PERPUSTAKAAN ONLINE Manuriaigö
PERPUSTAKAAN ONLINE
Manuriaigö
Nias
ö
  • ö
  • Ö
  • ŵ
  • Ŵ
  • ʼ
  • SURA NI'AMONI'Ӧ
  • PUBLIKASI
  • ANGOWULOA
Publikasi ba Li Nias (2013-2025)
Log Out
Log In
PERPUSTAKAAN ONLINE Manuriaigö
PERPUSTAKAAN ONLINE
Manuriaigö
Ya'ahowu.
Da'a lala wangalui ngawalö publikasi nihaogö ndra Samaduhu'ö Yehowa ba ngawalö li.
Ba wangai publikasi, tola öfaigi jw.org.
  • Ma'ökhö

Satu, 26 Mbaŵa si Fitu

Miʼoʼö khö Lowalangi simane iraono omasiö.—Ef. 5:1.

Sambua lala si tola tafalua ba wangomusoiʼö tödö Yehowa yaʼia daʼö na tafadunö-dunö sanandrösa khönia. Moroi ba wehededa oroma wa taʼomasiʼö ba taʼandrö saohagölö khönia. Ba wanuriaigö, moguna tatörö tödöda wa ohitö dödöda siföföna yaʼia daʼö tatolo niha böʼö enaʼö ahatö ira khö Namada safönu faʼomasi ba laʼokhögö waʼaboto ba dödö simane yaʼita. (Yak. 4:8) Omasi ita taforomaʼö khöra hadia niwaʼö Zura Niʼamoniʼö sanandrösa khö Yehowa hegöi bua-buania si sökhi. Duma-dumania, yaʼia andrö Lowalangi safönu faʼomasi, faʼatulö, faʼatua-tua ba safönu faʼabölö. Tola göi tafosumange Yehowa ba taʼomusoiʼö dödönia na taforege woloʼö nifaluania. Daʼö gamaehutada ba gulidanö si lö sökhi andre. Tola manö lanehe-nehegö ita ba omasi ira laʼila hadia mbörö wa faehu ita. (Mat. 5:​14-16) Ba ginötö fahuhuo ita, tola tatutunö khöra wanema linia. Buania, tola adöni dödö niha satulö tödö ba wangokhögö faʼaboto ba dödö sanandrösa khö Lowalangida. Tobali, na tasuno Yehowa ba lala daʼa, no taʼomusoiʼö dödönia.—1 Ti. 2:​3, 4. w24.02 10 ¶7

Mamareso Sura Niʼamoniʼö Ero Maʼökhö—2025

Migu, 27 Mbaŵa si Fitu

Tola ifarou dödö niha . . . ba tola itegu.—Tit. 1:9.

Enaʼö tobali ndraʼugö niha Keriso saro ba wamati, moguna öfahaʼö ndraʼugö ba waʼonekhe si tola öʼogunaʼö ero maʼökhö. Daʼa zanolo yaʼugö ba wamalua noro dödö ba mbanua niha Keriso, ba wanöndra halöwö si tola mangaʼasogö soguna khöu hegöi ösi nomomö, mazui enaʼö tola öʼokhögö wahuwusa si sökhi ba niha böʼö. Duma-dumania, fahaʼö ndraʼugö enaʼö itugu onekhe ba wombaso hegöi ba wanura. Itutunö Sura Niʼamoniʼö wa niha somuso tödö hegöi sofozu ba waʼauri yaʼia daʼö niha sangogunaʼö inötönia ba wombaso hegöi ba woʼangerönusi Taromali Lowalangi ero maʼökhö. (Si. 1:​1-3) Na ibaso Zura Niʼamoniʼö ero maʼökhö, itugu aboto ba dödö zi samösa niha lala wangera-ngera Yehowa, sanolo yaʼia ba wangokhögö faʼaboto ba dödö hegöi fangera-ngera si sökhi. (Amd. 1:​3, 4) Ira talifusöda ba gangowuloa, moguna khöra wanolo moroi khö dalifusöda ira matua si tola mamahaʼö ba sameʼe khöra mene-mene moroi ba Zura Niʼamoniʼö. Na onekhe ndraʼugö wombaso hegöi manura, daʼö zanolo yaʼugö ba wamaʼanö huhuo hegöi bua gera-era si tola mangaʼaroʼö famati niha böʼö. Daʼö göi zanolo yaʼugö ba wanura hadia zadöni dödömö ba wangaʼaroʼö famatimö hegöi ba wamarou tödö niha böʼö. w23.12 26-27 ¶9-11

Mamareso Sura Niʼamoniʼö Ero Maʼökhö—2025

Sinaya, 28 Mbaŵa si Fitu

Abölö zi hasara tödö khömi moroi ba zi hasara tödö ba gulidanö.—1 Yo. 4:4.

Ba ginötö örasoi waʼataʼu, angerönusi hadia dania nifalua Yehowa ba zi so miföna na no muhori Zatana. So sambua wamadumaisi ba gangowuloa sebua ba zi sambua regional me 2014, sangoromaʼö so samösa nama sanutunö ba nösi nomonia hewisa na ngawua wehede nisura ba 2 Timoteo 3:​1-5, sangoromaʼö hewisa waʼauri ba gulidanö Faradaiso. Imane, ”So dania mbaŵa si sökhi ba gulidanö si bohou. Amuata niha ba daʼö tenga ha tana khöra laʼalui, laʼomasiʼö zindruhu, lö lasuno ira samösa, lö mangosebua, sanuno Lowalangi, samondrondrongo li zatua, sangila mangandrö saohagölö, si lö faröi, sangomasiʼö awöra, sondrorogö fahasara dödö, lö laböbögö khö nawöra zi lö duhu, so wanaha tödö, si sökhi amuata, sangomasiʼö si sökhi, tola mufaduhusi tödö, moloʼö-loʼö, lö fayawa, sangomasiʼö Lowalangi moroi ba gisö-isö dödöra, soloʼö khö Lowalangi soroi ba dödö. Hatöʼögö ba niha simane daʼö.” Hadia mifadunö-dunö ba nösi nomomi mazui khö ndra talifusö ba wamati hewisa dania waʼauri nitötönami ba gulidanö si bohou? w24.01 6 ¶13-14

Mamareso Sura Niʼamoniʼö Ero Maʼökhö—2025
Ya'ahowu.
Da'a lala wangalui ngawalö publikasi nihaogö ndra Samaduhu'ö Yehowa ba ngawalö li.
Ba wangai publikasi, tola öfaigi jw.org.
  • Nias
  • Fa'ema Misa
  • Pengaturan
  • Copyright © 2025 Watch Tower Bible and Tract Society of Pennsylvania
  • Lala Wangoguna'ö
  • Si Tebai La'ila Niha Bö'ö
  • Pengaturan si Tebai La'ila Niha Bö'ö
  • JW.ORG
  • Log In
Fa'ema Misa