Yehowa Zondröniaʼö Ono Mbanuania

1, 2. (a) Hadia gamaehuta ndra Samaduhuʼö Yehowa ba agama böʼö? (b) Hadia nitutunöda ba wamahaʼö daʼa hegöi ba wamahaʼö migu föna?

ASESE manofu-nofu niha khö ndra Samaduhuʼö Yehowa, ”Haniha zondröniaʼö yaʼami?” Lasofu daʼö börö me oya agama nidöniaʼö ndra matua hegöi ira alawe iadaʼa. Hizaʼi, omasi ita tafaduhuʼö wa Sondröniaʼö yaʼita tenga niha si lö moʼahonoa. Sondröniaʼö yaʼita yaʼia daʼö Yesu Keriso! Iʼoʼö niwaʼö Namania hegöi Sondröniaʼö yaʼia, Yehowa.​—Mataiʼo 23:10.

² So göi ngawawa ndra matua nifotöi ’sawuyu si lö faröi ba satua-tua’. Yaʼira zondröniaʼö ono mbanua Lowalangi ba gulidanö irugi iadaʼa. (Mataiʼo 24:45) Hizaʼi, hezo tola taʼila wa sindruhu-ndruhu iʼodela Nononia Yehowa ba wondröniaʼö yaʼita? Datatutunö tölu ngawalö dandra sameʼe faduhu dödöda. Hewaʼae na niha gulidanö niʼogunaʼö Yehowa ba wondröniaʼö ono mbanuania, hizaʼi aboto ba dödöda wa lö tebulö tobali Sondröniaʼö satulö Yehowa ba nono mbanuania.​—Yesaya 58:11.

EHEHA NIʼAMONIʼÖ ZANGABÖLÖʼÖ YAʼIRA

3. Hadia zanolo Moze irege tola idöniaʼö ndraono Gizaraʼeli?

³ Ibeʼe gehehania Lowalangi khö genoninia. Ifili Moze Lowalangi ba wondröniaʼö ndraono Gizaraʼeli. Hadia zanolo yaʼia enaʼö iʼonorogö tödö halöwö sebua nibeʼe khönia andre? Ibeʼe Yehowa ’gehehania niʼamoniʼö’ khö Moze. (Baso Yesaya 63:11-14.) Börö me ehehania zanolo Moze, andrö wa tola taʼila wa sindruhunia Yehowa zondröniaʼö ono mbanuania.

4. Hadia zangoromaʼö wa no itema geheha siʼotarai khö Lowalangi Moze? (Faigi gambara ba wamobörö wamahaʼö.)

⁴ Hadia tola laʼila niha wa no itema geheha siʼotarai khö Lowalangi Moze? Tola! Ibeʼe gehehania niʼamoniʼö Yehowa irege tola ifalua Moze dandra sahöli-höli dödö hegöi ba wamaduhuʼö töi Lowalangi khö Waraʼo, samatörö ba danö Miserai. (II Moze 7:1-3) Eheha niʼamoniʼö zanolo Moze irege tobali ia sondröniaʼö safönu faʼomasi ba fanaha tödö. No aröu faehu ia moroi khö ndra sondröniaʼö ba mbanua böʼö sangokhögö amuata fakhögusa ba si lö sökhi! (II Moze 5:2, 6-9) Sindruhu-ndruhu wa no ifili Moze Yehowa ba wondröniaʼö ono mbanuania.

5. Haʼökhö manö ibeʼe geheha niʼamoniʼönia Yehowa ba wondröniaʼö ono mbanuania?

⁵ Haʼökhö nasa ibeʼe geheha niʼamoniʼö Yehowa ba wondröniaʼö ono mbanuania? Imane Sura Niʼamoniʼö, ”Ba fahöna geheha faʼatua-tua khö Yosua andrö, ono Nuni.” (V Moze 34:9) ”Ba so geheha Yehowa khö Gideono.” (Zanguhuku 6:34) Ba ”so geheha Yehowa khö Dawido”. (I Zamueli 16:13) Yaʼira andre laʼodaligö geheha Lowalangi ba wanolo yaʼira wamalua hadia ia zi tebai ikhamö faʼabölöra. (Yosua 11:16, 17; Zanguhuku 7:7, 22; I Zamueli 17:37, 50) Ba daʼa taʼila wa ha Yehowa zi tola mameʼe khöra faʼabölö ba wamalua halöwö sebua. Börö daʼö, sinangea na ha yaʼia nisuno.

6. Hana wa itötöna ba nono mbanuania Yehowa enaʼö lafosumange ndra sondröniaʼö yaʼira?

⁶ Hadia zinangea lafalua iraono Gizaraʼeli me laʼila wa no itema geheha Lowalangi Moze, Yosua, Gideono, hegöi Dawido? Sinangeania menaʼö na lafosumange ira. Me so zokökö-kökö khö Moze, imane Yehowa, ”Hawaʼara tebato wangoʼaya niha andrö yaʼo”? (IV Moze 14:2, 11) Ba daʼa taʼila wa ifili ndra matua Yehowa ba wondröniaʼö ono mbanuania. Na laʼoʼö niwaʼö ndra sondröniaʼö andre, ba daʼö oroma wa sindruhu-ndruhu laʼoʼö niwaʼö Yehowa, si no tobali Sondröniaʼö yaʼira.

ITOLO IRA MALAʼIKA

7. Hewisa wanolo ndra malaʼika Moze?

⁷ Ira malaiʼika, latolo niha si no tobali enoni Lowalangi. (Baso Heberaiʼo 1:7, 14.) Iʼogunaʼö malaʼikania Lowalangi ba wameʼe fanuturu lala khö Moze. Si oföna, samösa malaʼika ”sangoromaʼö yaʼia khönia, ba ngafu ndroi andrö”. Ba ibeʼe khönia halöwö ba wangefaʼö ndraono Gizaraʼeli hegöi ba wondröniaʼö yaʼira. (Halöwö Zinenge 7:35) Si dua, iʼogunaʼö malaʼikania Lowalangi ba wameʼe khö Moze Goroisa si tobali fanuturu lala ba ndraono Gizaraʼeli. (Galatia 3:19) Si tölu, imane khönia Yehowa, ”Ba ohe niha andrö ba niwaʼögu khöu; mowaö-waö fönau malaʼika andrö khögu.” (II Moze 32:34) Hewaʼae lö itutunö Sura Niʼamoniʼö wa no irai laʼila iraono Gizaraʼeli malaʼika andrö mazui löʼö, hizaʼi moroi ba wamahaʼö hegöi ba wanuturu lala nibeʼe Moze khöra, ba daʼa aboto ba dödöda wa latolo ia ira malaʼika.

8. Hadia nifalua malaʼika ba wanolo Yosua hegöi Hizikia?

⁸ Haniha manö nasa zi no irai latolo ira malaʼika? Imane Sura Niʼamoniʼö wa ”solohe sanuwö andrö, khö Yehowa”, samösa malaʼika, sanolo Yosua ba wasuwöta ba wolawa mbanua Kanaʼana. (Yosua 5:13-15; 6:2, 21) Aefa daʼö, ba ginötö mamatörö Razo Hizikia ba nono mbanua Lowalangi, ngahönö zaradadu Asiria sedöna manuwö mbanua Yeruzalema. Hizaʼi, ba zi sara wongi, samösa ’malaʼika Yehowa, ibunu 185.000’ zaradadu Asiria.​—II Razo 19:35.

9. Hewaʼae lö moʼahonoa genoni Lowalangi, hadia zi lö tola lö lafalua iraono Gizaraʼeli?

⁹ Moʼahonoa ndra malaʼika. Hizaʼi, lö moʼahonoa ndra matua nitolora. Duma-dumania, no irai lö ifosumange Yehowa Moze. (IV Moze 20:12) Lö iʼandrö wanuturu lala moroi khö Lowalangi Yosua ba ginötö fawuʼu li ia ba mbanua Gibeona. (Yosua 9:14, 15) No irai asiliawa Hizikia. (II Ngaʼötö 32:25, 26) Hewaʼae lö moʼahonoa ira, hizaʼi moguna lafosumange ira iraono Gizaraʼeli. Aboto ba dödö ndraono Gizaraʼeli wa iʼogunaʼö malaʼikania Yehowa ba wanolo ndra sondröniaʼö andrö. Ba daʼa oroma, wa Yehowa zondröniaʼö ono mbanuania.

TAROMALI LOWALANGI ZAMEʼE KHÖRA FANUTURU LALA

10. Hadia zangoromaʼö wa iʼoʼö Goi-goi Lowalangi Moze?

¹⁰ Taromali Lowalangi zameʼe fanuturu lala ba genoninia. Ba Zura Niʼamoniʼö Goi-goi nibeʼe ba ndraono Gizaraʼeli lafotöi ia ”Goroisa Moze”. (I Razo 2:3) Hizaʼi, itutunö Sura Niʼamoniʼö wa Yehowa zameʼe Goroisa andrö ba ndraono Gizaraʼeli. Moguna göi iʼoʼö Goroisa daʼö Moze. (II Ngaʼötö 34:14) Duma-dumania, me no aefa itutunö khönia Yehowa lala ba wangehaogö ose Lowalangi, iwaʼö Sura Niʼamoniʼö wa ”iʼoʼö sibai Moze niwaʼö Yehowa khönia; simanö wolaunia”.​—II Moze 40:1-16.

11, 12. (a) Hadia nifalua Yosua hegöi razo tanö böʼö samatörö ba nono mbanua Lowalangi? (b) Hewisa wameʼe Daromali Lowalangi fanuturu lala khö ndra matua si tobali samatörö?

¹¹ Ifahaʼö ia ba Daromali Lowalangi Yosua ba ginötö tobali ia sondröniaʼö. Ba imane khönia Yehowa, ”Öfatou-tou tödöu, bongi maʼökhö, enaʼö öʼalui woloʼö fefu hadia ia nitanö ba zura andrö.” (Yosua 1:8) Razo samatörö ono mbanua Lowalangi moguna labaso huku andrö ero maʼökhö, lasura ia, ba laʼoʼö ’daromali goroisa andrö, awö nifakhoi andrö, fefu’.​—Baso V Moze 17:18-20.

¹² Hewisa wameʼe Daromali Lowalangi fanuturu lala ba ndra matua si tobali sondröniaʼö? Angeraigö atö duma-duma Razo Yosia. Sekretaris Yosia, ibaso Goroisa Moze si no musöndra.a ”Ba me irongo razo niwaʼö ba zura Goroisa andrö, ba isika nukhania.” Taromali Lowalangi zamarou tödö Yosia ba wangohori fefu nadu ba mbanua daʼö, ba ifalua göi Gowasa Fasa sebua. (II Razo 22:11; 23:1-23) Börö me laoʼö Daromali Lowalangi ira Yosia hegöi awönia samatörö si lö faröi tanö böʼö, latehegö lawuʼai wanuturu lala nibeʼera ba nono mbanua Lowalangi. Si tobali mbuania, laʼoʼö Lowalangi iraono mbanuania.

13. Hadia gamaehutania samatörö ono mbanua Lowalangi moroi khö ndra samatörö mbanua böʼö?

¹³ Ha fangera-ngera niha gulidanö si no öna-öna si tobali fanuturu lala ba niha samatörö ba mbanua böʼö. Duma-dumania, niha samatörö ba mbanua Kanaʼana hegöi ono mbanuania samalua gamuata si lö sökhi. Lafalua gamuata wohorö ba gotalua zi fatalifusö, ba gurifö, hegöi ba wamalua faʼorudu ndra matua ba ndra matua. Labeʼe göi ndraonora tobali sumange nadu, ba lamosumange nadu. (III Moze 18:6, 21-25) Ira samatörö Mbabilona hegöi Miserai, lö laʼokhögö goi-goi sanandrösa ba waʼehao simane niʼokhögö nono mbanua Lowalangi. (IV Moze 19:13) Aboto ba dödö nono mbanua Lowalangi wa omasi ndra sondröniaʼö yaʼira si lö faröi enaʼö lö raʼiö lala wamosumange nifaluara, lö taʼunö mbotora ba latimbagö gamuata fohorö. Daʼa zangoromaʼö wa Yehowa zondröniaʼö yaʼira.

14. Hana wa ibeʼe degu-degu Yehowa khö ndra samatörö ono mbanuania?

¹⁴ So ösa razo samatörö ono mbanua Lowalangi si lö moloʼö fanuturu lala moroi khö Lowalangi. Razo si faröi andre, latimbagö wanuturu lala nibeʼe geheha niʼamoniʼö moroi khö Lowalangi, malaʼikania, ba Taromalinia. Irege ibeʼe khöra degu-degu Yehowa ba iheta ira tobali samatörö. (I Zamueli 13:13, 14) No ituyu Yehowa samösa zamatörö soʼahonoa ba zi so miföna.

NO ITUYU YEHOWA ZAMATÖRÖ SOʼAHONOA

15. (a) Hewisa wangoromaʼö ndra samaʼeleʼö wa hasambalö tohare samösa zamatörö soʼahonoa? (b) Haniha zamatörö soʼahonoa andrö?

¹⁵ Ngahönö fakhe faʼara, no ifabuʼu Yehowa wa hasambalö ituyu samösa zamatörö soʼahonoa ba nono mbanuania. Duma-dumania, imane Moze ba ndraono Gizaraʼeli, ”Iʼasogö dania khöu zamaʼeleʼö Lowalangiu, Yehowa, oi yaʼami, iwami, samaʼeleʼö simane yaʼodo; li daʼö dania mifondro-ndrongo.” (V Moze 18:15) Iwaʼö göi Yesaya wa Yaʼia andre dania tobali ”salawa ba samatörö”. (Yesaya 55:4) Ba no isura Danieli wa Mesia si tohare tobali ”Salawa”. (Danieli 9:25) Ba gafuriatania, ifaduhuʼö Yesu wa yaʼia andre ”Salawa” ba nono mbanua Lowalangi. (Baso Mataiʼo 23:10.) Faduhu dödö ndra nifahaʼö Yesu wa yaʼia andre nituyu Lowalangi irege laʼoʼö ia. (Yohane 6:68, 69) Hana wa tola faduhu dödöra wa Yesu Keriso andre zi no ituyu Yehowa si tobali samatörö ba nono mbanuania?

16. Hadia dandra wa so geheha niʼamoniʼö khö Yesu?

¹⁶ Eheha niʼamoniʼö zameʼe faʼabölö khö Yesu. Me tebayaigö idanö Yesu, iʼila Yohane wa ”tebokai mbanua si yawa, ba möi mitou ba khönia geheha, hulö marafadi”. Ba lö ara aefa daʼö, ”ifarou ia eheha, ba weʼamöi ba danö si mate”. (Mareko 1:10-12) Eheha niʼamoniʼö moroi khö Lowalangi zameʼe faʼabölö khö Yesu ba wamahaʼö hegöi ba wamalua tandra sahöli-höli dödö sagötö me so ia ba gulidanö. (Halöwö Zinenge 10:38) Aefa daʼö, eheha niʼamoniʼö zanolo Yesu ba wangoromaʼö faʼomasi, faʼowua-wua dödö, hegöi famati saro. (Yohane 15:9; Heberaiʼo 12:2) Lö hadöi samatörö tanö böʼö sangokhögö eheha niʼamoniʼö simane daʼö. Daʼa zangoromaʼö wa Yesu andre no ifili ia Yehowa tobali Samatörö.

17. Hadia nifalua ndra malaʼika ba wanolo Yesu?

¹⁷ Latolo Yesu ira malaʼika. Lö ara me no aefa tebayaigö idanö Yesu, ”la ondrasi ia malaʼika, möi ira ngoni-ngoninia”. (Mataiʼo 4:11) Ba mbongi fatua lö mate ia, ”toʼele khönia malaʼika, moroi ba zorugo, sangabölöʼö yaʼia”. (Luka 22:43) Faduhu dödö Yesu wa hasambalö ifatenge malaʼikania Yehowa ba wanolo yaʼia ba ginötö moguna khönia wanolo.​—Mataiʼo 26:53.

18, 19. Hewisa wangodaligö Yesu Daromali Lowalangi ba waʼauri hegöi ba wamahaʼönia?

¹⁸ Taromali Lowalangi zameʼe fanuturu lala khö Yesu. Iʼoʼö Yesu wanuturu lala moroi ba Zura Niʼamoniʼö, iʼotarai me ibörötaigö halöwö fanuriaigö irege me mate ia ba döla geu. Hewaʼae ba wamakao so ia, lö aetu itutunö wamaʼeleʼö sanandrösa khö Mesia. (Mataiʼo 4:4; 27:46; Luka 23:46) Niha sondröniaʼö ba agama ba götö daʼö, no aröu faehu ira moroi khö Yesu. Lö laʼogunaʼö nösi Daromali Lowalangi na no faehu daʼö moroi ba nifahaʼöra. Ibaso Daromali Lowalangi Yesu me itutunö sanandrösa ba nifaluara. Imane, ”Lafosumange ndraʼo bewera niha andrö, ba tödöra, ba no aröu khögu. Zaya-zaya gölö ba wamosumangera yaʼo, me no nifakhoi niha wamahaöra andrö.” (Mataiʼo 15:7-9) Lö ituyu Yehowa niha si lö moloʼö Taromalinia tobali samatörö ba nono mbanuania.

¹⁹ Iʼogunaʼö Daromali Lowalangi Yesu ba ginötö ifahaʼö niha. Me latandrawaisi ia ira sondröniaʼö ba agama, lö iʼogunaʼö wangera-ngerania samösa mazui si no irai itörö ba wameʼe khöra fanema li. Hizaʼi, ibeʼe wanema li moroi ba Zura Niʼamoniʼö. (Mataiʼo 22:33-40) Tola manö ahöli-höli dödö niha na itutunö Yesu waö-waö waʼaurinia ba zorugo hegöi ba womböwöi ulidanö maʼasagörö. Hizaʼi, börö me iʼomasiʼö sibai Daromali Lowalangi, andrö wa ifili ba wanutunö hadia ia zi no tesura ba Daromali andrö. Ba ”ibokai dödöra, fa aboto ba dödöra zi so ba zura”.​—Luka 24:32, 45.

20. (a) Hewisa wamosumange Yesu Yehowa? (b) Hadia gamaehuta mbua-bua Yesu khö Herode Agripa I?

²⁰ Hewaʼae ahöli-höli dödö niha samondro-ndrongo wamahaʼö Yesu, hizaʼi hasambalö isunö Yehowa si no mamahaʼö yaʼia. (Luka 4:22) Ba ginötö so samösa niha si kayo sangumaʼö khö Yesu ”samahaö si sökhi”, iforomaʼö wangide-ngideʼö Yesu ba itema linia imane, ”Hana wa öwaʼö si sökhi ndraʼo? Lö si sökhi, baero zi ha samösa andrö, Lowalangi.” (Mareko 10:17, 18) No aröu faböʼö mbua-bua Yesu moroi khö Herode Agripa I si tobali samatörö ba Yudea, walu fakhe me no aefa iwaʼö wehede daʼö Yesu. Samuza inötö, me so gangowuloa si tohude, iʼobaru mbaru razo sabölö sökhi Herode. Ba me laʼila ia ba melarongo linia, lamane niha, ”Li Lowalangi daʼö, ba tenga li niha.” Omasi Herode na la folakhömi ia niha. Hizaʼi hadia zalua? ”Ba iʼanemaiʼö ibözi ia malaʼika Zoʼaya, me tenga Lowalangi ifosumange; ba mate ia, niʼa guö-kuö.” (Halöwö Zinenge 12:21-23) Ba daʼa taʼila wa lö ituyu Herode Yehowa tobali samatörö. Hizaʼi, iʼoromaʼö Yesu wa yaʼia andre nituyu Lowalangi, ba hasambalö ifosumange Yehowa si tobali Samatörö Salawa ba nono mbanuania.

21. Hadia wamahaʼö khöda ba migu fönada?

²¹ Omasi Yehowa na Mamatörö Yesu tenga ha ba zi sabata. Me no aefa tesusugi ia, imane Yesu khö ndra nifahaʼönia, ”Fefu waʼabölö andre ba zorugo ba ba gulidanö, ba no mubeʼe khögu.” Imane nasa, ”Ba hiza, fao khömi ndraʼo, ero maʼökhö, irugi gamozua götö danö andrö.” (Mataiʼo 28:18-20) Börö me ba zorugo so Yesu ba lö hadöi si tola mangila yaʼia, hewisa wa tola mamatörö ia ba nono mbanua Lowalangi si so ba gulidanö? Haniha niʼogunaʼö Yehowa ba wo salahini Yesu ba gulidanö? Ba hewisa enaʼö laʼila ira niha Keriso haniha niha nifili Lowalangi andre? Fanema linia so ba wamahaʼö migu fönada.