FAʼAURI NIHA KERISO
Fanuriaigö ba Famahaʼö—Moguna ba Wombaliʼö Nifahaʼö
Ifatenge ndra soloʼö khönia Yesu enaʼö labaliʼö nifahaʼö fefu niha. (Mat 28:19) Daʼa halöwö fanuriaigö hegöi famahaʼö. Ero inötö, moguna tasofu khöda samösa, ’Hewisa enaʼö itugu onekhe ndraʼo ba wombaliʼö nifahaʼö fefu niha?’
FANURIAIGÖ
Moroi na tabaloi enaʼö laʼondrasi ita niha, moguna taʼalui niha ”sotemaʼö” yaʼita. (Mat 10:11) Ba ginötö möi ita manuriaigö, hadia taforege wahuhuosa ba niha ”si so ba daʼö”? (Hal 17:17) Börö me owölö-ölö zinenge sotöi Faulo ba wanuriaigö, andrö wa tobali nifahaʼö Lidia.—Hal 16:13-15.
”Ba zanguhulö wongi fazaewe danömö zinanö khöu, ba böi göi böda dangau na tanö owi” (Zango 11:6)
FAIGI VIDEO BÖI BATO WANURIAIGÖ—SI LÖ RESMI HEGÖI BA NOMO-OMO MISA, BA BEʼE WANEMA LI BA WANOFU-NOFU DAʼA:
Moroi ba nifaluania ero maʼökhö, hewisa wangoromaʼö Samuel wa owölö-ölö ia ba wamazaewe tanömö zindruhu?
Hana wa moguna taʼodödögö ba wamalua ngawalö halöwö fanuriaigö?
Ba waʼaurimö si ero maʼökhö, haʼökhö manö tola öfaʼema duria Wamatörö Lowalangi?
FAMAHAʼÖ
Ba wombaliʼö nifahaʼö, tenga ha asala taröi majalah ba niha. Enaʼö tedou ira ba wamati, moguna tafuli tafalukhaisi ba tafahaʼö ira ba Zura Niʼamoniʼö. (1Kor 3:6-9) Hizaʼi, hadia nifaluada na no taforege wamahaʼö zi samösa niha sanandrösa ba zindruhu ba lö hadöi mbuania? (Mat 13:19-22) Böi mamalö taʼalui niha sangokhögö tödö simane ’tanö si sökhi’.—Mat 13:23; Hal 13:48.
”Yaʼodo zananö, Afolo zombuwui ba Lowalangi zamanöi” (1Kor 3:6)
FAIGI VIDEO BÖI BATO WANURIAIGÖ—BA NAHIA SATO NIHA BA MUBALIʼÖ NIFAHAʼÖ, BA BEʼE WANEMA LI BA WANOFU-NOFU DAʼA:
Hadia nifalua Solomon hegöi Mary ba wombuwui sindruhu ba dödö Ezekiel hegöi Abigail?
Hadia zi tobali ohitö dödöda ba ngawalö halöwö fanuriaigö, simane fanuriaigö ba nahia sato niha?
Börö me omasi ita tafahaʼö niha, hadia nifaluada na so niha si lö manemaʼö sindruhu?