Sabölö Sa Daromali Lowalangi

1. Hana wa tola faduhu dödömö ba waʼabölö Daromali Lowalangi? (Faigi gambara ba wamobörö wamahaʼö.)

FADUHU dödö nono mbanua Yehowa wa taromalinia, yaʼia daʼö turia nibeʼenia ba niha gulidanö, ’auri ba abölö’. (Heberaiʼo 4:12) Tola taʼila waʼabölö Zura Niʼamoniʼö ba waʼaurida samösa hegöi ba niha böʼö. Fatua lö tobali Samaduhuʼö, so ösa zi tobali sanagö, sandru ba narkoba mazui samalua fohorö. So göi niha si kayo mazui si tehöngö, hizaʼi larasoi wa lö hadöi eluaha waʼaurira. (Zangombakha 2:3-11) Omuso dödöda börö me ato niha zafatö tödö ba zilalö, laʼokhögö dötönafö ba fanuturu lala ba waʼaurira iadaʼa. Ba Manuriaigö, oya waö-waö si sökhi andre si no tabaso ba seri artikel ”Sura Niʼamoniʼö Zombulöʼö Faʼauri”. Hewaʼae no tobali ira niha Keriso, moguna nasa laforege ba wangogunaʼö Sura Niʼamoniʼö enaʼö itugu aro wahuwusara khö Yehowa.

2. Hewisa waʼabölö Daromali Lowalangi ba wanolo niha ba götö siföföna?

² Lö ahöli-höli dödöda na ato niha zamalua fombulöʼö sebua ba waʼaurira me no aefa lafahaʼö ira ba zindruhu. Ira talifusöda ba götö siföföna sangokhögö dötönafö ba zorugo, lafalua göi daʼa. (Baso I Korindro 6:9-11.) Me itutunö Faulo sanandrösa ba niha si tebai möi ba Mbanua Lowalangi, imane ”Ba no simanö ösa ami föna.” Taromali Lowalangi hegöi eheha niʼamoniʼö zanolo yaʼira ba wombulöʼö faʼaurira. Hizaʼi, hewaʼae no tobali ira niha Keriso, so ösa zamalua horö sebua irege molua-lua daʼö ba wahuwusara khö Yehowa. Duma-dumania, itutunö Sura Niʼamoniʼö samösa dalifusöda ira matua si no mubayoini niʼefasi ba gangowuloa. Hizaʼi, ba gafuriata ibulöʼö lala waʼaurinia ba ifuli latemaʼö ia ba mbanua niha Keriso. (I Korindro 5:1-5; II Korindro 2:5-8) Tatu tefarou dödöda me so ndra talifusöda si no mombulöʼö faʼaurira börö waʼabölö Daromali Lowalangi.

3. Hadia nitutunöda ba wamahaʼö daʼa?

³ Ebua sibai waʼabölö Daromali Lowalangi. Börö me no buala nibeʼe Yehowa daʼa khöda, omasi ita tahaogö wangogunaʼö yaʼia. (II Timoteo 2: 15) Ba wamahaʼö daʼa tatutunö hewisa wangogunaʼöda faʼabölö Zura Niʼamoniʼö (1) ba waʼaurida, (2) ba wanuriagö, hegöi (3) ba wamaʼema huhuo. Famahaʼö daʼa zanolo yaʼita ba wangoromaʼö faʼomasi hegöi fangandröda saohagölö khö Namada si so ba zorugo, samahaʼö yaʼita ba zoguna khöda.​—Yesaya 48:17.

BA WAʼAURIDA

4. (a) Hadia nifaluada enaʼö tatema wanolo ba Daromali Lowalangi? (b) Hewisa wangogunaʼömö inötömö ba wombaso Sura Niʼamoniʼö?

⁴ Enaʼö tatema wanolo ba Daromali Lowalangi, moguna tatatugöi ginötö ba wombaso yaʼia. Tabaso ia ero maʼökhö. (Yosua 1:8) Ato ba gotaluada zoya halöwö. Hizaʼi, böi tatehegö gofu hadia ia, simane noro dödöda, möi fanaisida ba wombaso Sura Niʼamoniʼö. (Baso Efeso 5:15, 16.) Tola tabaso ia si hulö wongi, ba zi laluo, mazui ba zi bongi. Fao dödöda ba niwaʼö zanura sinunö me isura, ”Ha lö omasido goroisamö andrö! Maʼö-maʼökhö lö aefa ba dödögu.”​—Zinunö 119:97.

5, 6. (a) Hana wa moguna so khöda woʼangerönusi? (b) Hewisa enaʼö itugu moʼeluaha woʼangerönusi nifaluada? (c) Hewisa wa möi fanolomö na öbaso ba öʼangerönusi Zura Niʼamoniʼö?

⁵ Hizaʼi, tenga ha asala tabaso Zura Niʼamoniʼö. Moguna taʼangerönusi mazui tahaogö taʼangeraigö hadia zi no tabaso. (Zinunö 1:1-3) Daʼa zanolo yaʼita ba wamalua hadia zi no tabaso ba Zura Niʼamoniʼö. Andrö, gofu hezoso tabaso Zura Niʼamoniʼö, he ba zi no mucetak mazui ba fakake elektronik, omasi ita tatehegö ibulöʼö ba ifarou dödöda Taromali Lowalangi.

⁶ Hewisa enaʼö itugu moʼeluaha woʼangerönusi nifaluada? Ba ginötö tabaso Zura Niʼamoniʼö, moguna tabatogö ba tasofu khöda samösa, ’Hadia wamahaʼö khögu sanandrösa khö Yehowa ba ayati daʼa? Hewisa wamaluagu ba waʼaurigu hadia zi no ubaso? Hadia zinangea ubulöʼö?’ Na taʼangerönusi Daromali Lowalangi ba na taʼohe ba wangandrö hadia nibasoda, omasi ita tafalua daʼö. Ba tola tarasoi waʼabölö Zura Niʼamoniʼö ba waʼaurida.​—II Korindro 10:4, 5.

BA WANURIAIGÖ

7. Hewisa wangogunaʼöda Taromali Lowalangi ba wanuriaigö?

⁷ Moguna asese taʼogunaʼö Daromali Lowalangi ba ginötö manuriaigö hegöi na tafahaʼö niha. Imane samösa talifusöda ira matua, ”Na fao ndraʼugö manuriaigö khö Yehowa ba nomo-omo misa, hadia ha yaʼugö manö zi fahuhuo mazui ötehegö khönia fahuhuo?” Na tabaso Zura Niʼamoniʼö khö zi samösa niha, no tatehegö fahuhuo khönia Yehowa. Ayati si no tahaogö tafili, abölö moguna ia moroi ba ngawalö niwaʼöda. (I Tesalonika 2:13) Ba ginötö ölau manuriaigö, hadia öforege enaʼö asese öbaso Zura Niʼamoniʼö?

8. Hana wa tenga ha asala tabaso manö ayati Zura Niʼamoniʼö na möi ita manuriaigö?

⁸ Hewaʼae simanö, tenga ha asala tabaso Zura Niʼamoniʼö ba niha nifalukhaisida. Ato niha si lö mangila eluaha nösi Zura Niʼamoniʼö. No alua daʼa ba götö föna hegöi ba götöda iadaʼa. (Roma 10:2) Böi alio halö gangetula wa no aboto ba dödö zokhö omo ayati nibasoda. Tola tatolo ia na tatandrösaigö ngawua wehede si tohude moroi ba ayati daʼö ba tatutunö hadia geluahania. Na tafalua daʼö, tola tofakha ba dödö hegöi ba wangera-ngerania Daromali Lowalangi.​—Baso Luka 24:32.

9. Hewisa wanoloda niha böʼö enaʼö laʼameʼegö tödö Zura Niʼamoniʼö moroi ba wehede famasao niʼogunaʼöda fatua lö tabaso sambua ayati? Beʼe duma-duma.

⁹ Fehede famasao niʼogunaʼöda fatua lö tabaso ayati, möi fanolo zokhö omo ba woʼameʼegö tödö Zura Niʼamoniʼö. Duma-dumania, tola tamane, ”Datafaigi hadia niwaʼö Zomböi ba nidunö-dunöda andre.” Mazui, na fahuhuo ita ba niha si tenga niha Keriso, tola tamane, ”Datafaigi hadia niwaʼö Kitab Suci khöda.” Na falukha ita ba niha si lö moʼameʼegö tödö agama, tola tasofu khönia, ”Hadia no irai örongo wehede si sökhi andre?” Na tatörö tödöda wa faböʼö-böʼö lala waʼauri zi samösa niha hegöi hadia nifaduhusira tödö, omasi ita taforege ba wamalua hadia zi tola tafalua ba wangalui fehede famasao si tefaudu.​—I Korindro 9:22, 23.

10. (a) Hadia zi no irai alua khö zi samösa dalifusöda ira matua? (b) Hadia no irai örasoi waʼabölö Daromali Lowalangi ba wanuriaigö nifaluamö?

¹⁰ Ato zi no morasoi wa so mbuania na laʼogunaʼö Daromali Lowalangi ba wanuriaigö. Duma-dumania, möi samösa dalifusöda ira matua ba wamalukhaisi niha salawa döfi si no asese mombaso mbukuda ba zi no hauga fakhe. Samuza inötö, moroi na ha ibeʼe mbuku Manuriaigö si bohou, ihalö gangetula talifusöda andrö ba wombaso sambua ayati. Ibaso II Korindro 1:3, 4, sangumaʼö, ”Ama waʼahakhö dödö andrö, Lowalangi wondrara dödö, fefu, sondrara tödöma, ba waʼafökhö andrö fefu khöma.” Tofakha ba dödö niha salawa döfi andrö ayati daʼa. Iʼandrö khö dalifusöda enaʼö ifuli ibaso ayati daʼö. Iwaʼö wa yaʼia hegöi foʼomonia moguna khöra wondrara dödö. Börö ayati daʼa, omasi ia iʼila abölö oya sanandrösa ba Zura Niʼamoniʼö. Oya mbua nitemada na taʼogunaʼö Daromali Lowalangi ba wanuriaigö!​—Halöwö Zinenge 19:20.

BA WAMAʼEMA HUHUO

11. Hadia noro dödö niʼokhögö ndra talifusöda sangolohesi huhuo?

¹¹ Omasi ita taʼondrasi gangowuloa, kebaktian wilayah hegöi kebaktian regional. Dani siföföna wa taʼondrasi yaʼia daʼö ba wamosumange Yehowa. Tatema göi mbua moroi ba nifaʼema ba daʼö. Andrö, ira talifusöda sangolohesi huhuo, laʼokhögö halöwö si tohude hegöi noro dödö sebua. (Yakobo 3:1) Moguna teʼodane-dane huhuora moroi ba Daromali Lowalangi. Na öʼokhögö halöwö daʼa, hewisa wangogunaʼömö faʼabölö moroi ba Zura Niʼamoniʼö enaʼö tofakha ba dödö niha hadia huhuo nifaʼemamö?

12. Hadia nifalua niha sangolohesi huhuo enaʼö teʼodane-dane moroi ba Zura Niʼamoniʼö hadia nifaʼemania?

¹² Moguna sibai laʼogunaʼö Zura Niʼamoniʼö gofu hadia huhuo niʼolohesi. (Yohane 7:16) Andrö, haogö angenanöi enaʼö waö-waö waʼauri, duma-duma mazui lala niʼogunaʼömö ba wamaʼema huhuo lö tohude ia moroi ba Zura Niʼamoniʼö. Törö göi tödömö wa fombaso moroi ba Zura Niʼamoniʼö faböʼö ira na mamahaʼö moroi ba Zura Niʼamoniʼö. Sindruhunia, na talafo oya öbaso ayati, tola manö olifu ira daʼö. Andrö, haogö fili ayati niʼogunaʼömö. Ogunaʼö ginötö ba wombaso, ba wanutunö, ba wameʼe duma-duma hegöi ba wanutunö lala wamalua yaʼia. (Nehemia 8:8) Na huhuo niʼolohesimö moroi ba zi sambua rangka, moguna öfahaʼö ndraʼugö ba rangka hegöi ba ayati niʼogunaʼö ba daʼö. Haogö botokhi ba dödömö hadia gamakhaita rangka ba ayati si no tehenaigö, ba ogunaʼö ayati daʼö ba wanutunö duho siföföna moroi ba rangka andrö. (Tola öʼila mene-mene si sökhi ba pelajaran 21 irugi 23 moroi ba mbuku Memperoleh Manfaat dari Pendidikan Sekolah Pelayanan Teokratis.) Sabölö moguna, andrö wanolo moroi khö Yehowa ba wamaʼema fangera-ngerania si sökhi moroi ba Zura Niʼamoniʼö.​—Baso Gesera 7:10; Gamaedola 3:13, 14.

13. (a) Hewisa wa möi fanolo dalifusöda ira alawe ayati nirongonia ba gangowuloa? (b) Hadia mbuania khöu me muʼogunaʼö Zura Niʼamoniʼö ba gangowuloa?

¹³ Oya zi lö sökhi salua khö zi samösa dalifusöda ira alawe si toröi ba Australia me ide-ide ia. Hewaʼae no tobali ia Samaduhuʼö Yehowa, lö faduhu dödönia wa iʼomasiʼö ia Yehowa. Ba gangowuloa, irongo sambua ayati si tofakha ba dödönia. Iʼangerönusi daʼö ba ifalua riset irege oya ayati tanö böʼö nibasonia ba Zura Niʼamoniʼö. Ba gafuriata, faduhu dödönia wa iʼomasiʼö ia Yehowa.a (Faigi nisura ba gahe zura.) Hadia so ayati si no irai örongo si tofakha ba dödömö me öʼondrasi gangowuloa, kebaktian wilayah mazui kebaktian regional?​—Nehemia 8:12.

14. Hewisa wangoromaʼöda foʼameʼegö tödö hegöi faʼomasida ba Daromali Yehowa?

¹⁴ Taʼandrö saohagölö khö Yehowa me no ibeʼe khöda Daromalinia, Sura Niʼamoniʼö. Ifabuʼu wa lö tebulö daʼö, ba hasambalö ifalua hadia nifabuʼunia. (I Fetero 1:24, 25) Andrö, omasi ita tatatugöi ginötöda ba wombaso Sura Niʼamoniʼö, tafalua ia ba waʼaurida, ba taʼogunaʼö daʼö ba wanolo niha böʼö. Na tafalua daʼa, no taforomaʼö wa sindruhu-ndruhu taʼomasiʼö ba taʼameʼegö tödö mbuala andre hegöi Samazökhi yaʼia, Lowalangi Yehowa.