Fakake ba Wanuriaigö​—Mangaʼasogö Lektur ba Nowi ba zi Sagörö Ulidanö

1, 2. (a) Me döfi siföföna, hadia mbörö wa tola terongo duria somuso dödö ba zi sagörö Imperium Romawi? (b) Hadia dandra wa fao Yehowa khöda ba ginötö andre? (Faigi kotak ”Turia Somuso Dödö ba zi 670 Ngawalö Li”.)

AHÖLI-HÖLI dödö niha sato si möi ba Yeruzalema me larongo wa onekhe sibai niha Galilea fahuhuo ba li böʼö. Tobali dödöra ba duria si no mufaʼema. Me luo daʼö Fendrakose 33 M, ba latema mbuala ira nifahaʼö ba wahuhuosa ba li böʼö—tandra wa fao Lowalangi khöra. (Baso Halöwö Zinenge 2:1-8, 12, 15-17.) Turia nifaʼemara me luo daʼö irugi niha ba ngawalö soi, ba ofeta ba zi sagörö Imperium Romawi.—Kol. 1:23.

² Iadaʼa, lö alua dandra sahöli-höli dödö ba nono mbanua Lowalangi enaʼö onekhe ira fahuhuo ba li böʼö. Hewaʼae simanö, abölö oya li niʼogunaʼöra moroi ba niʼogunaʼö me döfi siföföna, lafoʼeluaha duria Mbanua Lowalangi ba zi töra 670 ngawalö li. (Hal. 2:9-11) Oya sibai lektur si no lahaogö ba ngawalö li irege tola tefaʼema duria Mbanua Lowalangi ba zi sagörö ulidanö.a Daʼa dandra wa iʼogunaʼö Razo Yesu Keriso Yehowa ba wondröniaʼö halöwö fanuriaigö. (Mat. 28:19, 20) Datafaigi hadia manö wakake niʼogunaʼöda barö zi 100 fakhe andre ba wamalua halöwö daʼa. Faigi hewisa me lö isamuzaigö Razo ba wamahaʼö yaʼita ba woʼameʼegö tödö niha böʼö ba ifarou ita enaʼö tobali samahaʼö Taromali Lowalangi.—II Tim. 2:2.

Ifaʼanö Nono Mbanuania Razo ba Wananö Tanömö Zindruhu

3. Hadia mbörö wa taʼogunaʼö ngawalö wakake ba wamalua halöwö fanuriaigö?

³ Ifoʼamaedolagö Yesu ’duria Mbanua Lowalangi’ simane tanömö, ba tödö niha simane tanö. (Mat. 13:18, 19) Hulö zohalöwö ba danö, oya fakake niʼogunaʼönia enaʼö owukho dambu ba tola mutanö danömö zinanö. Simanö göi nono mbanua Yehowa, oya fakake niʼogunaʼöra ba wamaʼanö tödö niha si hauga zuta faʼato enaʼö latema duria Mbanua Lowalangi. So ösa wakake si lö ara laʼogunaʼö. Tanö böʼö, lö labato wangogunaʼö, simane buku hegöi majalah. Fefu wakake nifatunö ba duho daʼa no tobali fanolo khö ndra sanuriaigö Banua Lowalangi ba wamalukhaisi niha, tenga simane lala wahuhuosa niʼogunaʼö niha sato, nitutunö ba faza si no aefa.—Hal. 5:42; 17:2, 3.

4, 5. Hewisa wangogunaʼö rekaman fonograf, ba hadia zoʼambötö ba wangogunaʼö yaʼia?

⁴ Huhuo nirekam. Ira sanuriaigö me 1930-an irugi 1940-an, lafuta ba fonograf jinjing huhuo sebua Zura Niʼamoniʼö si no murekam. Ambö lima menit rekaman nifutara. Itaria adogo-dogo duho huhuonia, simane ”Lowalangi Sambua Tölu”, Alitö Fangamoniʼö”, hegöi ”Banua Lowalangi”. Hewisa wamarongogö rekaman andre? Imane talifusöda Clayton Woodworth, Jr., nibayagö idanö me 1930 ba Amerika Serikat, ”Uʼohe fonograf, mane kofo side-ide. So ba daʼö wamuta yaʼia. Enaʼö terongo linia, ubeʼe ndrangania ba mbalö piringan saitö. Möido ba zi sambua omo, ubokai kofo, ufasa fakakenia, ba utuko bel. Na ibokai mbawandruhönia sokhö omo, umane khönia, ’So duria somasi ufarongogö khöu.’” Hewisa dödö zokhö omo? Imane talifusöda Woodworth, ”Ato zanemaʼö, ba so göi zondruhö bawandruhö. Lawalinga möido ba wamawa fonograf.”

⁵ Me 1940, töra 90 rekaman huhuo sebua si no mufaʼanö, ba töra sazuta piringan saitö si no muhaogö. So zi merintis ba Inggris me luo daʼö si tobali anggota Mboto Zolohe ba gafuriatania. Töinia John E. Barr. Imane, ”Me 1936 irugi 1945, no tobali awögu si lö faröi fonograf. Me luo daʼö, hulö so zambö na lö uʼohe ia. Aro wamatigu na urongo huhuo dalifusöda Rutherford nifutagu föna nomo, hulö na so ia ba daʼö. Tatu manö, ambö tefahaʼö niha na ha mufuta fonograf, börö ambö fagöna ba dödö zamondrongo.”

6, 7. (a) Hadia manö gunania kartu kesaksian, ba hadia göi zoʼamböta? (b) Hadia geluahania wa ibeʼe Yehowa ’ngawua wehede ba mbawada’?

⁶ Kartu kesaksian. Iʼotarai me 1933, mufarou dödö ndra sanuriaigö ba wangogunaʼö kartu kesaksian ba wanuriaigö ba nomo-omo misa. Faʼebuania, 8 kali 13 sentimeter, ba so duria sadogo-dogo ba daʼö moroi ba Zura Niʼamoniʼö hegöi angombakhata sanandrösa ba lektur Zura Niʼamoniʼö si tola iʼokhögö sokhö omo. Ibeʼe kartu andrö sanuriaigö ba zokhö omo enaʼö ibaso. Imane Lilian Kammerud si tobali utusan injil ba Puerto Riko hegöi ba Argentina, ”Omasido sibai wangogunaʼö kartu andrö. Lö fefu ndraʼaga onekhe ba wanuriaigö. Tobali, na uʼogunaʼö kartu daʼö, aoha khögu wahuhuosa ba niha.”

⁷ Imane talifusöda David Reusch, nibayagö idanö me 1918, ”Tetolo ndra talifusöda ba kartu kesaksian andrö börö me lö ato zonekhe fahuhuo.” Hizaʼi, so zoʼamböta ba kartu daʼö. Imane talifusöda Reusch, ”Itaria, na falukhaga ba niha, lawalinga lö maʼila fahuhuo. Sindruhu sa, ato moroi ba gotaluama zi lö onekhe fahuhuo. Hizaʼi, ifaʼanö ndraʼaga Yehowa tobali enoninia ba wamalukhaisi niha sato. Lö ara aefa daʼö, ibeʼe ngawua wehede ba mbawama, ifahaʼö ndraʼaga ba wangogunaʼö Sura Niʼamoniʼö. Tola mafalua daʼö börö Sekolah Pelayanan Teokratis nibörögö me 1943.”—Baso Yeremia 1:6-9.

8. Hewisa wanehegömö Keriso ba wamahaʼö yaʼugö?

⁸ Buku. Iʼotarai 1914, töra 100 ngawalö mbuku sanandrösa ba Zura Niʼamoniʼö nifazökhi nono mbanua Yehowa. So ösa mbuku nifazökhi enaʼö onekhe ndra talifusöda ba wanuriaigö. Imane Anna Larsen si no tobali sanuriaigö ba Denmark ba zi töra 70 fakhe, ”Itolo ndraʼaga Yehowa enaʼö itugu onekhega ba wanuriaigö, iʼasogö Sekolah Pelayanan Teokratis hegöi ngawalö mbuku tanö böʼö. Lö olifudo mbuku si oföna yaʼia daʼö Theocratic Aid to Kingdom Publishers, niʼombakhaʼö me 1945. Aefa daʼö, so mbuku ”Equipped for Every Good Work”, nifazökhi me 1946. Iadaʼa, so khöda mbuku Mendapat Manfaat dari Pendidikan Sekolah Pelayanan Teokratis, nifazökhi me 2001.” Me no iʼasogö Yehowa Sekolah Pelayanan Teokratis andrö hegöi buku tanö böʼö, daʼa zi möi fanolo ”enaʼö tola enoni ndraʼaga”. (II Kor. 3:5, 6) Hadia no öfasuraʼö döimö ba Sekolah Pelayanan Teokratis? Hadia öʼohe mbuku Sekolah Pelayanan andrö ba gangowuloa ero migu ba öfaigi na ibaso sondröniaʼö sekola? Na öfalua daʼö, eluahania no ötehegö khö Keriso ba wamahaʼö yaʼugö tobali samahaʼö si sökhi.—II Kor. 9:6; II Tim. 2:15.

9, 10. Hadia guna mbuku ba wananö hegöi ba wombuwui sindruhu?

⁹ Ibeʼe göi khöda Yehowa wanolo ba organisasinia, iʼasogö ngawalö mbuku sanolo ira sanuriaigö ba wamotokhi famahaʼö moroi ba Zura Niʼamoniʼö. Baga sibai mbuku Kebenaran yang Membimbing kepada Hidup yang Kekal. Tefazökhi mbuku daʼa me 1968 ba iʼanemai fagöna ba dödö niha. Moloʼö Kingdom Ministry baŵa si Felezara 1968, ”Ato sibai zangandrö buku Kebenaran andrö, irege me baŵa si Siwa, mohalöwö ba zi bongi percetakan Lembaga ba Brooklyn.” Aefa daʼö, itutunö artikel andrö, ”Me baŵa si Walu, abölö oya mbuku Kebenaran niʼandrö moroi ba zi no tefazökhi, töra sazuta amatonga waʼoya!” Me 1982, töra 100 zuta mufazökhi mbuku andre ba zi 116 ngawalö li. Barö zi 14 fakhe iʼotarai 1968 irugi 1982, töra sazuta monönö waʼato ndra sanuriaigö Banua Lowalangi, börö me so mbuku Kebenaran andrö.b

¹⁰ Me 2005, so mbuku niʼombakhaʼö, Apa yang Sebenarnya Alkitab Ajarkan? So mato 200 zuta zi no mufazökhi ba zi 256 ngawalö li! Hadia mbuania? Ba zi fitu fakhe iʼotarai 2005 irugi 2012, so mato 1,2 zuta niha si tobali sanuriaigö turia somuso dödö. Ba ginötö daʼö, tedou waʼato niha samahaʼö yaʼira ba Zura Niʼamoniʼö, ba wamobörö 6 zuta, ba gafuriata töra 8,7 zuta waʼato. Yehowa zamahowuʼö halöwöda ba wananö hegöi ba wombuwui tanömö zindruhu moroi ba Mbanua Lowalangi.—Baso I Korindro 3:6, 7.

11, 12. Tefaudu ba ayati si no tesura, haʼökhö wa lafazökhi majalah-majalah andrö?

¹¹ Majalah. Ba wamobörö, mubeʼe majalah Manuriaigö ba ”rorogöfö gubalo” soʼurakha ba ”wogaoni andrö, moroi ba zorugo”. (Luk. 12:32; Heb. 3:1) Me 1 mbaŵa si Fulu 1919, ihaogö majalah tanö böʼö organisasi Yehowa, enaʼö adöni dödö zombaso tanö böʼö yaʼia daʼö niha sato. Tehöngö majalah andrö ba Nono Zekola Zura Niʼamoniʼö hegöi ba niha sato irege abölö oya wamazaewe yaʼia moroi ba majalah Manuriaigö ba zi hauga fakhe faʼara. Me mböröta, töi majalah andrö The Golden Age. Me 1937, mugati döinia tobali Consolation. Aefa daʼö me 1946, töinia Awake! mazui Sadarlah!

¹² Ba zi hauga wulu fakhe, faböʼö-böʼö wamaʼanö ba famöföʼö majalah Manuriaigö hegöi Sadarlah! Hizaʼi, lö tebulö gohitö dödönia yaʼia daʼö ba wangombakha Banua Lowalangi hegöi ba wangaʼaroʼö famati ba Zura Niʼamoniʼö. Iadaʼa, no mufazökhi Manuriaigö edisi wamahaʼö hegöi edisi nibeʼe ba niha sato. Mubeʼe edisi wamahaʼö andrö ba ’zi so yomo khönia’, yaʼia daʼö ”rorogöfö gubalo” hegöi ’biri-biri böʼö’.c (Mat. 24:45; Yoh. 10:16) Edisi nibeʼe ba niha sato mubeʼe ba niha si lö faʼaboto ba dödö sindruhu, hizaʼi laʼosinangegö Zura Niʼamoniʼö hegöi Lowalangi. (Hal. 13:16) Mubeʼe Sadarlah! ba niha si so faʼaboto ba dödö maʼifu ba Zura Niʼamoniʼö hegöi khö Lowalangi sindruhu sotöi Yehowa.—Hal. 17:22, 23.

13. Hadia zahöli-höli dödöu ba majalah andrö? (Tutunö bagan ”Publikasi si Tehöngö ba zi Sagörö Ulidanö”.)

¹³ Me böröta ndröfi 2014, töra 44 zuta Sadarlah! nifazökhi ero waŵa ba mato 46 zuta majalah Manuriaigö. Mufoʼeluaha Sadarlah! te ba zi 100 ngawalö li, ba Manuriaigö ba zi töra 200 ngawalö li. Lua-luania, si dombua majalah andre zabölö oya mufoʼeluaha ba mufaʼema ba zi sagörö ulidanö! Lö ahöli-höli dödöda ba zi no mukhamö andre. So duria nifaʼema Yesu ba majalah-majalah daʼa, nituriaigö ba niha fefu.—Mat. 24:14.

14. Hadia nituriaigöda si fao faʼowölö-ölö, ba hadia mbörö?

¹⁴ Sura Niʼamoniʼö. Me 1896, talifusöda Russell hegöi ira awönia tanö böʼö lafaböʼöni döi badan hukum niʼogunaʼöra ba wangehaogö lektur, enaʼö so döi Zura Niʼamoniʼö ba daʼö. Töi badan hukum andrö Lembaga Alkitab dan Risalah Menara Pengawal. Tefaudu wamohouni andre börö me Sura Niʼamoniʼö zi tobali fakake si oföna ba wamaʼema turia somuso dödö sanandrösa ba Mbanua Lowalangi. (Luk. 24:27) Owölö-ölö nono mbanua Lowalangi ba wamaʼema Sura Niʼamoniʼö hegöi famarou tödö niha böʼö enaʼö labaso ia, tefaudu ba döi badan hukum andrö. Duma-dumania, me 1926, tafazökhi The Emphatic Diaglott, famoʼeluaha Mbuku Niʼamoniʼö Yunani Niha Keriso, nifazökhi Benjamin Wilson. Ibörögö me 1942, tafazökhi mato 700 ngawua Zura Niʼamoniʼö King James Version ba tafaʼema ba niha. Dua fakhe aefa daʼö, tabörögö wamazökhi Sura Niʼamoniʼö American Standard Version, tesura ba daʼö döi Yehowa ba zi 6.823 kali. Me 1950, no tabeʼe töra 250.000 Zura Niʼamoniʼö ba niha.

15, 16. (a) Hadia niʼandröu saohagölö ba Zura Niʼamoniʼö Famoʼeluaha Gulidanö si Bohou? (Tutunö kotak ”Aösö Wamoʼeluaha Sura Niʼamoniʼö”.) (b) Hewisa wanehegömö Yehowa ba wanufa tödömö?

¹⁵ Me 1950, muʼombakhaʼö New World Translation of the Christian Greek Scriptures. Sura Niʼamoniʼö New World Translation of the Holy Scriptures si no awai mufazökhi ba zi sambua jilid teʼombakhaʼö me 1961. Tefosumange Yehowa ba wamoʼeluaha daʼa, börö me tesura döinia ero so döi andrö ba naskah asli ba li Heberaiʼo. Tesura göi döi Lowalangi 237 kali ba teks si oföna Mbuku Niʼamoniʼö Yunani Niha Keriso. No mato hauga kali mubohouni Wamoʼeluaha Gulidanö si Bohou andre, safuria me 2013 enaʼö abölö tefaudu ba aoha wamotokhi ba dödö. Irugi döfi 2013, töra 201 zuta Wamoʼeluaha Gulidanö si Bohou nifazökhi, he si no awai tefazökhi, hegöi si lö awai nasa, ba zi 121 ngawalö li.

¹⁶ Hewisa dödö niha me labaso Wamoʼeluaha Gulidanö si Bohou ba li niʼilara? Imane samösa ira matua moroi ba Nepal, ”Moloʼö niha sato, abua sibai wamotokhi ba dödö Zura Niʼamoniʼö ba li Nepal si no ara maʼokhögö, börö me li me föna niʼogunaʼö ba daʼö. Iadaʼa, alio aboto ba dödöma nösi Zura Niʼamoniʼö börö me li niʼogunaʼö sero maʼökhö niʼogunaʼö.” So samösa ndra alawe moroi ba Republik Afrika Tengah, ilau meʼe me ibaso Zura Niʼamoniʼö nifoʼeluaha ba li Sango. Imane, ”Daʼa li si fagöna ba dödögu.” Simane ira alawe andrö, tola tatehegö khö Yehowa wanufa tödöda, tabaso Daromalinia ero maʼökhö.—Zin. 1:2; Mat. 22:36, 37.

Fangandrö Saohagölö ba Wakake hegöi Famahaʼö

17. Hewisa wangandröu saohagölö ba ngawalö fakake hegöi famahaʼö si no ötema, ba hadia mbuania me no öʼogunaʼö?

¹⁷ Hadia öʼandrö saohagölö ba wamahaʼö si lö aetu moroi khö Razo Yesu Keriso hegöi fakake nibeʼenia khöda? Hadia öbeʼe ginötöu ba wombaso lektur moroi ba organisasi Lowalangi, ba öʼogunaʼö ia ba wanolo niha böʼö? Na yaʼia, fao dödöu ba niwaʼö dalifusöda ira alawe sotöi Opal Betler, nibayagö idanö me 4 mbaŵa si Fulu 1914. Imane Opal, ”Barö zi hauga fakhe, daruaga foʼomogu [Edward] maʼogunaʼö fonograf hegöi kartu kesaksian. Möiga manuriaigö ba nomo-omo misa, maʼogunaʼö mbuku, buku side-ide, hegöi majalah. Mafalua kampanye ba mafaʼoli ndraʼaga ba wameʼe risalah. Ba gafuriata, lafahaʼö ndraʼaga ba wamalukhaisi niha si no irai mafaʼema turia, ba mafalua wamahaʼö ba Zura Niʼamoniʼö ba nomo niha sadöni tödö ba zindruhu. Oya sibai halöwöma ba omuso dödöma.” Ifabuʼu Yesu wa oya halöwö nono mbanuania ba wananö, ba wamasi, ba owua-wua dödöra. So hauga zuta niha simane Opal zorasoi wa sindruhu nifabuʼu andrö.—Baso Yohane 4:35, 36.

18. Hadia halöwö sabölö ebua niʼokhögöda?

¹⁸ Ato niha si lö tobali enoni Razo, te lamane tödöra wa ono mbanua Lowalangi andrö ”niha si lö mufahaʼö ira, ono mbanua”. (Hal. 4:13) Hizaʼi, angeraigö atö! Razo andrö, no ibaliʼö ono mbanuania tobali organisasi penerbit si tebai muʼaohasi ba dödö, hewaʼae ha niha si toʼölö manö ira. Oya publikasi nifoʼeluaha ba nifazökhira, daʼö zabölö oya tefazaewe sagötö sejarah! Sabölö moguna, no ifahaʼö ba ifarou dödöda wangogunaʼö fakake andrö enaʼö taturiaigö duria somuso dödö ba niha fefu moroi ba ngawalö soi. No sambua töi sebua khöda daʼa na falulu fohalöwö khö Keriso ba wananö tanömö zindruhu hegöi ba wamasi ira nifahaʼö!