”Taʼomasiʼö Nawöda . . . ba Nilauda Khönia Taʼomasiʼö Ia, ba Sindruhu-ndruhu”

1. Hadia waʼomasi sabölö alawa? Tutunö. (Faigi gambara ba wamobörö wamahaʼö.)

YEHOWA no Umbu waʼomasi. (I Yohane 4:7) Faʼomasi sabölö alawa yaʼia daʼö faʼomasi si teʼodane-dane ba goi-goi satulö. Ba Zura Niʼamoniʼö, ngawua wehede Yunani niʼogunaʼö ba wanutunö faʼomasi daʼa yaʼia daʼö a·gaʹpe. Moʼamakhaita ia ba waʼomasi soroi ba dödö hegöi fahuwusa ba niha böʼö. Faʼomasi daʼa tenga ha ba dödö so ia. Hizaʼi, muforomaʼö ia ba mbua-bua ba wanolo niha böʼö. Faʼomasi daʼa zamarou yaʼita ba wamalua si sökhi ba niha böʼö. Daʼa göi zameʼe khöda faʼowua-wua dödö ba itugu moʼeluaha waʼaurida.

2, 3. Hewisa wangoromaʼö Yehowa faʼomasi soroi ba dödö ba niha gulidanö?

² Fatua lö iwöwöi Gadamo ba Khawa, no iforomaʼö waʼomasinia Yehowa ba niha gulidanö. Ifazökhi gulidanö si tola mangaʼasogö fefu zoguna khöda. Ifazökhi göi daʼö enaʼö tobali nahiada ba tarasoi waʼowua-wua dödö. Tenga soguna khönia samösa wa ifazökhi daʼö Yehowa, hizaʼi soguna khöda. Me no awai tefazökhi gulidanö, ifazökhi niha ba ibeʼe khöra ginötö ba wangokhögö faʼauri si lö aetu ba gulidanö faradaiso.

³ Aefa daʼö, iforomaʼö Yehowa waʼomasinia soroi ba dödö ba niha gulidanö ba lala sabölö tohude. Hewaʼae no mamadaö Gadamo ba Khawa, faduhu dödö Yehowa wa so ngaʼötöra sangomasiʼö yaʼia irege ibeʼe Nononia tobali höli ba wangorifi yaʼira. (I Moze 3:15; I Yohane 4:10) Sindruhunia, iʼotarai me ibeʼe mbuʼusa li daʼö Yehowa, hulö zi no ibeʼe höli andrö. Ba zi 4.000 fakhe aefa daʼö, ibeʼe Nononia si hasambua Yehowa ba niha gulidanö. (Yohane 3:16) Taʼandrö sibai saohagölö ba waʼomasi Yehowa andre!

4. Hewisa tola taʼila wa niha si lö moʼahonoa tola laforomaʼö waʼomasi soroi ba dödö?

⁴ Hadia tola taforomaʼö waʼomasi soroi ba dödö hewaʼae lö moʼahonoa ita? Tola. Ifazökhi ita Yehowa si fakhili-khili khönia ba ibeʼe khöda waʼabölö ba woloʼö yaʼia. Lö aoha khöda ba wangoromaʼö faʼomasi soroi ba dödö, hizaʼi tola tafalua ia. Iforomaʼö waʼomasinia Habeli khö Lowalangi me ibeʼe zumange sabölö sökhi niʼokhögönia. (I Moze 4:3, 4) Iforomaʼö Noakhi waʼomasinia soroi ba dödö me lö mamalö ituriaigö duria moroi khö Lowalangi ba zi töra hauga fakhe hewaʼae lö laʼameʼegö tödö nifaʼemania andrö. (II Fetero 2:5) Iforomaʼö göi Aberahamo wa abölö aro waʼomasinia khö Lowalangi moroi ba ngawalö hadia ia me ibeʼe nononia omasiʼö sotöi Izaʼaki tobali sumange. (Yakobo 2:21) Simane ira matua si lö faröi andre, omasi ita taforomaʼö waʼomasi hewaʼae abua wangoromaʼö yaʼia.

HADIA WAʼOMASI SOROI BA DÖDÖ?

5. Hewisa wangoromaʼöda faʼomasi soroi ba dödö?

⁵ Imane khöda Sura Niʼamoniʼö, ”Böi ba li taʼomasiʼö nawöda, ba böi ba lela, ba nilauda khönia taʼomasiʼö ia, ba sindruhu-ndruhu.” (I Yohane 3:18) Hadia daʼö geluahania wa tebai taforomaʼö waʼomasi ba wehededa? Tenga. (I Tesalonika 4:18) Eluahania, tenga ha asala tawaʼö ”Uʼomasiʼö ndraʼugö”. Moguna taforomaʼö ia ba nifaluada. Duma-dumania, na so ndra talifusöda sambö balazo mazui nukha, tenga ha fehede zoguna khöra. (Yakobo 2:15, 16) Simane daʼö göi, börö me taʼomasiʼö Yehowa hegöi niha böʼö, tenga ha asala talau mangandrö enaʼö ato zanuriaigö, hizaʼi taforege göi ba wanuriaigö.​—Mataiʼo 9:38.

6, 7. (a) Hadia geluaha ’waʼomasi si lö famini tödö’? (b) Hadia manö duma-duma waʼomasi si tenga soroi ba dödö?

⁶ Imane sinenge sotöi Yohane wa moguna taʼomasiʼö nawöda ”ba nilauda khönia taʼomasiʼö ia, ba sindruhu-ndruhu”. Andrö, faʼomasida ”böi faruka wamini tödö” mazui ”si lö famini tödö”. (Roma 12:9; II Korindro 6:6) Itaria, so niha sangoromaʼö faʼomasi si tenga soroi ba dödö. Hadia faʼomasi sindruhu daʼö? Hadia zamarou tödönia? Lö hadöi eluahania waʼomasi si fao famini tödö ba lö hadöi guna waʼomasi si tenga soroi ba dödö.

⁷ Datatutunö duma-duma waʼomasi si tenga soroi ba dödö. Me fahuhuo Zatana khö Khawa ba kabu Edena, ba wehedenia hulö iforomaʼö wa iʼameʼegö tödö Khawa. Hizaʼi, moroi ba nifaluania oroma wa falimosa daʼö. (I Moze 3:4, 5) Me mamatörö Dawido tobali razo, so zi fahuwu khönia sotöi Ahitofeli. Hizaʼi, faröi Ahitofeli khö Dawido börö me iʼalui dana khönia samösa. Ba nifaluania oroma wa yaʼia tenga si fahuwu si sökhi. (II Zamueli 15:31) Iadaʼa, niha si no faröi hegöi niha somasi mamawukaisi mbanua niha Keriso, ’sökhi sibai lira, ba no lahaogö-haogö’. (Roma 16:17, 18) Te lawaʼö wa laʼomasiʼö niha böʼö, hizaʼi sindruhunia ha tana khöra laʼalui.

8. Hadia wanofu si tola tasofu khöda samösa?

⁸ No sambua fangaila sebua na laforomaʼö waʼomasi si tenga soroi ba dödö, börö me lafalua ia ba wolimo niha böʼö. Hewaʼae tola talimo niha, hizaʼi tebai talimo Yehowa. Iwaʼö Yesu wa sindruhu-ndruhu lahuku niha si so famini tödö. (Mataiʼo 24:51) Yaʼita samosumange Yehowa, lö irai omasi ita tobali niha samini tödö. Andrö, datasofu khöda samösa, ’Hadia soroi ba dödö waʼomasigu, mazui ha tana khögu samösa uʼalui ba lö utörö zindruhu?’ Datatutunö siwa ngawua lala si tola tafalua ba wangoromaʼö faʼomasi ”si lö famini tödö”.

LALA WANGOROMAʼÖDA FAʼOMASI ’BA NIFALUA HEGÖI BA ZINDRUHU’

9. Hadia nifaluada na so khöda waʼomasi soroi ba dödö?

⁹ Owua-wua dödö ba wohalöwö hewaʼae lö niha sangila. Omasi ita tafalua waʼomasi ba faʼahakhö dödö ba niha böʼö hewaʼae lö niha sangila nifaluada andrö. (Baso Mataiʼo 6:1-4.) Anania ba Safira, lö laʼokhögö mbua-bua daʼa. Me labeʼe dolo-tolo, omasi ira na laʼila niha nifaluara. Falimo ira sanandrösa ba waʼebua dolo-tolo nibeʼera, ba lua-luania lahuku ira börö me so khöra wamini tödö. (Halöwö Zinenge 5:1-10) Hizaʼi, na sindruhu-ndruhu taʼomasiʼö ndra talifusöda, omasi ita tafalua khöra zi sökhi ba lö tatötöna enaʼö laʼila niha nifaluada andrö. Tola tafahaʼö ita moroi khö ndra talifusöda sanolo Boto Solohe ba wamaʼanö gö ba wamati. Lö laʼalui lala enaʼö lasuno ira, ba lö latutunö ba niha böʼö halöwö si no lafalua.

10. Hewisa wangoromaʼöda wa tafosumange niha böʼö?

¹⁰ Fosumange niha böʼö. (Baso Roma 12:10.) Iforomaʼö wa ifosumange ndra sinengenia Yesu me isasai gahera. (Yohane 13:3-5, 12-15) Moguna taforege enaʼö so khöda wangide-ngideʼö simane Yesu ba tafosumange niha böʼö. Lö aboto ba dödö ndra sinenge hadia geluaha nifalua Yesu irugi me latema geheha niʼamoniʼö. (Yohane 13:7) Taforomaʼö wa tafosumange niha böʼö na lö hadöi ba wangera-ngerada wa abölö tohude ita moroi khöra börö zekola, gokhöta, mazui halöwö si tohude niʼokhögöda. (Roma 12:3) Lö afökhö dödöda ba ginötö lasuno niha böʼö, hizaʼi fao ita khöra ba waʼowua-wua dödö hewaʼae na moloʼö yaʼita tola göi tatema wanuno simane daʼö.

11. Hana wa moguna tasuno niha böʼö soroi ba dödö?

¹¹ Beʼe wanuno soroi ba dödö. Moguna taʼalui ginötö ba wanuno niha böʼö. Fefu ita taʼila wa fanuno moguna ia khöda ”ba wangaʼazökhi”. (Efeso 4:29) Hizaʼi, moguna taʼangenanöi enaʼö soroi ba dödö na tasuno niha böʼö, tenga ha enaʼö omuso dödöra. Lö tawaʼö hadia zi lö hadöi ba dödöda mazui enaʼö aheta noro dödöda ba wameʼe mene-mene. (Gamaedola 29:5) Na tasuno niha böʼö, hizaʼi ba gafuriatania tafatou-tou ia furinia, eluahania so khöda wamini tödö. Iʼokhögö waʼomasi soroi ba dödö sinenge sotöi Faulo. Me isura zura ba niha Keriso si so ba Korindro, isuno zi sökhi nifaluara. (I Korindro 11:2) Hizaʼi, ibeʼe göi khöra mene-mene si sökhi ba ginötö moguna, ba itutunö si fao faʼasökhi dödö hadia mbörö wa ibeʼe mene-mene andrö.​—I Korindro 11:20-22.

12. Hewisa wa tola taforomaʼö waʼomasi soroi ba dödö na so khöda waʼoböwö?

¹² Oböwö. Iʼoʼou ita Yehowa enaʼö sökhi laguda khö ndra talifusöda. (Baso I Yohane 3:17.) Hizaʼi, moguna taʼokhögö lala wangera-ngera satulö ba wamalua daʼö. Tola tasofu khöda samösa, ’Hadia ha niha sahatö khögu mazui niha si tohude ba mbanua niha Keriso nikaonigu ba nomo? Hadia ha niha si tola manulöni zi no ufalua nikaonigu? Mazui, hadia oböwö ndraʼo khö ndra talifusö si lö uʼila sibai haniha ira mazui ba niha si tebai manulöni si no ufalua?’ (Luka 14:12-14) Angeraigö zalua andre: Hewisa na so samösa dalifusöda ira matua sinangea mutolo börö gangetula si lö tefaudu nihalönia? Mazui, hewisa na so niha nikaonida ba nomo si lö irai mangandrö saohagölö khöda? Imane khöda Yehowa, ”Faoma mibeʼe gö khö nawömi, na möi tomemi, böi mikökö-kökö.” (I Fetero 4:9) Tasöndra waʼomuso dödö na mamuala ita si fao fangera-ngera satulö.​—Halöwö Zinenge 20:35.

13. (a) Hawaʼara manö moguna abölö taʼokhögö waʼebolo dödö? (b) Hadia zi tola tafalua ba wanolo niha sambö faʼabölö?

¹³ Tolo niha sambö faʼabölö. Imane Sura Niʼamoniʼö, ”Mitolo zambö faʼabölö, mibologö dödömi khöra fefu.” Daʼa zangoromaʼö hadia taʼokhögö waʼomasi soroi ba dödö. (I Tesalonika 5:14) Ato ndra talifusöda si lö aro ba wamati ba zilalö, hizaʼi iadaʼa no laʼokhögö wamati saro. Tanö böʼönia, moguna nasa khöra waʼebolo dödö hegöi fanolo si fao faʼomasi moroi khöda. Hewisa wanoloda yaʼira? Tola taʼogunaʼö Zura Niʼamoniʼö ba wamarou tödöra, fao ita khöra manuriaigö mazui tola tafondro-ndrongo nösi dödöra. Böi so ba wangera-ngerada wangumaʼö wa daʼa dalifusöda ”saro” ba daʼa ”zambö faʼabölö”. Hizaʼi, moguna taʼila wa fefu ita so zi tola hegöi si tebai tafalua. Ifaduhuʼö Faulo wa so zoʼamböta ba waʼaurinia. (II Korindro 12:9, 10) Moguna faoma tatolo ba tafarou dödö nawöda zamösana.

14. Hadia zinangea tafalua ba wondrorogö faʼatulö khö ndra talifusöda?

¹⁴ Asogö waʼatulö. Moguna sibai tarorogö waʼatulö ba gotalua ndra talifusöda. Hewaʼae na lafalua khöda zi lö atulö mazui na fasala lala wangera-ngerara sanandrösa khöda, moguna tafalua fefu zi tola tafalua ba wondrorogö faʼatulö. (Baso Roma 12:17, 18.) Na no taʼafökhöiʼö dödö zi samösa niha, si sökhinia taʼandrö waʼebolo dödönia, hizaʼi moguna soroi ba dödöda. Duma-dumania, moroi na tawaʼö, ”Bologö dödömö he, fasala wangera-ngeramö”, abölö sökhi na tafaduhuʼö zala nifaluada ba tamane, ”Bologö dödömö, no uʼafökhöiʼö dödömö ba wehedegu.” Moguna sibai so göi waʼatulö ba wongambatö. Foʼomo ira matua ba ira alawe, böi ha föna niha laforomaʼö waʼomasira khö nawöra, ba na lö hadöi niha lö omasi ira fahuhuo khö nawöra, faoma lawaʼö wehede safökhö mazui lalau faʼudu.

15. Hewisa wangoromaʼöda wa taʼefaʼö zala niha böʼö soroi ba dödö?

¹⁵ Okhögö waʼedöna ba wangefaʼö sala. Na so zangafökhöiʼö tödöda, moguna tabeʼe aefa daʼö ba tatiboʼö waʼafökhö dödöda andrö, hewaʼae lö iʼila wa no iʼafökhöiʼö dödöda. Tola edöna ita ba wangefaʼö sala na taʼoʼö mene-mene daʼa, ”Mibologö dödömi khö nawömi, miʼomasiʼö ia; miʼoigö dödömi, enaʼö lö tebulö wahasara dödö, enaʼö faböbö ami, famaböbö faʼatulö andrö.” (Efeso 4:2, 3) Enaʼö tola taʼefaʼö zala niha böʼö soroi ba dödö, böi taʼangera-ngeraigö zala nifaluania khöda. Faʼomasi ”lö itanö ba dödönia zi lö sökhi”. (I Korindro 13:4, 5) Sindruhunia, na fahöʼö dödöda, tola tekiko wahuwusada khö ndra talifusöda hegöi khö Yehowa. (Mataiʼo 6:14, 15) Taforomaʼö wa so khöda waʼedöna ba wangefaʼö zala na mangandrö ita salahi niha sangafökhöiʼö tödöda.​—Luka 6:27, 28.

16. Hewisa wangoromaʼöda faʼomasi soroi ba dödö ba ginötö tatema halöwö si tohude ba wamosumange Yehowa?

¹⁶ Tatehegö lö alua zomasi dödöda. Na tatema halöwö si tohude ba wamosumange Yehowa, tola taforomaʼö wa so khöda waʼomasi soroi ba dödö na ’lö taʼalui zoguna khöda zamösana, soguna khö nawöda taʼalui’. (I Korindro 10:24) Duma-dumania, ba kebaktian wilayah hegöi regional, no tohöna tohare petugas tata tertib fatua lö tohare niha böʼö. Tola manö tedönisi dödöra ba wangai nahia gurusi si sökhi ba nösi nomora hegöi khöra samösa. Hizaʼi, ato moroi ba gotaluara zamili mudadao ba nahia si no muhenaigö khöra. Daʼa zangoromaʼö wa so khöra waʼomasi soroi ba dödö. Hewisa woloʼömö duma-duma si sökhi moroi khöra?

17. Na so waʼomasi soroi ba dödö ba niha Keriso si no mamalua horö sebua, hadia nifaluania?

¹⁷ Böhöli ba fatunö horö si tobini si no öfalua. So ösa niha Keriso saminiʼö horö sebua si no lafalua. Te aila ira mazui lö omasi ira na afatö dödö niha böʼö. (Gamaedola 28:13) Hizaʼi, tenga faʼomasi na mubiniʼö horö si no irai mufalua börö me tola manö molua-lua ia khöra samösa hegöi ba niha böʼö. Hana? Börö me tola manö lö mohalöwö geheha niʼamoniʼö ba lö hadöi faʼatulö ba mbanua niha Keriso. (Efeso 4:30) Andrö, na so niha Keriso samalua horö sebua, faʼomasi soroi ba dödö zamarou yaʼia enaʼö itutunö daʼö khö ndra satua sokubaloi ba iʼandrö wanolo.​—Yakobo 5:14, 15.

18. Hana wa moguna sibai waʼomasi soroi ba dödö?

¹⁸ Faʼomasi andre no bua-bua sabölö tohude. (I Korindro 13:13) Daʼa zanolo niha enaʼö laʼila haniha zindruhunia zoloʼö khö Yesu hegöi niha soloʼö khö Yehowa si no tobali Umbu waʼomasi. (Efeso 5:1, 2) Iwaʼö Faulo wa na lö iʼokhögö waʼomasi, lö eluaha waʼaurinia. (I Korindro 13:2) Dataforege ba wangoromaʼö faʼomasi tenga ha ”ba lela” hizaʼi ”ba nilauda khönia taʼomasiʼö ia ba sindruhu-ndruhu”.