Lala Wangogunaʼö hegöi Wondrorogöda Amuata si Bohou

1, 2. (a) Hewisa wa tola taʼila wa tola taʼokhögö gamuata si bohou? (b) Hadia manö mbua-bua moroi ba gamuata si bohou si tola tafahaʼö ita ba Kolose 3:10-14?

SO DUA kali muʼogunaʼö ngawua wehede ”amuata si bohou” ba Kitab Suci Terjemahan Dunia Baru. (Efeso 4:24; Kolose 3:10) Moʼamakhaita daʼa ba gamuata ’nifazökhi moloʼö somasi Lowalangi’. Hadia tola taʼokhögö gamuata si bohou? Tola. Ifazökhi niha Yehowa simane si fakhili-khili khönia, andrö wa tola taʼoʼö mbua-buania si sökhi.​—I Moze 1:26, 27; Efeso 5:1.

² Atulösa wa taʼokhögö gisö-isö dödö si fasala ero inötö börö me lö moʼahonoa ita. Tedönisi göi ita börö niha si so ba zi fasuida. Hizaʼi, börö wanolo moroi ba waʼahakhö dödö Yehowa, tola tobali ita niha somasi ia. Ba wanolo yaʼita ba wamalua daʼa, datatutunö hadia manö mbua-bua moroi ba gamuata si bohou. (Baso Kolose 3:10-14.) Aefa daʼö, taʼila göi dania hewisa wangoromaʼöda mbua-bua daʼö ba halöwö ba wamati nifaluada.

”DOZI AMI SA, BA HA SAMÖSA”

3. Hadia sambua mbua-bua moroi ba gamuata si bohou?

³ Itutunö Faulo wa moguna sibai falöʼebua dödö zambuana ba wangokhögö amuata si bohou. Imane, ”Lö dawa Heleni ba lö niha Yehuda, ba lö niboto ba lö si lö muboto, lö niha böʼö, ba lö Sikito, lö sawuyu, ba lö si tenga sawuyu.”a (Faigi nisura ba gahe zura.) Ba mbanua niha Keriso, lö hadöi niha sangumaʼö wa abölö tohude ia moroi ba niha böʼö börö soi, banua mazui halöwö nitemania. Hadia mbörö? Börö me yaʼita soloʼö khö Keriso, ”ha samösa” ita.​—Kolose 3:11; Galatia 3:28.

4. (a) Hadia zinangea lafalua ira samosumange Yehowa ba niha böʼö? (b) Hadia zalua irege abua ba niha Keriso ba wangokhögö fahasara dödö?

⁴ Ba ginötö taʼogunaʼö gamuata si bohou ba waʼaurida, tafosumange ba taʼameʼegö tödö fefu niha gofu hadia ia soi mazui lala waʼaurira ba zilalö. (Roma 2:11) So ösa soi ba zi sagörö ulidanö, abua khöra wamalua daʼö. Duma-dumania, ba zilalö ba Afrika Selatan, labeʼe nahia si faböʼö ira samatörö ba niha si faböʼö soi. Ato niha si toröi ba mbanua daʼö, duma-dumania manö ira Samaduhuʼö Yehowa. Omasi ndra Boto Solohe ba wamarou tödö ndra talifusöda enaʼö ”labokai dödöra”. Andrö, me baŵa si Fulu 2013, latehegö mufalua wamohouni si no mutatugöi sanolo ndra talifusöda si faböʼö-böʼö soi enaʼö itugu ahatö ira khö nawöra.​—II Korindro 6:13.

5, 6. (a) Hadia zi no mutatugöi ba zi sambua soi sanolo ono mbanua Lowalangi enaʼö itugu laʼokhögö wahasara dödö? (Faigi gambara ba wamobörö wamahaʼö.) (b) Hadia mbuania?

⁵ Ira talifusöda ira matua latatugöi ginötö enaʼö hari satu ba migu, ira Samaduhuʼö ba zi dombua mbanua niha Keriso si faböʼö li hegöi soi, tola faoma laʼogunaʼö ginötöra ba wariawösa. Ira talifusöda andre fao ira ba wanuriaigö, weʼamöi ba gangowuloa ba faoma laʼondrasi nomo nawöra. Ngaotu mbanua niha Keriso si fao, ba oya duria si sökhi nitema gödo ndraha. Ahöli-höli göi dödö niha baero si tenga Samaduhuʼö. Duma-dumania, imane samösa menteri agama, ”Yaʼodo tenga samösa Samaduhuʼö, hizaʼi ufaduhuʼö wa sindruhu-ndruhu toföfö halöwö fanuriaigö nifaluami ba so khömi wahasara dödö hewaʼae faböʼö-böʼö soimi.” Hewisa dödö ndra talifusöda ba zi no mutatugöi andre?

⁶ Ba wamobörö, alawö zi samösa dalifusöda ira alawe sotöi Noma sangogunaʼö li Xhosa ba wogaoni ndra Samaduhuʼö moroi ba mbanua niha Keriso sangogunaʼö li Inggris weʼamöi ba nomonia si no ide-ide. Hizaʼi, me no aefa fao ia manuriaigö khö ndra Samaduhuʼö safusi uli ba me no iʼondrasi nomora, so khönia waʼahono dödö. Imane, ”Yaʼira niha si toʼölö simane yaʼita!” Andrö, me möi manuriaigö ndra talifusöda moroi ba mbanua niha Keriso sangogunaʼö li Inggris ba mbanua niha Keriso sangogunaʼö li Xhosa, ikaoni ira Noma weʼamöi manga ba nomonia. Ahöli-höli dödönia me iʼila wa so ba gotalua nikaoninia yaʼia daʼö samösa satua sokubaloi safusi uli, somasi modadao tou ba baku-baku sadogo-dogo. Börö me lö aetu lafalua daʼa, ato ndra talifusöda zangokhögö fariawösa si bohou ba itugu aboto ba dödöra nawöra hewaʼae faböʼö-böʼö lala waʼaurira ba zilalö.

OKHÖGÖ WAʼAHAKHÖ DÖDÖ HEGÖI FAʼEBUA DÖDÖ

7. Hana wa moguna lö aetu-aetu taforomaʼö waʼahakhö dödö?

⁷ Fatua lö tedudugö gulidanö nifatörö Zatana, oya wanandraigö nitaögö nono mbanua Yehowa. Lö hadöi lala halöwö, fökhö sabölö-bölö, folohi, bencana alam, faʼahori gokhöta börö waʼalösökhi mazui fanandraigö tanö böʼö si tola molua-lua ba waʼaurida. Enaʼö faoma tatolo nawöda na alua wanandraigö, moguna taʼokhögö waʼahakhö dödö. Faʼahakhö dödö zamarou yaʼita ba wangoromaʼö faʼebua dödö ba niha böʼö. (Efeso 4:32) Daʼa mbua-bua moroi ba gamuata si bohou sanolo yaʼita ba woloʼö Lowalangi hegöi ba wondrara tödö niha böʼö.​—II Korindro 1:3, 4.

8. Hadia mbua si sökhi na taforomaʼö waʼahakhö dödö hegöi faʼebua dödö ba mbanua niha Keriso? Beʼe duma-duma.

⁸ Hewisa wangoromaʼöda faʼebua dödö ba mbanua niha Keriso si fao ita na so niha si findra moroi ba soi böʼö mazui na so niha sambö moharazaki? Omasi ita tatemaʼö ira, fariawö khöra, ba tatolo ira enaʼö laʼila wa moguna sibai ira ba mbanua niha Keriso. (I Korindro 12:22, 25) Duma-dumania, findra Dannykarl moroi ba Filipina möi ia ba Jepang. Börö me niha si fatewu ia, lö lafalua khönia simane nifalua khö ndra awönia sohalöwö tanö böʼö. Hizaʼi, iʼondrasi gangowuloa ndra Samaduhuʼö Yehowa. Imane Dannykarl, ”Arakhagö niha Jepang fefu zangondrasi gangowuloa daʼö, hizaʼi latemaʼö ndraʼo si fao faʼowua-wua dödö hulö zi no ara falukha ira khögu.” Faʼebua dödö moroi khö ndra talifusöda zanolo yaʼia irege itugu ahatö ia khö Yehowa. Tebayagö idanö Dannykarl, ba no tobali ia satua sokubaloi iadaʼa. Omuso dödö ndra awönia satua sokubaloi börö me yaʼia hegöi foʼomonia Jennifer, tola orudu ira ba mbanua niha Keriso. Lamane, ”Laʼöna-önaiʼö sibai waʼaurira tobali perintis ba labeʼe duma-duma si sökhi ba wangofönaiʼö wangalui Banua Lowalangi.”​—Luka 12:31.

9, 10. Tutunö duma-duma moroi ba mbua si sökhi salua na taforomaʼö waʼahakhö dödö ba wanuriaigö.

⁹ Taʼokhögö ginötö ba wamalua si sökhi ”ba niha fefu” na taturiaigö duria somuso dödö sanandrösa ba Mbanua Lowalangi. (Galatia 6:10) Ato ndra Samaduhuʼö sahakhö tödö ba niha imigran irege lafahaʼö ira ba li niʼogunaʼöra. (I Korindro 9:23) Latema mbua si sökhi ba nifaluara andrö. Duma-dumania, talifusöda ira alawe perintis ba Australia sotöi Tiffany, ifahaʼö ia ba li Swahili enaʼö tola itolo mbanua niha Keriso sangogunaʼö li Swahili si so ba mbanua Brisbane. Hewaʼae moguna iforege wamahaʼö yaʼia, hizaʼi itugu moʼeluaha waʼaurinia. Imane Tiffany, ”Na omasiʼö adöni dödömö ba wanuriaigö, sökhi na ötolo mbanua niha Keriso sangogunaʼö li böʼö. Na öfalua daʼa, hulö zanörö-nörö ndraʼugö hizaʼi lö moguna öröi mbanuamö. Tola örasoi waʼafatalifusötada ba zi sagörö ulidanö ba öʼila samösa hewisa wahasara dödö salua.”

¹⁰ So sambua fongambatö ba Jepang samalua simane daʼö. Imane Sakiko, onora alawe, ”Asese falukha ndraʼaga ba niha imigran Brasil na möiga manuriaigö. Me maforomaʼö khöra ayati simane Famaʼeleʼö 21:3, 4 mazui Zinunö 37:10, 11, 29 ba li Portugis, laʼameʼegö tödö sibai ba itaria mowöi nidanö höröra.” Börö me so khöra waʼahakhö dödö ba niha imigran ba omasi ira latolo enaʼö laʼila zindruhu, andrö wa lafahaʼö ira sambua omo ba li Portugis. Aefa daʼö, fao ira ba wanolo irege tefazökhi mbanua niha Keriso sangogunaʼö li Portugis. Ba zi hauga fakhe, ato niha imigran si no latolo tobali samosumange Yehowa. Imane Sakiko, ”Oya nifaluama ba wamahaʼö yaʼaga ba li Portugis, hizaʼi abölö oya nasa howu-howu nitemama. Maʼandrö sibai saohagölö khö Yehowa.”​—Baso Halöwö Zinenge 10:34, 35.

OKHÖGÖ WANGIDE-NGIDEʼÖ

11, 12. (a) Hana wa moguna atulö lala wangera-ngerada sanandrösa ba wangokhögö gamuata si bohou? (b) Hadia zanolo yaʼita enaʼö lö mamalö taʼokhögö wangide-ngideʼö?

¹¹ Ohitö dödöda ba wangokhögö gamuata si bohou yaʼia daʼö enaʼö tefosumange Yehowa, tenga enaʼö lasuno ita. Törö tödömö wa malaʼika soʼahonoa manö tola iʼokhögö waʼasiliawa ba ifalua zala. (Fatimbaisi Hezekieli 28:17.) Lö moʼahonoa ita, andrö wa abua sibai khöda ba wanimbagö faʼasiliawa. Hizaʼi, tola taʼokhögö wangide-ngideʼö ba waʼaurida. Hadia zanolo yaʼita ba wamalua daʼö?

¹² Sambua lala sanolo yaʼita ba wangokhögö fangide-ngideʼö yaʼia daʼö tabaso Daromali Lowalangi ero maʼökhö ba taʼangerönusi daʼö. (V Moze 17:18-20) Sabölö taʼangerönusi yaʼia daʼö hadia nifahaʼö Yesu khöda hegöi duma-duma fangide-ngideʼö nifaluania. (Mataiʼo 20:28) So wangide-ngideʼö khö Yesu me isasai gahe ndra nifahaʼönia. (Yohane 13:12-17) Lala tanö böʼö si tola tafalua yaʼia daʼö taʼandrö khö Yehowa gehehania. Ehehania zanolo yaʼita ba wolawa fangera-ngera wa abölö tohude ita moroi ba niha böʼö.​—Galatia 6:3, 4; Filifi 2:3.

13. Hadia manö mbua moroi ba wangide-ngideʼö?

¹³ Baso Gamaedola 22:4. Iʼandrö khöda Yehowa enaʼö taʼokhögö wangide-ngideʼö. Oya mbua moroi ba wangide-ngideʼö. Na so khöda wangide-ngideʼö, itugu so wahasara dödö hegöi faʼatulö ba mbanua niha Keriso. Ibeʼe göi khöda Yehowa waʼebua dödönia si tenga sinangea tatema. Imane sinenge sotöi Fetero, ”Ba dozi ami, ba faoma miʼolembe wa lö fayawa andrö ba khö nawömi; itimba sa Lowalangi zi fayawa, ba iʼebuaʼö dödönia ba zangide-ngideʼö yaʼira.”​—I Fetero 5:5.

OKHÖGÖ WAʼEBOLO DÖDÖ HEGÖI FANAHA TÖDÖ

14. Haniha duma-duma sabölö sökhi sangokhögö faʼebolo dödö hegöi fanaha tödö?

¹⁴ Ba gulidanö daʼa, na so niha sebolo tödö hegöi sanaha tödö, hulö niha si lö faʼabölö ira ba wamaigi niha. Hizaʼi, lö atulö daʼö. Daʼa mbua-bua si sökhi moroi khö Yehowa, Lowalangi fondrege zabölö ba mbanua siawa awö danö. Yaʼia duma-duma sabölö sökhi sangokhögö faʼebolo dödö hegöi fanaha tödö. (II Fetero 3:9) Duma-dumania, angeraigö hewisa waʼebolo dödö Yehowa me iʼogunaʼö malaʼikania ba wameʼe fanema li khö Gaberahamo hegöi Loti. (I Moze 18:22-33; 19:18-21) Angeraigö göi waʼebolo dödö Yehowa ba wa lö moloʼö ndraono Gizaraʼeli ba zi töra 1.500 fakhe.​—Hezekieli 33:11.

15. Hadia duma-duma nibeʼe Yesu ba wangoromaʼö faʼebolo dödö hegöi fanaha tödö?

¹⁵ Yesu no niha ”sebolo tödö”. (Mataiʼo 11:29) Sindruhu-ndruhu so khönia wanaha tödö ba zoʼamböta niʼokhögö ndra nifahaʼönia. Sagötö fanuriaigönia ba gulidanö, asese lafatou-tou ba laböbögö khönia zi lö duhu. Hizaʼi, lö mamalö ebolo dödönia ba so khönia wanaha tödö irugi waʼamatenia. Me irasoi waʼafökhö ba döla geu, iʼandrö khö Namania enaʼö iʼefaʼö zala niha samunu yaʼia. Imane, ”Löʼö sa laʼila hadia nilaura.” (Luka 23:34) Hewaʼae ba waʼabu dödö mazui ba waʼafökhö so Yesu, lö mamalö so khönia waʼebolo dödö hegöi fanaha tödö.​—Baso I Fetero 2:21-23.

16. Hewisa wangoromaʼöda faʼebolo dödö hegöi fanaha tödö?

¹⁶ Itutunö Faulo sambua lala si tola tafalua ba wangoromaʼö faʼebolo dödö hegöi fanaha tödö me isura, ’Faoma mibologö dödömi khö nawömi, ba faoma miʼefaʼö zala nawömi khömi, na so zinegu zamösana khö nawönia; simane fangefaʼö Yehowa khömi, simanö göi ami.’ (Kolose 3:13) Ba wangefaʼö zala niha böʼö, moguna taʼokhögö waʼebolo dödö hegöi fanaha tödö. Daʼa zangaʼasogö hegöi sondrorogö fahasara dödö ba mbanua niha Keriso.

17. Hana wa moguna waʼebolo dödö hegöi fanaha tödö?

¹⁷ Omasi Yehowa na taforomaʼö waʼebolo dödö hegöi fanaha tödö ba niha böʼö. Daʼa mbua-bua sinangea taʼokhögö na omasi ita auri ba gulidanö si bohou. (Mataiʼo 5:5; Yakobo 1:21) Na so khöda waʼebolo dödö hegöi fanaha tödö, tafosumange Yehowa ba tatolo niha böʼö wamalua simane daʼö.​—Galatia 6:1; II Timoteo 2:24, 25.

OKHÖGÖ WAʼOMASI

18. Hadia gamakhaita waʼomasi ba wa lö ebua dödö zambuana?

¹⁸ Fefu mbua-bua nitutunöda, moʼamakhaita ia ba waʼomasi. Duma-dumania, ibeʼe mene-mene khö ndra talifusönia Yakobo börö me abölö sökhi nifaluara ba niha si kayo moroi ba niha si numana. Itutunö wa möi folawa goi-goi Lowalangi daʼö ba ’wangomasiʼö niha böʼö simane faʼomasiu ndraʼugö’. Imane nasa, ”Na miʼebuaʼö dödömi zambuana, ba mamazökhi horö ami.” (Yakobo 2:8, 9) Na taʼomasiʼö niha, böi so khöda wanahö-nahö tödö ba niha böʼö börö zekola, soi mazui dadaomania. Moguna soroi ba dödö wamaluada gamuata falöʼebua dödö zambuana.

19. Hana wa moguna sibai taʼokhögö waʼomasi?

¹⁹ Faʼomasi göi ”no sebolo tödö, no sebua tödö” ba ’lö faʼasiliawa’. (I Korindro 13:4) Moguna so khöda wanaha tödö, faʼebolo dödö hegöi fangide-ngideʼö ba wamaʼema turia somuso dödö ba niha böʼö. (Mataiʼo 28:19) Mbua-bua daʼa zanolo yaʼita enaʼö aoha khöda wariawösa khö ndra talifusöda fefu ba mbanua niha Keriso. Na fefu ita taforomaʼö waʼomasi, so wahasara dödö ba mbanua niha Keriso ba möi famosumange Yehowa. Tola laʼila niha böʼö wahasara dödöda ba tola ahatö ira ba zindruhu. Tefaudu daʼa ba rahu-rahu nitutunö Zura Niʼamoniʼö sanandrösa ba gamuata si bohou me imane, ”Ba baero daʼö fefu, ba faʼomasi; daʼö wamaböbö faʼamoʼahonoa.”​—Kolose 3:14.

”NIBOHOUNI AMI”

20. (a) Hadia manö wanofu-nofu sinangea tasofu khöda samösa? Hana? (b) Hadia dötönafö si sökhi nitötönada?

²⁰ Moguna tasofu khöda samösa, ’Hadia nasa zinangea ubulöʼö enaʼö tola uheta ba uröi gamuata si tohöna?’ Moguna mangandrö ita khö Yehowa ba taʼandrö enaʼö itolo ita. Moguna taforege ba wombulöʼö fangera-ngera hegöi amuatada si fasala irege tola ’tasöndra Mbanua Lowalangi’. (Galatia 5:19-21) Moguna göi tasofu khöda, ’Hadia lö mamalö ubohouni lala wangera-ngeragu enaʼö omuso dödö Yehowa?’ (Efeso 4:23, 24) Lö moʼahonoa ita. Andrö wa moguna taforege ba wangogunaʼö hegöi ba wondrorogö gamuata si bohou. Lö aetu-aetu wamalua daʼa. Omuso sibai dödöda na fefu niha ba zi so miföna laʼokhögö gamuata si bohou ba laʼoʼö mbua-bua Yehowa si sökhi ba soʼahonoa!