Tefarou Dödöda Börö Me No Ibeʼe Lowalangi ”Mbualania Andrö, si Tebai Tawaʼö Faʼebua”

1, 2. (a) Hadia manö ’mbuala Lowalangi si tebai tawaʼö faʼebua andrö?’ (b) Hadia wanofu-nofu nifatunöda ba duho daʼa?

OROMA waʼomasi Yehowa me ifatenge Nononia, Yesu ba gulidanö. Daʼa no sambua buala sebua böli! (Yoh. 3:16; I Yoh. 4:9, 10) Ifotöi mbuala andre Faulo ’buala si tebai tawaʼö faʼebua’. (II Kor. 9:15) Hana wa iwaʼö Faulo wehede daʼa?

² Aboto ba dödö Waulo wa höli nibeʼe Yesu andrö si tobali tandra wa hasambalö alua fefu nifabuʼu Lowalangi. (Baso II Korindro 1:20.) ’Buala si tebai tawaʼö faʼebua andrö’ yaʼia daʼö höli nibeʼe Yesu ba fefu waʼebua dödö Yehowa hegöi faʼomasi niforomaʼönia khöda. Lö ikhamö fangera-ngerada ba wokhalaigö hawaʼebua mbuala andrö. Hewisa dödöda ba mbuala sebua böli andrö? Ba börö mbuala andrö, hewisa enaʼö tefarou dödöda ba wamaʼanö yaʼita ba Wanörö Tödö faʼamate Yesu ba luo Rabu, 23 mbaŵa si Tölu 2016?

BUALA SEBUA BÖLI MOROI KHÖ LOWALANGI

3, 4. (a) Hewisa dödöu na so zameʼe khöu mbuala? (b) Hewisa wa tola tebulöʼö waʼauriu moroi ba mbuala sebua böli andrö?

³ Omuso sibai dödöda na so zameʼe khöda buala. So mbuala si fagöna ba dödö si tola mombulöʼö lagu waʼaurida. Duma-dumania, khalaigö atö na no öfalua gamuata si lö sökhi. Hukumamö yaʼia daʼö faʼamate. Hizaʼi, ba zi lö ödöna-ödöna, so niha somasi mosalahini yaʼugö ba wanema hukumamö andrö. Itehegö mate ia salahimö! Hewisa dödöu ba nifaluania andrö?

⁴ Moroi ba waʼomasi hegöi buala sebua simane daʼö, tola manö öbulöʼö lala waʼauriu. Na öʼangeraigö fefu daʼö, tola tefarou dödöu enaʼö itugu obowö ndraʼugö, öʼomasiʼö niha böʼö ba öʼefaʼö zala niha si fasala khöu. Tola öforomaʼö ba waʼaurimö wa öʼandrö sibai saohagölö me no teʼasogö höli andrö.

5. Hana waʼabölö sökhi mbuala höli nibeʼe Lowalangi andrö moroi ba mbuala tanö böʼö?

⁵ Abölö sökhi mbuala höli nibeʼe Lowalangi moroi ba duma-duma mbuala nifatunöda no mege. (I Fet. 3:18) Angeraigö daʼa: Fefu ita tatema horö gondröita moroi khö Gadamo, ba lua-luania yaʼia daʼö faʼamate. (Rom. 5:12) Börö me so khö Yehowa waʼomasi, andrö ifatenge Yesu ba gulidanö enaʼö ”itandra waʼamate, salahi niha fefu”. (Heb. 2:9) Hizaʼi, so zabölö ebua nifalua Yesu dania! Iheta waʼamate sagötö faʼara. (Yes. 25:7, 8; I Kor. 15:22, 26) Fefu niha samati khö Yesu tola laʼokhögö waʼohahau dödö, he si fao awö Keriso tobali razo ba zorugo hegöi si tobali ono mbanua moroi ba Mbanua Lowalangi. (Rom. 6:23; Fam. 5:9, 10) Hadia howu-howu danö böʼö nasa moroi ba mbuala nibeʼe Yehowa?

6. (a) Hadia howu-howu moroi ba mbuala nibeʼe Yehowa somasi ötema ba zi so föna? (b) Börö me taʼosinangegö mbuala Lowalangi, tutunö tölu ngawalö zinangea tafalua.

⁶ Buala Lowalangi tanö böʼö yaʼia daʼö tobali faradaiso gulidanö andre ba zi so föna, tefadöhö wökhö, ba tesusugi niha si no mate. (Yes. 33:24; 35:5, 6; Yoh. 5:28, 29) Taʼomasiʼö Yehowa hegöi Nononia börö me no ibeʼe khöda ’mbuala andrö, si tebai tawaʼö faʼebua’. Moroi ba mbuala andrö, hadia zinangea tafalua? Tefarou dödöda ba (1) woloʼö khö Yesu Keriso, (2) wangomasiʼö ndra talifusöda, ba (3) wangefaʼö zala niha böʼö soroi ba dödö.

”FAʼOMASI KERISO ANDRÖ SA ZANGOʼOU YAʼAGA”

7, 8. Hewisa dödöda ba waʼomasi Keriso andrö, ba hadia zinangea tafalua?

⁷ Si oföna, enaʼö tefarou dödöda ba wangogunaʼö faʼaurida ba wamosumange Yesu. Imane Faulo, ”Faʼomasi Keriso andrö sa zangoʼou yaʼaga.” (Baso II Korindro 5:14, 15.) Iʼila Faulo wa terou dödöda ba wangomasiʼö hegöi ba wamosumange Yesu na tatema waʼomasinia. Na aboto ba dödöda hadia zi no ifalua Yehowa ba waʼaurida, tefarou dödöda ba wangosinangegö Yesu. Hewisa lalada ba wamalua daʼö?

⁸ Faʼomasida khö Yehowa daʼö zamarou yaʼita ba woloʼö hegöi ba wotara lahe Yesu. (I Fet. 2:21; I Yoh. 2:6) Na taʼoʼö li Lowalangi hegöi Keriso, daʼö dandra wa taʼomasiʼö ira. Imane Yesu, ”Si so oroisa andrö khögu, soloʼö yaʼia, daʼö zomasi yaʼo. Ba niʼomasiʼö Namagu zomasi yaʼo; ba yaʼo göi uʼomasiʼö ia ba uʼoromaʼö ndraʼo khönia.”​—Yoh. 14:21; I Yoh. 5:3.

9. Hadia manö si tola mondrönisi tödöda?

⁹ Barö mbaŵa Wanörö Tödö faʼamate Yesu, moguna taʼangerönusi zinangea tafalua ba waʼaurida. Börö daʼö, sofu khöu samösa: ’Hezo oroma wa no uʼoʼö Yesu? Hadia zinangea ubulöʼö ba waʼaurigu?’ Moguna taʼangerönusi wanofu andrö börö me omasi niha gulidanö na taʼoʼö zomasi ira. (Rom. 12:2) Na lö khöda famangelama, tola adöni dödöda ba woloʼö niha sagatua-tua ba gulidanö andre, artis, hegöi si tehöngö ba olahraga. (Kol. 2:8; I Yoh. 2:15-17) Hewisa enaʼö lö taʼoʼö zomasi gulidanö andre?

10. Hadia wanofu-nofu si tola taʼangerönusi barö mbaŵa Wanörö Tödö faʼamate Yesu? Ba hadia zinangea tafalua? (Faigi gambara ba wamobörö wamahaʼö.)

¹⁰ Barö mbaŵa Wanörö Tödö andre, moguna taʼangeraigö lagu wonukhada, film nifaigida, musik nifondro-ndrongoda, hegöi fefu ngawalö zi so ba komputer, HP, mazui ba tablet. Sofu khöu samösa: ’Na so Yesu ba daʼa, hadia lö aila ndraʼo na iʼila nukha nifakegu?’ (Baso I Timoteo 2:9, 10.) ’Moroi ba lagu wonukhagu, hadia oroma wa yaʼodo andre soloʼö khö Keriso? Hadia omasi Yesu wamaigi film nifaigigu? Hadia omasi ia wamondro-ndrongo musik nifondro-ndrongogu? Na ifiza Yesu HP mazui tablet-gu, hadia lö ailado ba niʼilania andrö? Hadia abua khögu ba wamatunö khö Yesu hana wa omasido video game daʼö?’ Faʼomasida khö Yehowa zamarou tödöda ba waniboʼö gofu hadia ia ngawalö zi lö faudu ba mbua-bua niha Keriso, hewaʼae na ebua mbölinia. (Hal. 19:19, 20) Na talulu waʼaurida khö Yehowa, no tafabuʼu wa taʼogunaʼö waʼaurida ba wamosumange Keriso. Böi taʼiröʼö gofu hadia ia zi tobali daha-tahada ba woloʼö khö Yesu.​—Mat. 5:29, 30; Fil. 4:8.

11. (a) Börö waʼomasida khö Yehowa hegöi khö Yesu, hadia zinangea tafalua ba halöwö fanuriaigö? (b) Börö me so khöda waʼomasi, hadia nifaluada ba wanolo ndra talifusöda si so ba gangowuloa?

¹¹ Faʼomasida khö Yesu zamarou tödöda enaʼö owölö-ölö ita ba wanuriaigö hegöi ba wamahaʼö. (Mat. 28:19, 20; Luk. 4:43) Barö mbaŵa Wanörö Tödö faʼamate Yesu, hadia tola öbeʼe ginötöu 30 mazui 50 za enaʼö tobali perintis ekstra? Imane samösa talifusöda ira matua si 84 fakhe, si no mate donga, wa tebai merintis ia börö me no alawa ndröfinia ba börö me asese mofökhö ia. Hizaʼi, latolo ia ira perintis si so ba mbanuania. Labeʼe lalania ba lafili mbanua si tola möi ia manuriaigö. Lua-luania tola ikhamö 30 za talifusöda andre ba zi sara waŵa. Hadia tola ötolo samösa dalifusöda si so ba gangowuloa enaʼö merintis ekstra ia ba mbaŵa si Tölu mazui ba mbaŵa si Öfa? Sindruhu sa wa lö fefu niha tola merintis. Hizaʼi, tola taʼogunaʼö ginötö hegöi faʼabölöda ba wondrouʼö halöwöda khö Yehowa. Na tafalua daʼö, no taforomaʼö wa no terou dödöda börö waʼomasi Yesu, simane nifalua Waulo. Moroi ba waʼomasi Lowalangi, hadia nasa zi tola tafalua?

MOGUNA TAʼOMASIʼÖ NDRA TALIFUSÖDA

12. Börö waʼomasi Lowalangi andrö, hadia zinangea tafalua?

¹² Si dua, faʼomasi Lowalangi zamarou tödöda ba wangomasiʼö ndra talifusöda. Imane Yohane, ”He yaʼami niʼomasiʼö! Na no imanö wangomasiʼö yaʼita Lowalangi, ba moʼömö göi ita fangomasiʼö awöda.” (I Yoh. 4:7-11) Tobali, na tatema waʼomasi Lowalangi, moguna taʼomasiʼö ndra talifusöda. (I Yoh. 3:16) Hewisa wa tola taforomaʼö waʼomasi khöra?

13. Hadia duma-duma nibeʼe Yesu si tobali tandra wa iʼomasiʼö niha gulidanö?

¹³ Moroi ba duma-duma nibeʼe Yesu ba daʼö taʼila hewisa enaʼö tola taʼomasiʼö niha böʼö. Me so ia ba gulidanö, itolo niha si so fangide-ngideʼö. Ifadöhö niha sofökhö, sakela-kela, sauʼa, safiso, hegöi si lö hede. (Mat. 11:4, 5) Omasi Yesu wamahaʼö niha somasi manöndra faʼaboto ba dödö sanandrösa khö Lowalangi, tenga simane sondröniaʼö ba agama. (Yoh. 7:49) Iʼomasiʼö ba itolo niha si so fangide-ngideʼö.​—Mat. 20:28.

14. Hadia dandra wa öʼomasiʼö ndra talifusöda?

¹⁴ Tola tobali inötö si sökhi khöda baŵa Wanörö Tödö andre göi ba woʼangeraigö hewisa lalada ba wanolo ndra talifusöda si so ba gangowuloa, mendrua manö ndra talifusöda si no atua mboto. Hadia tola möiʼö khöra ba nomo? Hadia tola öʼohe öra gö, ölului halöwöra yomo ba nomo, öfaondragö ira weʼamöi ba gangowuloa, mazui faoʼö khöra ba wanuriaigö? (Baso Luka 14:12-14.) Yaterou dödöu ba wangomasiʼö ndra talifusöda börö me no ötema waʼomasi Lowalangi!

EFAʼÖ ZALA NDRA TALIFUSÖDA

15. Hadia zinangea taʼila?

¹⁵ Si tölu, faʼomasi Yehowa zamarou tödöda ba wangefaʼö zala ndra talifusöda. Fefu ita no taʼokhögö horö ondröita ba faʼamate moroi khö Gadamo. Tobali, samösa lö si tola mangumaʼö, ”Lö moguna khögu höli.” Niha si lö faröi khö Lowalangi manö moguna khönia höli. Fefu ita no teʼefaʼö moroi ba gömö sebua! Hana wa moguna taʼila daʼö? Taʼila wanema linia moroi ba gamaedola nidunö-dunö Yesu.

16, 17. (a) Hadia wamahaʼö si tola tahalö moroi ba gamaedola nibeʼe Yesu sanandrösa khö razo hegöi zawuyunia? (b) Me no öʼangerönusi gamaedola nibeʼe Yesu, hadia gangetula nihalömö?

¹⁶ Ifatunö Yesu sambua gamaedola sanandrösa khö razo sangefaʼö foʼömö zawuyunia, si 60.000.000 hua suku faʼebua. Hizaʼi, so zawuyu si lö mangefaʼö foʼömö nawönia sawuyu si ha 100 hua suku faʼebua. Sindruhunia, tola iʼefaʼö woʼömö nawönia sawuyu andrö börö me no iʼefaʼö woʼömönia razo. Mofönu sibai razo me irongo wa lö iʼefaʼö zawuyu andrö gömö nawönia sawuyu hewaʼae lö ebua. Imane, ”He sawuyu si lö sökhi! Ömö no andrö fefu, ba no ubeʼe bualagu khöu, me no mangandrö ndraʼugö khögu; ba hadia lö öhakhösi tödö göi nawöu sawuyu, simane yaʼo, me no uhakhösi tödö ndraʼugö?” (Mat. 18:23-35, NW) Iʼefaʼö Yehowa gömöda sebua, simane nifalua razo andrö. Börö daʼö, hadia zinangea tafalua?

¹⁷ Gasa-gasa wombaloida baŵa Wanörö Tödö andrö, tola tasofu khöda samösa, ’Hadia no uʼafökhöiʼö dödö dalifusö si sara lala wamati khögu? Hadia abua khögu wangefaʼö zalania?’ Na simanö, no inötö si sökhi daʼa ba woloʼö Yehowa ”somasi mameʼe aefa horö”. (Neh. 9:17; Zin. 86:5) Na taʼandrö saohagölö börö waʼebua waʼomasi Yehowa, tola taʼefaʼö zala ndra talifusöda soroi ba dödö. Na lö taʼomasiʼö ba taʼefaʼö zalara, tebai tadöna-döna wa iʼomasiʼö ba iʼefaʼö zalada Yehowa. (Mat. 6:14, 15) Na taʼefaʼö zalara, tenga daʼö geluahania lö irai laʼafökhöiʼö dödöda. Hizaʼi, na tafalua daʼö so khöda waʼohahau dödö ba zi so föna.

18. Börö waʼomasi Lowalangi, hana wa tola so waʼebolo dödö khö dalifusöda Lily hewaʼae lö moʼahonoa dalifusöda nitolonia?

¹⁸ Börö me lö moʼahonoa ndra talifusöda, tola manö lö khöda fanaha tödö. (Baso Efeso 4:32; Kolose 3:13, 14.) So samösa dalifusöda ira alawe sotöi Lily.^[1] Itolo dalifusöda lakha mbanua sotöi Carol. Duma-dumania, ifasao Carol gofu hezo möi ia, itolo na iʼöli zoguna khönia, ba oya danö böʼönia nasa. Hewaʼae oya itolo ia talifusöda Lily, iʼalu-alui zalania Carol. Lua-luania, abua khö Lily ba wanolo yaʼia. Hewaʼae simanö, iʼila Lily wa so gamuata si sökhi khö dalifusöda Carol, ba lö iböhöli wanolo Carol ba zi hauga fakhe faʼara irege mofökhö Carol ba mate ia. Hewaʼae abua khönia ba wanolo Carol, imane Lily, ”Omasido falukha khö Carol na tesusugi ia dania. Omasido uʼila ia ba ginötö moʼahonoa ia.” Moroi ba duma-duma daʼa, tola so khöda waʼebolo dödö khö ndra talifusöda börö waʼomasi Lowalangi, ba tadöna-döna ginötö na no moʼahonoa fefu niha.

19. Börö ’mbuala Lowalangi si tebai tawaʼö faʼebua’ andrö, hadia zinangea tafalua?

¹⁹ No ibeʼe khöda Yehowa ”mbualania andrö, si tebai tawaʼö faʼebua”. Böi awöli-wöli ita ba wangandrö saohagölö börö mbuala andrö! Baŵa Wanörö Tödö andre no inötö si sökhi sibai ba woʼangerönusi fefu zi no ifalua Yehowa hegöi Yesu ba waʼaurida. Börö me no laʼomasiʼö ita, yaterou dödöda wanara lahe Yesu, wangomasiʼö ndra talifusöda, hegöi ba wangefaʼö zalara soroi ba dödö.