Hana Wa Moguna Taʼataʼufi Yehowa?

1-2. Moloʼö Sinunö 25:14, hadia zinangea tafalua enaʼö ahatö ita khö Yehowa?

MOLOʼÖ yaʼugö, hadia gamuata sinangea öʼokhögö enaʼö tola örorogö wahuwusamö khö zi samösa niha? Tola manö öbeʼe wanema li wa si fahuwu si sökhi andrö moguna faoma laʼomasiʼö ba latolo nawöra. Te lö irai tumbu ba wangera-ngeramö wa moguna sibai waʼataʼu ba wondrorogö fahuwusa si sökhi. Hizaʼi, simane niwaʼö ba ayati si tobali tuho artikel daʼa, dozi somasi mangokhögö fahuwusa saro khö Yehowa moguna ’laʼataʼufi ia’.—Baso Zinunö 25:14.

² Hewaʼae na no ara mangai halöwö ita khö Yehowa, fefu ita moguna tarorogö waʼataʼu soroi ba dödö khönia. Hizaʼi, hadia geluahania fangataʼufi Lowalangi? Hewisa enaʼö tola tafahaʼö ita ba wangataʼufi Yehowa? Ba hadia wamahaʼö si tola tahalö sanandrösa ba wangataʼufi Lowalangi moroi ba duma-duma Gobadia, Ere Sebua sotöi Yehoyada, hegöi Razo Yehoasi?

HADIA GELUAHANIA FANGATAʼUFI LOWALANGI?

3. Tutunö hadia mbörö wa tarasoi waʼataʼu, ba hadia gunania khöda?

³ Tola manö tarasoi waʼataʼu na taʼila teʼala ita. Sökhi waʼataʼu simane daʼö, börö me daʼö zanolo yaʼita ba wangai angetula safönu faʼatua-tua. Duma-dumania, börö me ataʼu ita na aekhu si tou, lö tafahatö ita ba zinga mbaho. Börö me ataʼu ita mesokho, lö tafahatö ita ba nahia safönu teʼala. Börö me ataʼu ita na tekiko wahuwusada ba niha niʼomasiʼöda, lö tawaʼö mazui tafalua zi möi fangafökhö dödönia.

4. Hadia waʼataʼu somasi Zatana taʼokhögö sanandrösa khö Yehowa?

⁴ Omasi Zatana na taʼokhögö waʼataʼu si lö tefaudu khö Yehowa. Omasi ia na taʼokhögö lala wangera-ngera niʼokhögö Gelifasi, wa Yehowa andrö Lowalangi sofönu-fönu, omasi ia ihuku ita, ba lö taʼila taʼomusoiʼö dödönia. (Yob. 4:18, 19) Omasi Zatana na ataʼu sibai ita khö Yehowa irege taböhöli wamosumange yaʼia. Enaʼö lö aekhu ita ba dandrawa andrö, moguna taʼokhögö waʼataʼu si tefaudu khö Lowalangi.

5. Hadia geluahania fangataʼufi Lowalangi?

⁵ Niha sangokhögö faʼataʼu si tefaudu khö Lowalangi, laʼomasiʼö ia ba lö lafalua zi möi famakiko fahuwusara khönia. So khö Yesu wangataʼufi Lowalangi. (Heb. 5:7) Tenga faʼataʼu si hokha mbu nirasoinia khö Yehowa. (Yes. 11:2, 3) Hizaʼi, irasoi waʼomasi soroi ba dödö ba iʼoʼö niwaʼö Lowalangi. (Yoh. 14:21, 31) Simane Yesu, ahöli-höli dödöda khö Yehowa ba tafosumange ia börö me Lowalangi safönu faʼomasi, atua-tua, atulö ba abölö. Aboto ba dödöda wa iʼomasiʼö sibai göi ita Yehowa, ba iʼameʼegö tödö hewisa wanemaʼöda fanuturu lala moroi khönia. Tola afökhö dödö Yehowa tabeʼe, ba tola göi taʼomusoiʼö dödönia.—Si. 78:41; Amd. 27:11.

HEWISA ENAʼÖ TOLA TAFAHAʼÖ ITA BA WANGATAʼUFI LOWALANGI?

6. Hewisa lalada ba wangataʼufi Lowalangi? (Sinunö 34:11)

⁶ Tenga iʼotarai me tumbu ita so khöda wangataʼufi Yehowa. (Baso Zinunö 34:11.) Moguna taforege wangokhögö yaʼia. Sambua lala si tola tafalua yaʼia daʼö na tanehegö niwöwöinia. Na itugu taʼila waʼatua-tua Lowalangi, faʼabölönia, hegöi faʼomasinia khöda soroma moroi ba nifazökhinia, itugu tafosumange ba taʼomasiʼö ia. (Rom. 1:20) Imane talifusöda ira alawe sotöi Adrienne, ”Ahöli-höli dödögu ba waʼatua-tua Yehowa soroma ba gomböila dangania, daʼö zanolo yaʼo ba wangiʼila wa aboto ba dödönia hadia zabölö sökhi khögu.” Me no iʼangerönusi fefu daʼö, imane Adrienne, ”Lö omasido ufalua hadia ia zi möi famakiko wahuwusagu khö Yehowa, Umbu wangorifi.” Hadia tola öbeʼe ginötöu barö migu andre ba woʼangerönusi gomböila danga Yehowa? Na öfalua daʼö, itugu öfosumange ba öʼomasiʼö ia.—Si. 111:2, 3.

7. Hewisa wa tobali fanoloda wangandrö ba wangokhögö faʼataʼu si tefaudu khö Yehowa?

⁷ Lala tanö böʼö si tola tafalua ba wangokhögö faʼatau khö Lowalangi yaʼia daʼö fangandrö ero maʼökhö. Na asese mangandrö ita, itugu aboto ba dödöda Yehowa. Ero na taʼandrö waʼabölö khönia ba wanaögö fanandraigö, tefasugi ba dödöda waʼabölönia sahöli-höli dödö. Ba ginötö taʼandrö saohagölö börö me no iʼamualagö Nononia khöda, itörö tödöda wa iʼomasiʼö sibai ita Yehowa. Ba na taʼandrö wanolo khö Yehowa ba wangasiwai abula dödö, itörö tödöda waʼatua-tua sibai ia. Fangandrö simane daʼö zanolo yaʼita ba wangataʼufi Yehowa soroi ba dödö. Daʼö göi zangaroʼö angetulada ba wanimbagö ngawalö hadia ia zamakiko fahuwusada khönia.

8. Hadia nifaluada enaʼö lö taböhöli ba wangataʼufi Lowalangi?

⁸ Enaʼö lö taböhöli ba wangataʼufi Lowalangi, moguna tafahaʼö ita ba Zura Niʼamoniʼö. Ba ginötö tabaso ia, ohitö dödöda yaʼia daʼö enaʼö tafahaʼö ita ba duma-duma si sökhi hegöi si lö sökhi ba götö föna. Datatutunö darua nono mbanua Yehowa si lö faröi, yaʼia daʼö sohalöwö ba nomo Razo Gahabi sotöi Gobadia hegöi Ere Sebua sotöi Yehoyada. Aefa daʼö, taʼila dania hadia wamahaʼö si tola tahalö moroi khö Razo Yehoasi ba Yehuda, samosumange Yehowa ba wamobörö hizaʼi iböhöli ba gafuriata.

OKHÖGÖ WAʼABARANI SIMANE GOBADIA

9. Hewisa gamuata Gobadia börö me iʼataʼufi Yehowa? (1 Razo 18:3, 12)

⁹ Me awena sibai mutötöi döi Gobadiab ba Zura Niʼamoniʼö, tesura wa yaʼia andrö ”niha sangataʼufi Yehowa soroi ba dödö”. (Baso 1 Razo 18:3, 12.) Börö me iʼataʼufi Yehowa, tobali ia niha sanörö sindruhu ba tola mufaduhusi tödö. Andrö wa ifataro ia Razo tobali samaigi-maigi halöwö ba nomo Razo. (Fareso göi Nehemia 7:2.) Baero daʼö, börö me iʼataʼufi göi Yehowa, iʼokhögö Gobadia waʼabarani sahöli-höli dödö. Moguna sibai khönia waʼabarani me luo daʼö börö me auri ia ba götö Razo Gahabi si lö sökhi. Imane Sura Niʼamoniʼö, ”Ba wamaigi Yehowa, abölö-bölö waʼalösökhi Gahabi . . . moroi khö ndra razo fatua lö yaʼia.” (1 Ra. 16:30) Baero daʼö, foʼomo Gahabi sotöi Izebela, samösa samosumange Baʼali. Fatuwu sibai ia khö Yehowa, irege iʼalui lala ba wangohori famosumange satulö moroi ba wamatörö Gizaraʼeli si fulu mado. Ato göi zamaʼeleʼö khö Lowalangi nibununia. (1 Ra. 18:4) Ba daʼa taʼila wa moguna sibai waʼabarani khö Gobadia ba wangai halöwö khö Yehowa sagötö mbaŵa waʼabasaki andrö.

10. Hewisa wangoromaʼö Gobadia faʼabarani sahöli-höli dödö?

¹⁰ Hewisa wangoromaʼö Gobadia faʼabarani sahöli-höli dödö? Me iʼalui lala Izebela ba wamunu fefu zamaʼeleʼö khö Lowalangi, ’ibiniʼö Gobadia 100 ndra samaʼeleʼö khö Yehowa ba dögi narö hili, 50 niha ero sambua nahia, ba iʼasogö roti hegöi öra idanö’. (1 Ra. 18:13, 14) Na iʼila daʼö Izebela, tatu ihuku mate Gobadia. Sindruhu sa, tola manö ataʼu Gobadia ba lö omasi ia mate. Hizaʼi, itehegö nosonia börö waʼomasinia khö Yehowa hegöi faʼomasinia ba niha samosumange Yehowa.

11. Hewisa nono mbanua Yehowa ba götöda andre woloʼöra duma-duma Gobadia? (Faigi göi gambara.)

¹¹ Iadaʼa, ato nono mbanua Yehowa si toröi ba soi si lö manehegö halöwö nifaluada. Lö tebulö lafosumange ndra samatörö ira talifusö niʼomasiʼöda andrö. Hizaʼi simane Gobadia, ha khö Yehowa lalulu waʼaurira. (Mat. 22:21) Börö me abölö laʼataʼufi Lowalangi, abölö laʼoʼö niwaʼönia moroi ba niwaʼö niha gulidanö. (Hal. 5:29) Andrö wa lö laböhöli wanuriaigö turia somuso dödö ba lafalua gangowuloa ba zi lö laʼila niha sato. (Mat. 10:16, 28) Baero daʼö, laʼalui lala enaʼö lasöndra gö ba wamati ira talifusöra. Nehegö zi no irai alua khö Henri si toröi ba zi sambua soi ba Afrika. Me lasaisi halöwöda ba soi andrö, aoha gölö Henri ba wamasao gö ba wamati khö ndra talifusönia. Imane wanutunö, ”Sindruhunia, yaʼodo andre niha saila-aila. Hizaʼi, faduhu dödögu wa tola barani ndraʼo börö wangataʼufigu Lowalangi soroi ba dödö.” Hadia tola göi barani ndraʼugö simane Henri? Tatu manö tola, na öforege ba wangataʼufi Lowalangi.

YALÖFARÖI NDRAʼUGÖ SIMANE ERE SEBUA SOTÖI YEHOYADA

12. Hewisa Gere Sebua sotöi Yehoyada hegöi foʼomonia ba wangoromaʼö faʼalöfaröi khö Yehowa?

¹² Iʼataʼufi Yehowa Ere Sebua sotöi Yehoyada. Börö daʼö, lö faröi ia ba lö tebulö itolo niha ba wamalua famosumange satulö. Samuza inötö, ono Gizebela sotöi Atalia, ifadöni dadaoma ba wamatörö ba tobali ia ratu. Ataʼu sibai niha khö Gatalia. Afaito ia ba omasi sibai ia mamatörö, irege iʼalui lala ba wamunu fefu ngaʼötö razo. Sindruhunia, yaʼira andrö maʼuwunia! (2 Ng. 22:10, 11) Hizaʼi, foʼomo Yehoyada sotöi Yozabata, ilumöʼö samösa ngaʼötö razo yaʼia daʼö Yehoasi. Labiniʼö nono andrö ba laʼebuaʼö darua ira foʼomonia. Me lafalua daʼö, no latatugöi wa lö aetu ngaʼötö Razo Dawido. Lö faröi Yehoyada khö Yehowa ba lö göi ataʼu ia khö Gatalia.—Amd. 29:25.

13. Hewisa nasa wangoromaʼö Yehoyada waʼalöfaröinia khö Yehowa?

¹³ Me fitu fakhe ndröfi Yehoasi, ifuli iforomaʼö Yehoyada waʼalöfaröinia khö Yehowa. Iʼalui lala Yehoyada ba wamataro Yehoasi tobali razo, börö me yaʼia andrö ngaʼötö Dawido ba yaʼia zinangea mamatörö. Na lö mofozu niʼera-erania andrö, hasambalö mubunu Yehoyada. Hizaʼi börö wanolo moroi khö Yehowa, mofozu fefu niʼera-erania. Latuhini göi ia ira sondröniaʼö saradadu hegöi niha Lewi, irege tola ifataro Yehoasi andre tobali razo ba ifaretakö enaʼö labunu Gatalia. (2 Ng. 23:1-5, 11, 12, 15; 24:1) Aefa daʼö, ”ifazökhi mbuʼusa li Yehoyada ba gotalua Yehowa faoma Razo hegöi ono mbanua wa lö tebulö tobali ira ono mbanua Yehowa”. (2 Ra. 11:17) Baero daʼö, ”ifataro göi zanaro bawa göli ba nomo Yehowa, enaʼö lö möi bakha niha si raʼiö”.—2 Ng. 23:19.

14. Börö me iʼataʼufi Yehowa Yehoyada, hadia nifalua Yehowa khönia?

¹⁴ No irai iwaʼö Yehowa, ”Niha samosumange yaʼo ba ufosumange göi.” Daʼö nifaluania khö Yehoyada. (1 Sa. 2:30) Duma-dumania, itatugöi Yehowa enaʼö musura ba Zura Niʼamoniʼö waʼasökhi dödö Yehoyada si tobali famahaʼö khöda. (Rom. 15:4) Ba me mate Yehoyada, tebeʼe khönia döi si sökhi me lakoʼo ia ”ba Mbanua Dawido ba zinga ndra razo, börö zi sökhi nifaluania ba ndraono Gizaraʼeli khö Lowalangi sindruhu hegöi ba nomonia andrö”.—2 Ng. 24:15, 16.

15. Hadia manö wamahaʼö nihalöda ba waö-waö waʼauri Yehoyada? (Faigi göi gambara.)

¹⁵ Tola tobali fanoloda waö-waö waʼauri Yehoyada andrö ba wangataʼufi Lowalangi. Tola laʼoʼö duma-duma Yehoyada ira satua sokubaloi na lö tebulö laʼalui lala ba wolumöʼö ono mbanua Lowalangi. (Hal. 20:28) Tola göi lafahaʼö ira ba duma-duma Yehoyada andrö ira talifusöda salawa döfi. Na laʼataʼufi Yehowa ba lö faröi ira, iʼogunaʼö ira Yehowa ba wamalua ohitö dödönia. Lö tebulö moguna ira khö Yehowa. Yaʼira si bohou ebua, tola göi lafahaʼö ira ba lala Yehowa ba woʼameʼegö tödö Yehoyada. Moguna sökhi gamuatara ba lafosumange niha si no alawa döfi, töra-töra ba niha si no ara mangai halöwö khö Yehowa si fao faʼalöfaröi. (Amd. 16:31) Tola göi tafahaʼö ita fefu ba zi no lafalua ira sondröniaʼö saradadu hegöi niha Lewi sotuhini Yehoyada. Omasi ita taforomaʼö waʼalöfaröi ba wotuhini ’niha sondröniaʼö’ yaʼita ba taʼoʼö niwaʼöra.—Heb. 13:17.

BÖI TOBALI NDRAʼUGÖ SIMANE RAZO YEHOASI

16. Hadia zangoromaʼö wa no awuwu ba wamati Razo Yehoasi?

¹⁶ Oya duma-duma si sökhi si tola ihalö Razo Yehoasi khö Yehoyada. (2 Ra. 12:2) Buania, omasi razo si bohou ebua andrö ba wangomusoiʼö tödö Yehowa. Hizaʼi me no mate Yehoyada, ifondrondrongo Yehoasi wehede ndra sondröniaʼö ba gödo razo si no mondröi sindruhu. Lua-luania, yaʼia hegöi ono mbanuania ”lafosumange döla-döla niʼamoniʼö awö nadu”. (2 Ng. 24:4, 17, 18) Afökhö sibai dödö Yehowa. Hizaʼi, ”ifatenge khöra ndra samaʼeleʼö Yehowa ba wolohe yaʼira mangawuli khönia”. Hewaʼae simanö, ”lö lafondrondrongo”. Lö lafondrondrongo göi nono Yehoyada sotöi Zakharia. Sindruhunia, Zakharia andre tenga ha samaʼeleʼö khö Yehowa ba tenga göi ha ere, hizaʼi si tenga böʼö Yehoasi. Faʼalösökhi fondrege zebua nifalua Razo Yehoasi yaʼia daʼö me ifaretakö enaʼö mubunu Zakharia, hewaʼae na sindruhunia ösi nomo Zakharia zangorifi yaʼia.—2 Ng. 22:11; 24:19-22.

17. Hadia manö zalua khö Yehoasi börö me lö ifosumange Yehowa?

¹⁷ Lö sökhi zalua khö Yehoasi börö me iböhöli wamosumange Yehowa. No irai iwaʼö Yehowa, ”Niha sangosiwawöi yaʼo ba uʼosiwawöi.” (1 Sa. 2:30) Sindruhu sa, daʼö zalua khö zaradadu Yehoasi ”sato sibai”, kala ira labeʼe ira saradadu Ziria si lö atoto ba ’ebua zokho’ Yehoasi. Me no mofanö zaradadu Siria, labunu Yehoasi ira sohalöwö khönia börö me no ibunu Zakharia. Tenga göi sinangea mukoʼo razo si lö sökhi andrö ”ba lewatö ndra razo”.—2 Ng. 24:23-25; Faigi ”anak Barakhia” ba keterangan tambahan untuk Matius 23:35.

18. Simane niwaʼö ba Yeremia 17:7, 8, hadia zinangea tafalua enaʼö böi tobali ita simane Yehoasi?

¹⁸ Hadia wamahaʼö nihalöda ba zalua khö Yehoasi? Yehoasi andrö amaedola geu si lö aro waʼa. Tola mosindro geu daʼö börö me ituwuni ia eu tanö böʼö. Me no aefa mate Yehoyada, lö hadöi saʼae sotuwuni Yehoasi. Börö daʼö, me so wondrönisi dödö ba niha si no mondröi sindruhu si no amaedola nangi sabölö-bölö, aekhu göi tou Yehoasi. Moroi ba daʼa tafahaʼö ita wa fangataʼufida Lowalangi tebai teʼodaligö khö ndra talifusöda ba wamati tefarahu ba daʼö nösi nomoda. Enaʼö lö tebulö aro ita ba wamati, moguna taforege ba wangomasiʼö hegöi ba wamosumange Yehowa. Andrö, moguna asese tafahaʼö ita ba Zura Niʼamoniʼö, taʼangerönusi, ba talau mangandrö.—Baso Yeremia 17:7, 8; Kol. 2:6, 7.

19. Hadia zindruhunia niʼandrö Yehowa khöda?

¹⁹ Sindruhunia, lö oya niʼandrö Yehowa khöda. Tola taʼila niʼandrönia andrö ba Zangombakha 12:13: ”Ataʼufi Lowalangi sindruhu ba falua goroisania, börö me daʼa zinangea lafalua niha fefu.” Na taʼataʼufi Lowalangi, tola tataögö wanandraigö ba zi so miföna, ba lö faröi ita simane Gobadia hegöi Yehoyada. Lö hadöi si tola mamakiko fahuwusada khö Yehowa.