Iʼabölöʼö Dania Ndraʼugö Yehowa

1, 2. Hadia nifalua Lowalangi me götö Zura Niʼamoniʼö, ba hadia wanofu-nofu niha ba ginötö göna ira fökhö?

NA NO irai mofökhö ndraʼugö, te manofuʼö, ’Hadia döhö dania wökhögu andre?’ Mazui na mofökhö nösi nomou hegöi si fahuwu khöu tola manö manofuʼö hadia döhö dania ira andrö. Taʼandrö saohagölö na lö mofökhö ita hegöi niha niʼomasiʼöda. Itutunö khöda Sura Niʼamoniʼö wa so niha sofökhö ba omasi ira döhö. Duma-dumania, Razo Gahaseya, ono Gahabi ba Gizebela, manofu-nofu dödönia hadia tola döhö dania wökhönia andrö. Aefa daʼö, mofökhö Razo Benihada moroi ba ndrawa Garamo ba manofu ia hadia tola döhö dania wökhönia andrö.—II Raz. 1:2; 8:7, 8.

² Meföna, iʼombakhaʼö khöda Sura Niʼamoniʼö wa itaria ifalua dandra sahöli-höli dödö Yehowa ba wamadöhö niha sofökhö, iʼogunaʼö göi ndra samaʼeleʼö ba wanusugi niha si no mate. (I Raz. 17:17-24; II Raz. 4:17-20, 32-35) Ba ginötö andre, ato niha sofökhö ba manofu-manofu ira hadia ifalua Lowalangi dandra sahöli-höli dödö andre enaʼö döhö ira.

3-5. Hadia zi tola ifalua Yehowa hegöi Yesu, ba hadia wanofu-nofu nifatunöda ba duho daʼa?

³ Tola manö ifalua hadia ia Yehowa ba waʼaurida. Duma-dumania, iʼasogö wökhö ba wanguhuku niha, simane nifaluania khö Waraʼo ba götö Gaberahamo, aefa daʼö khö dalifusö Moze sotöi Miriya. (I Moz. 12:17; IV Moz. 12:9, 10; II Zam. 24:15) Ihuku göi ndraono Gizaraʼeli, ibeʼe ”wökhö ba famakao” me faröi ira khönia. (V Moz. 28:58-61) Ba ginötö böʼö, ilumöʼö nono mbanuania moroi ba ngawalö wökhö. (II Moz. 23:25; V Moz. 7:15) Ifadöhö göi zofökhö. Duma-dumania, me göna Yobi fökhö sabölö-bölö ifadöhö ia Yehowa.—Yob. 2:7; 3:11-13; 42:10, 16.

⁴ Faduhu dödöda so waʼabölö khö Yehowa ba wamadöhö fökhö. Tola göi ifalua daʼö Yesu. Me so ia ba gulidanö, ifadöhö zofökho simane sobou auri hegöi fökhö saniri. Ifadöhö zauʼa hegöi si mate dambai. (Baso Mataiʼo 4:23, 24; Yoh. 9:1-7) Tola tadöna-döna wa ifalua dania dandra sahöli-höli dödö Yesu ba gulidanö si bohou börö me no irai ifalua meföna. Ba luo daʼö, ”Samösa lö ba mbanua sangumaʼö: No gönado safökhö khögu.”—Yes. 33:24.

⁵ Tobali, na abölö-bölö wökhöda, hadia tola tadöna-döna dandra sahöli-höli dödö moroi khö Yehowa hegöi khö Yesu ba wamadöhö yaʼita iadaʼa? Ba hadia zinangea taʼangeraigö ba ginötö tafili dalu-dalu?

ODALIGÖ YEHOWA NA MOFÖKHÖʼÖ

6. Hadia niwaʼö Zura Niʼamoniʼö sanandrösa ba dandra sahöli-höli dödö nifalua niha Keriso me döfi si föföna?

⁶ Ibayoini niha Keriso si föföna Yehowa ba ibeʼe khöra waʼabölö ba wamalua tandra sahöli-höli dödö. (Hal. 3:2-7; 9:36-42) Duma-dumania, tola lafadöhö niha sofökhö ba fahuhuo ira ba li si faböʼö-böʼö. (I Kor. 12:4-11) Ba gafuriatania, tebato dandra sahöli-höli dödö andrö simane niwaʼö Zura Niʼamoniʼö. (I Kor. 13:8) Andrö, böi tadöna-döna wa so dandra sahöli-höli dödö moroi khö Lowalangi ba wamadöhö yaʼita hegöi niha niʼomasiʼöda ba ginötö andre.

7. Hana wa terara dödöda na tabaso Zinunö 41:4?

⁷ Na mofökhö ndraʼugö, hasambalö itolo ndraʼugö Yehowa ba ibeʼe khöu waʼabölö, simane nifaluania ba zilalö ba nono mbanuania. Imane Razo Dawido, ”Yaʼahowu zi so ba dödö niha si numana! Na baŵa wamakao, ba iʼorifi ia Yehowa. Irorogö ia Yehowa ba iʼanauʼö nosonia.” (Zin. 41:2, 3) Tatu manö, tenga daʼö geluaha wehede Dawido wa lö irai mate dania niha satulö soʼameʼegö tödö niha si numana. Tobali, hewisa wanolo Yehowa niha soʼameʼegö tödö niha si numana? Itutunö Dawido, ”Ituwu narö galogonia Yehowa ba wökhönia, tou ba zalo; ötolo ia ba wökhönia fefu.” (Zin. 41:4) Aboto ba dödö Yehowa gabula dödö salua ba nono mbanuania, ba lö iʼolifugö ira. Ibeʼe khöra waʼabölö ba faʼatua-tua. Me ifazökhi niha Yehowa, ibeʼe ba mbotoda zi no amaedola dalu-dalu enaʼö tola döhö samösa ita.

8. Ba Zinunö 41:5, hadia niʼandrö Dawido khö Yehowa me göna ia fökhö sabölö-bölö?

⁸ Ba Zinunö 41, itutunö khöda Dawido hewisa me göna ia fökhö sabölö-bölö. Tebai sibai ia ba so khönia waʼaombö-aombö dödö. Me luo daʼö, ifadöni Gabisalomi dadaoma waʼarazo namania. Börö me abölö-bölö sibai wökhö Dawido, andrö wa tebai itaha Gabisalomi tobali razo. Aboto ba dödönia wa alua gabula dödö ba nösi nomonia börö horö nifaluania khö Mbaseba. (II Zam. 12:7-14) Tobali, hadia nifaluania? Mangandrö ia imane, ”Hakhösi tödö ndraʼo Yehowa! Fadöhö wökhö dödögu; noa sa ufazökhi horö khöu.” (Zin. 41:5) Iʼila Dawido wa no iʼefaʼö zalania Yehowa, ba iʼodaligö Lowalangi me mofökhö ia. Hadia idöna-döna dandra sahöli-öli dödö Dawido moroi khö Yehowa?

9. (a) Hadia nifalua Yehowa khö Razo Hisikia? (b) Hadia nidöna-döna Dawido moroi khö Yehowa?

⁹ Itaria sa ifadöhö niha sofökhö Lowalangi. Duma-dumania, me arakhagö mate Razo Hisikia, ifadöhö ia Yehowa. Monönö waʼanau nosonia 15 fakhe. (II Raz. 20:1-6) Hizaʼi, lö idöna-döna dandra sahöli-höli dödö Dawido. Tobali, idöna-döna enaʼö itolo ia Lowalangi simane fanolonia ”zi so ba dödö niha si numana”. Sökhi wahuwusa Dawido khö Yehowa, andrö tola iʼandrö wondrara dödö moroi khö Yehowa ba terorogö ia ba wökhönia. Iʼandrö göi enaʼö döhö ia. Tola taʼandrö wanolo moroi khö Yehowa simane nifalua Dawido.—Zin. 103:3.

10. Hadia zalua khö Terofimo hegöi khö Gefaforito, ba hadia wamahaʼönia khöda?

¹⁰ Me döfi si föföna, lö fefu niha Keriso tefadöhö ba dandra sahöli-höli dödö, hewaʼae tola ifadöhö niha sofökhö Faulo hegöi ira nifahaʼö tanö böʼö. (Baso Halöwö Zinenge 14:8-10.) Me göna faʼaukhu ba fökhö talu nama Fubelio, ifadöhö ia Faulo. ’Mangandrö Waulo, itufa danga zofökhö, ifadöhö wökhö.’ (Hal. 28:8) Hizaʼi, lö ifadöhö fefu niha Faulo. So samösa zi fahuwu ba si fao awö Waulo weʼamöi manuriaigö sotöi Terofimo. (Hal. 20:3-5, 22; 21:29) Me mofökhö ia, lö ifadöhö ia Faulo. Börö daʼö, lö fao ia khö Waulo ba wanuriaigö ba toröi ia ba Mileti irugi döhö ia. (II Tim. 4:20) Mofökhö göi zi fahuwu khö Waulo sotöi Gefaforito, arakhagö mate ia. Hizaʼi, lö si tesura ba Zura Niʼamoniʼö wa ifadöhö ia Faulo.—Fil. 2:25-27, 30.

HADIA WANUTURU LALA SINANGEA ÖTEMA?

11, 12. Hadia niʼilada sanandrösa khö Luka, ba hewisa wanolonia Faulo?

¹¹ Luka samösa doto si fao awö Waulo weʼamöi manuriaigö. (Hal. 16:10-12; 20:5, 6; Kol. 4:14) Omasi ia itolo Waulo hegöi ira nifahaʼö tanö böʼö me mofökhö ira. (Gal. 4:13) Simane niwaʼö Yesu, ”ha ba zofökhö” moguna doto.—Luk. 5:31.

¹² Tenga ha asala ibeʼe wanuturu lala Luka enaʼö döhö wökhö niha, tobali si ndruhu-ndruhu wa yaʼia andrö doto. Lö nifatunö Zura Niʼamoniʼö hezo ba hamega möi ia sekola doto. Hizaʼi, ba daʼö taʼila me ifaʼema Waulo wangowai Luka ba mbanua Kolose. Te ba Laʼodikia sekola doto ia, ahatö ba mbanua Kolose. Me isura samösa zurania Luka hegöi Halöwö Zinenge, iʼogunaʼö ngawua wehede niʼila ndra doto. Börö me doto ia, isura waö-waö nifalua Yesu me ifadöhö niha sofökhö.

13. Hadia zi tebai olifu ita na tabeʼe mazui tatema wanuturu lala sanandrösa ba wamadöhö fökhö?

¹³ Ba ginötö andre, lö hadöi ndra talifusöda si tola mamalua dandra sahöli-höli dödö ba wamadöhö niha sofökhö. Hizaʼi, börö me omasi ira latolo ita, tola manö labeʼe khöda wanuturu lala hewaʼae lö niʼandröda. Tatu manö, lö fasala fefu wanuturu lala niʼombakhaʼöra. Duma-dumania, ifarou Dimoteo Faulo ba wamadu agu. Börö me no ibadu idanö si taʼunö Dimoteo, andrö waʼafökhö dalunia.a (Baso I Timoteo 5:23.) Hewaʼae simanö, moguna mangelama ita na so dalifusöda sameʼe khöda faʼafaduhu dödö sanandrösa ba dalu-dalu, simane bulu ndruʼu, gö si tebai muʼa mazui si tola. Te ifatunö khöda wa no irai döhö nösi nomonia me laʼogunaʼö dalu-dalu andrö. Hizaʼi, tenga daʼö geluahania wa tola göi döhö ita ba dalu-dalu daʼö. Böi olifu ita hewaʼae ato zangogunaʼö dalu-dalu andrö, tola manö lö tefaudu ba mbotoda.—Baso Gamaedola 27:12.

OGUNAʼÖ WAʼABOTO BA DÖDÖ

14, 15. (a) Hadia manö zinangea taʼangelamaisi na so niha sameʼe fanuturu lala sanandrösa ba dalu-dalu? (b) Hadia wamahaʼö si tola tahalö khöda moroi ba zura Gamaedola 14:15?

¹⁴ Tatu manö ohahau dödöda na lö mofökhö ita ba tafalua halöwö khö Yehowa. Hizaʼi, yaʼita andre niha si lö moʼahonoa ba hasambalö göna ita fökhö. Na mofökhö, yaʼita samösa zangai angetula hadia dalu-dalu niʼogunaʼöda. Na so niha hegöi perusahaan zangumaʼö wa no lasöndra dalu-dalu si tola mamadöhö fökhö, sindruhunia sa, ha kefe niʼakalira. Lamane wangumaʼö wa ato niha si döhö me no laʼogunaʼö dalu-dalu andrö. Na mofökhö ita, omasi tafalua gofu hadia ia enaʼö döhö wökhöda ba anau gölöda. Hizaʼi, böi olifu ita mene-mene niwaʼö ba Zura Niʼamoniʼö, ”Sambö tödö, ba ifati fefu hadia ia niwaʼö; ba satua-tua, ba ifaigi nibekainia.”—Gamd. 14:15.

¹⁵ Na so khöda waʼatua-tua, tatu manö mangelama ita na so niha sameʼe fanuturu lala sanandrösa ba dalu-dalu, mendrua manö na lö irai itörö sekola doto. Moguna tasofu khöda samösa, ’Me iwaʼö wa so zi döhö börö vitamin, bulu ndruʼu, mazui me laʼangenanöi wemanga gö, hadia faduhu dödögu wa atulö niwaʼönia andrö? Hewaʼae so zi döhö, hadia tola ifadöhö wökhögu? Hadia moguna uʼalui mazui usofu khö ndra doto sanandrösa ba wökhögu andre?’—V Moz. 17:6.

16. Hadia zinangea taʼangeraigö ba ginötö tahalö gangetula sanandrösa ba dalu-dalu niʼogunaʼöda?

¹⁶ Ba ginötö tafareso wökhöda mazui tahalö gangetula sanandrösa ba dalu-dalu niʼogunaʼöda, moguna so khöda ’waʼatua-tua’ mazui faʼaboto ba dödö. (Tit. 2:12) Moguna sibai waʼatua-tua na so wamadöhö fökhö mazui famareso sawena tarongo. Hadia tola itutunö khöda hewisa lala wangogunaʼö dalu-dalu andrö? Hadia tefaudu ba dödöda nitutunönia andrö? Hadia fao dödö ndra doto wa tola tefadöhö wökhö niha ba dalu-dalu andrö? (Gamd. 22:29) Te so zangumaʼö wa so dalu-dalu sawena musöndra si so ba mbanua saröu, hizaʼi lö manö niʼila ndra doto. Hadia sindruhu-ndruhu so dalu-dalu niwaʼöra andrö? Tola manö so zameʼe dalu-dalu si lö muʼila hezo moroi mbörötania. Tola möi famaʼalada na tafaduhusi tödö niwaʼöra. Ibeʼe wamangelama khöda Lowalangi enaʼö böi taʼogunaʼö dalu-dalu moroi ba duku.—V Moz. 18:10-12; Yes. 1:13.

”YAʼAHOWU AMI!”

17. Hadia zomasi ita ba waʼauri andre?

¹⁷ Me döfi si föföna, ira badan pimpinan lafaʼoheʼö zura khö ndra talifusöda ba mbanua niha Keriso enaʼö laʼila hadia manö zi tebai lafalua. Ba gafuriata zura nifaʼoheʼöra, lamane, ”Na lö mibabaya daʼö, ba ohahau dödömi. Yaʼahowu ami!” (Hal. 15:29) Fehede daʼö zangoromaʼö wa lö omasi ita na göna fökhö.

18, 19. Hadia nidöna-dönada ba gulidanö si bohou dania?

¹⁸ Hasambalö göna ita fökhö börö me yaʼita niha si lö moʼahonoa. Na mofökhö ita, böi tadöna-döna wa ifalua dandra sahöli-höli dödö Yehowa ba wamadöhö yaʼita. Hizaʼi, tola tadöna-döna ba zi so föna wa ifadöhö ita Lowalangi. Famaʼeleʼö 22:1, 2, ifatunö khöda Yohane sanandrösa ba ”nidanö fangorifi” hegöi ”eu fangorifi” si tola mamadöhö fefu niha. Tenga simane dalu-dalu bulu ndruʼu si tola tahalö iadaʼa mazui dania ba gulidanö si bohou. Eluahania yaʼia daʼö, tola ifadöhö ita Yehowa hegöi Yesu enaʼö auri ita irugi zi lö aetu.—Yes. 35:5, 6.

¹⁹ Tadöna-döna ginötö andrö. Iadaʼa, faduhu dödöda wa iʼomasiʼö fefu niha Yehowa ba aboto ba dödönia fefu gabula dödöda. Simane Dawido, faduhu dödöda wa lö faröi Yehowa khöda na göna ita fökhö. Irorogö niha si lö faröi khönia.—Zin. 41:13.