Hewisa Na owulo Ndraʼaga ba Wamosumange Lowalangi?

Niha Keriso si föföna si toʼölönia manunö ira, mangandrö, labaso ba lafatunö Zura Niʼamoniʼö; lö hadöi famahaʼö tanö böʼö. (I Korindro 14:26) Hulö zimane daʼö nifalua ba gangowuloama.

Famahaʼönia teʼodane-dane ba Zura Niʼamoniʼö ba tola lafalua. Sakali samigu, owula ira ba wamondro-ndrongo huhuo sebua sanandrösa hewisa Zura Niʼamoniʼö moʼamakhaita ba waʼaurida andre, matonga za waʼara. La farou dödö zangondrasi enaʼö labokai ayati nitötöi ba Zura Niʼamoniʼö. Me no aefa huhuo sebua, so Wamahaʼö ”Menara Pengawal”, yaʼia daʼö famatunö sambua tuho Menara Pengawal niʼogunaʼö ba wamahaʼö, ba fefu zangondrasi tola labeʼe mbua gera-erara. Famahaʼö andre zanolo yaʼaga wamalua ba waʼaurima duma-duma moroi ba Zura Niʼamoniʼö. Ba lafalua göi daʼa ba zi töra 110.000 angowuloa ba zi sagörö ulidanö.

Tetolo ndraʼaga enaʼö atua-tua ba wamahaʼö. So gangowuloama barö zi sambua migu, tölu lala halöwö nifalua, tuhonia yaʼia daʼö Faʼauri Niha Keriso ba Fanuriaigö. Fefu waö-waö halöwö tehalö moroi ba garate Waö-Waö Halöwö ba Gangowuloa Faʼauri ba Fanuriaigö. Faosatö si oföna moroi ba gangowuloa andre yaʼia daʼö Girö-Girö si Tobini moroi ba Daromali, sanolo yaʼita enaʼö tabaso ayati Zura Niʼamoniʼö irege aboto ba dödöda ia. Aefa daʼö, so göi Owölö-ölö ba Wanuriaigö si tobali duma-duma khöda enaʼö tola tafahaʼö niha böʼö ba Zura Niʼamoniʼö. Samösa zoʼamenesi samarou tödö enaʼö tedou ndraʼaga ba waʼatua-tua ba wombaso ba ba wamahaʼö. (I Timoteo 4:13) Faosatö safuria, yaʼia daʼö Faʼauri Niha Keriso, sanutunö lala si sökhi si teʼodane-dane ba goi-goi Zura Niʼamoniʼö soguna ba waʼaurida si ero maʼökhö. So wanofu ba fanema li si tola mangabakhaiʼö faʼaboto ba dödöda ba Zura Niʼamoniʼö.

Na möi ndraʼugö ba gangowuloama, toröi ba dödöu wamahaʼö ba Zura Niʼamoniʼö nitemau.​—Yesaya 54:13.

• Hadia manö lala halöwö sadöni dödöu ba gangowuloa ndra Samaduhuʼö Yehowa?

• Ba gotalua gangowuloa ndra Samaduhuʼö Yehowa hezo zomasiʼö möi?