Mifondrondrongo Degu-Degu Andrö, Enaʼö Atua-tua Ami

1. Hewisa enaʼö tola taʼokhögö waʼatua-tua ba hadia mbuania khöda?

YEHOWA, no umbu waʼatua-tua ba ibeʼe daʼö ba niha si fao faʼoböwö. Imane ba Yakobo 1:5, ”Na so zambö faʼatua-tua, böi miböhöli wangandrö khö Lowalangi, ba hasambalö mitema, börö me fahöna wameʼe Lowalangi ba lö iʼailasi niha.” Tola taʼokhögö waʼatua-tua na tatema degu-degu moroi khö Lowalangi. Faʼatua-tua andre zolumöʼö yaʼita enaʼö lö tafalua zala ba itugu ahatö ita khö Yehowa. (Gamaedola 2:10-12) Buania, taʼokhögö dötönafö faʼauri si lö aetu.​—Yuda 21.

2. Hewisa enaʼö taʼomasiʼö degu-degu moroi khö Lowalangi?

² Börö me lö moʼahonoa mazui faböʼö-böʼö lala wangebuaʼö yaʼita, andrö wa itaria abua khöda wanemaʼö degu-degu. Hizaʼi, na no tarasoi hadia mbua moroi ba degu-degu Lowalangi, tola taʼila wa iʼomasiʼö sibai ita. Imane ba Gamaedola 3:11, 12, ”He onogu, böi ositengagö wotu khö Yehowa.” Imane nasa, ”Somasi Yehowa sa, ba iʼotuʼö.” Faduhu dödöda wa omasi Yehowa ibeʼe khöda zabölö sökhi. (Baso Heberaiʼo 12:5-11.) Börö me aboto ba dödönia ita, hasambalö tefaudu degu-degu nibeʼenia khöda. Ba wamahaʼö daʼa, so öfa ngawalö nitutunöda sanandrösa ba degu-degu, (1) fanaha tödö, (2) degu-degu nibeʼe zatua ba ndraono, (3) degu-degu nitemada ba mbanua niha Keriso, ba (4) sabölö afökhö moroi ba degu-degu.

HANA WA ATUA-TUA ITA NA TAʼOKHÖGÖ WANAHA TÖDÖ?

3. Hewisa enaʼö tola so wanaha tödö ba ndraono? Beʼe duma-duma.

³ Na so khöda wanaha tödö, tola taʼangenanöi gamuatada hegöi lala wangera-ngerada. Tenga iʼotarai me tumbu taʼokhögö gamuata simane daʼö, andrö wa moguna tafahaʼö ita. Duma-dumania, na ifahaʼö ia si samösa iraono fakureta, moguna igogohe gureta andrö satuania enaʼö lö asoʼa. Hizaʼi, na no ibörögö iʼila fakureta ononia, idaʼi-daʼi ba wangefasi tangania. Na faduhu dödönia wa no onekhe saʼae nononia andrö fakureta, tola iʼefasi dangania. Simanö göi, na ebolo dödö zatua ba wamahaʼö iraonora moloʼö ’fotu si fao fanuturu lala moroi khö Yehowa’, daʼa zanolo iraono enaʼö so khöra wanaha tödö ba laʼokhögö waʼatua-tua.​—Efeso 6:4.

4, 5. (a) Hana wa no faosatö si tohude ba gamuata si bohou mbua-bua wanaha tödö? (b) Hana wa lö moguna ide-ide dödöda na tafalua zala?

⁴ Niha sawena mangokhögö faʼaboto ba dödö sanandrösa khö Yehowa me no atua ira, tola manö no laʼokhögö ösa wanaha tödö. Hizaʼi, lö nasa si tobali ira niha Keriso saro ba wamati. Me labörögö ’labohouni gamuatara’ ba laforege woloʼö Keriso, itugu aro ira ba wamati. (Efeso 4:23, 24) Na so khöda wanaha tödö tola ”tatimbagö gisö-isö dödö ba gulidanö, taʼokhögö wangera-ngera si sökhi, faʼatulö, ba famosumange Lowalangi soroi ba dödö ba gotalua niha gulidanö ba götö daʼa”.​—Tito 2:12.

⁵ Fefu ita, lö soʼahonoa. (Zangombakha 7:20) Na tafalua zala, tenga daʼö geluahania wa lö khöda fanaha tödö. Imane ba Gamaedola 24:16, ”Mewitu sa alau zatulö tödö, ba mewitu ifuli maoso.” Hadia zi tola manolo yaʼita enaʼö ”ifuli maoso”? Tenga börö waʼabölöda samösa hizaʼi börö geheha Lowalangi. (Baso Filifi 4:13.) Bua moroi ba geheha niʼamoniʼö yaʼia daʼö fanaha tödö.

6. Hewisa enaʼö tobali ita nifahaʼö si sökhi ba Daromali Lowalangi? (Faigi gambara ba wamobörö wamahaʼö.)

⁶ Fangandrö, famahaʼö ba Zura Niʼamoniʼö hegöi foʼangerönusi tola möi fanoloda enaʼö so khöda wanaha tödö. Hizaʼi, hewisa na abua khöu ba wamahaʼö yaʼugö ba Zura Niʼamoniʼö mazui lö omasiʼö? Böi ide-ide dödömö. Törö tödömö wa tola itolo ndraʼugö Yehowa enaʼö ’ödouʼö waʼomasimö’ ba Daromalinia. (1 Fetero 2:2) Andrö khö Yehowa enaʼö itolo ndraʼugö ba wangokhögö inötö ba wamahaʼö ba Zura Niʼamoniʼö. Ba wamobörö, ogunaʼö ginötö mato hauga menit ba wamahaʼö yaʼugö. Na no toʼölö, tola itugu aoha khöu ba örasoi waʼowua-wua dödö. Tola örasoi waʼomuso dödö na öʼangerönusi lala wangera-ngera Yehowa.​—1 Timoteo 4:15.

7. Hewisa wanaha tödö möi fanoloda ba wogamö ohitö dödöda ba wamati?

⁷ Na so khöda wanaha tödö, tola takhamö gohitö dödöda ba wamati. Duma-dumania, samösa ama sorasoi wa lö oya saʼae ginötö niʼogunaʼönia ba wanuriaigö. Andrö, ihalö gangetula enaʼö ilau merintis biasa. Hewisa wa tola möi fanolonia gamuata fanaha tödö? Ibaso majalah soʼamakhaita khö ndra perintis ba ilau mangandrö. Daʼa zangaroʼö fahuwusania khö Yehowa. Ilau merintis ekstra ba lö itehegö so zanaisi yaʼia. Iʼosambuaʼö wangera-ngerania ba gohitö dödönia. Ba gafuriata, ilau merintis biasa.

EBUAʼÖ NDRAONOMÖ MOLOʼÖ DEGU-DEGU MOROI KHÖ YEHOWA

8-10. Hadia zi tola manolo ira satua ba wangebuaʼö iraonora enaʼö lafosumange Yehowa? Beʼe duma-duma.

⁸ No ibeʼe Yehowa halöwö khö zatua ba wangebuaʼö iraonora moloʼö ’fotu si fao fanuturu lala moroi khö Yehowa’. (Efeso 6:4) Abua wamalua daʼö ba gulidanö iadaʼa. (2 Timoteo 3:1-5) Me awena tumbu ndraono, lö laʼila hadia zatulö ba si sala ba lö nifahaʼö dödöra side-ide. Andrö, moguna lafahaʼö ba labeʼe khöra degu-degu. (Roma 2:14, 15) So samösa pakar Zura Niʼamoniʼö sanutunö wa eluaha ngawua wehede ”degu-degu” ba li Yunani yaʼia daʼö mangebuaʼö iraono enaʼö tola laʼonorogö tödö hadia ia na no ebua ira.

⁹ Na lategu ndraonora ira satua si fao faʼomasi, tola telumöʼö ndraonora. Laʼila wa so nola-ola si tebai lafalua ba waʼaurira ba gofu hadia ia nifaluara so lua-luania. Satua si no tobali niha Keriso, moguna sibai laʼodaligö waʼatua-tua Yehowa ba wangebuaʼö iraonora. No faböʼö-böʼö lagu ba wangebuaʼö iraono moloʼö banua si toröi yaʼira. Hizaʼi, satua samondrondrongo niwaʼö Lowalangi lö laʼebuaʼö ndraonora moloʼö faʼatua-tuara samösa mazui moloʼö faʼatua-tua niha gulidanö.

¹⁰ Tola tafahaʼö ita moroi ba duma-duma Noakhi. Me iwaʼö khönia Yehowa ba wamazökhi owo, lö iʼila hewisa wamazökhi daʼö ba wamobörö. Hizaʼi, iʼodaligö Yehowa ba ifalua daʼö simane niwaʼö Yehowa khönia. (1 Moze 6:22) Hadia mbuania? Tola teʼorifi ia hegöi ösi nomonia börö nowo andrö! Noakhi andre satua si sökhi. Hana? Börö me ifaduhusi tödö waʼatua-tua moroi khö Lowalangi. Ihaogö wamahaʼö iraononia ba tobali ia duma-duma, hewaʼae auri ira ba gulidanö si lö sökhi fatua lö Anönö Danö Idanö.​—1 Moze 6:5.

11. Hana wa moguna laforege ira satua ba wamahaʼö iraonora?

¹¹ Yaʼami satua, hewisa woloʼömi Noakhi ba wangebuaʼö iraono? Fondrondrongo li Yehowa. Andrö khönia wanolo ba wangebuaʼö iraonomö. Ogunaʼö mene-mene si so ba Daromalinia hegöi organisasinia. Ba gafuriatania, tola laʼandrö saohagölö iraonomö börö me no öfalua daʼö! So samösa dalifusöda ira matua sanura, ”Uʼandrö sibai saohagölö khö ndra satuagu me sökhi lala wangebuaʼöra yaʼo. Laʼodödögö wamahaʼö yaʼo irege tofakha ba dödögu.” Iwaʼö, börö ndra satuania wa tola ahatö ia khö Yehowa. Tatu manö, hewaʼae no laʼodödögö ira satua ba wamahaʼö iraono, tola manö lahalö gangetula iraonora ba wondröi Yehowa. Hizaʼi, satua si no mamorege ba wamahaʼö iraonora, laʼokhögö dödö side-ide si lö sinegu ba latötöna wa samuza inötö tola mangawuli ndraonora andrö khö Yehowa.

12, 13. (a) Na so ndraono niʼefasi ba gangowuloa, hewisa zatua ba wangoromaʼö wa moloʼö ira khö Lowalangi? (b) Hadia mbua nitema zi sambua fongambatö börö me moloʼö zatua khö Yehowa?

¹² Tetandraigö sibai waʼalöfaröi zatua ba ginötö teʼefasi ndraonora ba gangowuloa. Daʼa nirasoi dalifusöda ira alawe me no muʼefasi nononia alawe ba gangowuloa ba mofanö nononia andrö moroi ba nomo. Imane, ”Uʼalu-alui ba publikasida hadia zi tobali dela khögu enaʼö tola fariawö ndraʼo khö nonogu hegöi khö maʼuwugu.” Hizaʼi, itolo ia foʼomonia enaʼö iʼila wa tenga saʼae noro dödöra nonora andrö ba moguna lö faröi ira khö Yehowa.

¹³ Hauga fakhe aefa daʼö, mufuli mutema nonora andrö ba mbanua niha Keriso. Imane mamania, ”Iadaʼa, arakhagö ero maʼökhö itelefo ba ikirim khögu sms! Iʼameʼegö tödö sibai ndraʼo hegöi foʼomogu börö me iʼila wa lö faröi ndraʼaga khö Lowalangi. Itugu aro wahuwusama.” Na no laʼefasi ndraonou ba gangowuloa, hadia lö mamalö ’ödöna-döna khö Yehowa, moroi siʼaikö ba dödöu’? Hadia öforomaʼö wa lö ’öʼabeʼeʼö dödöu ba waʼonekheu’? (Gamaedola 3:5, 6) Törö tödöu wa degu-degu moroi khö Yehowa no tandra wa iʼokhögö waʼatua-tua ba iʼomasiʼö sibai ita. Böi olifu ndraʼugö wa no ibeʼe Nononia Lowalangi ba niha gulidanö hegöi ba ndraonomö. Omasi Lowalangi enaʼö fefu niha lasöndra waʼauri si lö aetu. (Baso 2 Fetero 3:9.) Andrö, yaʼami satua yafaduhu dödömi wa degu-degu hegöi fanuturu lala moroi khö Yehowa hasambalö atulö hewaʼae abua woloʼö yaʼia. Tema degu-degu moroi khö Lowalangi ba böi lawa ia.

BA MBANUA NIHA KERISO

14. Hadia mbuania khöda na taʼoʼö wanuturu lala moroi khö Yehowa nibeʼenia khö ndra sawuyu si lö faröi?

¹⁴ No ifabuʼu Yehowa wa irorogö, ilumöʼö ba ifahaʼö mbanua niha Keriso. Oya lala niʼogunaʼönia ba wamalua daʼö. Duma-dumania, ifataro Nononia ba wondrorogö banua niha Keriso ba ifataro ndra sawuyu si lö faröi Yesu ba wangaʼasogö gö ba wamati enaʼö lö faröi ita. (Luka 12:42) Sawuyu andre zameʼe khöda fanuturu lala mazui degu-degu si sökhi. Te no irai örongo ba huhuo sebua mazui öbaso ba publikasida wamahaʼö si tola manolo yaʼugö ba wamulöʼö lala wangera-ngera mazui amuatamö. Tola owua-wua dödömö na öbulöʼö gamuatamö, eluahania no ötema degu-degu moroi khö Yehowa.​—Gamaedola 2:1-5.

15, 16. (a) Hewisa enaʼö tola tatema mbua moroi ba halöwö ndra satua sokubaloi? (b) Hadia zinangea tafalua enaʼö omuso dödö ndra satua sokubaloi ba wamalua halöwöra?

¹⁵ Ibeʼe göi ndra satua sokubaloi Keriso ba wondrorogö banua niha Keriso si fao faʼomasi. Ifotöi ira Sura Niʼamoniʼö ”buala ba niha”. (Efeso 4:8, 11-13) Hewisa enaʼö tatema mbua ba halöwö ndra satua sokubaloi? Tola taʼoʼö wamati hegöi duma-duma si sökhi nifaluara ba taʼoʼö mene-mene nibeʼera si teʼodane-dane ba Zura Niʼamoniʼö. (Baso Heberaiʼo 13:7, 17.) Laʼomasiʼö ita ira satua sokubaloi ba omasi ira na ahatö ita khö Lowalangi. Laʼanemaiʼö labeʼe khöda wanolo na lö asese möi ita ba gangowuloa mazui taya waʼowölö-ölöda. Lafondrondrongo ba labeʼe khöda wamarou dödö si fao faʼomasi. Labeʼe göi khöda mene-mene moroi ba Zura Niʼamoniʼö. Ba wamaigimö, hadia fanolo nibeʼera andre no tandra wa iʼomasiʼö ndraʼugö Yehowa?

¹⁶ Törö tödömö wa lö aoha khö ndra satua sokubaloi ba wameʼe khöda mene-mene. Hadia tola ökhalaigö hewisa dödö zamaʼeleʼö sotöi Natano me lafatenge ia ba wameʼe mene-mene khö Razo Dawido saminiʼö horö sebua si no ifalua? (2 Zamueli 12:1-14) Hewisa dödö zinenge sotöi Faulo me iʼamenesi Wetero, samösa moroi ba gotalua ndra sinenge si 12, si so faʼebua dödö zambuana ba gotalua ndra talifusöda niha Keriso Yahudi ba si tenga Yahudi? Tatu moguna waʼabarani khö Waulo ba wamalua daʼö. (Galatia 2:11-14) Hadia nifaluamö enaʼö tola aoha khö ndra satua sokubaloi ba wameʼe khöu mene-mene? Moguna so khöu wangide-ngideʼö, andrö saohagölö ba alui lala enaʼö lö alawö ira fahuhuo khöu. Törö tödöu wa fanolo nibeʼera no tandra wa omasi moroi khö Lowalangi. Tola ötema mbuania ba omuso dödö ndra satua sokubaloi ba wamalua halöwöra.

17. Hewisa ndra satua sokubaloi ba wanolo si samösa talifusöda ira alawe?

¹⁷ Itutunö samösa talifusöda ira alawe wa abua khönia wangomasiʼö Yehowa börö zi lö sökhi si no irai alua khönia, ba fawuka wangera-ngerania. Imane, ”Uʼila wa moguna fahuhuodo khö ndra satua sokubaloi. Lö lategu mazui latahigö ndraʼo, hizaʼi lafarou dödögu ba laʼabeʼeʼö ndraʼo. Ero awai gangowuloa, hasambalö so ba gotaluara zanofu hewisa duriagu, hewaʼae oya halöwöra. Börö zi no irai alua khögu ba zilalö, so ba dödögu wa tenga sinangea iʼomasiʼö ndraʼo Lowalangi. Me no numalö ginötö, iʼogunaʼö mbanua niha Keriso hegöi ira satua sokubaloi Yehowa ba wangoromaʼö wa iʼomasiʼö ndraʼo. Ulau mangandrö enaʼö lö faröi ndraʼo khönia.”

HADIA ZABÖLÖ AFÖKHÖ MOROI BA DEGU-DEGU?

18, 19. Hadia zabölö afökhö moroi ba degu-degu? Beʼe duma-duma.

¹⁸ Tola manö afökhö ba wanemaʼö degu-degu. Hizaʼi, abölö afökhö lua-luania na tatimbagö degu-degu moroi khö Lowalangi. (Heberaiʼo 12:11) Tola tahalö khöda wamahaʼö moroi ba duma-duma si lö sökhi khö Gaʼino hegöi khö Razo Zedekia. Me iʼila Lowalangi wa fatuwu Gaʼino khö nakhinia ba omasi ia ibunu, ifangelama ia Lowalangi, ”Hana wa mofönu ndraʼugö, ba hana wa abao mbawau? Tenga simanö: na satulö ölau, ba tola öfaöga mbawau; ba na tenga satulö nilaumö, ba no so moroi tou horö, itarogö ndraʼugö ba iʼisöʼö; ba yaʼugö ba höndrögö ia.” (1 Moze 4:6, 7) Itimbagö Kaʼino degu-degu moroi khö Yehowa, ibunu dalifusönia ba irasoi lua-lua sagötö faʼaurinia. (1 Moze 4:11, 12) Na no ifondrondrongo Kaʼino li Lowalangi, lö itaögö wamakao safökhö.

¹⁹ No Razo si lö sökhi ba si lö faʼabölö Zedekia. Lö sökhi zalua me mamatörö ia ba Yeruzalema. No hauga kali ifangelama ia samaʼeleʼö sotöi Yeremia enaʼö ifalalini gera-erania. Hizaʼi, itimbagö degu-degu moroi khö Yehowa ba lö sökhi lua-luania. (Yeremia 52:8-11) Lö omasi Yehowa na tahalö gangetula si lö tefaudu ba tataögö wangabu dödö!​—Baso Yesaya 48:17, 18.

20. Hadia zalua ba niha sanemaʼö hegöi sanimbagö degu-degu moroi khö Lowalangi?

²⁰ Iadaʼa, ato niha sangosilöʼögö ba sangoʼaya degu-degu moroi khö Lowalangi. Lö ara tö, fefu niha sanimbagö degu-degu moroi khö Lowalangi lataögö lua-lua si lö sökhi. (Gamaedola 1:24-31) Andrö ”mifondrondrongo wamangelama andre, enaʼö atua-tua ami”. Imane ba Gamaedola 4:13, ”Olembai wamahaʼö andrö; böi böhöli; aroʼö khöu me fangorifiu.”