Eheha Andrö Zamaduhuʼö Tödöda

1-3. Hana wa sökhi sibai luo Wendrakose andrö, ba hewisa waʼalua nifaʼeleʼö ba Daromali? (Faigi gambara ba wamobörö wamahaʼö.)

SIHULÖ wongi Migu ba Yeruzalema no ngaluo si sökhi sibai si tebai muʼolifugö. Me luo daʼö laʼowasaini gowasa niʼamoniʼö nifotöi luo Wendrakose, me tebörögö mbaŵa wamasi rigi. Sihulö wongi ba gosali, ibeʼe ere sebua zumange si toʼölö mubeʼe. Aefa daʼö, mato bözi siwa, ibeʼe roti si lö muʼaisöni nifazökhi moroi ba mbua nowi si oföna mubasi. Ihahae roti andrö ere sebua ba ibeʼe khö Yehowa. Daʼa nifotöi ngaluo Wendrakose 33 M.​—III Moz. 23:15-20.

² Ero röfi, ba zi hauga fakhe faʼara, ifazökhi ere sebua zumange nihahae. Muʼameʼegö tödö sibai wameʼe sumange andre börö sanandrösa ba Wendrakose 33 M. Daʼö zalua khö ndra nifahaʼö Yesu si 120 sangandrö yawa ba lote ba Yeruzalema. (Hal. 1:13-15) Walu ngaotu fakhe fatua lö alua daʼö, no ihenaigö isura Yoeli sanandrösa ba gowasa andrö. (Yoe. 3:1-5; Hal. 2:16-21) Hadia sibai zalua andrö?

³ Baso Halöwö Zinenge 2:2-4. Me inötö Wendrakose 33 M, ibeʼe gehehania Lowalangi ba niha Keriso, irege tebayoini ira. (Hal. 1:8) Aefa daʼö, lafasui ira niha sato ba tebörögö fahuhuo ndra nifahaʼö sanandrösa ba zahöli-höli dödö sawena laʼila ba larongo. Itutunö khöda Fetero hadia manö zalua me luo daʼö ba hana wa moguna ia. Aefa daʼö, imane ba niha sato, ”Mifalalini gera-erami ba mifabayagöʼö idanö ami, dozi ami ba döi Yesu Keriso, ba wangefaʼö horömi andrö, ba mitema dania mbuala andrö, Eheha niʼamoniʼö.” Me luo daʼö, so 3.000 niha nibayagö idanö ba latema göi geheha niʼamoniʼö.​—Hal. 2:37, 38, 41.

4. (a) Hana wa moguna adöni dödöda ba zalua me luo Wendrakose? (b) Hadia danö böʼö nasa zalua me luo daʼö? (Faigi onönöta.)

⁴ Haniha niʼamaedolagö ere sebua hegöi sumange nibeʼenia ero ngaluo Wendrakose? Yesu zi no amaedola ere sebua. Ira nifahaʼö Yesu si no mubayoini daʼö zi no amaedola roti. No mufili ndra nifahaʼö moroi ba gotalua niha gulidanö si lö moʼahonoa ba lafotöi ira ”böröta” mazui mbua siaʼa. (Yak. 1:18) Itema ira Lowalangi tobali ononia ba tefili ira tobali razo si fao awö Yesu mamatörö ba zorugo ba Mbanua Lowalangi. (I Fet. 2:9) Iʼogunaʼö wamatörönia Yehowa ba wameʼe howu-howu ba niha soloʼö somasi ia. So gunania khöda Wendrakose 33 M, he sauri si fao awö Yesu ba zorugo hegöi sauri ba waradaiso.^[1]

HADIA ZALUA ME TEBAYOINI ZI SAMÖSA NIHA?

5. Hezo taʼila wa lö fagölö ginötö wombayoini niha nibayoini?

⁵ Lö olifu ndra nifahaʼö ginötö me owulo ira yawa ba lote. So zi hulö hola-hola galitö ba högöra zamösana. Ibeʼe waʼatua-tua khöra Yehowa irege tola fahuhuo ira ba li tanö böʼö. Faduhu dödöra wa no tebayoini ira eheha. (Hal. 2:6-12) Tobali, lö fefu alua zahöli-höli dödö ba niha Keriso me tebayoini ira. Duma-dumania, so ngahönö niha nibayoini ba Yeruzalema me no aefa Wendrakose. Hizaʼi, lö niwaʼö Zura Niʼamoniʼö wa so zi hulö hola-hola galitö ba högöra. Tebayoini ira ba ginötö tebayagö ira idanö. (Hal. 2:38) Lö fefu göi niha Keriso tebayoini ba ginötö tebayagö ira idanö. So niha Zamaria nibayoini me no aefa tebayagö ira idanö. (Hal. 8:14-17) Ba ginötö böʼö, tebayoini Konelio hegöi ösi nomonia fatua lö tebayagö ira idanö.​—Hal. 10:44-47.

6. Hadia nitema niha nibayoini, ba hadia lua-luania khöra?

⁶ Aboto ba dödö niha Keriso wa no faböʼö-böʼö lala ba wombayoini yaʼira. So zoʼanemaiʼö mangila wa no ibayoini ia Yehowa, so göi zi löʼö. Awena laʼila ba gafuriatania. Hizaʼi, ifatunö Faulo hadia zalua khöra. Imane, ”Ba daʼö teʼaʼaroʼö göi ami, Eheha ba gamabuʼula li andrö, niʼamoniʼö, me no mamati ami. Eheha andrö weʼe-weʼe dödö, ba gondröita andrö khöda.” (Ef. 1:13, 14) Tobali, iʼogunaʼö gehehania Yehowa ba wotandrösaigö ba dödö niha Keriso wa no tefili ira weʼamöi ba zorugo. Eheha andrö no ”weʼe-weʼe dödö”, mazui tandra wa ba zorugo dania auri ira, tenga ba gulidanö.​—Baso II Korindro 1:21, 22; 5:5.

7. Enaʼö latema luora weʼamöi ba zorugo, hadia zinangea ifalua niha Keriso si no tebayoini?

⁷ Na so niha Keriso si no mubayoini, hadia hasambalö itema luonia? Löʼö. Faduhu dödönia wa no tekaoni ia weʼamöi ba zorugo. Hizaʼi, awena itema luonia na lö faröi ia khö Yehowa. Imane Fetero, ”Andrö mendrua manö miʼowölö-ölögö, yaʼami ira talifusö, wangaʼaroʼö fogaoni yaʼami andrö, awö wanutuyu yaʼami andrö; na milau daʼö sa ba löʼö manö teʼala ami. Na simanö sa, ba lö teʼambösi khömi dania lala ba mbanua si lö tebulö andrö, khö Zoʼaya yaʼita andrö, sangorifi yaʼita, Yesu Keriso.” (II Fet. 1:10, 11) Börö daʼö, niha Keriso nibayoini moguna itimbagö gofu hadia ia zanaisi yaʼia ba wamosumange Yehowa. Hewaʼae no mutuyu mazui mukaoni ia weʼamöi ba zorugo, lö itema luonia na faröi ia.​—Heb. 3:1; Fam. 2:10.

HEWISA WA TOLA IʼILA?

8, 9. (a) Hadia mbörö wa ato zi lö aboto ba dödö hadia zalua ba zi samösa niha me tebayoini ia? (b) Hewisa wa tola iʼila zi samösa niha wa no tefili ia weʼamöi ba zorugo?

⁸ Ba ginötö andre, ato nono mbanua Lowalangi si lö aboto ba dödö hadia zalua ba zi samösa niha me ibayoini ia Lowalangi. Lö fasala daʼö, börö me yaʼira manö lö mubayoini. Iwöwöi niha Lowalangi enaʼö auri ira ba gulidanö, tenga ba zorugo. (I Moz. 1:28; Zin. 37:29) Hizaʼi, so nifili Yehowa ösa zi tobali razo hegöi ere ba zorugo. Me no tebayoini ira, no faböʼö dötönaföra hegöi fangera-ngerara. Ladöna-döna enaʼö ba zorugo auri ira.​—Baso Efeso 1:18.

⁹ Hewisa wa tola iʼila zi samösa niha wa no tefili ia weʼamöi ba zorugo? Faigi hadia niwaʼö Waulo ba niha nibayoini si so ba Roma, ”nikaoni andrö niʼamoniʼö”. Imane khöra, ”Tenga sa Eheha zawuyu nitemami, enaʼö ataʼu zui ami; Eheha ndraono nitemami; moroi khönia wa muʼao ita: He Aba, Ama! Yaʼia, Eheha andrö göi, zamaduhuʼö tödöda, wa ono Lowalangi ita.” (Rom. 1:7; 8:15, 16) Eheha niʼamoniʼö niʼogunaʼö Lowalangi ba wangombakha ba zi samösa niha, wa no tefili ia fao awö Yesu mamatörö tobali razo ba zorugo.​—I Tes. 2:12.

10. Hadia geluaha I Yohane 2:27 me imane wa lö moguna so niha böʼö zamahaʼö niha Keriso nibayoini?

¹⁰ Lö moguna so niha böʼö zamaduhuʼö ba dödöra wa no ibayoini ira Lowalangi. Yehowa sa zamaduhuʼö ba dödöra. Imane Yohane ba niha Keriso si no mubayoini, ”Ba no so khömi wamayoini andrö, khö niʼamoniʼö andrö, ba miʼila fefu, hadia ia.” Imane nasa, ”Ba no ahono ba dödömi wamayoini andrö, nitemami khönia, ba lö moguna khömi, ifahaʼö ami niha, miʼiagö saʼae ba khönia, dali wamahaʼö wamayoininia yaʼami andrö, ba ngawalö hadia ia, fefu, ba no si duhu, ba tenga faya; miʼoʼö wamahaʼönia yaʼami andrö.” (I Yoh. 2:20, 27) Yehowa zamahaʼö niha Keriso nibayoini. Börö daʼö, lö moguna so niha böʼö zangombakha khöra wa no tebayoini ira. Iʼogunaʼö gehehania Yehowa ba wamaduhuʼö ba dödöra wa no tefili ira!

IFULI ”TUMBU” IRA

11, 12. Hadia zanofu-nofu dödö niha Keriso si no tebayoini, ba hadia zi faduhu dödönia?

¹¹ Oya zi tebulö ba waʼauri niha Keriso me ibayoini ira eheha niʼamoniʼö. Imane Yesu wa no ifuli ”tumbu” ira mazui ”tumbu moroi si yawa”. (Yoh. 3:3, 5) Aefa daʼö itutunö, ”Böi ahöli-höli dödöu, me no uwaʼö khöu, lö tola lö tumbu moroi si yawa ami. Angi andrö, ba isawa zomasi ia, ba örongo höngö-höngönia, ba lö öʼila, heza iʼotarai, ba heza isawa. Simanö göi dozi si tumbu khö Geheha.” (Yoh. 3:7, 8) Lö duhu tola tatutunö ba niha si lö mubayoini hewisa rasonia na no tebayoini.^[2]

¹² Tola manö manofu-nofu dödö niha si no mubayoini, ’Hana wa yaʼo nifili Yehowa, hana wa tenga niha böʼö?’ Te imane dödönia wa tenga sinangea tebayoini ia. Hizaʼi, so khönia waʼafaduhu dödö börö me Yehowa zofili yaʼia. Omuso sibai dödönia ba iʼandrö saohagölö börö me no mubeʼe khönia mbuala andrö. Fagölö nirasoinia simane niwaʼö Wetero, ”Nisuno Lowalangi, Ama Zoʼaya yaʼita, Yesu Keriso, si no mamuli mangadonogö yaʼita, dali waʼahakhö dödönia andrö, si no fahöna, ba wanötöna andrö, si tenga faya, moroi ba wemaoso Yesu Keriso andrö, moroi ba ngai zi mate, ba wanema ondröita andrö si lö taya, si lö si lö göna, si lö ariri, niʼiröʼö khömi ba zorugo.” (I Fet. 1:3, 4) Na labaso ayati daʼa ira niha nibayoini, faduhu dödöra wa khöra samösa fahuhuo Namara.

13. Me no tebayoini ira eheha, hadia zi tebulö ba wangera-ngerara ba hadia mbörö?

¹³ Fatua lö ifili niha Keriso si möi ba zorugo Yehowa, tötönaföra yaʼia daʼö enaʼö auri ira ba gulidanö sagötö faʼara. Labase-baseʼö ginötö na ibohouni gulidanö andre Yehowa tobali faradaiso ba ihori fefu ngawalö zi lö sökhi. Te lakhalaigö ha waʼomuso dödöra na tesusugi nösi nomora mazui si fahuwu khöra. Ba latötöna enaʼö tola laʼiagö nomo nifazökhira mazui latanö zinanö ba laʼa mbuania. (Yes. 65:21-23) Hana wa ibörögö faböʼö niʼera-erara? Hadia börö me no larasoi waʼabu dödö mazui famakao? Hadia lamane dödöra wa aföli ira dania wangiagö ulidanö si bohou andrö ba lö lasöndra waʼohahau dödö? Mazui hadia omasi ira worasoi hewisa wangiagö zorugo? Tenga. Sindruhunia, Lowalangi zangumaʼö khöra. Me ifili ira, iʼogunaʼö gehehania ba wombulöʼö lala wangera-ngerara hegöi luo nidöna-dönara.

14. Hewisa dödö niha nibayoini sanandrösa ba waʼaurira ba gulidanö?

¹⁴ Hadia daʼö geluahania niha nibayoini andre omasi ira mate? Itutunö Waulo hadia nirasoi niha nibayoini. Iʼamaedolagö mbotora si hulö ”nose” ba imane, ”Andrö mangarö-ngaröga, yaʼaga si so ba nose andrö, sonoro ndraʼaga, me lö omasiga, na aheta nukhama, me omasiga na tefalaete, enaʼö iʼa faʼauri andrö zi mate andrö.” (II Kor. 5:4) Börö daʼö, niha Keriso nibayoini andre lö omasi ira mate. Omasi ira lasöndra waʼohahau dödö ba laʼogunaʼö ginötöra wefao ba nösi nomora hegöi si fahuwu khöra ba wamosumange Yehowa ero maʼökhö. Gofu hadia ia nifaluara, itörö-törö tödöra zi no ifabuʼu Lowalangi khöra ba zi so föna.​—I Kor. 15:53; II Fet. 1:4; I Yoh. 3:2, 3; Fam. 20:6.

HADIA NO IFILI NDRAʼUGÖ YEHOWA?

15. Hadia manö dandra zangoromaʼö wa lö mubayoini eheha zi samösa niha?

¹⁵ Te manofu–nofu dödöu hadia no ifili ndraʼugö Yehowa weʼamöi ba zorugo mazui löʼö. Na ömane tödöu no ifiliʼö, angeraigö wanofu-nofu daʼa: Hadia no owölö-ölö ndraʼugö weʼamöi manuriaigö? Hadia omasiʼö öfahaʼö ndraʼugö ba Zura Niʼamoniʼö ba önönö waʼaboto ba dödöu ’faʼabakha waʼatua-tua Lowalangi’? (I Kor. 2:10) Hadia faduhu dödöu wa no ibeʼe khöu Yehowa mbua si sökhi ba halöwö fanuriaigö? Hadia omasi öfalua nasa niʼandrö Yehowa? Hadia sindruhu-ndruhu öʼomasiʼö niha böʼö ba öʼonorogö tödö wanolo yaʼira ba wamosumange Yehowa? Hadia no öʼila dandra wa no oya itolo ndraʼugö Yehowa ba waʼauriu? Na yaʼia, hadia daʼö geluahania wa no tekaoni ndraʼugö weʼamöi ba zorugo? Tenga. Hadia mbörö? Börö me ato nono mbanua Lowalangi zorasoi simane daʼö, hewaʼae no mubayoini ira hegöi löʼö. Baero daʼö, ibeʼe Yehowa gehehania ba niha samosumange yaʼia, gofu hadia dania luo nitemara. Na so khöu waʼaombö dödö, eluahania lö nifili ndraʼugö. Lö hadöi faʼaombö-aombö dödö ba niha si no ifili Yehowa! Sindruhu-ndruhu wa faduhu dödöra!

16. Hezo taʼila wa lö fefu niha sotema geheha Lowalangi tefili ira möi ba zorugo?

¹⁶ Ba Zura Niʼamoniʼö, ato niha si lö faröi sotema eheha moroi khö Yehowa. Hizaʼi, lö möi ira ba zorugo. Sambua duma-duma yaʼia daʼö Yohane Samayagö Idanö. Imane Yesu hewaʼae lö irai so niha sebua simane Yohane, hizaʼi lö fao ia wamatörö tobali razo ba zorugo. (Mat. 11:10, 11) Itema göi geheha niʼamoniʼö Dawido. (I Zam. 16:13) Eheha niʼamoniʼö zanolo yaʼia enaʼö so khönia waʼatua-tua sanandrösa khö Yehowa hegöi ba wanura ösa mbuku Zura Niʼamoniʼö. (Mrk. 12:36) Hewaʼae simanö, iʼombakhaʼö Fetero wa ”tenga sa Dawido zi möi yawa ba zorugo”. (Hal. 2:34) Iʼogunaʼö gehehania Yehowa ba wameʼe khöra faʼabölö ba wamalua sahöli-höli dödö, tenga enaʼö möi ira ba zorugo. Hadia daʼö geluahania ambö afönu woloʼöra mazui tenga sinangea mamatörö ira ba zorugo? Tenga. Tobali, omasi isusugi ira Yehowa auri ba gulidanö Faradaiso.​—Yoh. 5:28, 29; Hal. 24:15.

17, 18. (a) Hadia luo nidöna-döna nono mbanua Lowalangi ba ginötö andre? (b) Hadia wanofu-nofu nifatunöda ba wamahaʼö aefa daʼa?

¹⁷ Ato nono mbanua Lowalangi ba ginötö andre si lö möi ba zorugo. Ladöna-döna wa auri ira ba gulidanö nifatörö Lowalangi, simane Gaberahamo, Dawido, Yohane Samayagö Idanö, ba oya danö böʼönia nasa me götö Zura Niʼamoniʼö. (Heb. 11:10) So 144.000 si fao awö Yesu mamatörö ba zorugo. Imane Sura Niʼamoniʼö wa so niha nibayoini ’zi tosai’ nasa ba gulidanö ba ngaluo safuria andre. (Fam. 12:17) Tobali, ato zi no mate moroi ba gotalua zi 144.000, ba no so ira ba zorugo iadaʼa.

¹⁸ Na so zangumaʼö wa no tebayoini ia, hewisa dödöda yaʼita sanötöna sauri ba gulidanö? Na so ba gotalua ndra talifusöda niha Keriso si no mamörögö wemanga roti hegöi wamadu agu ba Wanörö Tödö faʼamate Yesu, hewisa dödöda? Hewisa na itugu monönö waʼato niha nibayoini? Hadia moguna aombö dödöda? Tasöndra wanema linia ba wamahaʼö aefa daʼa.