Lala ba Woʼasiwaisi Abula Dödö

Me awena mongambatö ami, ibörötaigö so gabula dödö. Alua daʼa, börö me faböʼö lala wangera-ngerami, ösi dödömi, mazui lala wangebua yaʼami me iraono. So göi gabula dödö moroi ba niha böʼö mazui salua si lö mudöna-döna.

Te itaria omasi ita moloi moroi ba gabula dödö, hizaʼi, iʼoʼou ita Sura Niʼamoniʼö enaʼö taʼasiwaisi gabula dödö salua. (Mataiʼo 5:23, 24) Öʼila samösa wa ha famalua mene-mene moroi ba Zura Niʼamoniʼö zanolo yaʼita ba woʼasiwaisi abula dödö.

1 MIFATUNÖ GABULA DÖDÖ SALUA

HADIA NIWAʼÖ ZURA NIʼAMONIʼÖ: ”So . . . ginötö ba wehede.” (Zangombakha 3:1, 7) Moguna öbeʼe ginötöu ba wamatunö abula dödö salua. Böi biniʼö hewisa wangera-ngerau sanandrösa ba gabula dödö salua andrö. ’Faoma si duhu miwaʼö khö nawömi’. (Efeso 4:25) Na ibörötaigö aukhu dödöu, angenanöi faböi faʼudu ndraʼugö. Fanema li nihaogö, tola iʼalösi wönu. —Gamaedola 15:4; 26:20.

Hewaʼae lö khömi fahasara dödö, böi miböhöli wangehao fehedemi khö nawömi, fangomasiʼö ba famosumange ngambatömi. (Kolose 4:6) Miʼaliokö wangasiwai abula dödö salua khömi, ba böi zi lö fahede ami.—Efeso 4:26.

SI TOLA ÖFALUA:

• Faigi ginötö si tefaudu ba wamatunö abula dödö salua

• Na yaʼugö zamondrongo, böi tuyu dalu huhuonia. So ginötö dania yaʼugö zi fahuhuo göi

2 HAOGÖ FONDRO-NDRONGO ENAʼÖ ÖʼILA GELUAHA

HADIA NIWAʼÖ ZURA NIʼAMONIʼÖ: ”Fangomasiʼö talifusö andrö, ba ya moroi ba dödömi. Faoma mihulö nawömi, wamosumange yaʼia.” (Roma 12:10) Moguna sibai öfondro-ndrongo wehedenia. Angeraigö hadia zi so ba gera-era ngambatöu, enaʼö ”faoma afökhö khömi zafökhö khö nawömi . . . ba böi fayawa ami”. (I Fetero 3:8; Yakobo 1:19) Böi osilömamondrongogö huhuonia. Na tola, bato halöwöu, ba haogö wamondro-ndrongo hadia niwaʼö ngambatöu. Mazui, waʼö khönia dania tafatunö. Na si falulu fohalöwö khöu woʼomou ba wamaigiu, ”lö alio-lio abao dödöu” khönia.—Zangombakha 7:9.

SI TOLA ÖFALUA:

• Haogö wamondrongo niwaʼönia, hewaʼae lö omasi ndraʼugö huhuonia andrö

• Faigi hadia geluaha wehedenia andrö. Faigi lagu mbotonia, ba note linia

3 FALUA ZI NO MIHALÖ ANGETULA

HADIA NIWAʼÖ ZURA NIʼAMONIʼÖ: ”Fefu ngawalö waʼerege dödö ba mofozu, ba tea-tea mbewe andrö ba isawa waʼanumana.” (Gamaedola 14:23) Ambö na ha fangila lala wangasiwai abula dödö. Tobali, moguna mifalua zi no mihalö angetula. Atulö wa abua wamalua daʼa, hizaʼi tenga zaya-zaya gölö. (Gamaedola 10:4) Na falulu fohalöwö ami, ’misöndra mböli gölö si sökhi ba waʼerege dödömi.’—Zangombakha 4:9.

SI TOLA ÖFALUA:

• Angeraigö hadia zi tola mifalua ba wangasiwai na so gabula dödö salua

• Böi miböhöli wamareso hadia zi no mikhamö