”Douʼö Wamatima”

1. Hana wa moguna nifotöi famati? (Faigi gambara ba ngaʼörö 17.)

HADIA no irai manofu ndraʼugö samösa, ’Na alua wamakao sabölö-bölö, hadia iʼorifi ndraʼo Yehowa?’ Moguna so wamati enaʼö tola teʼorifi. Imane Faulo, ”Ba na lö famati, ba tebai iʼomasiʼö niha Lowalangi.” (Heberaiʼo 11:6) Hewaʼae ha si toʼölö manö ba wamondrongoda ayati andre, si ndruhunia ”löʼö sa dozi mamati” fefu niha. (II Tesalonika 3:2) Ayati si dombua andre zangoromaʼö wa moguna taʼaroʼö wamatida.

2, 3. (a) Moloʼö Fetero, hana wa moguna so khöda wamati? (b) Hadia nifatunöda ba duho daʼa?

² Itutunö Fetero sanandrösa ba wamati si no ”tetandraigö”. (Baso I Fetero 1:7.) No ahatö wamakao sabölö-bölö, ba omasi ita enaʼö taʼokhögö wamati si tola mangorifi yaʼita. (Heberaiʼo 10:39) Moguna taʼodödögö enaʼö tedou ita ba wamati. Omasi ita so ba gotalua niha sotema howu-howu ba wamatörö Yesu ba gulidanö. Hulö simane ira matua sangandrö khö Yesu, tola göi tawaʼö, ”Tolodo ba waʼambö famati andrö!” (Mareko 9:24) Simane ndra nifahaʼö Yesu, tola göi tawaʼö, ”Douʼö wamatima.”​—Luka 17:5.

³ Ba duho daʼa, datatutunö: Hewisa enaʼö aro ita ba wamati, hewisa wangoromaʼöda wa so khöda wamati saro, ba hana wa faduhu dödöda ifondro-ndrongo Lowalangi na taʼandrö khönia enaʼö monönö wamatida.

OMASI LOWALANGI NA ARO ITA BA WAMATI

4. Haniha duma-duma si tola taʼoʼö enaʼö aro ita ba wamati?

⁴ Börö me moguna sibai nifotöi famati, ibeʼe khöda Yehowa duma-duma niha samati si no tesura ba Zura Niʼamoniʼö. Moguna ia ”ba wamahaʼö yaʼita.” (Roma 15:4) Na tafahaʼö ita ba duma-duma Gaberahamo, Sara, Gizaʼaki, Yakobo, Rakhaba, Gideono, Mbaraki, ba tanö böʼönia, daʼa zi tola manolo yaʼita enaʼö aro ba wamati. (Heberaiʼo 11:32-35) Baero daʼö, so duma-duma wamati niʼokhögö ndra talifusöda ba ginötö andre si tola taʼoʼö.a (Faigi zi no musura ba gahe zura.)

5. Hewisa Gelia ba wangoromaʼö wa so khönia wamati saro, ba hadia zinangea tasofu khöda samösa?

⁵ Sambua duma-duma si no tesura ba Zura Niʼamoniʼö yaʼia daʼö Gelia. Datafaigi lima ngawalö zi no alua khö Gelia sangoromaʼö wa mamati ia khö Yehowa. (1) Me itutunö Gelia khö Razo Gahabi wa ibeʼe Yehowa mbaŵa lökhö, lö ataʼu ia ba wangombakha, ”Faya wa no sauri Yehowa, Lowalangi ndraono Gizaraʼeli, si no möido enoni, na so namo mbanua ba he teu ba ndröfi andre, ha me uga fakhe, na tenga yaʼo zangumaʼö!” (I Razo 17:1) (2) Faduhu dödö Gelia wa hasambalö iʼasogö Yehowa zoguna khönia hegöi niha böʼö na alua mbaŵa lökhö. (I Razo 17:4, 5, 13, 14) (3) Faduhu dödö Gelia wa isusugi Yehowa nono lakha mbanua. (I Razo 17:21) (4) Faduhu dödö Gelia wa moroi khö Yehowa galitö si manga zumange nibeʼenia ba hili Garemeli. (I Razo 18:24, 37) (5) Fatua lö aekhu deu sabölö-bölö, si fao faʼafaduhu dödö imane Gelia khö Gahabi, ”Ae miyawa ba lau manga; urongo saʼae goso-goso deu.” (I Razo 18:41) Me no taʼila hadia zalua andre, manofu ita samösa, ’Hadia famatigu andre simane famati Gelia?’

HEWISA ENAʼÖ ARO WAMATIDA?

6. Hadia niʼandröda khö Yehowa enaʼö aro wamatida?

⁶ Tebai taʼokhögö wamati na lö fanolo geheha Lowalangi. Famati andrö no bua geheha. (Galatia 5:22) Moguna taʼoʼö mene-mene nibeʼe Yesu enaʼö taʼandrö geheha Lowalangi. No ifabuʼu Yesu wa ibeʼe Yehowa ”geheha niʼamoniʼö ba zangandrö khönia.”​—Luka 11:13.

7. Beʼe duma-duma hewisa enaʼö aro wamatida.

⁷ Hewaʼae no aro wamatida khö Yehowa, moguna tarorogö ia. Famati laʼamaedolagö ia hulö galitö. Na tafewuaʼö galitö tatu manö mohola. Hewaʼae simane daʼö, na lö tanönö geu ba galitö andrö tola mate. Hizaʼi, na lö aetu-aetu tanönö geu ba galitö, lö alio mate galitö andrö. Simanö göi ita ba wamati. Na lö aetu-aetu tabaso ba tafahaʼö ita ba Zura Niʼamoniʼö ero maʼökhö, itugu monönö waʼomasida khö Yehowa hegöi ba Daromalinia. Lua-luania aro wamatida.

8. Hadia nasa zi tola manolo yaʼita enaʼö tarorogö ba taʼaroʼö wamatida?

⁸ Lö abönö wamahaʼö nitemada fatua lö tebayagö idanö. (Heberaiʼo 6:1, 2) Duma-dumania, böi taböhöli wamahaʼö yaʼita sanandrösa ba wamaʼeleʼö si no alua. Daʼa zi tola manolo yaʼita ba wondrorogö hegöi ba woʼaroʼö famatida. Moguna taʼogunaʼö Zura Niʼamoniʼö ba wamareso hadia no taʼokhögö wamati saro mazui löʼö.​—Baso Yakobo 1:25; 2:24, 26.

9, 10. Hewisa wa tola aro wamatida na (a) fariawö ita ba niha si sökhi? (b) möi ba gangowuloa? (c) möi manuriaigö?

⁹ Imane Faulo ba niha keriso ”terara dödögu göi awömi, ba khömi andrö, börö wa no faoma samati ita.” (Roma 1:12) Hadia geluahania? Na tabeʼe ginötö fariawö khö ndra talifusöda tola tefarou dödö zamösana, mendrua manö na fariawö ita khö ndra talifusöda si no ”tetandraigö” ba wamati. (Yakobo 1:3) Fariawösa si lö sökhi ifakiko wamatida, hizaʼi fariawösa si sökhi daʼö zoʼaroʼö famatida. (I Korindro 15:33) Daʼö mbörö wa lö adage-dage lafarou ita weʼamöi ba gangowuloa. Ba daʼö ”tafarou dödö nawöda.” (Baso Heberaiʼo 10:24, 25.) Aefa daʼö, wamahaʼö nitemada ba gangowuloa daʼö zangaroʼö famatida. Imane Sura Niʼamoniʼö, famati andrö tumbu moroi ba nirongoda. (Roma 10:17) Tobali, moguna taʼangerönusi khöda samösa, ’Hadia lö uböhöli weʼamöi ba gangowuloa?’

¹⁰ Tola aro wamatida na möi ita manuriaigö. Hulö simane niha keriso me föna, moguna mamati ita khö Yehowa ba lö ataʼu ita weʼamöi manuriaigö gofu hadia ia zalua.​—Halöwö Zinenge 4:17-20; 13:46.

11. Hadia mbörö wa laʼokhögö wamati saro Yosua ba Kalebi, ba hewisa enaʼö so khöda wamati simane daʼö?

¹¹ Itugu aro wamatida na no tarasoi wanolo Yehowa ba na ifondro-ndrongo wangandröda. Daʼa zalua khö Yosua ba Kalebi. Mamati ira khö Yehowa me möi ira mamauze ba danö gamabuʼula. Itugu ara ginötö, itugu aro ira ba wamati ero larasoi wanolo Yehowa. Börö me so waʼafaduhu dödö khö Yosua, imane ba ndraono Gizaraʼeli, ”sambua lö saekhu ba danö taromali si sökhi andrö, niwaʼö Lowalangimi, Yehowa, ba khömi andrö, no ahori itörö khömi.” Itohugö wangumaʼö, ”ba miʼataʼufi saʼae Yehowa, ba mifosumange ia moroi siʼaikö ba dödömi ba böi faröi ami.” Aefa daʼö imane, ”ba yaʼodo ba soroi yomogu fefu, ba Yehowa mafosumange.” (Yosua 23:14; 24:14, 15) Na faduhu dödöda khö Yehowa ba tarasoi wanolonia, itugu aro wamatida khönia.​—Zinunö 34:8.

LALA BA WANGOROMAʼÖ FAMATI

12. Hewisa wangoromaʼö wa so khöda wamati saro?

¹² Hewisa wangoromaʼö wa so khöda wamati saro? Imane Yakobo, ”Ba mbua-buagu uʼoromaʼö khöu wamati andrö.” (Yakobo 2:18) Fefu nifaluada, daʼö zangoromaʼö wa so khöda wamati saro. Datafaigi hadia geluahania.

13. Hana wa tola tawaʼö na möi ita manuriaigö no taforomaʼö wamati?

¹³ Fanuriaigö no sambua lala si sökhi ba wangoromaʼö famati. Hadia mbörö? Na manuriaigö ita, no daʼa zangoromaʼö faʼafaduhu dödöda wa lö aratö alua luo Yehowa ba ”lö zi lö alua!” (Habakuki 2:3) Enaʼö taʼila wa so khöda wamati saro, moguna taʼangerönusi: ’Hadia no uʼofönaiʼö ba waʼaurigu weʼamöi manuriaigö? Hadia no uʼodödögö wanutunö ba niha sanandrösa khö Yehowa? Hadia no uʼodödögö ba wondrouʼö inötögu weʼamöi manuriaigö?’ (II Korindro 13:5) Dataʼodödögö wamatida ba tafalua wanuriaigö ba ”wogamö fangorifi.”​—Baso Roma 10:10.

14, 15. (a) Ba waʼaurida sero maʼökhö, hewisa wangoromaʼö wa so khöda wamati? (b) Tutunö duma-duma si no irai alua khö dalifusöda wa so khöra wamati saro.

¹⁴ Na lö faröi ita ba ginötö göna fanandraigö, daʼa zangoromaʼö wa mamati ita khö Yehowa. Ba ginötö göna ita fökhö, faʼide-ide dödö, faʼambö zoguna, mazui tanö böʼönia, moguna so khöda waʼafaduhu dödö wa Yehowa ba Yesu labeʼe khöda ”wanolo, na baŵa moguna.” (Heberaiʼo 4:16) Taʼoromaʼö wamati khö Yehowa na taʼandrö wanolo khönia. Imane Yesu, tola taʼandrö khö Yehowa enaʼö ”si rugi öma, beʼe khöma ero maʼökhö.” (Luka 11:3) Itutunö khöda Sura Niʼamoniʼö wa tola ibönökhi Yehowa fefu zoguna khöda. Duma-dumania, me alua mbaŵa lökhö ba danö Gizaraʼeli, iʼasogö Yehowa fefu zoguna khö Gelia. Imane Sura Niʼamoniʼö ”ba laʼohe-ohe khönia gaga kue ba diwo, ba zanguhulö wongi ba na tanö owi, ba önia idanö mbo-mbo andrö.” (I Razo 17:3-6) Faduhu göi dödöda wa iʼasogö Yehowa fefu zoguna khöda.

¹⁵ Faduhu dödöda na tafalua goi-goi Zura Niʼamoniʼö ba waʼaurida, tola taʼameʼegö tödö zoguna ba nösi nomoda. Itutunö Rebecca si no mangowalu si toröi ba Asia, hewisa ira wamalua goi-goi Zura Niʼamoniʼö si no tesura ba Mataiʼo 6:33 ba Gamaedola 10:4. Itohugö wangumaʼö, halöwö woʼomonia tola möi famakiko wahuwusara khö Yehowa. Andrö wa iröi halöwönia. Ba wamönökhi soguna ba ndraononia si daöfa, lalau mamawa gö. Börö me owölö-ölö ira ba wohalöwö, tebönökhi zoguna ba nomo. Imane Rebecca, ”Marasoi wa lö faröi Yehowa khöma. Lö irai ambö zoguna khöma.” Hadia no irai alua ba waʼauriu zimane salua khö dalifusöda andre si tola mangaroʼö famatiu?

16. Hadia lua-luania na mamati ita khö Lowalangi?

¹⁶ Faduhu dödöda na tafalua mene-mene nibeʼe Yehowa, ibeʼe khöda wanolo. Itörö tödö Waulo wehede Habakuki me imane, ”Moroi ba wamati auri dania zatulö andrö.” (Galatia 3:11; Habakuki 2:4) Andrö, moguna mamati ita khö Yehowa wa hasambalö itolo ita. Ifasugi ba dödöda Faulo wa Lowalangi, ”yaʼia, sangila manaluʼi na fefu hadia ia, wolau, faʼaröu italuʼi niʼandröda, awö zi faböbö ba gera-erada, dali waʼabölö andrö, si no abölö ba dödöda.” (Efeso 3:20) Yaʼita ono mbanua Lowalangi taʼodödögö wamalua somasi ia, hewaʼae so zoʼamböta ita ba wamalua yaʼia. Taʼandrö sibai saohagölö me no fao khöda Lowalangi ba ifahowuʼö fefu hadia zi no tafalua.

NA TAʼANDRÖ WAMATI TEBEʼE KHÖDA

17. (a) Hewisa Yesu wanema li ndra nifahaʼönia? (b) Hana wa faduhu dödöda na taʼandrö wamati hasambalö ibeʼe Lowalangi?

¹⁷ Moroi ba zi no tafatunö andre, omasi taʼandrö simane niwaʼö ndra nifahaʼö Yesu, ”Douʼö wamatima!” (Luka 17:5) Tefondro-ndrongo wangandröra. Alua daʼa me luo Wendrakose 33 M, me latema geheha ba monönö waʼaboto ba dödöra sanandrösa ba gohitö dödö Lowalangi. Daʼa zangaroʼö famatira. Lua-luania tebörögö halöwö fanuriaigö sabölö ebua. (Kolose 1:23) Hadia ifondro-ndrongo Lowalangi na taʼandrö enaʼö monönö wamatida? No ifabuʼu Yehowa wa ifondro-ndrongo wangandröda ”si faudu ba zomasi ia.”​—I Yohane 5:14.

18. Hadia howu-howu nibeʼe Yehowa ba niha samati khönia?

¹⁸ Omuso sibai dödö Lowalangi na faduhu dödöda khönia. Na taʼandrö khönia wamati, hasambalö ifondro-ndrongo wangandröda. Itugu aro wamatida, ba tebeʼe ”khömi dania mbanua Lowalangi andrö.”​—II Tesalonika 1:3, 5.