Ataʼufi Lowalangi ba Tema Mbuaʼania

1-2. Simane Loti, hadia waʼabasaki nitaögö niha Keriso iadaʼa?

ME TAʼILA wa itugu lö sökhi goi-goi gulidanö andre sanandrösa ba gamuata, tarasoi simane nirasoi Loti. ’Tefakao ia börö me iʼila gamuata si lö faʼaila nifalua niha si lö sökhi’, börö me aboto ba dödönia wa fatuwu khö Yehowa gamuata simane daʼö. (2 Fe. 2:7, 8) Iʼataʼufi ba iʼomasiʼö Lowalangi Loti. Börö daʼö, lö iʼoʼö gamuata niha si so ba zi fasuinia. Iadaʼa, niha si so ba zi fasuida göi laʼosilöʼögö goi-goi Yehowa sanandrösa ba gamuata. Hewaʼae simanö, lö tebulö sökhi gamuatada na taforege ba wangomasiʼö Lowalangi ba tafosumange ia.—Amd. 14:2.

² Ibeʼe khöda Yehowa mene-menenia si fao faʼomasi ba mbuku Gamaedola ba wanolo yaʼita. Fefu niha Keriso, he ira matua mazui ira alawe, si bohou ebua mazui si no alawa döfi, tola latema mbua na laʼangeragö mene-mene nibeʼenia andrö.

FANGATAʼUFI LOWALANGI TOLA MÖI FOLUMÖʼÖDA

3. Simane ba Gamaedola 17:3, hadia sambua dane-dane wa moguna tarorogö dödöda? (Faigi göi gambara.)

³ Sambua dane-dane si tohude hana wa moguna tarorogö dödöda yaʼia daʼö börö me Yehowa zamareso tödö. Iʼila hewisa ita zindruhunia, tenga ha soroma moroi baero. (Baso Gamaedola 17:3.) Iʼomasiʼö ita na tafoʼösi wangera-ngerada faoma mene-menenia satua-tua, si tola manolo yaʼita ba wanöndra faʼauri si lö aetu. (Yoh. 4:14) Tola möi folumöʼöda daʼö moroi ba wondrönisi dödö nifaʼema Zatana hegöi ulidanönia, si tola mamakiko amuatada hegöi famatida. (1 Yo. 5:18, 19) Na lö tebulö tahatöʼö ita khö Yehowa, itugu taʼomasiʼö ba tafosumange ia. Börö me lö omasi ita taʼafökhöiʼö dödö Namada, lö taʼangeragö ba wamalua horö. Ba ginötö so wondrönisi dödö, tamane wangumaʼö, ’Hewisa wa uʼafökhöiʼö dödö Yehowa si no mangomasiʼö yaʼo ba si no mamalua khögu si sökhi?’—1 Yo. 4:9, 10.

4. Hewisa wangataʼufi Yehowa tola möi folumöʼö zi samösa dalifusöda ira alawe ba ginötö so wondrönisi dödö?

⁴ Samösa dalifusöda ira alawe moroi ba Kroasia sotöi Marta, no irai tedönisi dödönia ba wamalua amuata fohorö. Imane, ”Abua sibai ba wangokhögö fangera-ngera si sökhi ba wolawa isö-isö dödö si fasala. Hizaʼi, tola telumöʼö ndraʼo börö me uʼataʼufi Yehowa.”b Hewisa wa tola möi folumöʼö Marta wangataʼufinia Yehowa? Imane Marta wa iʼangeragö hadia lua-luania na iʼoʼö gisö-isö dödö si fasala andrö. Na iʼoʼö gisö-isö dödö si fasala, lua-luania abu dödö Yehowa ba tebai ifosumange sagötö faʼara. Simane nifalua Marta, moguna taʼangeragö daʼö enaʼö tola talawa wondrönisi dödö.—1 Mo. 6:5, 6.

5. Hadia wamahaʼö nihalömö ba zi no irai alua khö Leo?

⁵ Na taʼataʼufi Yehowa, moguna mangelama ita enaʼö böi fariawö ba niha si lö sökhi amuata. Nehegö zi no irai alua khö Leo si toröi ba Kongo. Öfa fakhe me no tebayagö ia idanö, ibörögö fariawö ia ba niha si lö sökhi amuata. Imane tödönia wa na lö fao ia ba wamalua ngawalö zi lö sökhi, lö salania daʼö. Hizaʼi lö ara aefa daʼö, ibörögö tedönisi dödönia ba wamadu-madu tuo, ba ifalua gamuata fohorö. Ba gafuriata, itörö tödönia wamahaʼö nibeʼe zatuania si no tobali Samaduhuʼö Yehowa. Itörö tödönia göi hawaʼomuso dödönia mböröta me ifosumange Yehowa. Ba gafuriata, maniasa ia. Börö wanolo ndra satua sokubaloi, ifuli ia khö Yehowa. Iadaʼa, omuso sibai dödönia me ihalö halöwö tobali satua sokubaloi hegöi perintis istimewa.

6. Muʼamaedolagö simane hadia ira alawe si darua nitötöi ba Gamaedola faza 9?

⁶ Omasi sibai gulidanö Zatana andre ba wamalua amuata fohorö hegöi pornografi. (Ef. 4:19) Börö daʼö, moguna taforege ba wamosumange Lowalangi ba taʼaröuʼö ita moroi ba zi lö sökhi. (Amd. 16:6) Hadia zi tola möi fanoloda? Fefu ita, he ira matua hegöi ira alawe, tola tatema mbua moroi ba Gamaedola faza 9. Ba faza daʼö, faʼatua-tua hegöi faʼabodo, muʼamaedolagö ia simane ira alawe si darua.c Ira alawe si darua andrö faoma lakaoni niha ”si lö tödö”, mazui niha si lö faʼatua-tua. Hulö lamane wangumaʼö, ’Aine, ba lau manga ba nomogu.’ (Amd. 9:1, 5, 6, 13, 16, 17) Hizaʼi, faböʼö ba gafuriata lua-lua wogaoni ndra alawe si darua andrö.

TIMBAGÖ WOGAONI NIBEʼE ”NDRA ALAWE SI BODO”

7. Hadia zalua ba niha sotemaʼö fogaoni nibeʼe ”ndra alawe si bodo”? (Amaedola 9: 13-18) (Faigi göi gambara.)

⁷ Datatutunö wogaoni moroi ba ndra alawe si oföna niʼamaedolagö simane ’ira alawe si bodo’. (Baso Gamaedola 9:13-18.) Lö aila ia ba wogaoni niha si lö faʼatua-tua weʼamöi ba nomonia ba fao wemanga khönia. Hadia zalua ba niha sotemaʼö fogaoni andrö? Möi ira ba ”Lewatö sabakha”. Te itörö tödömö duma-duma si fagölö si no mutötöi ba zilalö ba mbuku Gamaedola. Mufangelama ita sanandrösa ba ”ndra alawe si lö sökhi” hegöi ’ira alawe sohorö-horö’. Lafatunö göi khöda wa ’na möi ita ba nomonia, hulö na möi ba waʼamate’. (Amd. 2:11-19) Ba Gamaedola 5:3-10, ifangelama göi ita sanandrösa khö ”ndra alawe si lö sökhi” tanö böʼö ”ahenia numalö ba waʼamate”.

8. Hadia gangetula sinangea tahalö?

⁸ Niha nikaoni ”ndra alawe si bodo” andrö, moguna lahalö gangetula: latemaʼö wogaoni andrö mazui löʼö. Hewisa göi ita? Ba ginötö so wondrönisi dödö ba wamalua amuata fohorö mazui ba wamaigi pornografi, duma-dumania ba TV mazui ba internet, hadia nifaluada?

9-10. Hana wa moguna tatimbagö gamuata fohorö?

⁹ Oya dane-dane hana wa moguna tatimbagö gamuata fohorö. Imane ’ira alawe si bodo’ andrö, ”Ami sibai nidanö nitagö.” Hadia geluahania ’idanö nitagö’? Iʼamaedolagö Sura Niʼamoniʼö faʼorudu ba zi no mongambatö hulö nidanö sodöwa-döwa. (Amd. 5:15-18) Faʼorudu simane daʼö, ha ba niha si no mangowalu si no teʼosambuaʼö föna Lowalangi hegöi niha. Faböʼö sibai daʼö ba ”nidanö nitagö”, eluahania famalua faʼorudu ba niha si lö sangowalu ba samalua amuata wohorö. Si toʼölönia, niha samalua amuata fohorö, labiniʼö ira simane sanagö. Hulö ”ami sibai” raso ”nidanö nitagö” andrö, mendrua manö na so ba wangera-ngerara wa nifaluara andrö lö laʼila niha böʼö. Hizaʼi, sindruhunia no lalimo ira samösa, börö me iʼila fefu daʼö Yehowa. Tola tekiko gamakhaitara khö Yehowa ba sindruhu-ndruhu lö ”ami sibai” daʼö. Faʼafökhö nirasoira. (1 Ko. 6:9, 10) So nasa lua-lua tanö böʼönia.

¹⁰ Amuata fohorö tola möi fangaila ba zi samösa niha, ba si lö eluaha waʼaurinia. Tola göi abeto ia ba tekiko wahuwusania ba nösi nomonia. Baero daʼö, niha samalua amuata wohorö mate ira ba wamati. Ba ato göi ba gotaluara zi göna fökhö si tola mamunu yaʼira. (Amd. 7:23, 26) Andrö, imane ba Gamaedola 9 ayati 18, ’Ba Lewatö sabakha so dome ndra alawe si bodo andrö.’ Sindruhu sa, abölö sökhi na tatimbagö wogaoni nibeʼe ”ndra alawe si bodo”. Hizaʼi, hana wa ato niha somasi manemaʼö fogaoni nibeʼenia?—Amd. 9:13-18.

11. Hana wa möi famaʼalada pornografi?

¹¹ Sambua dandrawa sasese muʼogunaʼö yaʼia daʼö pornografi. So zangumaʼö, wa lö möi famaʼalara pornografi andrö. Hizaʼi sindruhunia, tenga sohare ira daʼö, möi fangekhugö tou döi, ba tola manö sandru ira. Abua ba wangeheta ngawalö gambara zohorö ba wangera-ngerada. Baero daʼö, pornografi tola ifatumbuʼö gisö-isö dödö si fasala, ba abua wangeheta yaʼia. (Kol. 3:5; Yak. 1:14, 15) Ato niha samaigi pornografi ba gafuriata lafalua gamuata fohorö.

12. Hadia zinangea tafalua na oroma gambara zohorö ba HP-da ba zi lö tadöna-döna?

¹² Yaʼita niha Keriso, hadia zinangea tafalua na oroma gambara zohorö ba HP-da ba zi lö tadöna-döna? Moguna iʼanemaiʼö taheta daʼö! Aoha khöda wamalua yaʼia na itörö tödöda wa ebua sibai mböli wahuwusada khö Yehowa. Moguna göi tatimbagö ngawalö gambara hewaʼae na tenga pornografi daʼö, hizaʼi tola ifatumbuʼö ba wangera-ngerada gamuata fohorö. Hadia mbörö? Börö me gambara simane daʼö, tola ifarou ita ba wamalua horö bakha ba dödö. (Mat. 5:28, 29) Imane si samösa zatua sokubaloi sotöi David moroi ba Thailand, ”Imane tödögu, ’hewaʼae gambara andrö tenga pornografi, hadia omasi Yehowa na lö tebulö ufaigi daʼö?’ Börö me uʼokhögö lala wangera-ngera simane daʼö, tola uhalö gangetula si fao faʼatua-tua.”

13. Hewisa enaʼö tola tahalö gangetula si fao faʼatua-tua?

¹³ Na taʼataʼufi Yehowa soroi ba dödö, mazui ataʼu ita ba wangafökhöiʼö tödönia, tola tahalö gangetula si fao faʼatua-tua. Imane Sura Niʼamoniʼö, ”Böröta waʼatua-tua, fangataʼufi Yehowa.” (Amd. 9:10) Daʼö niforomaʼö ba ayati si oföna moroi ba Gamaedola faza 9. Ba li sindruhunia, muʼamaedolagö ayati andrö ’faʼatua-tua sindruhu’ si tobali ira alawe tanö böʼö.

TEMA WOGAONI MOROI BA ”WAʼATUA-TUA SINDRUHU”

14. Hadia wogaoni nitötöi ba Gamaedola 9:1-6?

¹⁴ Baso Gamaedola 9:1-6. Ba ayati daʼa, so sambua wogaoni moroi khö Zomböi yaʼita, yaʼia daʼö Umbu waʼatua-tua sindruhu. (Amd. 2:6; Rom. 16:27) Itutunö ba ayati daʼö sambua nomo sebua sangokhögö fitu ngawua gehomo. Daʼa zangoromaʼö waʼoböwö Yehowa ba itema gofu haniha manö zomasi manema faʼatua-tua moroi khönia.

15. Hadia niʼandrö Lowalangi khöda me ikaoni ita?

¹⁵ Moroi ba Gamaedola faza 9 sanutunö sanandrösa ba ndra alawe niʼamaedolagö ’faʼatua-tua sindruhu’, tola tafahaʼö ita wa oböwö sibai Yehowa andrö, ba omasi ia ba wameʼe khöda ngawalö zi sökhi. Ira alawe andrö no ihenaigö ifaʼanö nagole hegöi nagu, ba ibeʼe daʼö fefu ba domenia. (Amd. 9:2) Aefa daʼö, ba ayati 4 hegöi 5, ”Imane [faʼatua-tua sindruhu] ba niha si lö tödö, ’Aine, dataʼa roti daʼa khögu.’” Hana wa moguna tatema wogaoni andrö? Omasi Yehowa na atua-tua ndraononia ba lö teʼala ira. Omasi ia ba wolumöʼö yaʼita enaʼö lö tatörö ua sakali waʼafökhö, awena maniasa ita. Daʼö mbörö wa ”iʼiröʼö waʼatua-tua soguna ba niha sadölö tödö”. (Amd. 2:7) Na taʼataʼufi Yehowa, taforege ba wangomusoiʼö tödönia. Tafondrondrongo mene-menenia satua-tua ba taʼoʼö daʼö si fao faʼomuso dödö.—Yak. 1:25.

16. Hewisa wangataʼufi Lowalangi möi fanolo Alain ba wangai angetula si fao faʼatua-tua, ba hadia mbuania?

¹⁶ Nehegö zi no irai alua khö zi samösa satua sokubaloi sotöi Alain, sohalöwö tobali guru ba zekola. Imane, ”Ato ndra guru sangumaʼö wa film zohorö-horö no tobali faosatö moroi ba wamahaʼö sanandrösa ba seks.” Hizaʼi, iʼila Alain wa lö atulö daʼö. Imane, ”Börö me uʼataʼufi Lowalangi, si fao faʼabarani utimbagö wamaigi film simane daʼö. Ututunö göi khö ndra guru tanö böʼö hadia mbörö wa uhalö gangetula simane daʼö.” Iʼoʼö Alain ”waʼatua-tua sindruhu” me ’itörö lala sadölö saekhu ba waʼatua-tua’. (Amd. 9:6) So ösa guru zadöni tödö ba gangetula nihalö Alain. Iadaʼa lafahaʼö ira ba Zura Niʼamoniʼö ba möi ira ba gangowuloa.

17-18. Hadia howu-howu iadaʼa nirasoi niha sanemaʼö fogaoni moroi ba ”waʼatua-tua sindruhu”, ba hewisa waʼaurira ba zi so miföna? (Faigi göi gambara.)

¹⁷ Iʼogunaʼö duma-duma ndra alawe si darua andrö Yehowa ba wangoromaʼö hewisa enaʼö tola taʼokhögö waʼowua-wua dödö ba zi so miföna. Niha sanemaʼö fogaoni moroi ba ”ndra alawe si bodo” labiniʼö wamalua amuata wohorö hulö ”ami sibai” wamaigira. Ha somasi-masi dödöra niʼangeragöra ba lö laʼangeragö hadia lua-luania ba zi so miföna. Imane Sura Niʼamoniʼö, ba gafuriatania möi ira ba ”Lewatö sabakha”.—Amd. 9:13, 17, 18.

¹⁸ Hewisa göi ba niha sanemaʼö fogaoni moroi ba ”waʼatua-tua sindruhu”? Owua-wua dödöra börö me fahöna fefu zoguna khöra enaʼö itugu ahatö khö Yehowa. (Yes. 65:13) Ifaʼema Yesaya sameʼeleʼö wehede Yehowa, imane, ”Mihaogö wamondrondrongo yaʼo, ba miʼa gö si sökhi, ba misöndra waʼowua-wua dödö ba wemanga ö sabölö sökhi.” (Yes. 55:1, 2) Moguna tafahaʼö ita ba wangomasiʼö niʼomasiʼö Yehowa, ba fatuwu ita ba zi fatuwu ia. (Si. 97:10) Omuso göi dödöda börö me tola takaoni niha böʼö ba wanema mbua moroi ba ”waʼatua-tua sindruhu”. Hulö na ’muʼao ita moroi ba nahia salawa ba mbanua sebua, haniha zi lö faʼatua-tua, miʼaine ba daʼa’. ’Faʼatua-tua sindruhu’ tenga ha iadaʼa moguna ia khöda. Ba zi so miföna, tola auri ita sagötö faʼara hegöi niha samondrondrongo yaʼita, ba lö tebulö ’tatörö lala sadölö saekhu ba waʼatua-tua’.—Amd. 9:3, 4, 6.

19. Simane ba Zangombakha 12:13, 14, hadia gangetula sinangea tahalö? (Faigi göi kotak ”Bua Wangataʼufi Lowalangi”.)

¹⁹ Baso Zangombakha 12:13, 14. Sagötö ngaluo safuria si lö sökhi andre, yalötebulö terorogö dödöda na taʼatauʼfi Lowalangi, ba itolo ita enaʼö lö raʼiö ba gamuata hegöi ba wamati. Börö me taʼataʼufi Lowalangi, yalötebulö takaoni niha böʼö ba wangalui ’faʼatua-tua sindruhu’ ba latema mbuania.