Uröi Fefu Hadia Ia ba Woloʼö Keriso

HANA wa mofönu sibai bapagu? Daʼututunö. Tumbu ndraʼo me 29 mbaŵa si Fitu 1929, ba ebua ndraʼo ba mbanua side-ide si so ba provinsi Bulacan, Filipina. Lö oya gefema ba no öna-öna waʼaurima. Me ide-idedo, möi zaradadu Jepang ba wosuwö Filipina ba ibörögö alua wasuwöta. Hizaʼi, börö me fandrö-ndröu mbanuama, lö ikhamö ndraʼaga fasuwöta. Lö hadöi radioma, TV mazui koran. Ha ba niha marongo-rongo duria wasuwöta andrö.

So dafitu dalifusögu. Me walu fakhe ndröfigu, toröi ndraʼo khö kakegu hegöi nenegu. Hewaʼae Katolik ndraʼaga, omasi kakegu fahuo-huo sanandrösa ba agama, ba itema mbuku ba wamati nibeʼe ndra awönia. Itörö tödögu wa no irai iforomaʼö khögu Zura Niʼamoniʼö hegöi mbuku side-ide Protection, Safety, ba Uncovered ba li Tagalog.a (Faigi nisura ba gahe zura) Omasido ubaso Zura Niʼamoniʼö, mendrua manö Injil si öfa ngawua. Buania, omasido uʼoʼö duma-duma Yesu.​—Yohane 10:27.

UFAHAʼÖDO BA WOLOʼÖ KERISO

Laröi Filipina ira saradadu Jepang me 1945. Te ba ginötö daʼö, ifuli lawaʼö khögu ira satuagu enaʼö mangawulido ba nomo. Ifarou ndraʼodo kakegu enaʼö mangawulido, ba ulau mangawuli.

Me baŵa si Felendrua 1945, manuriaigö ndra Samaduhuʼö Yehowa si otarai mbanua Angat ba mbanuama. Möi samösa Zamaduhuʼö si no alawa döfi ba nomoma ba itutunö hadia niwaʼö Zura Niʼamoniʼö sanandrösa ba ”götö safuria”. (2 Timoteo 3:1-5) Ikaoni ndraʼaga ba wangondrasi famahaʼö Zura Niʼamoniʼö nifalua ba mbanua sahatö ba mbanuama. Möi ndraʼodo, hewaʼae na lö möi ndra satuagu. Te so mato 20 niha zangondrasi, ba so ösa zameʼe fanofu sanandrösa ba Zura Niʼamoniʼö.

Lö aboto sibai ba dödögu hadia nitutunöra, daʼö mbörö wa ulau mofanö. Hizaʼi, me ibörögö laʼanunöisi zinunö Mbanua Lowalangi, lö aʼozu mofanödo börö me omasido sibai zinunö daʼö. Me no aefa manunö ba mangandrö, lakaoni ndraʼaga ba wangondrasi gangowuloa ba Angat ba ngaluo Migu.

Mufalua gangowuloa ba nomo Cruz. So ösa ba gotaluama zanörö tanö walu kilometer enaʼö ofeta ba daʼö. Te so mato 50 niha si no owulo. Adöni dödögu börö me so ndraono side-ide si tola mameʼe fanema li ba wanofu sabua sanandrösa ba Zura Niʼamoniʼö. Me no uʼondrasi gangowuloa ba zi hauga kali, ikaoni ndraʼodo talifusöda Damian Santos ba wemörö ba nomonia. Yaʼia andre perintis si no alawa döfi ba si no irai tobali walikota mböröta. Mahorigö ginötöma sara wongi ba wanutunö Sura Niʼamoniʼö.

Me föna, tola iʼanemaiʼö tebayagö idanö zi samösa niha na no iʼila dane-dane wamahaʼö ba Zura Niʼamoniʼö. Me no hauga kali möido ba gangowuloa, lasofu khögu hegöi ba niha böʼö ira talifusöda ira matua, ”Hadia omasi ami tebayagö idanö?” Ba umane, ”Omasi.” Uʼila wa omasido tobali ”enoni Zoʼaya, Keriso”. (Kolose 3:24) Me 15 mbaŵa si Dua 1946, so darua ndraʼaga nibayagö idanö ba nungo nidanö sahatö ba daʼö.

Aboto ba dödögu wa moguna asese möi manuriaigö niha Keriso si no tebayagö idanö simane nifalua Yesu. Imane khögu bapagu wa awuyu-wuyu sibai nasa ndraʼo weʼamöi manuriaigö ba lö iʼanemaiʼö tobalido penginjil ha me no tebayagödo idanö. Ufatunö khönia wa omasi Lowalangi na taturiaigö duria somuso dödö sanandrösa ba Mbanua Lowalangi. (Mataiʼo 24:14) Ufatunö göi khönia wa hasambalö ufalua hadia zi no ufabuʼu khö Lowalangi. Ba ginötö daʼö ifetaʼudo bapagu simane si no ututunö ba wamobörö. Iʼalui lala enaʼö ubato manuriaigö. Daʼö zi oföna sibai uröi mazui utehegö fefu hadia ia ba wamosumange Yehowa.

Lakaoni ndraʼo ira ösi nomo Cruz enaʼö toröido khöra ba Angat. Lafarou ndraʼodo hegöi onora alawe siakhi sotöi Nora, enaʼö malau merintis. Mabörögö merintis me 1 mbaŵa si Felezara 1947. Ulau merintis ba Angat, hizaʼi merintis Nora ba mbanua böʼö.

UFULI ZUI URÖI FEFU HADIA IA

Me no merintis ndraʼo dua fakhe, samösa dalifusöda moroi ba Mbetieli, Earl Stewart, ifaʼema huhuo ba niha si töra 500 faʼato ba zi sambua nahia sato niha ba Angat. Ifaʼema huhuo ba li Inggris, ba aefa daʼö ufatunö nösi huhuonia ba li Tagalog. Daʼa huhuo si oföna moroi ba huhuo soya tanö böʼö nifoʼeluahagu ba zi no hauga fakhe. Hana wa tola ufalua daʼö? Hewaʼae ha fitu fakhe faʼara möido ba zekola, asese fahuhuo ndra gurugu ba li Inggris. Aefa daʼö, börö me lö oya publikasida si teʼodane-dane ba Zura Niʼamoniʼö ba li Tagalog, andrö wa oya ufahaʼödo ba publikasi ba li Inggris. Daʼö zanolo yaʼo irege aboto ba dödögu li Inggris ba tola ufoʼeluaha huhuo sebua.

Ifatunö talifusöda Stewart ba mbanua niha Keriso si so ba mbanua daʼö, wa laʼondrasi kebaktian nifalua ba New York, AS ira utusan injil. Daʼö kebaktian Pertambahan Teokratis me 1950. Andrö wa omasi gödo ndraha na so samösa mazui darua ndra perintis sanolo ba Mbetieli. Ba lakaoni ndraʼodo. Ufuli zui uröi fefu hadia manö zi no irai uʼokhögö börö me mohalöwödo ba Mbetieli.

Urugi Mbetieli me 19 mbaŵa si Önö 1950. So Mbetieli ba nomo sebua si no atua ba faʼebolo danönia sara hektar ba no ifasui eu sebua. Te so felendrua niha ndra talifusöda ira matua si lö sangowalu sohalöwö ba daʼö. Ero si hulö wongi, ulau mohalöwö ba naha nawu. Aefa daʼö, te bözi siwa ulau manarika ba laundry. Ufuli ufalua zimane daʼö ba zi talu luo. Hewaʼae na no mangawuli ndra utusan injil moroi ba kebaktian internasional, lö mamalö toröi ndraʼo ba Mbetieli. Ufalua gofu hadia ia niwaʼö ndra talifusöda khögu. Ubukusi majalah nifaʼoheʼö, uʼurusi na so niʼandrö niha ba tobalido sanemaʼö tome.

URÖI FILIPINA WEʼAMÖI BA SEKOLAH GILEAD

Me 1952, yaʼo hegöi si daönö ndra talifusöda ira matua moroi ba Filipina, lakaoni ndraʼaga ba wefao ba Sekolah Gilead kelas si-20. Omuso sibai dödögu! Me so ndraʼaga ba Amerika Serikat, maʼila ba oya marasoi ngawalö zi bohou. No aröu faehu waʼauri ba daʼö moroi ba waʼauri ba mbanuagu.

Duma-dumania, moguna mafahaʼöga ba wangogunaʼö fakake elektronik hegöi fakake si lö irai maʼila ba zilalö. No aröu faehu göi cuaca ba daʼö. No irai ba zi hulö wongi me awena maosodo, oi afusi fefu zi so baero. Daʼö zi oföna sibai uʼila salju. Sökhi sibai daʼö. Hizaʼi, iʼanemaiʼö urasoi nangi sokafu sibai!

Owua-wua sibai dödögu ba wamahaʼö nitemagu ba Gilead, ba lö fatimba khögu fefu wamohouni nibeʼe ba daʼö. Atua-tua sibai ndra talifusö si tobali samahaʼö ba laforomaʼö khöma hewisa wamalua famahaʼö hegöi ba wamalua riset. Sekolah daʼa sindruhu-ndruhu möi fangaro wahuwusagu khö Yehowa.

Me no aefa wisuda, tebeʼe halöwögu tobali perintis istimewa ba zi lö arara ba Bronx, New York. Andrö, me baŵa si Fitu 1953 tola uʼondrasi Kebaktian Ono Mbanua Gulidanö si Bohou nifalua ba Bronx. Me no aefa kebaktian, lafuli lafataro ndraʼo ba Filipina.

URÖI WAʼASANA BA MBANUA SEBUA

Lafataro ndraʼo ira talifusöda si so ba Mbetieli tobali satua samasui. Itugu oya ginötö niʼokhögögu ba woloʼö Yesu, si möi ba mbanua sebua hegöi ba mbanua side-ide saröu ba wanolo ono mbanua Yehowa. (1 Fetero 2:21) Banua nihalöwögöigögu yaʼia daʼö tanö sebolo ba Luzon tengah, hulo sabölö ebua ba Filipina. No tefarahu ba daʼö provinsi Bulacan, Nueva Ecija, Tarlac, hegöi Zambales. Ba weʼamöi ba zi hauga mbanua side-ide, moguna utörö Hili si so ba Sierra Madre sokara. Lö hadöi bus hegöi kereta api si möi ba mbanua daʼö. Andrö, moguna manofudo ba zolohe truk hadia tola faodo khöra ba modadaodo tanö furi. Si toʼölönia, latehegö khögu ba wefao. Hizaʼi, sindruhu-ndruhu lö ohahau dödögu ba daʼö.

Oya mbanua niha Keriso side-ide hegöi si bohou ba daʼö. Andrö wa laʼandrö sibai saohagölö ira talifusöda me utolo ira ba wotatugöi gangowuloa hegöi enaʼö itugu sökhi wamalua halöwö fanuriaigö.

Ba gafuriata, uhalöwögöigö göi zi sagörö mbanua Bicol. Ba mbanua daʼö, oya ngawawa ba nahia saröu. Ba daʼö, manuriaigö ndra perintis istimewa ba mbanua si lö irai muturiaigö. Ba zi sambua omo, naha weʼamöi ba WC ha tanö si no mutögi si no mubeʼe dua rozi geu si tobali naha gahe. Me moziziodo ba geu andrö, izumaigö atoru geu ba faodo ba waʼaekhu si tou. Oya ginötö niʼogunaʼögu ba wanasai mbotogu ba aefa daʼö ulau manga!

Me tefataro ndraʼo ba mbanua daʼö, ibörötaigö uʼangeraigö Nora, si fao khögu ba wamörögö merintis. Iadaʼa, no tobali perintis istimewa ia ba Dumaguete City, ba möido ufalukhaisi ia. Aefa daʼö, ibörötaigö mafaʼoheʼö zura khö nawöma, ba me 1956, mangowalu ndraʼaga. Ba zi samigu me no aefa mangowaluga, maʼogunaʼö ginötö ba weʼamöi ba zi sambua mbanua niha Keriso si so ba Hulo Rapu-Rapu. Masösö hili ba aröu sibai matörö tanö. Hizaʼi, omuso dödöma me tola fao ndraʼaga hegöi me tola matolo ndra talifusöda ba daʼö.

IFULI LAKAONI WOHALÖWÖ BA MBETIELI

Me no aefa mafalua halöwö famasui ba zi öfa fakhe faʼara, lafuli lakaoniga ba gödo ndraha. Ibörögö mohalöwöga me baŵa si Sara 1960. Ba zi hauga fakhe me mohalöwöga ba Mbetieli, oya wamahaʼö nihalögu moroi khö ndra talifusöda sangokhögö noro dödö sebua ba organisasi Yehowa. Omuso göi dödö Nora ba ngawalö halöwönia ba Mbetieli.

No sambua howu-howu me uʼila wa itugu tedou waʼato niha samosumange Yehowa ba Filipina. Awuyu-wuyu nasa ndraʼodo me awena möido ba Mbetieli ba lö nasa sangowaludo. Me luo daʼö, so mato 10.000 ndra sanuriaigö. Iadaʼa, töra 200.000 ndra sanuriaigö ba Filipina, ba so ngaotu ndra talifusöda sohalöwö ba Mbetieli ba wanuhini halöwö fanuriaigö.

Itugu numalö ginötö, moguna khöma Mbetieli sabölö ebua. Börö daʼö, laʼandrö khöma ira Boto Solohe ba wangalui tanö si tobali nahia wangehaogö gödo ndraha sabölö ebua. Yaʼo hegöi pengawas percetakan, möi ndraʼaga ba nomo-omo si so ba zi fasui Mbetieli ba masofu hadia so zomasi mamawa tanöra. Hizaʼi, lö somasi mamawa. So samösa zangumaʼö khöma, ”Lö mamawa niha Cina. Hizaʼi, laʼöli naʼi naso.”

Hizaʼi, ba zi sambua ngaluo, so zalua si lö madöna-döna. So samösa zi faola omo si findra ba Amerika Serikat. Andrö wa isofu khöma hadia omasiga maʼöli danönia. Aefa daʼö, so zi faola omo tanö böʼö somasi mamawa tanönia ba ifarou göi zi faola omo tanö böʼö ba wamawa tanöra. Ba maʼöli danö niha sangumaʼö khöma, ”Lö mamawa niha Cina.” Ba zi lö arara, tölu kali abölö ebolo danö niʼokhögö gödo ndraha. Faduhu dödögu wa no ohitö dödö Yehowa daʼa.

Me 1950, yaʼo zabölö awuyu-wuyu sohalöwö ba Mbetieli. Iadaʼa, yaʼo hegöi foʼomogu zabölö atua. Lö irai maniasa ndraʼodo me no uʼoʼö Yesu gofu hezo ituturu lalagu. Hewaʼae lafofanödo ira satuagu ba nomo, ibeʼe khögu Yehowa nösi nomo sabölö ebua sangomasiʼö yaʼia. Sindruhu-ndruhu faduhu dödögu wa hasambalö ibeʼe fefu zoguna khöda Yehowa, gofu hadia halöwöda. Yaʼo hegöi Nora, maʼandrö sibai saohagölö khö Yehowa ba ngawalö waʼasökhi dödönia. Mafarou göi dödö niha böʼö enaʼö latandraigö Yehowa.​—Maleakhi 3:10.

Ba mböröta, no irai ikaoni samösa zanema pajak Yesu sotöi Mataiʼo Lewi enaʼö tobali soloʼö yaʼia. Hadia nifalua Mataiʼo? ”Ba iröi fefu, hadia ia, maoso ia, iʼoʼö.” (Luka 5:27, 28) Uʼokhögö göi ginötö ba wondröi fefu hadia ia ba woloʼö Yesu, ba ufarou niha böʼö ba wamalua simane daʼö enaʼö tola larasoi howu-howu sebua.