Na Alua Gabula Dödö Yomo ba Nomo

Tatu manö no öʼodödögö wangalui lala enaʼö so waʼohahau dödö ba nösi nomou hegöi ba wongambatöu. Hizaʼi, tola manö alua gabula dödö si lö mudöna-döna sanaisi faʼohahau dödömi ba nomo. (Zangombakha 9:11, NW) Ibeʼe wanolo Lowalangi enaʼö tola tataögö. Na öʼoʼö goi-goi Zura Niʼamoniʼö andre, tola mitaögö gofu hadia gabula dödö salua.

1 MIBEʼE BALAZIMI YEHOWA

HADIA NIWAʼÖ ZURA NIʼAMONIʼÖ: ”Mibeʼe balazi ia na so zabu dödömi, gofu hadia ia, so so sa dödönia ami.” (I Fetero 5:7) Törö tödöu wa tenga moroi khö Lowalangi gabula dödö salua khöu. (Yakobo 1:13) Na fahuwu ndraʼugö khönia, ifolala dödöu. (Yesaya 41:10) ”Mibokai dödömi khönia.”—Zinunö 62:9.

Tola ohahau dödöu na öbaso Zura Niʼamoniʼö ero maʼökhö. Lua-luania, ösöndra wondrara dödö moroi khö Yehowa ba gabula dödö salua khöu. (II Korindro 1:3, 4; Roma 15:4) No ifabuʼu wa ibeʼe khöu ’waʼohahau dödö, sabölö moroi ba gera-era niha fefu’.—Filifi 4:6, 7, 13.

SI TOLA ÖFALUA:

• Andrö wanolo moroi khö Yehowa enaʼö so khöu waʼahono dödö ba faʼohau-hau wangera-ngera

• Fatimbaisi fefu wamobawa lala nibeʼe khöu, ba fili zabölö sökhi

2 AMEʼEGÖ TÖDÖ ZOGUNA KHÖU BA BA NÖSI NOMOU

HADIA NIWAʼÖ ZURA NIʼAMONIʼÖ: ”Tödö zi so tödö, ba isöndra waʼatua-tua, ba tögi dalinga zatua-tua ba iʼalui waʼaboto ba dödö.” (Gamaedola 18:15) Ameʼegö tödö ba alui hadia zoguna ba nösi nomou. Fondro-ndrongo nösi dödöra.—Gamaedola 20:5.

Hewisa na mate niha niʼomasiʼöu? Böi aila ndraʼugö weʼe ba wangoromaʼö faʼafökhö dödöu. Törö tödöu wa no irai ”meʼe Yesu”. (Yohane 11:35; Zangombakha 3:4) Sökhi na öʼila mörö. (Zangombakha 4:6) Enaʼö aoha khömi ba wanaögö abula dödö salua.

SI TOLA ÖFALUA:

• Aseseʼö fatunö nösi dödöu ba zi fahatö khöu, enaʼö lö alawö ira wahuhuosa khöu na so gabula dödöu

• Fahuo-huo ba niha si no irai manaögö abula dödö simane daʼö

3 ANDRÖ WANOLO SINANGEA MOGUNA KHÖU

HADIA NIWAʼÖ ZURA NIʼAMONIʼÖ: ”Si ndruhu zi fahuwu, ba no fadoro iʼomasiʼö nawönia; ba ba wamakao ba tumbu ia si fatalifusö.” (Gamaedola 17:17) Omasi latolo ndraʼugö si fahuwu khöu, hizaʼi lö laʼila hadia zinangea lafalua. Böi alawö ndraʼugö wangombakha khöra hadia zinangea latolo. (Gamaedola 12:25) Ba sofu ba niha si so faʼaboto ba dödö Taromali hadia zanolo yaʼugö ba wamati. Tola labeʼe khöu wanuturu lala moroi ba Zura Niʼamoniʼö.—Yakobo 5:14.

Tola aro wamatiu na fariawö ndraʼugö ba niha saro famati ba si faduhu tödö ba zi no ifabuʼu Lowalangi. Terara göi dödöu na örara dödö niha si göna abula dödö. Tutunö khöra wamatiu ba hadia nifabuʼu Yehowa. Beʼe ginötöu ba wanolo niha sabu tödö, ba böi oniagö ndraʼugö ba niha sangomasiʼö ba sangosinangegö yaʼugö.—Gamaedola 18:1; I Korindro 15:58.

SI TOLA ÖFALUA:

• Fahuhuo ba niha si fahuwu khöu, ba tema wanolo nibeʼera

• Böi alawösi wangumaʼö hadia zinangea mutolo ndraʼugö