Hewisa Ndra Samaduhu’ö Yehowa Wamomaha Ya’ira ba Wamalua Halöwöra?

Lö tebulö latema wamomaha ira Samaduhu’ö Yehowa ba lala wa’aurira me no tobali ira niha Keriso, farahu ba da’ö ba wamalua halöwöra ba niha sato. Halöwö da’a ya’ia da’ö halöwö nibe’e Yesu khö ndra solo’ö khönia ba wanuriaigö turia somuso dödö hegöi ba wamaha’ö niha sanandrösa ba Wamatörö Lowalangi. (Matai’o 24:14; 28:19, 20) Ba gangowuloa ero migu nifaluama, angowuloa ba zi sambua wilayah hegöi angowuloa sebua, matema wamomaha ba wamalua halöwö andrö. Ira Samaduhu’ö Yehowa sangokhögö noro dödö mazui sanema halöwö ba organisasi, latema wamomaha si tohude ba zekola si te’odane-dane ba Zura Ni’amoni’ö nifaluama.

Nitutunö ba artikel da’a:

Hadia wamomaha nitema ndra Samaduhu’ö Yehowa?

Angowuloa. Owulo ndra’aga dua kali samigu ba wamosumange Lowalangi ba Nahia Gangowuloa khöma. Si to’ölönia, mufalua gangowuloa si dombua andre sakali barö migu ba si sakali ba ngaluo Satu mazui Migu. Tola la’ondrasi da’a gofu haniha manö ba lö la’andrö gefe.

Angowuloa barö migu. Ba gangowuloa andre, mafomaha ndra’aga ba wondrou’ö fa’onekhema ba wombaso, ba wangolohesi huhuo föna niha sato, fahuo-huo ba niha, hegöi ba wanuriaigö turia somuso dödö moroi ba Zura Ni’amoni’ö. Matema wamomaha moroi ba huhuo nifa’ema, huhuo si fao fanofu, famadumaisi hegöi video. Famomaha andre zanolo ya’aga ena’ö itugu onekhe ba wanuriaigö turia somuso dödö moroi ba Zura Ni’amoni’ö hegöi ba wondrönia’ö famaha’ö ba Zura Ni’amoni’ö ba niha sadöni tödö. Fefu niha sangondrasi angowuloa andre, tola latema mbua moroi ba wamomaha andrö. Sabölö tohudenia, itugu monönö wamatima ba fa’omasima khö Lowalangi hegöi khö ndra talifusöma ba wamati.
Angowuloa ba ngaluo Satu mazui Migu. Angowuloa da’a, so dombua faosatö. Faosatö si oföna ya’ia da’ö huhuo sebua si te’odane-dane ba Zura Ni’amoni’ö. Ösinia soguna ba niha sato. Faosatö si dua ya’ia da’ö huhuo si fao fanofu si te’odane-dane ba artikel si so ba majalah Manuriaigö edisi wamaha’ö.a Itutunö khöda ba artikel andrö ngawalö wamaha’ö hegöi mene-mene si te’odane-dane ba Zura Ni’amoni’ö si tola manolo ya’aga ba wamalua halöwöma hegöi ba lala wa’aurima.

Angowuloa ba zi sambua wilayah hegöi angowuloa sebua. Ero röfi, so tölu gangowuloa sebua nifaluama ba oya mbanua niha Keriso si möi ba gangowuloa andrö. Ba gangowuloa sebua si möi fa’omuso dödö andre so huhuo, famadumaisi, fanofu-nofu hegöi video sanutunö sambua tuho si te’odane-dane ba Zura Ni’amoni’ö. Simane ba gangowuloa nifaluama barö migu hegöi ba ngaluo Satu mazui Migu, angowuloa ba zi sambua wilayah hegöi angowuloa sebua, möi fanolo khöma ena’ö monönö wa’aboto ba dödöma nösi Zura Ni’amoni’ö ba ena’ö tedou wa’atua-tuama ba wanuriaigö. Tola la’ondrasi da’a gofu haniha manö ba lö la’andrö gefe.

Sekolah-sekolah Zura Ni’amoni’ö khö ndra Samaduhu’ö Yehowa

So ösa ndra Samaduhu’ö Yehowa nikaoni ba wangondrasi ngawalö sekolah Zura Ni’amoni’ö. Hadia manö döi-töi sekola andrö? Hadia gohitö dödö wa mufalua ia ba hawa’oya ginötö ni’oguna’ö? Haniha manö zi tola fao ba da’ö?

Sekolah Dinas Perintis

Ohitö dödö: Ba wamomaha zangai halöwö safönu inötö nifotöi perintis,b ena’ö itugu onekhe ira ba wanuriaigö hegöi ba wamaha’ö niha ba duria somuso dödö moroi ba Zura Ni’amoni’ö. Ba sekola da’ö so huhuo si fao fanofu, famadumaisi, huhuo, hegöi sesi latihan.
Inötö: Önö hari.
Si tola fao: Ya’ira si no tobali perintis ba zi döfi fa’ara. Ira perintis si no irai fao ba zekola da’a, tola ifuli lakaoni ira na no aefa lima fakhe.

Sekolah bagi Penginjil Kerajaan

Ohitö dödö: Ba wo’abakhai’ö wame’e famomaha khö ndra talifusöda si no ara mangai halöwö safönu inötö. Lafomaha ira ena’ö monönö wa’atua-tuara ba wanuriaigö hegöi ba wamaha’ö niha ba duria somuso dödö moroi ba Zura Ni’amoni’ö. La’abakhai’ö wamaha’ö ya’ira ba ngawalö duho si so ba Zura Ni’amoni’ö. Ya’ira si no lulus ba zekola da’a, ato moroi ba gotaluara nifatenge ba mbanua si lö ato sanuriaigö.
Inötö: Dua waŵa.
Si tola fao: Tola lafasura’ö döira ira perintis na no sinangea ira ba lö hadöi si tobali taha-tahara ba wangai halöwö gofu hezo lafatenge ira.

Sekolah bagi Penatua Sidang

Ohitö dödö: Ba wanolo ira satua sokubaloic ena’ö tola lafalua noro dödöra ba mbanua niha Keriso, simane ba wamaha’ö hegöi ba wokubaloi. Latolo göi ira ena’ö itugu la’omasi’ö Lowalangi hegöi ira talifusöra ba wamati.—1 Fetero 5:2, 3.
Inötö: Lima hari.
Si tola fao: Ira satua sokubaloi sawena mufataro hegöi si no ara. Ira satua sokubaloi si no irai fao ba zekola da’a, tola ifuli lakaoni ira na no irugi lima fakhe.

Sekolah bagi Pengawas Wilayah dan Istri

Ohitö dödö: Ba wamaha’ö ndra satua samasuid ena’ö itugu sökhi wamaluara noro dödö si no tebe’e khöra. (1 Timoteo 5:17) Famomaha nitema ndra satua samasui hegöi fo’omora zanolo ya’ira ena’ö itugu aboto ba dödöra ayati Zura Ni’amoni’ö.
Inötö: Sara waŵa.
Si tola fao: Ira satua samasui hegöi fo’omora si no mangai halöwö ba zi döfi fa’ara. Ero lima fakhe, tola lafuli lakaoni ira.

Sekolah Pelayanan Kerajaan

Ohitö dödö: Ba wanolo ira satua sokubaloi hegöi enonie ena’ö itugu sökhi wamaluara noro dödö ba mbanua niha Keriso molo’ö soguna, salua hegöi fa’atedou organisasi. (2 Timoteo 3:1) Mufalua zekola da’a sakali ba zi hauga fakhe.
Inötö: Si to’ölönia ha sahari.
Si tola fao: Ira satua samasui, satua sokubaloi, hegöi enoni.

Sekolah Dinas Betel

Ohitö dödö: Ba wanolo ösi nomo Mbetielif ena’ö sökhi wamaluara halöwöra hegöi ba wondrou’ö fa’omasira khö Lowalangi hegöi khö nawöra zamösana.
Inötö: Lima hari amatonga.
Si tola fao: Ösi nomo Mbetieli si bohou lö tola lö’ö moguna fao ira. Ya’ira si no ara mangai halöwö ba Mbetieli, tola ifuli lakaoni ira na no aefa lima fakhe.

Sekolah Alkitab Gilead Menara Pengawal

Ohitö dödö: Ba wanolo ira talifusöda si fao ba zekola andre ba wangabakhai’ö fa’aboto ba dödö hegöi fa’omasira ba Daromali Lowalangi ba la’aurifagö da’ö ba wa’aurira. (1 Tesalonika 2:13) Hewa’ae na no aro ira ba wamati, na no fao ira ba zekola andre, tola tobali ira harato sebua böli ba organisasi Yehowa hegöi ba wamaha’ö niha ba Zura Ni’amoni’ö ba zi sagörö ulidanö. Na no aefa lulus, tola lafataro ira ba wamalua halöwö ba lapangan mazui mangai halöwö ba gödo ndraha khöma, he ba soi si so ya’ira mazui ba soi bö’ö.
Inötö: Lima waŵa.
Si tola fao: Ira talifusöda sangai halöwö safönu inötö si no ifili gödo ndraha tola lafasura’ö döira. Mufalua sekolah da’a ba Pusat Pendidikan Menara Pengawal ba Patterson, New York, Amerika Serikat.

Sekolah bagi Anggota Panitia Cabang dan Istri

Ohitö dödö: Ba wamomaha ira Panitia Cabangg ba wamaigi-maigi halöwö nifalua ba gödo ndraha hegöi halöwö ndra Samaduhu’ö Yehowa ba zi sambua soi mazui ba zi hauga soi si farahu barö wondrönia’ö gödo ndraha andrö.
Inötö: Dua waŵa.
Si tola fao: Ira Panitia Cabang hegöi fo’omora nikaoni gödo sebua ndra Samaduhu’ö Yehowa ba zi sagörö ulidanö. Mufalua sekola da’a ba Pusat Pendidikan Menara Pengawal ba Patterson, New York, Amerika Serikat.

Hadia dane-dane wamomaha nitema ndra Samaduhu’ö Yehowa?

Dane-dane wamomaha nitema ndra Samaduhu’ö Yehowa siföföna sibai ya’ia da’ö Sura Ni’amoni’ö. Faduhu dödöma wa moroi khö Lowalangi Zura Ni’amoni’ö ba ösinia no fanuturu lala fondrege zi sökhi soguna ba wa’auri niha Keriso.—2 Timoteo 3:16, 17.

Hadia moguna labe’e gefe ira Samaduhu’ö Yehowa ba wanema’ö famomaha andrö?

Lö’ö. Fefu wamomaha andrö lö la’andrö gefe. Wa tola lafalua halöwö andrö ira Samaduhu’ö Yehowa börö dolo-tolo si no aoha gölö fame’e.—2 Korindro 9:7.

a Ba situs web jw.org khöma, no tehenaigö ba da’ö Zura Ni’amoni’ö awö publikasi si te’odane-dane ba Zura Ni’amoni’ö, farahu ba da’ö video.

b Perintis ya’ia da’ö samösa Samaduhu’ö Yehowa, he ira matua mazui ira alawe si no tebayagö idanö ba si tobali duma-duma. No itatugöi hawa’oya ginötö ni’oguna’önia ero waŵa ba wanuriaigö turia somuso dödö moroi ba Zura Ni’amoni’ö.

c Ira satua sokubaloi ya’ia da’ö ira matua si no aro ba wamati, labe’e wamaha’ö moroi ba Zura Ni’amoni’ö ba lakubaloi nono mbanua Yehowa ba wanolo hegöi ba wamarou tödöra. Lö lagazi ira ba wamalua halöwöra.

d Satua samasui ya’ia da’ö ira talifusöda sangai halöwö safönu inötö si möi mangondrasi banua niha Keriso si fabö’ö-bö’ö ero migu si so ba wilayah nifataro ya’ira. I’aro’ö ndra talifusöda ba mbanua niha Keriso ya’ia da’ö ifa’ema khöra huhuo sebua si te’odane-dane ba Zura Ni’amoni’ö ba fao göi ia khöra ba wanuriaigö.

e Oya halöwö nifalua ndra enoni ba wanolo ira talifusöda ba mbanua niha Keriso. Börö me lafalua da’ö, itugu oya ginötö ni’oguna’ö ndra satua sokubaloi ba wamomaha hegöi ba wamalua fokubaloi.

f Betieli ya’ia da’ö töi gödo ndraha ndra Samaduhu’ö Yehowa. Ira talifusöda sangai halöwö safönu inötö ba da’ö latuhini halöwö ndra Samaduhu’ö Yehowa ba wilayah cabang si so ya’ira.

g Si tobali Panitia Cabang ya’ia da’ö datölu ndra talifusöda ira matua mazui töra, ba no sinangea ira molo’ö Sura Ni’amoni’ö.

Hadia mbua nitema ndra Samaduhu’o Yehowa sanema famomaha andrö?

”Börö me niha saila-aila ndra’o, abua khögu wama’ema turia somuso dödö ba niha si lö irai falukha khögu. Hiza’i, börö wamomaha nitemagu ba gangowuloa barö migu, da’ö zi möi fanolo khögu irege lö khögu fa’atau ba tedou wa’onekhegu ba wamaha’ö niha bö’ö. Baero da’ö, itugu barani ndra’o fahuhuo ba niha, he si so ba mbanua niha Keriso hegöi ba nahia wohalöwögu.”—Natasha, Amerika Serikat.
”Sekolah bagi Penginjil Kerajaan andre zi möi fanologu ba wolo’ö amuata Yehowa simane fa’omasi, fa’ebolo dödö ba fa’asökhi dödö. Buania, urasoi wa tobali ndra’o niha Keriso, si fahuwu, hegöi ono mbanua sabölö sökhi. U’ila göi lala ba wamalua riset ba ngawalö duho Zura Ni’amoni’ö ba tofakha ba dödö niha na ututunö Daromali Lowalangi.”—Stephen, Nigeria.
”Sekolah bagi Penatua Sidang zi möi fanolo khögu ena’ö itugu so khögu wangide-ngide’ö irege tobali ndra’o satua sokubaloi sabölö sökhi. Ngawalö huhuo nifa’ema ba zekola andrö zamasugi ba dödögu wa moguna sibai u’o’ö duma-duma Yesu.”—Luca, Italia.
”Sekolah Pelayanan Kerajaan zamaha’ö ya’o wa moguna tobali ndra’o niha si sökhi tödö, lö alawö fahuhuo niha khögu, ba fahuwu ndra’o ba niha bö’ö. Ufaha’ö ndra’ö, na utolo niha bö’ö tenga börö me sinangea ufalua da’ö, hiza’i börö wa’omasigu khöra.”—Samuel, Inggris.
”Sekolah Gilead zi möi fanolo khöma ba wamareso ya’aga ba Daromali Lowalangi si no amaedola zörömi khöma. (Yakobo 1:22-25) Ma’ila göi hadia manö zinangea mabulö’ö sanandrösa ba gamuatama hegöi ba wangai halöwö khö Yehowa. Baero da’ö, itugu ma’angeragö niha bö’ö moroi na ma’angeragö ndra’aga samösa ba moguna matatugöi wa fefu nifa’ema hegöi nifaluama te’odane-dane ia ba wa’omasi.”—Elnathan hegöi Princess, Filipina.