TUHO SIʼOFÖNA | HADIA TOLA TESUSUGI NIHA SI NO MATE?
Hadia Zalua Na No Mate Niha?
Imane Lionel, ”So tölu nahia na no mate niha: sorugo, narako, mazui alitö fanasa horö. Uʼila wa tenga sinangea möi ndraʼo ba zorugo hegöi ba narako. Lö aboto göi ba dödögu hadia nifotöi alitö fanasa horö, ba lö irai ubaso ba Zura Niʼamoniʼö. Daʼö fefu ha fehede niha.”
Imane Fernando, ”Famahaʼö sasese urongo na no mate niha möi ira ba zorugo. Hizaʼi, lö faduhu dödögu. Na uʼangeraigö tödögu, na mate niha lö hadöi faʼauri saʼae.”
Te manofu-nofu ndraʼugö: Hadia zalua ba niha si no mate? Na mate niha niʼomasiʼöda, hadia tefakao ia? Hadia tola ifuli falukha ita khöra? Datafaigi hewisa zi ndruhunia niwaʼö Zura Niʼamoniʼö. Itutunö khöda Sura Niʼamoniʼö wa ibeʼe Lowalangi dötönafö ba niha si no mate.
Hadia zalua ba niha si no mate?
FANEMA LI MOROI BA ZURA NIʼAMONIʼÖ: ”Sauri sa, ba no laʼila, wa si mate ira dania, ba si no mate, ba lö hadia ia laʼila, ba löʼö saʼae böli gölöra, löʼö saʼae itörö tödö niha böʼö ira. Fefu hadia ia niʼilamö ölau tangau, ba waʼabölömö andrö, ba ölau; ba mbanua tou andrö sa, ba zi möiʼö dania, ba lö halöwö ba lö faʼonekhe ba lö faʼaboto ba dödö ba lö faʼatua-tua.”a—Zangombakha 9:5, 10.
Lewatö, nahia niha si no mate si tebai laʼila hadia ia ba lö halöwö nifalua ba daʼö. Hadia niwaʼö Yobi sanandrösa ba lewatö? Ha ba zi maʼö-maʼökhö mate nono Yobi ba ahori fefu gokhötania, aefa daʼö göna ia bou auri. Ilau mangandrö khö Lowalangi: ”Enaʼö na ba mbanua tou öbiniʼö ndraʼodo.” (Yobi 1:13-19; 2:7; 14:13) Moroi ba wehede Yobi andre, aboto ba dödönia wa lewatö andrö tenga alitö narako ba tenga nahia wamakao. Tobali, si so ba gera-erania wa lewatö andrö nahia sahono.
Enaʼö aboto ba dödöda hadia zalua ba niha si no mate, itutunö khöda Sura Niʼamoniʼö so dawalu niha si no irai tesusugi.—Faigi kotak ”So Dawalu Niha Nisusugi si No Tesura ba Zura Niʼamoniʼö.”
Lö hadöi ba gotalua si dawalu andre sangumaʼö wa so ira ba zorugo mazui ba nahia wamakao. Na si ndruhu-ndruhu so ira ba nahia daʼö, tatu manö ladunö-dunö ba niha me no tesusugi ira. Na si ndruhu-ndruhu alua zimane daʼö, tatu manö tesura ia ba Zura Niʼamoniʼö enaʼö laʼila niha fefu. Hizaʼi, lö musura ba Zura Niʼamoniʼö. Samösa lö hadöi ba gotalua zi dawalu andrö zanutunö hadia zalua khöra. Hadia mbörö? Ba ginötö mate ira lö laʼila hadia ia zalua hulö zi no mörö. Iʼamaedolagö Sura Niʼamoniʼö niha si no mate andre hulö zi mörö. Duma-dumania, Sura Niʼamoniʼö zangombakha khöda me mate Dawido hegöi Sitefano hulö zi mörö ira.—Halöwö Zinenge 7:60; 13:36 (Terjemahan Dunia Baru, NW).
Hadia so dötönafö ba niha si no mate? Hadia tola ifuli tesusugi ira?
a Ba Kitab Suci Terjemahan Dunia Baru, ngawua wehede ”Lewatö” na ba li Heberaiʼo yaʼia daʼö ”Syeol” ba li Yunani ”Hades”. So ösa Zura Niʼamoniʼö zangogunaʼö wehede ”Narako”. Hizaʼi, lö irai iwaʼö ba Zura Niʼamoniʼö wa niha si no mate tefakao ba Narako.