FAMAHAʼÖ 36
Tatörö Zindruhu ba Ngawalö Hadia Ia
Omasi ita na fefu zi fahuwu khöda latörö zindruhu. Omasi göi Yehowa na latörö zindruhu ira si fahuwu khönia. Hizaʼi abua wamalua daʼö börö me ato niha ba gulidanö andre lö latörö zindruhu. Na simanö, hadia manö mbuania khöda na tatörö zindruhu ba ngawalö hadia ia?
1. Hadia sibai mbörö wa tatörö zindruhu?
Na tatörö zindruhu, no taforomaʼö khö Yehowa wa taʼomasiʼö ba tafosumange ia. Böi olifu ita wa fefu hadia ia niʼera-erada hegöi nifaluada ahori iʼila Yehowa. (Heberaiʼo 4:13) Anehe ia na tatörö zindruhu ba omuso dödönia. Imane Taromalinia, ”Ogoro Yehowa niha samalua faʼonekhe, hizaʼi, fahuwu sibai ia ba niha sadölö tödö.”—Amaedola 3:32.
2. Hezo manö taforomaʼö wa no tatörö zindruhu ba waʼaurida sero maʼökhö?
Omasi Yehowa na ’tatörö zindruhu na fahuhuo ita khö nawöda’. (Zakharia 8:16, 17) Eluahania, moguna tatörö zindruhu na fahuhuo ita ba nösi nomoda, khö nawöda wohalöwö, khö ndra talifusöda si sara lala wamati mazui khö ndra samatörö. Lö göi falimo ita na so nisofu-sofura khöda. Na tatörö zindruhu, lö managö ita mazui talimo niha böʼö. (Baso Gamaedola 24:28 hegöi Efeso 4:28.) Tabuʼa göi pajak si tobali foʼömöda. (Roma 13:5-7) Daʼö zinangea tafalua ba wangoromaʼö wa ’tatörö zindruhu ba ngawalö hadia ia’.—Heberaiʼo 13:18.
3. Hadia manö mbuania na tatörö zindruhu?
Tola lafaduhusi tödö ita niha na laʼila lö falimo ita. Ohahau göi dödö ndra talifusöda ba mbanua niha Keriso amaedola zi sambua omo si fahuwu. Baero daʼö, taʼokhögö dödö side-ide si lö sinegu. Na tatörö zindruhu ”tola tefolakhömi wamahaʼö Lowalangi Sangorifi yaʼita” ba tobali göi fondrönisi dödö niha böʼö irege lafosumange Lowalangi.—Tito 2:10.
ODÖDÖGÖ NASA WANGALUI
Tatutunö dania hewisa dödö Yehowa na tatörö zindruhu ba hadia mbua nitemada na tafalua daʼö. Tafatunö göi hewisa wangoromaʼöda wa tatörö zindruhu ba lala waʼaurida.
4. Omuso dödö Yehowa ba niha sanörö sindruhu
Baso Zinunö 44:21 hegöi Maleakhi 3:16, ba beʼe wanema li ba wanofu-nofu daʼa:
Moloʼö yaʼugö, hadia mbörö wa tebai so ba wangera-ngerada wa tola tabiniʼö nifaluada föna Yehowa?
Moloʼö yaʼugö, hewisa dödö Yehowa na tatörö zindruhu hewaʼae na abua khöda wamalua daʼö?
Samösa nono mbanua sanörö sindruhu, abölö lafaduhusi tödö ia ira samatörö
5. Böi böhöli wanörö sindruhu
Ato niha sangumaʼö wa lö eluaha na tatörö zindruhu. Hizaʼi, hadia mbörö wa lö taböhöli wanörö sindruhu? Futa VIDEO.
Baso Heberaiʼo 13:18, ba tutunö hewisa enaʼö lö tebulö tatörö zindruhu . . .
ba nösi nomoda.
ba nahiada wohalöwö mazui ba zekola.
ba ginötö tanö böʼö.
6. So mbuania khöda na tatörö zindruhu
Itaria göna ita abula dödö na tatörö zindruhu. Hizaʼi, na lö tebulö tafalua daʼö so mbua nitemada. Baso Zinunö 34:12-16, ba beʼe wanema li ba wanofu daʼa:
Hadia manö mbua si no örasoi börö me ötörö zindruhu?
Omuso dödö zatua na lö falimo nononia, ba omuso göi dödö Yehowa na lö falimo ita
Itugu aro zi sambua fongambatö na faoma latörö zindruhu khö nawöra zamösana
Samösa zohalöwö sanörö sindruhu, abölö ifaduhusi tödö ia kafalonia
SO ZANGUMAʼÖ: ”Lö salania na itaria falimo ita, asala lö rugi niha böʼö.”
Hadia mbörö wa faduhu dödöu wa fatuwu Yehowa ba niha si falimo-limo?
RAHU-RAHU WAMAHAʼÖ
Omasi Yehowa na fefu zi fahuwu khönia latörö zindruhu he ba wehede hegöi ba nifaluara.
Hadia Wamahaʼö si Tola Öhalö?
Hezo manö taforomaʼö wa no tatörö zindruhu ba waʼaurida sero maʼökhö?
Hadia mbörö wa tebai so ba wangera-ngerada wa tola tabiniʼö nifaluada föna Yehowa?
Hana wa omasiʼö ötörö zindruhu ba ngawalö hadia ia?
ALUI NASA DANÖ BÖʼÖ
Hewisa zatua ba wamahaʼö iraonora enaʼö latörö zindruhu?
Hadia mbua nitemada na tafalua zi no tazazi?
Hadia moguna tabuʼa pajak hewaʼae laʼogunaʼö ba zi fasala?
”Hadia Lö Tola Löʼö Öbuʼa Pajak?” (Menara Pengawal, 1 Mbaŵa si Siwa 2011)
Hadia mbörö wa tebulö zi samösa ira matua si lö manörö sindruhu ba zilalö?