Hadia Guna Na Fariawö Ita ba Gotalua Niha Keriso?

Hewaʼae matörö gatua mazui teu sabölö-bölö, lö maböhöli weʼamöi ba gangowuloa niha keriso. Hewaʼae oya ngawalö gabula dödö ba faʼamarase ba wangalui soguna ero maʼökhö, hana wa laʼodödögö sibai weʼamöi ba gangowuloa niha keriso ira Samaduhuʼö Yehowa?

Enaʼö ohahau dödöma ba wamati. Ifarou dödö nono mbanua Lowalangi Faulo enaʼö ”faoma tafaigi nawöda zamösana”. (Heberaiʼo 10:24) Eluaha wehede daʼa ”tahaogö woʼangeraigö”, mazui enaʼö faoma taʼila nawöda zamösana. Tobali, fehede Waulo zamarou yaʼaga enaʼö faoma ma ameʼegö tödö nawöma zamösana. Na ahori maʼila fefu ngambatö niha keriso tanö böʼö, awena aboto ba dödöma wa no lataögö gabula dödö simane si göna khöma, börö zimanö tola latolo göi ndraʼaga na abu dödöma.

Mangaʼaroʼö fahuwusa si lö tebulö. Ba nahia gangowuloa, sifalukha khöma, tenga ha si faʼila manö, tobali si fahuwu khöma. Ba ginötö tanö böʼö, möiga göi manörö-nörö. Hadia gunania wariawösa simane daʼö? Mafomaha ndraʼaga wangosinangegö zamösana, ba tedou wa omasi ba gotaluama. Na so zifahuwu khöma si göna abula dödö, ba matolo ira soroi ba dödö börö me so wahuwusa saro. (Gamaedola 17:17) Na fariawö ndraʼaga zamösana, daʼö zangoromaʼö wa ”maʼameʼegö tödö nawöma”.​—I Korindro 12:25, 26.

Mafarou dödömi enaʼö mi fili nawömi ba wariawösa ha samalua somasi Lowalangi. Tola ösöndra daʼö ba gotalua ndra Samaduhuʼö Yehowa. Böi aombö dödöu na fariawö ndraʼugö khöma.

• Hana wa moguna fariawö ita ba gangowuloa?

• Hawaʼara omasiʼö aboto ba dödöu haniha ndraʼaga?