Atulöʼö Ndraʼugö ba Niha si Fao Faʼomasi

1, 2. Hadia zalua ba niha si no mututunö ba mbuku I Moze ba hana wa adöni dödöda ba daʼö?

HADIA no irai öfatou-tou tödöu niha si no irai faʼudu nitutunö ba Zura Niʼamoniʼö? Ba zi haʼuga faza wamobörö sura I Moze taʼila wa ibunu Habeli Kaʼino (I Moze 4:3-8); ibunu samösa nono matua Lameki börö me no ifesokho ia (I Moze 4:23); fasoso ira gubalo gurifö Gaberahamo faoma gubalo gurifö Loti (I Moze 13:5-7); fayawa Hagara khö Zara, ba abao dödö Zara khö Gaberahamo (I Moze 16:3-6); ifaʼudusi fefu niha Simaʼeli, ba dozi niha lafaʼudusi ia.​—I Moze 16:12.

² Hana wa mudunö-dunö ba Zura Niʼamoniʼö waʼudusara? Börö me tola tahalö wamahaʼö khöda moroi ba duma-duma niha si lö moʼahonoa, si so abula dödö. Yaʼita göi niha si lö moʼahonoa, ba na alua ba waʼaurida gabula dödö simanö, tola taʼoʼö duma-duma si sökhi moroi ba Zura Niʼamoniʼö ba böi taʼoʼö zi lö sökhi. (Roma 15:4) Daʼa zanolo yaʼita enaʼö tola atulö ba niha böʼö.

3. Hadia nifatunöda ba duho daʼa?

³ Ba duho daʼa, tafahaʼö ita hadia mbörö wa moguna taʼatulöʼö waʼafaehu wangera-ngerada ba niha böʼö, ba hewisa wamalua yaʼia. Tafahaʼö ita göi ba goi-goi Zura Niʼamoniʼö sanolo yaʼita enaʼö atulö ba niha, tarorogö wahuwusada khö Yehowa hegöi ba niha böʼö.

HANA WA MOGUNA ATULÖ NONO MBANUA LOWALANGI BA NIHA FEFU

4. Hadia gamuata si toʼölö lafalua niha gulidanö ba hadia lua-luania?

⁴ Satana mbörö wa fawuka niha gulidanö ba teʼasogö waʼafaböʼö lala wangera-ngera. Hana wa tawaʼö daʼö? Ba kabu Edena, imane Satana wa tola ba sinangea lahalö samösa gangetulara, tenga dali fao Lowalangi. (I Moze 3:1-5) Na tafaigi ba ginötö daʼa, amuata simane daʼö zi tola mangaʼasogö abula dödö. Ato zangumaʼö wa yaʼira zinangea mangai angetula samösa, he si sökhi hegöi si lö sökhi. Fayawa ira, so khöra wakhögusa ba faoma fahindri ira, ba lö ba dödöra na afökhö dödö niha böʼö ba gangetula nihalöra. Lua-luania, alua waʼudusa. Ifasugi ba dödöda Sura Niʼamoniʼö na alio mofönu ita tola teʼasogö wasosota ba fahöna horö.​—Gamaedola 29:22.

5. Hadia nifahaʼö Yesu ba niha enaʼö lö khöra watötöisa?

⁵ Me ifaʼema Yesu Huhuo ba Hili, ifahaʼö ndra nifahaʼönia enaʼö atulö ira ba niha ba böi so wabuʼa-buʼasa, hewaʼae akao ira. Duma-dumania, imane khöra enaʼö sökhi gamuatara, atulö ira ba niha, latimbagö wönu, lö laradö-radö wangatulöʼö faʼafaböʼö wangera-ngera, ba laʼomasiʼö nudura.​—Mataiʼo 5:5, 9, 22, 25, 44.

6, 7. (a) Hana wa moguna taʼatulöʼö waʼafaböʼö wangera-ngerada ba waʼalio? (b) Hadia wanofu-nofu sinangea laʼangerönusi ono mbanua Yehowa?

⁶ Ba ginötö andre, tafosumange Yehowa na mangandrö ita, na möi manuriaigö, ba na möi ba gangowuloa. Na lö atulö ita khö ndra talifusöda, lö itema Yehowa zumange nibeʼeda khönia. (Mareko 11:25) Na omasi ita tobali si fahuwu khö Yehowa, moguna taʼefaʼö zala niha si fasala khöda.​—Baso Luka 11:4; Efeso 4:32.

⁷ Iʼandrö Yehowa ba nono mbanuania enaʼö laʼefaʼö zala niha ba so khöra waʼatulö ba fahuwusa si sökhi. Tola tasofu khöda samösa, ’Hadia alio uʼefaʼö zala ndra talifusögu? Hadia omuso dödögu fariawö khöra?’ Na ömane tödöu wa moguna nasa so khöu waʼebolo dödö, angandrö khö Yehowa enaʼö ibeʼe khöu wanolo. Ifondro-ndrongo ba itema Amada ba zorugo wangandrö si fao fangide-ngideʼö.​—I Yohane 5:14, 15.

HADIA LÖ ÖTANÖ BA DÖDÖU ZALA NIHA SI FASALA KHÖU?

8, 9. Hadia zinangea tafalua na abao dödöda ba niha?

⁸ Fefu ita oi lö moʼahonoa ba tola manö afökhö dödöda ba wehede hegöi ba nifalua niha. (Zangombakha 7:20; Mataiʼo 18:7) Hadia nifaluau? Tola tahalö khöda wamahaʼö moroi ba zalua andre: Samösa dalifusöda ira alawe zangowai darua ndra talifusöda ira matua me owulo ira. Hizaʼi, abao dödö dalifusöda ira matua si samösa börö lagu wangowainia. Me hatö daru-darua ndra talifusöda ira matua andre, itutunö hadia zabao dödönia sanandrösa khö dalifusöda ira alawe sangowai yaʼira. Ifatika khönia dalifusöda ira matua si samösa andrö wa talifusöda ira alawe daʼö lö manö si faröi ia khö Yehowa ba zi 40 fakhe waʼara hewaʼae oya gabula dödönia. Faduhu dödönia wa lö ba dödö dalifusöda ira alawe andrö wangafökhöiʼö tödönia. Hadia niwaʼö dalifusöda sabao tödö andrö? Imane, ”Atulö niwaʼömö.” Aefa daʼö, lö itörö tödönia zi no alua andrö.

⁹ Hadia wamahaʼö khöda moroi ba zalua andrö? Na so zameʼe tetutu dödöda, tola tafili hadia nifaluada. Niha si so faʼomasi, iʼefaʼö zala niha. (Baso Gamaedola 10:12; I Fetero 4:8.) Na ’tabologö dödöda ba golalöwa’, daʼa zi sökhi ba wamaigi Yehowa. (Gamaedola 19:11; Zangombakha 7:9) Tobali, na ifuli so niha sangumaʼö mazui samalua hadia ia zi tola mangafökhöiʼö dödöu, sofu khöu samösa, ’Hadia lö utanö ba dödögu zala niha si fasala khögu? Hadia moguna uʼera-era manö ia?’

10. (a) Hewisa dödö dalifusöda ira alawe me labeʼe khönia wehede safökhö? (b) Hadia Ayati si tola manolo dalifusöda andrö enaʼö atulö ia ba niha böʼö?

¹⁰ Na so zameʼe khöda fehede si lö atulö, tola manö abua khöda woʼolifuagö fehedera andrö. Angeraigö hadia zalua khö dalifusöda ira alawe perintis, takaoni manö döinia Lucy. So ösa ndra talifusö ba gangowuloa zameʼe fehede si lö atulö khönia sanandrösa ba halöwö fanuriaigö nifaluania hegöi inötö niʼogunaʼönia. Afökhö sibai dödönia ba iʼandrö mbua gera-era ndra talifusöda si so faʼaboto ba dödö. Hadia lua-luania? Imane wangumaʼö wa laʼogunaʼö Zura Niʼamoniʼö ba wanolo yaʼia enaʼö lö iʼera-era wehede si lö atulö nifaʼema niha andrö. Abölö sökhi iʼera-era sanandrösa khö Yehowa. Tefarou dödönia me ibaso Mataiʼo 6:1-4. (Baso.) Ayati daʼa zamasugi ba dödönia wa sabölö moguna yaʼia daʼö wangomusoiʼö dödö Yehowa. Börö daʼö, ifili enaʼö lö itanö ba dödönia wehede si lö atulö andrö. Iadaʼa, hewaʼae so zameʼe fehede si lö atulö sanandrösa ba wanuriaigönia, omuso dödönia börö me iʼila wa ifalua zabölö sökhi ba wangomusoiʼö dödö Yehowa.

NA TEBAI ÖʼOLIFUGÖ ZALA NIHA SI FASALA KHÖU

11, 12. (a) Hadia zinangea ifalua samösa niha Keriso na faduhu dödönia wa ’so hadia ia zinegu dalifusönia’ khönia? (b) Hadia zi tobali famahaʼö khöda moroi ba nifalua Gaberahamo enaʼö böi so waʼudusa? (Faigi gambara ba wamobörö wamahaʼö.)

¹¹ ”Asese sa sala ita, dozi ita.” (Yakobo 3:2) Duma-dumania, no örongo wa so dalifusöda zabao tödö ba wehede hegöi ba nifaluau. Hadia zinangea tafalua? Imane Yesu, ”Na öbeʼe gameʼelau ba naha wameʼe sumange, ba na itörö tödöu ba daʼö so hadia ia zinegu dalifusöu khöu, ba röi ba daʼö gameʼelau föna naha wameʼe sumange, ba ae ua, ba atulöʼö ndraʼugö khö dalifusöu, ba awena öfuliʼö, ba öbeʼe gameʼelau andrö.” (Mataiʼo 5:23, 24) Börö daʼö, fahuhuo khö dalifusöu. Na öfalua daʼö, no öʼatulöʼö ndraʼugö khönia. Böi aila ndraʼugö wangumaʼö wa yaʼugö zi fasala ba böi ösalaikö ia. Sabölö moguna yaʼia daʼö atulö khö ndra talifusöda.

¹² Itutunö khöda Sura Niʼamoniʼö hewisa enaʼö tola atulö nono mbanua Lowalangi ba ginötö so waʼafaböʼö wangera-ngerara. Duma-dumania, oya gurifö Gaberahamo hegöi khö nono mbeneʼönia Loti. Ibörötaigö fabuʼa-buʼa gubalö guriföra zamösana börö me lö ibönö khöra danö si so yaʼira. Börö me omasi atulö Gaberahamo, itehegö khö Loti enaʼö ifili khönia nahia si sökhi. (I Moze 13:1, 2, 5-9) No sambua duma-duma si sökhi khöda daʼa! Hadia moʼamböta Gaberahamo börö waʼasökhi dödönia? Löʼö. Lö ara aefa daʼö, ifabuʼu khönia Yehowa wa ibeʼe howu-howu zi töra moroi ba zi no aheta khönia. (I Moze 13:14-17) Hadia wamahaʼönia khöda? Hewaʼae rugi ita, ifahowuʼö ita Yehowa börö me taʼatulöʼö ita si fao faʼomasi.^[1]—Faigi gonönöta.

13. Hadia nifalua samösa zatua me itema wehede sangafökhöiʼö tödö, ba hadia wamahaʼö si tola tahalö moroi ba duma-dumania andre?

¹³ Angeraigö duma-duma salua ba ginötö andre. Fatelefo zatua (pengawas) departemen si bohou ba kebaktian khö zi samösa talifusöda ba wanofu hadia tola ilului halöwö ba departemennia. Lö sökhi wehede dalifusöda andrö khönia ba iduhö telefo börö me lö saheta mbao dödönia khö zatua departemen si no numalö. Lö abao dödö zatua si bohou andrö ba lö iʼolifugö zi no alua. Sambua za aefa daʼö, ifuli itelefo dalifusöda no mege ba iʼandrö enaʼö falukha ira. Ba migu aefa daʼö, falukha ira ba Balai Mbanua Lowalangi (Balai Kerajaan) ba mangandrö ira khö Yehowa ba awena fahuhuo ira mato sambua za. Itutunö talifusöda andrö hadia zalua ba gotaluara zatua si no numalö. Ihaogö ifondro-ndrongo zatua si bohou ba iʼalui ayati si tola manolo yaʼia. Ba gafuriata, atulö ira ba fao ia ba wolului halöwö ba kebaktian. Omuso dödönia me ihaogö wahuhuosa khönia zatua andrö si fao faʼebolo dödö.

HADIA MOGUNA ÖFAOGÖ NDRA SATUA SOKUBALOI?

14, 15. (a) Hawaʼara tola tafalua mene-mene nisura ba Mataiʼo 18:15-17? (b) Hadia zi tölu ngawalö zinangea tafalua niwaʼö Yesu, ba hadia gohitö dödöda na tafalua ia?

¹⁴ Na so watitisa ba gotalua zi darua niha Keriso, tola ba moguna yaʼira samösa zangodödögö enaʼö atulö ira. Hewaʼae simanö, itaria abua wamalua yaʼia. Hizaʼi, tola taʼandrö wanolo ba niha böʼö na so gabula dödöda moloʼö nisura ba Mataiʼo 18:15-17. (Baso.) Me iwaʼö Yesu ”mosala”, tenga daʼö geluahania faʼafaböʼö wangera-ngera side-ide ba gotalua niha Keriso. Hewisa wa taʼila daʼö? Imane Yesu na lö ifalalini gera-erania niha si fasala me no aefa fahuhuo khönia dalifusönia, samaduhuʼö, hegöi ira talifusöda satua sokubaloi, ”yahulö niha baero ia khöu, yahulö zanema beo”. Ba ginötö andre, tola manö muʼefasi ia moroi ba gangowuloa. Na ”mosala”, tefarahu ia simane amuata walimosa mazui famöbögö si lö duhu ba niha. Hizaʼi, tenga simane amuata wohorö, faʼorudu ndra matua ba ndra matua, kemurtadan mazui fanömba adu. Na so horö simane daʼa, ira satua sokubaloi zangai angetula.

¹⁵ Ibeʼe Yesu mene-mene andrö enaʼö taʼila hewisa wanoloda ndra talifusöda börö me taʼomasiʼö ia. (Mataiʼo 18:12-14) Hewisa woloʼöda mene-mene andrö? (1) Taʼatulöʼö ita khö ndra talifusöda tenga dali fao niha böʼö. Tola manö fahuhuo ita khönia ba zi haʼuga kali, ba hewisa na lö satulö ita? (2) Tafaogö niha böʼö ba ginötö fahuhuo ita khönia. Hizaʼi, enaʼö niha sangila mangosisiʼö hadia mbörö wa tola alua zimanö. Na no atulö ita khönia ”no ösöndra dalifusöu”. Hizaʼi, na no hauga kali fahuhuo ami ba lö iʼila atulö (3) fatunö khö ndra satua sokubaloi.

16. Hana wa tola tawaʼö wa lala si no ifakhoi Yesu andrö sökhi ba si fao faʼomasi enaʼö so waʼatulö?

¹⁶ Si toʼölönia, lö moguna taʼoʼö sibai zi tölu lala nifakhoi ba Mataiʼo 18:15-17. Ha famarou dödö daʼö. Hana wa tawaʼö zimanö? Sasesenia, aboto ba dödö niha si no fasala wa no fasala ia ba ilau mangatulö. Börö daʼö, lö moguna muʼefasi ia ba gangowuloa. Moguna so waʼebolo dödö ba niha si no abao tödö enaʼö atulö ia khö dalifusönia. Tobali, moroi ba mene-mene Yesu oroma wa lö moguna taʼanemai möi ita khö ndra satua sokubaloi. Awena tafatunö ia, ha na no tafalua lala si dombua andrö, ba na so dane-dane wa so zala si no mufalua.

17. Hadia mbua nitemada na taʼodödögö waʼatulö ba niha?

¹⁷ Sagötö lö soʼahonoa ita, hasambalö taʼafökhöiʼö dödö niha. Imane Yakobo, ”Asese sa sala ita, dozi ita. Na so zi lö sala ba li, ba no niha si no moʼahonoa ia, sangila mamatörö botonia maʼasambua.” (Yakobo 3:2) Enaʼö so waʼasambua wangera-ngera, moguna ’taʼalui waʼatulö, gohi!’ (Zinunö 34:15) Na atulö ita ba niha, tola so khöda wahuwusa si sökhi khö ndra talifusöda, ba teʼosambuaʼö ita. (Zinunö 133:1-3) Sabölö moguna, aro wahuwusada khö Yehowa, ”Lowalangi waʼohahau dödö”. (Roma 15:33) Oya howu-howu nitemada na mangatulö ita ba niha si fao faʼomasi.