”Fefu Hadia Ia, ba Niha Fefu ba No Ugoʼö-goʼö”

FATUA lö alua daʼa, adöni sibai dödögu ba zindruhu. So ösa publikasi si teʼodane-dane ba Zura Niʼamoniʼö nitema mamagu, ba adöni dödögu nösinia. Sabölö omasido yaʼia daʼö gambarania. Fatuwu khö bapagu na idunö-dunö khögu mamagu hadia zi no ifahaʼö ia. Tobali, börö me adöni dödögu ba oya wanofu-nofugu, andrö wa ifahaʼödo mamagu na inötö mofanö bapagu. Buania, uhalö göi gangetula wa ululu waʼaurigu khö Yehowa. Tebayagö idanö ndraʼo ba Blackpool, Inggris me 1943, fulu fakhe ndröfigu me luo daʼö.

UBÖRÖGÖ UFOSUMANGE YEHOWA

Iʼotarai daʼö, lö maböhöli mamagu weʼamöi manuriaigö. Ba götö daʼö, maʼogunaʼö fonograf ba wanuriaigö. Ebua ba abua fakake daʼa, so mato öfa kilogram amatonga waʼabuania. Khalaigö atö, no ide-ide ndraʼo ba uʼohe sambua fonograf!

Me 14 fakhe ndröfigu, omasido tobali perintis. Imane mamagu wa moguna ufatunö ua khö genoni ndra talifusö (iadaʼa töinia satua samasui). Ifarou ndraʼo talifusöda andrö wa moguna so nekhe-nekhe dangagu irege daʼö zotuhini ndraʼo na merintis. Uʼoʼö niwaʼönia. Me no mohalöwödo dua fakhe waʼara, ufatunö khö zatua samasui tanö böʼö wa omasido merintis. Imane, ”Lau, fasuraʼö döimö!”

Me baŵa si Öfa 1949, yaʼo hegöi mamagu, maʼohe fefu gama-gamama ba findra ndraʼaga ba Middleton, ahatö ba Manchester, ba daʼö mabörögö merintis. Me no aefa öfa waŵa, ufili samösa dalifusöda ira matua si tobali awögu merintis. Iʼandrö khöma gödo ndraha enaʼö findra ndraʼaga ba mbanua niha Keriso si bohou ba Irlam. So samösa dalifusöda ira alawe ba mbanua niha Keriso tanö böʼö si fao khö mamagu merintis.

Hewaʼae na awena 17 fakhe nasa ndröfigu, daruaga awögu si tobali perintis andrö sondröniaʼö angowuloa börö me lö ato ndra talifusöda ba mbanua niha Keriso si bohou andre si tola sinangea. Aefa daʼö, findra ndraʼo ba Mbanua Niha Keriso Buxton, lö ato zanuriaigö ba daʼö ba moguna göi latolo ira. Fefu zi no irai utörö, daʼö zamaʼanö yaʼo ba wamalua halöwö sabölö ebua ba zi so miföna.

Me 1951, ufasuraʼö döigu ba Sekolah Alkitab Gilead Menara Pengawal. Aefa daʼö, me baŵa si Felendrua 1952, lakaoni ndraʼo tobali saradadu. Uwaʼö khöra wa lö omasido tobali saradadu börö me sanuriaigö safönu inötö ndraʼo. Hizaʼi, lö fao dödö ndra sanguhuku ba lakuru ndraʼo önö waŵa waʼara. Me so ndraʼo ba gurunga, utema undranga weʼamöi ba Sekolah Gilead kelas ke-22. Ba ginötö laʼefasi sibai ndraʼo ba gurunga me baŵa si Fitu 1953, iʼanemai utörö göfa Georgic ba möido ba New York.

Me no urugi New York, faodo ba Kebaktian Masyarakat Dunia Baru nifalua me döfi 1953. Aefa daʼö, utörö kereta api weʼamöi ba South Lansing, New York, ba daʼö mufalua zekola. No ide-ide gefegu börö me awena laʼefasi ndrao moroi ba gurunga. Me möido tou moroi ba kereta api, so bus si möi ba South Lansing, ba ufiza gefe 25 sen ba niha böʼö si möi yawa ba bus.

LAFATENGE BA SOI BÖʼÖ

Ba Sekolah Gilead, matema wamahaʼö si sökhi sanolo yaʼaga enaʼö ”fefu hadia ia, ba niha fefu ba no ugoʼö-goʼö”. (I Korindro 9:22) Lafatenge Paul Bruun, Raymond Leach, hegöi yaʼo ba Filipina. Hizaʼi, hauga waŵa mabalo-baloi visa-ma. Aefa daʼö, möiga ba Rotterdam, Belanda, matörö göfa. Matörö Laut Tengah, Terusan Suez, hegöi Samudra Hindia weʼamöi ba Malaysia, aefa daʼö ba Hong Kong. Me no 47 hari ndraʼaga ba nasi, marugi Manila me 19 mbaŵa si Felezara 1954.

Moguna mafaudugö waʼaurima ba zi toʼölö lafalua, soi si bohou, hegöi li si bohou. Ba wamobörö, lafatengega ba mbanua niha Keriso ba Quezon City, li Inggris zabölö oya laʼogunaʼö ba daʼö. Me no aefa önö waŵa, lö oya ngawua wehede niʼilama ba li Tagalog. Ba me lafatengega zui ba mbanua böʼö, lö tola löʼö mafahaʼöga ba li Tagalog.

Samuza inötö, me baŵa si Lima 1955, me mangawuliga ba nomo, daruaga talifusöda Leach, matema zura. Ösinia yaʼia daʼö lafatenge ndraʼaga tobali satua samasui. Awena 22 fakhe ndrao me luo daʼö. Tobali, ba halöwö si bohou andre, ufahaʼö ndraʼo ba ngawalö lala enaʼö ”fefu hadia ia, ba niha fefu ba no ugoʼö-goʼö”.

Duma-dumania, ba kaki lima toko si so ba mbanua side-ide ufaʼema huhuo sebua si oföna me tobali ndraʼo satua samasui. Me götö daʼö ba Filipina, fefu huhuo sebua lafaʼema ia ba nahia sato niha! Me uʼondrasi banua niha Keriso, ufaʼema huhuo ba nahia waʼowulo, ba fasa, föna balai kota, ba nahia famai basket, ba taman, hegöi ba zinga lala ba kota. Samuza maʼökhö ba San Pablo City, tebai ufaʼema huhuo ba fasa börö me so deu toho. Ba uwaʼö khö ndra talifusöda sangai halöwö wa ba Balai Mbanua Lowalangi ufaʼema huhuo sebua. Aefa daʼö, lasofu khögu ira talifusöda andrö hadia tola laʼombakhaʼö daʼa tobali angowuloa ba niha sato, börö me tenga ba nahia sato niha lafalua ia!

Ba nomo ndra talifusöda ulau mörö. Hewaʼae no ide-ide nomora, hizaʼi ehao sibai, lö taʼunö. Sasesenia, no labeʼe tou dufo ba zalo nifofafa, ba daʼö naha wemörögu. Baero ba nomo so mbaʼa nidanö, ba na ulau mondri, tola manö lafaigi-faigido niha. Börö daʼö, uhaogö-haogö sibai na mondrido. Utörö bus ba itaria göi utörö dundraha weʼamöi ba hulo böʼö. Sagötö manuriaigö ndraʼo, lö irai so motogu.

Ufahaʼödo ba li Tagalog, hewaʼae na lö irai kursus ndraʼo. Lalagu ba wamahaʼö yaʼo ba li daʼa yaʼia daʼö ufondro-ndrongo ndra talifusöda na inötö fahuhuo ira ba wanuriaigö hegöi ba gangowuloa. Omasi ira lafahaʼö ndraʼo, ba uʼandrö sibai saohagölö me lö atage ira ba wamahaʼö yaʼo ba lafatunö khögu na fasala wanötöigu wehedenia.

Itugu numalö ginötö, ba moguna zui ufaudugö waʼaurigu ba halöwö si bohou. Me 1956, möi khöma dalifusöda Nathan Knorr me mafalua kebaktian nasional. Halöwö nibeʼe khögu ba kebaktian andrö yaʼia daʼö si fahuhuo ba media berita. Lö irai ufalua halöwö daʼa, hizaʼi latolodo ira talifusö tanö böʼö. Lö ikhamö döfi aefa daʼö, mafalua zui kebaktian nasional, ba latuyu ndraʼo tobali satua kebaktian. Talifusöda Frederick Franz moroi ba gödo sebua zangondrasi ndraʼaga ba oya wamahaʼö si tola uhalö moroi khönia. Me ifaʼema huhuo sebua, ifake barong Tagalog, yaʼia daʼö baru niha Filipina. Omuso dödö ndra talifusö fefu, ba daʼa zamahaʼö yaʼo wa moguna ufaudugö waʼaurigu ba niha si so ba mbanua andre.

Moguna zui ufaudugö waʼaurigu me tobali ndraʼo pengawas distrik. Ba ginötö daʼö, mafuta film The Happiness of the New World Society (Kebahagiaan dari Masyarakat Dunia Baru). Asese mafuta video andrö ba nahia sato niha, ba itaria owulo ba daʼö ndri. Adöni dödöra ba haga layar, andrö wa lahurufai proyektor andrö. Ba na no awai wamuta film, erege dödöma ba wolosi proyektor andrö! Abua wamaʼanö halöwö daʼa, hizaʼi omuso dödöma me so zangondrasi ba samahaʼö yaʼira ba organisasi Yehowa si so ba zi sagörö ulidanö.

Ira sondröniaʼö ba agama Katolik lafaso ndra samatörö enaʼö lö latehegö khöma wamalua kebaktian. Lafoli göi dorosi ba ginötö mafaʼema huhuo ahatö moroi ba gerejara enaʼö lö larongo-rongo niha hadia huhuo nifaʼema. Hewaʼae simanö, lö tebulö lafahaʼö ira niha ba zindruhu, ba ato ba gotaluara iadaʼa samosumange Yehowa.

HALÖWÖ SI BOHOU, ABÖLÖ UFAUDUGÖ ZUI WAʼAURIGU

Me 1959, lakaonido ba gödo ndraha. Oya wamahaʼö nihalögu ba daʼö. Lö ara aefa daʼö, laʼandrö khögu weʼamöi ba soi böʼö tobali satua zona. Samuza inötö, falukha ndraʼo khö Janet Dumond, samösa utusan injil ba Thailand. Faoma mafaʼoheʼö zura khö nawöma irege ba gafuriatania mangowalu ndraʼaga. No 51 fakhe fao-fao ndraʼaga ba wangai halöwö khö Yehowa.

Omuso sibai dödögu börö me tola uʼondrasi nono mbanua Yehowa ba zi 33 soi. Uʼandrö sibai saohagölö ba halöwö si no irai labeʼe khögu börö me daʼa zamahaʼö yaʼo hewisa lala ba wahuhuosa ba niha si faböʼö-böʼö banua hegöi si toʼölö mufalua! Daʼa zanolo yaʼo irege aboto ba dödögu wa iʼomasiʼö sibai fefu niha Yehowa.​—Halöwö Zinenge 10:34, 35.

LÖ SI TEBULÖ NASA MAFAUDUGÖ WAʼAURIMA

Omuso dödögu hegöi Janet wefao khö ndra talifusö ba Filipina ba wangai halöwö khö Yehowa. Irugi mane maʼökhö, ba gödo ndraha Quezon City nasa mohalöwöga. Iadaʼa, töra fulu winaeta waʼato ndra talifusöda sanuriaigö moroi me awena toharedo mato 60 fakhe ba zilalö. Ba zi hauga fakhe faʼara, lö manö si tebulö wa moguna ufaudugö nasa waʼaurigu ba niʼandrö Yehowa. Duma-dumania, so zui wamohouni si bohou nibeʼe organisasi barö-barö daʼa, ba moguna mafaudugö waʼaurima ba gangetula daʼö.

No maforege woloʼö fefu wanuturu lala nibeʼe Yehowa, ba daʼa zangaʼasogö faʼowua-wua dödö ba waʼaurima. Maforege ba wamaudugö faʼaurima enaʼö tola matolo ndra talifusöda. Sagötö iʼogunaʼö ndraʼaga Yehowa ba wamalua somasi ia, mahalö gangetula wa ”fefu hadia ia, ba niha fefu ba no ugoʼö-goʼö”.