Hadia Manö Sekola si no Muhenaigö khö ndra Perintis?

Sekola wamahaʼö ba Zura Niʼamoniʼö no ara tobali tandra Zamaduhuʼö Yehowa. So zekola nihenaigö khö ndra talifusö safönu inötö ba wangombakha Banua Lowalangi. Ba zekola andre tefahaʼö ira ’ba wamoʼahonoa wamalua halöwö fanuriaigö’.​—II Timoteo 4:5.

Sekola khö ndra Perintis. Na no irugi döfi ndra perintis biasa, tesura döira tobali ono zekola wamahaʼö Zura Niʼamoniʼö önö ngaluo waʼara. Sekola andre tola tefalua ia ba nahia Gorahua Mbanua Lowalangi. Wa lafalua daʼö enaʼö tetolo ndra perintis andrö wangahatöʼö yaʼira khö Yehowa, enaʼö so mbua wohalöwöra ba wanuriaigö, ba enaʼö anau gölöra wangai halöwö khö Lowalangi.

Sekola khö ndra Sangombakha Banua Lowalangi. Sekola si dua waŵa waʼara andre lafalua ba wa mamaha ira perintis si no toʼölö ba somasi mondröi banuara ba weʼamöi manuriaigö ba mbanua tanö böʼö. Hulö nalamane wangumaʼö ”Yaʼe ndraʼo! Fatenge ndraʼo”, simane duma-duma nibeʼe Yesu Keriso, Sanuriaigö sebua si no irai möi ba gulidanö. (Yesaya 6:8; Yohane 7:29) Börö me fandröndröu mbanuara, moguna lafagölösi ira ba niha ba bambanua nirugira. Si toʼölö ba mbanua andrö (hada), teu mazui lökhö ba ngawalö gö tola manö faböʼö moroi ba mbanuara mege. Tola göi la famaha ira ba li niha nirugira. Sekola andre zanolo ira talifusö si lö sangowalu he göi si no mangowalu, iʼotarai 23 irugi 65 fakhe, enaʼö so khöra gamuata si sökhi ba mbanua nifatenge yaʼira ba wanuriaigö. Tetolo göi ira enaʼö laʼokhögö waʼatua-tua irege tola iʼogunaʼö ira Yehowa ba gangowuloania.

Sekola Zura Niʼamoniʼö Gileadi Menara Pengawal. Ba li Heberaiʼo, fehede ”Gileadi” eluhania ”Ngafu Sitobali Samaduhuʼö”. Iʼotarai me tefasindro zekola andre me döfi 1943, töra 8.000 niha zi no aefa sekola andre tefatenge ira ba wanuriaigö ”ba zi sagörö ulidanö”, ba oya howu-howu si no latema. (Halöwö Zinenge 13:47) So ba gotalua ndra talifusö si no aefa sekola Gileadi si föföna andre me larugi mbanua Peru, lö hadöi Samaduhuʼö Yehowa ba daʼö. Iadaʼa, töra 1.000 angowuloa zi so ba daʼö. Meʼibörögö manuriaigö ba Jepang, lö irugi dafulu Zamaduhuʼö Yehowa ba daʼö. Iadaʼa, töra 200.000 Zamaduhuʼö Yehowa ba mbanua andrö. Famahaʼö si lima waŵa waʼara ba sekola Gileadi andrö lahaogö sibai wamahaʼö yaʼira ba Daromali Lowalangi. Nikaoni ba zekola andre yaʼia daʼö perintis istimewa mazui nifatenge ba wangombakha ba mbanua misa, sohalöwö ba gödo si so ba soi böʼö, mazui sohawölö ba wamasui. Sekola andre zameʼe khöra faʼatua-tua ba wondrouʼö enaʼö sökhi halöwö fangombakha Taromali Lowalangi ba zi sagörö ulidanö.

• Hadia guna Sekola Perintis?

• Sekola khö ndra Sangombakha Banua Lowalangi haʼökhö wa laʼaʼasogö ia?