahuwu zi samösa niha khö Yehowa hegöi enaʼö lasöndra waʼauri si lö aetu. (Yohane 6:44, 65; Roma 6:23) Hawaʼebua waʼasökhi dödö Yehowa khöda! Hewaʼae niha samalua horö ita ba sinangea mate, hizaʼi iʼila Yehowa wa tola tafalua ngawalö zi sökhi. (Zinunö 103:10) Itolo ita enaʼö tafahaʼö ita ba duria somuso dödö sanandrösa khö Yesu hegöi hölinia. Na ibörögö taʼokhögö wamati khö Yesu ba taʼoʼö ia, tola taʼokhögö dötö nafö faʼauri si lö aetu!—Baso I Yohane 4:9, 10.

³ Hadia nasa zi tola tafahaʼö ita sanandrösa ba wamati? Na ha zi no ifalua Lowalangi khöda niʼilada hegöi hadia nifaluania ba zi so föna, hadia daʼö geluahania no mamati ita? Datafaigi hadia nasa zi lö tola löʼö tafalua.

”FAMOMAHA FAMATI BAKHA BA DÖDÖ”

4. Na taʼokhögö wamati, hadia lua-luania khöda?

⁴ Ba ginötö taʼokhögö wamati khö Yehowa hegöi khö Yesu, tenga ha si no lafalua mazui hadia zi lö aratö lafalua khöda niʼilada. Omasi sibai göi ita wamalua ba waʼaurida hadia zi no lafahaʼö khöda. Tefarou ita ba wanolo niha böʼö enaʼö aboto ba dödöra sanandrösa khöra. Imane sinenge Faulo, ”Na itehe sa beweu Soʼaya Yesu ba na faduhu dödöu, no isusugi ia Lowalangi moroi ba ngai zi mate, ba niʼorifi ndraʼugö. Ba dödöda sa so wamati, ba wogamö faʼatulö dödö, ba beweda zanehe, ba wogamö fangorifi.”—Roma 10:9, 10; II Korindro 4:13.

5. Hadia mbörö wa moguna sibai wamati, ba hadia zinangea tafalua enaʼö taʼokhögö wamati saro? Beʼe duma-duma.

⁵ Ba wangokhögö faʼauri si lö aetu ba gulidanö si bohou khö Lowalangi, moguna taʼokhögö wamati ba tarorogö enaʼö lö aetu aro wamatida. Famati andrö hulö simane zinanö. Moguna lö mamalö-malö tawuwui ia enaʼö sökhi waʼatedounia ba tola manöi zinanö andrö. Na ambö tabeʼe nidanö, tola aleu zinanö andrö ba mate. Simanö göi, moguna taforege enaʼö ’sökhi’ waʼatedou wamatida ba lö aetu ”manöi” ia.—Tito 2:2; II Tesalonika 1:3; Luka 22:32; Heberaiʼo 3:12.

ELUAHA WAMATI MOLOʼÖ ZURA NIʼAMONIʼÖ

6. Hadia dombua lala nitutunö ba Heberaiʼo 11:1 sanandrösa ba wamati?

⁶ Ba Heberaiʼo 11:1, itutunö Zura Niʼamoniʼö hadia geluaha wamati. (Baso.) (1) Famati andrö ”faʼaro dödö ba nidöna-döna”. Nifabuʼu Lowalangi sanandrösa ba zi so föna, daʼö sa nidöna-dönada. Duma-dumania, faduhu dödöda wa lö aratö tehori waʼalösökhi, ba so gulidanö si bohou. (2) Famati andrö ”faʼafaduhu dödö” mazui dandra sameʼe faduhu dödöda moroi ”ba ngawalö, hadia ia, si lö oroma”. Aboto ba dödöda wa sindruhu-ndruhu so Lowalangi Yehowa, Yesu Keriso, ira malaʼika hegöi mbanua Lowalangi ba zorugo hewaʼae tebai taʼila höröda daʼö. (Heberaiʼo 11:3) Hewisa tola taforomaʼö wa sindruhu-ndruhu taʼokhogö wamati ba nifabuʼu Lowalangi hegöi ba ngawalö si tebai taʼila höröda? Tola taforomaʼö daʼö ba lala waʼaurida, fehededa hegöi ba nifaluada.

7. Hewisa duma-duma Noakhi möi fanolo khöda enaʼö aboto ba dödöda hadia geluahania mangokhögö famati? (Faigi gambara ba wamobörö wamahaʼö.)

⁷ Hadia wamahaʼö si tola tafahaʼö ita moroi khö Noakhi sanandrösa ba wamati? Itutunö Faulo sanandrösa khö Noakhi, ”ilau nowo andrö Noakhi, ba wangorifi si sambua omo yaʼira, me no ibokai khönia Lowalangi zi lö oroma na, iʼataʼufi”. (Heberaiʼo 11:7) Börö me mamati Noakhi ba nifaʼema Yehowa khönia, ifazökhi nowo sebua sibai. Tola manö, manofu-nofu zi faola omo khönia hana wa ifazökhi nowo. Faduhu dödöda, wa itema lira Noakhi. Itutunö Sura Niʼamoniʼö wa Noakhi andrö, ”sanuriaigö faʼatulö dödö”. (II Fetero 2:5) Ifangelama niha wa iʼasogö molö Lowalangi ba wangohori niha si lö sökhi. Tola manö ifatunö khöra hadia niwaʼö Yehowa, ”No so ba duduma hörögu wozu nösi gulidanö fefu, noa sa anönö danö horö, nifazökhira” ba ”Anönö danö idanö ubeʼe, ba wangohori fefu nösi gulidanö, si so noso, barö mbanua, si yawa, fefu zi so ba gulidanö ba si tekiko ubeʼe.” Aefa daʼö, itutunö khöra Noakhi hadia zinangea lafalua enaʼö teʼefaʼö ira. Imane Yehowa, ”Möi ba nowo ndraʼugö.”—I Moze 6:13, 17, 18.

8. Hadia niwaʼö Yakobo sanandrösa ba wamati?

⁸ Isura göi Yakobo sanandrösa ba wamati. Ifalua daʼa, te lö ara me no isura buku Heberaiʼo Faulo. Isura Yakobo, ”Oromaʼö khögu wamatimö andrö, si lö bua-bua, ba ba mbua-buagu uʼoromaʼö khöu wamati andrö.” (Yakobo 2:18) Itutunö Yakobo wa ba wangokhögö famati, lö ibönö na ha faduhu dödö manö. Bekhu manö, faduhu dödöra wa so Lowalangi, hizaʼi lö mamati ira khö Yehowa. Sindruhu-ndruhu lalawa sa Lowalangi. (Yakobo 2:19, 20) Baero daʼö, tatu laʼomusoiʼö dödö Lowalangi niha samati moroi ba lagura si sökhi mazui mbua-buara si sökhi. Daʼö nifalua Gaberahamo. Isura Yakobo, ”Tuada Aberahamo andrö, hadia, tenga moroi ba mbua-bua isöndra wangatulö, me ibeʼe sumange nononia Izaʼaki andrö? Öʼila ba daʼö, itolo ba mbua-bua andrö famati, ba moroi ba mbua-bua andrö tefoʼahonoa wamati.” Aefa daʼö itandrösaigö Yakobo wa lö moguna famati si lö mbua-bua ba imane, ”Hulö simane boto sa, si lö faʼauri, na lö noso, simanö göi wamati andrö, lö faʼauri, na lö bua-bua.”—Yakobo 2:21-23, 26.

9, 10. Hadia geluahania mangoromaʼö famati khö Nono?

⁹ Töra 30 fakhe aefa daʼö, isura Yohane tölu zura hegöi Injil. Simane sanura Zura Niʼamoniʼö tanö böʼö, aboto ba dödö Yohane hadia geluaha wamati. Ba zurania asese iʼogunaʼö Yohane ngawua wehede Yunani si fataria lafoʼeluaha ba li khöda, ”mangoromaʼö famati”.

¹⁰ Duma-dumania, itutunö Yohane, ”Khö zamati khö Nono andrö so waʼauri si lö aetu, lö iʼila dania waʼauri si lö mamati khö Nono andrö, lö tebulö wönu Lowalangi khönia.” (Yohane 3:36) Ba wangoromaʼö famati khö Nono andrö, lö tola löʼö taʼoʼö Yesu. Sindruhunia, moroi ba nisura Yohane, taʼila wa asese iwaʼö Yesu wa ba wangokhögö faʼauri si lö aetu, lö tola löʼö taforomaʼö wamati khönia hegöi khö Namania.—Yohane 3:16; 6:29, 40; 11:25, 26; 14:1, 12.

11. Hewisa tola taforomaʼö wa taʼandrö sibai saohagölö khö Yehowa me no aboto ba dödöda zindruhu andrö?

¹¹ Iʼogunaʼö geheha niʼamoniʼö Yehowa ba wanolo yaʼita enaʼö aboto ba dödöda zindruhu sanandrösa khönia hegöi Ononia, ba itolo ita ba wangokhögö famati khöra. (Baso Luka 10:21.) Hewisa tola taforomaʼö wa taʼandrö saohagölö khö Yehowa ba ngawalö zi no ifalua? Moguna böi irai taböhöli ba wangandrö saohagölö khönia me no itehe fahuwu ita khönia börö ”Zolohe andrö, ba Samoʼahonoa famati” Yesu. (Heberaiʼo 12:2) Moguna taʼaroʼö wamatida ba wangandrö khö Yehowa hegöi ba wamahaʼö ba Daromalinia.—Efeso 6:18; I Fetero 2:2.

12. Na taʼokhögö wamati, hadia zi tola tafalua?

¹² Moguna lö aetu taforomaʼö ba mbua-buada wa taʼokhögö wamati saro ba nifabuʼu Yehowa. Duma-dumania, lö aetu tafalua wanuriaigö ba niha sanandrösa ba Mbanua Lowalangi ba tatolo ira enaʼö tobali nifahaʼö Yesu. Moguna göi böi taböhöli wamalua, ’zi sökhi ba niha fefu, ba oföna ba zi ha sara lala wamati, awöda’. (Galatia 6:10) Ba taforege ba ’woheta niha si tohöna andrö, fabaya nilau-launia andrö’ börö me lö omasi ita na tefakiko wahuwusada khö Yehowa ba ngawalö hadia ia.—Kolose 3:5, 8-10.

FAMATI KHÖ LOWALANGI NO SAMBUA DANE-DANEDA

13. Hana wa moguna ”famati khö Lowalangi”? Hewisa wanutunö Zura Niʼamoniʼö daʼö, ba hadia mbörö?

¹³ Imane Sura Niʼamoniʼö, ”Na lö famati, ba tebai iʼomasiʼö niha Lowalangi: Sangondrasi Lowalangi enaʼö ba löʼö sa tola lö mamati ia, so Lowalangi, ba ifoluo zangalui yaʼia andrö.” (Heberaiʼo 11:6) Iforomaʼö göi Zura Niʼamoniʼö wa ”famati khö Lowalangi” si föföna taʼokhögö enaʼö tola tobali niha Keriso. Famati andrö no sambua ’dane-daneda’. (Heberaiʼo 6:1) Hizaʼi baero wamati, moguna göi mbua-bua tanö böʼö enaʼö tola fahuwu ita khö Yehowa hegöi lö taböhöli daʼö.—Baso II Fetero 1:5-7; Yuda 20, 21.

14, 15. Hadia abölö tohude wamati moroi ba waʼomasi? Tutunö.

¹⁴ Famati zabölö asese lasura ira sanura Zura Niʼamoniʼö moroi ba mbua-bua tanö böʼö. Hadia daʼö geluahania wa famati andrö no mbua-bua sabölö tohude sinangea taʼokhögö?

¹⁵ Itutunö Faulo gamaehuta wamati ba faʼomasi. Isura, ”He no aʼoi so khögu wamati andrö, ba wamawuʼa hili, ba na lö khögu faʼomasi andrö, ba faya ndraʼodo.” (I Korindro 13:2) Itutunö Yesu wa ”zebua goroisa ba zura goroisa andrö” yaʼia daʼö wangomasiʼö Lowalangi. (Mataiʼo 22:35-40) Faʼomasi zanolo yaʼita ba wangokhögö mbua-bua tanö böʼö zangomusoiʼö dödö Lowalangi. Duma-dumania, itutunö Zura Niʼamoniʼö wa faʼomasi ”fefu hadia ia, ba faduhu dödönia”. Andrö, faʼomasi zanolo yaʼita enaʼö tola faduhu dödöda, mazui taʼokhögö wamati ba ngawalö niwaʼö Lowalangi nisura ba Zura Niʼamoniʼö.—I Korindro 13:4, 7.

16, 17. Hadia niwaʼö Zura Niʼamoniʼö sanandrösa ba wamati hegöi faʼomasi? Mbua-bua hadia zabölö tohude, ba hadia mbörö?

¹⁶ Moguna sibai wamati hegöi faʼomasi, ba asese lafaogö latutunö ia ira sanura Zura Niʼamoniʼö. Ifarou dalifusönia Faulo ba ”taʼobaru göröba famati andrö, ba öröba faʼomasi”. (I Tesalonika 5:8) Isura Fetero sanandrösa khö Yesu, ”Somasi ami, he ŵaʼae lö mirai falukha, si faduhu dödömi iadaʼe, he ŵaʼae lö miʼila ia.” (I Fetero 1:8) Manofu Yakobo khö dalifusönia nibayoini, ”Tenga no itutuyu Lowalangi zi numana ba gulidanö andre, enaʼö fahöna khöra wamati andrö, ba enaʼö sanema ondröita ira, banua andrö, nifabuʼunia ba zangomasiʼö yaʼia andrö?” (Yakobo 2:5) Isura Yohane wa no iwaʼö Lowalangi ”enaʼö mamati ita ba döi Nononia, Yesu Keriso, ba enaʼö faoma taʼomasiʼö nawöda”.—I Yohane 3:23.

¹⁷ Hizaʼi, isura Faulo, ”Ba me simanö, ba si lö tebulö wamati ba fanötöna ba faʼomasi, si tölu andrö, ba sebuara, ba faʼomasi andrö.” (I Korindro 13:13) Ba zi so föna, lö moguna mamati ita ba nifabuʼu Lowalangi sanandrösa ba gulidanö si bohou börö me no alua daʼö fefu. Owua-wua dödöda ba waʼauri sahöli-höli dödö nitutunö Zura Niʼamoniʼö. Hizaʼi, moguna lö aetu taʼokhögö waʼomasi khö Lowalangi hegöi awöda. Sindruhunia, lö aetu tedou waʼomasida khöra sagötö faʼara.

IFAHOWUʼÖ YEHOWA WAMATIDA

18, 19. Hadia mbuania börö me laʼokhögö wamati ono mbanua Lowalangi iadaʼa, ba haniha zinangea lasuno ba daʼö?

¹⁸ Ono mbanua Yehowa iadaʼa, laʼokhögö wamati ba Mbanua Lowalangi ba latuhini daʼö. Laʼomasiʼö göi nawöra zamösana. Tola alua daʼa, börö me latehe geheha Lowalangi ba wameʼe fanuturu lala ba waʼaurira. (Galatia 5:22, 23) Hadia zi tobali mbuania? Töra walu zuta ndra talifusöda ba zi sagörö ulidanö lasöndra waʼowua-wua dödö ba faʼatulö hegöi teʼosambuaʼö ba mbanua niha Keriso si so yaʼira. Atulö wa famati hegöi faʼomasi no mbua-bua sahöli-höli dödö.

¹⁹ Tola teʼosambuaʼö börö wanolo moroi khö Lowalangi. Sinangea lasuno ia. (Yesaya 55:13) Sindruhu-ndruhu taʼandrö saohagölö börö me no itehe khöda ”no auri ami, moroi ba wamati”. (Efeso 2:8) Lö iböhöli Yehowa ba wanolo enaʼö abölö ato niha zangokhögö famati khönia. Ba gafuriatania, afönu niha soʼahonoa ba zi sagörö ulidanö, satulö ba somuso tödö. Lasuno Yehowa sagötö faʼara!