Lala Wangogunaʼö Buku Hadia Nifahaʼö Zura Niʼamoniʼö Khöda?

Arakhagö fagölö mbuku Nifahaʼö Khöda ba mbuku Alkitab Ajarkan. Ba zi dombua mbuku andre, fagölö sindruhu nitutunönia, simanö göi lala wamaʼoli yaʼia. Hizaʼi, ba mbuku Nifahaʼö Khöda iʼogunaʼö ngawua wehede hegöi fanutunö sabölö aoha muʼila eluaha. Lafazökhi ia ba wanolo niha sambö aboto ba dödö mbuku Alkitab Ajarkan. Si tobali fangali apendiks, so gonönöta ba mbuku Nifahaʼö Khöda zanutunö ngawalö ngawua wehede ba faza andrö. Ero faza, lö hadöi fanofu famasao mazui kotak famuli furi. Hizaʼi, ero ba gafuriata faza so rahu-rahu sanandrösa ba zindruhu moroi ba Zura Niʼamoniʼö nitutunö ba faza andrö. Simane mbuku Alkitab Ajarkan, mbuku Nifahaʼö Khöda tola labeʼe ba niha ero inötö, hewaʼae buku andrö lö fao ia ba wameʼe buku ba mbaŵa andrö. Hewisa wangogunaʼöda ngawalö si tohude moroi ba mbuku Nifahaʼö Khöda andre ba ginötö tafahaʼö niha ba Zura Niʼamoniʼö?

RAHU-RAHU: Si toʼölönia, na tafahaʼö niha labaso sakali ngenoli ba mbuku Alkitab Ajarkan, aefa daʼö tabeʼe wanofu. Tefaudu lala simane daʼa ba niha sato. Hizaʼi, na so niha nifahaʼö sambö aboto ba dödönia li niʼogunaʼö mazui ambö iʼila mombaso, tola öʼogunaʼö mbuku Nifahaʼö Khöda. Aefa daʼö, tola öʼogunaʼö rahu-rahu faza si tobali dane-dane wamahaʼö ba tola öfarou dödö niha nifahaʼömö ba wombaso samösa ösi faza andrö. Ero sakali wamahaʼö, tola ötutunö sambua zindruhu ba Zura Niʼamoniʼö ha ba zi 15 menit. Börö me lö tesura ba rahu-rahu fefu si so ba faza andre, moguna öhaogö öfaʼanö duho andrö ba böi böhöli woʼangeraigö hadia zoguna ba niha nifahaʼömö. Na öfahaʼö niha ba Zura Niʼamoniʼö ba lala sasese niʼogunaʼö, tola öʼogunaʼö rahu-rahu si tobali famuli furi.

ONÖNÖTA: Ngawua wehede nitutunö ba gonönöta, tefaudu wamaʼanö yaʼia simane si no tefaʼoli ba mbuku andrö. Niha samahaʼö, tola ihalö gangetula hadia itutunö gonönöta ba mbuku Nifahaʼö Khöda mazui löʼö ba ginötö wamahaʼö.