Iʼomasiʼö Niha Gulidanö
”Ba somuso tödö ndraʼo ba nono niha.”—GAMAEDOLA 8:31.
1, 2. Hewisa wangoromaʼö Yesu wa iʼomasiʼö sibai niha gulidanö?
ONO siaʼa khö Lowalangi zi tola mokhalaigö faʼatua-tua Yehowa, ba yaʼia göi ”duka khö” Namania. Tola ökhalaigö atö hewisa waʼomuso dödö Yesu khö namania ba ginötö ”ifazökhi mbanua si yawa” ba ”me iʼaroʼö zi no amaedola wayo yawa nasi”. Hizaʼi, moroi ba ngawalö niwöwöi namania, sabölö iʼomasiʼö Yesu yaʼia daʼö niha gulidanö. (Gamaedola 8:22-31) Me so ia ba zorugo, iʼomasiʼö sibai niha gulidanö.
2 Ba gafuriata, iʼoromaʼö waʼomasinia Yesu ba lö faröi ia khö namania hegöi faʼomasinia ba niha gulidanö. Itehegö iröi nahiania ba zorugo ba möi ia ba gulidanö tobali niha. Ifalua daʼö Yesu börö me itehegö waʼaurinia ”si möi mameʼe nosonia höli zato”. (Filifi 2:5-8; Mataiʼo 20:28) Me so Yesu ba gulidanö, ibeʼe waʼabölö khönia Lowalangi ba wamalua tandra sahöli-höli dödö. Fefu nifalua Yesu andre, daʼö zangoromaʼö wa iʼomasiʼö sibai niha gulidanö. Ba zi lö aratö ifalua nasa dandra sahöli-höli dödö ba niha gulidanö.
3. Hadia nifatunöda ba duho daʼa?
3 Me so ia ba gulidanö, iʼombakhaʼö ”duria somuso dödö andrö, turia Mbanua Lowalangi”. (Luka 4:43) Iʼila wa famatörö andre zi tola mo amoniʼö töi namania ba si tola mangeheta fefu gabula dödö niha. Oya dandra sahöli-höli dödö nifalua Yesu ba ginötö möi ia manuriaigö. Tandra sahöli-höli dödö andre zangoromaʼö wa Yesu so so dödönia ba niha gulidanö. Hadia mbörö wa moguna sibai daʼa khöda? Fefu nifalua Yesu andre daʼö zangoromaʼö wa so khöda wanötöna ba zi so föna. Datafaigi öfa ngawalö dandra sahöli-höli dödö nifalua Yesu.
SO KHÖNIA WAʼABÖLÖ BA WAMADÖHÖ
4. Hadia zalua me falukha Yesu ba niha sobou auri?
4 Möi Yesu manuriaigö ba mbanua Galilea. Ba zi sambua banua, falukha ia niha sobou auri, fökhö sanuzu dödöda. (Mareko 1:39, 40) Luka samösa doto ba ginötö daʼö imane ”falawu bou auri”. (Luka 5:12) Ba ginötö iʼila Yesu, imane Sura Niʼamoniʼö ”ifalögu tou ia ba danö, mangandrö ia khönia, imane, ’He tua, na edöna ndraʼugö, ba öʼila öfadöhö wökhögu.’” Faduhu dödö ndra matua andre wa so waʼabölö khö Yesu ba wamadöhö, hizaʼi, omasi ia iʼila hadia edöna ifadöhö ia Yesu. Hadia mbörö? Börö me mofökhö bou auri ia, lö labeʼe dödöra ia ira Farizaiʼo. Hewisa ba wamaigi Yesu? Hewisa wanolonia niha si göna fökhö andrö? Hadia nifaluamö na so zimanö?
5. Hadia mbörö wa ifadöhö Yesu niha sobou auri?
5 Lö muʼao ndra matua andre ”Si raʼiö, si raʼiö!” simane niwaʼö ba Goroisa Moze. (III Moze 13:43-46) Hewaʼae simanö lö mofönu Yesu. Ahakhö sibai dödönia ba omasi ia itolo. Lö taʼila hadia zi so ba wangera-ngera Yesu, hizaʼi, tola taʼila hadia zalua khönia. Ahakhö sibai dödönia ba wamaigi niha sofökhö andre ba ifalua dandra sahöli-höli dödö. Iʼoroʼö dangania Yesu ba niha so fökhö andrö, si lö irai lafalua niha ba götö daʼö. Si fao faʼafaduhu dödö no ihaogö wangumaʼö imane, ”Edöna ndraʼo, ya döhö.” Ba iʼanemaiʼö göi, ”aheta khönia mbou auri andrö”. (Luka 5:13) Ibeʼe Yehowa waʼabölö khö Yesu ba wamalua tandra sahöli-höli dödö ba wangoromaʼö wa iʼomasiʼö niha gulidanö.—Luka 5:17.
6. Hadia zadöni dödöda moroi ba dandra sahöli-höli dödö nifalua Yesu? Hadia geluahania khöda?
6 Börö waʼabölö Lowalangi, tola ifalua Yesu dandra sahöli-höli dödö. Tenga ha sobou auri nifadöhö Yesu, ifadöhö göi wökhö tanö böʼö. Iʼombakhaʼö khöda Sura Niʼamoniʼö wa ahöli-höli sibai dödö niha ”me laʼila muhede zi lö hede andrö ba döhö wökhö zagaböda ba mowaö-waö zogombuyu-mbuyu ba laʼila niha sagauʼa”. (Mataiʼo 15:31) Ba ginötö ifadöhö zi samösa niha, lö iʼandrö wanolo moroi ba niha böʼö. Tola ifadöhö samösa niha sofökhö. Tola ifadöhö niha ba zi lö arara, hewaʼae aröu niha daʼö moroi ba ngainia. (Yohane 4:46-54) Hadia zoroma moroi ba duma-duma sahöli-höli dödö andre? Yesu zi tobali Razo khöda, so khönia waʼabölö ba edöna iheta ngawalö wökhö sagötö faʼara. Me no aboto ba dödöda nifalua Yesu ba niha, faduhu dödöda wa ba gulidanö si bohou ”ihakhösi tödö si lö töi ba zi numana”. (Zinunö 72:13) Ba ginötö daʼö, ifadöhö Yesu ngawalö wökhö börö me omasi ia ifalua daʼö.
’FAOSO, FAZAWA GASOMÖ BA OWAÖ-WAÖ’
7, 8. Tutunö hadia zalua fatua lö falukha ira Yesu zombuyu-mbuyu töla ba Mbetesa?
7 Me no hauga ŵawa aefa daʼö, mofanö Yesu moroi ba Galilea numalö ba Yudea ba lö iböhöli wanuriaigö Mbanua Lowalangi. Tatu manö ato niha somasi ba sadöni dödö ba wamahaʼö nifalua Yesu börö me so khönia waʼomasi. Omasi Yesu irara dödö zabu tödö ba ibeʼe wanötöna ba niha si numana ba niha si tefakao.—Yesaya 61:1, 2; Luka 4:18-21.
8 Me ba mbaŵa Nisa, möi Yesu ba Yeruzalema ba wamalua fasa. Ato niha si möi ba mbanua andrö börö wamalua fasa. Tanö ba gaekhula gosali so sambua mbaʼa sebua Betesa döinia, ba falukha khönia samösa ndra matua so mbuyu-mbuyu töla.
9, 10. (a) Hadia mbörö wa ato niha si möi ba mbaʼa Betesa? (b) Hadia nifalua Yesu ba daʼö, ba hadia zi tobali famahaʼö khöda? (Faigi gambara ba ngaʼörö 13.)
9 Si toʼölönia ato niha so fökhö si möi ba Betesa. Hadia mbörö? Lamane tödöra na möi ira bakha ba mbaʼa ba ginötö tekiba idanö andrö tola tefadöhö ira. Ato niha si lö fanötöna ba aombö dödö zi so ba daʼö, omasi ira enaʼö döhö. Khalaigö atö hewisa waʼakaliru meluo daʼö! Hana wa so Yesu ba daʼö, yaʼia niha soʼahonoa ba lö moguna lafadöhö ia? Börö me iʼomasiʼö ba ahakhö dödönia niha. Falukha ia ba daʼö samösa ndra matua si no göna fökhö 38 fakhe waʼara!—Baso Yohane 5:5-9.
10 Manofu Yesu khö ndra matua sofökhö andrö hadia omasi ia tefadöhö. Khalaigö atö hewisa waʼabu dödö ndra matua andrö me imane khö Yesu omasi ia döhö ba tebai, börö me lö hadöi niha somasi manolo yaʼia weʼamöi bakha ba mbaʼa. Iwaʼö khönia Yesu wamalua si tebai moloʼö niha. Iʼandrö khönia Yesu enaʼö ifazawa gasonia ba ilau mofanö. Ba tola ifalua! Tandra sahöli-höli dödö andre zangoromaʼö khöda hadia nifalua Yesu dania sanandrösa ba gulidanö si bohou. Aefa daʼö taʼila hewisa waʼebua waʼomasi Yesu ba niha. Iʼalui niha somasi latolo. Duma-duma nibeʼe Yesu andre zamarou yaʼita enaʼö tatolo niha si göna abula dödö ba si lö fanötöna ba gulidanö andre ba wamaʼema khöra duria somuso dödö.
”HANIHA ZOMBABAYA BARUGU?”
11. Hewisa waö-waö ba Mareko 5:25-34 wangoromaʼö Yesu wa so waʼomasinia ba niha so fökhö?
11 Baso Mareko 5:25-34. Samösa ndra alawe si göna fökhö sendro talu no 12 fakhe waʼara. Börö wökhönia andrö, tebai ifalua fefu halöwönia hegöi famosumangenia Lowalangi. Oya ahori gefenia ba weʼamöi khö doto ba wangalui dalu-dalu, lö faʼalö wökhönia ba itugu abölö-bölö. Samuza inötö, so niʼera-erania tanö böʼö. Daʼö mbörö wa, ilau mowaö-waö ba gotalua niha sato ba möi ia ibabaya mbaru Yesu. (III Moze 15:19, 25) Ba iʼanemaiʼö iʼila Yesu wa no aheta khönia waʼabölö andrö, ba manofu ia haniha zo bambaya barunia. Ba ”ataʼu ndra alawe no mege ba manizi-nizi” ba ”möi ituhi danö fönania ba iʼombakhaʼö hewisa zi ndruhunia”. Iʼila Yesu wa Yehowa zamadöhö ira alawe andrö, ba ihaogö wangumaʼö imane ”He onogu, no iʼorifi ndraʼugö famatimö andrö; fuliʼö, yaʼohahau dödöu ba yadöhö wamakao andrö khöu.”
12. (a) Moroi ba zi no tatutunö andre, moloʼö ira talifusö hewisa Yesu andrö? (b) Hadia duma-duma nibeʼe Yesu khöda?
12 So khöda waʼomuso dödö me no taʼila wa Yesu iʼomasiʼö niha gulidanö, mendrua manö ba niha so fökhö. Aröu faböʼö ia moroi khö Gafökha, ibeʼe ba wangera-ngerada wa lö moguna ita föna Lowalangi ba lö hadöi iʼomasiʼö ita. Tandra sahöli-höli dödö nifalua Yesu daʼö zangoromaʼö wa si ndruhu-ndruhu so ba dödönia ita. Taʼandrö sibai saohagölö me tola taʼokhögö Razo ba Ere sebua si so faʼomasi! (Heberaiʼo 4:15) Lö taʼila tatöfaigö ba dödöda hewisa waʼafökhö nirasoi niha tanö böʼö, mendrua manö na lö nitöröda. Tobali, törö tödöu Yesu. Hewaʼae lö irai mofökhö ia, hizaʼi iʼila irasoi hadia ia zalua ba niha so fökhö. Moguna taʼoʼö duma-duma nibeʼe Yesu andrö.—I Fetero 3:8.
”MEGEʼEGE YESU”
13. Hadia zaboto ba dödöda khö Yesu me isusugi Lazaro?
13 Irasoi Yesu gabula dödö niha böʼö. Duma-dumania, me inötö mate zi fahuwu khönia sotöi Lazaro, ”megeʼege” Yesu ba ”ifatalikhö” ia, me iʼila gabula dödö salua ba nösi nomo Lazaro hegöi si fahuwu khönia. (Baso Yohane 11:33-36.) Hewaʼae so khönia waʼabölö ba wanusugi Lazaro, ilau meʼe Yesu. Lö aila ia ba wangoromaʼö hewisa nösi dödönia. Iʼomasiʼö sibai Lazaro hegöi nösi nomonia irege iʼogunaʼö waʼabölö Lowalangi ba wanusugi Lazaro!—Yohane 11:43, 44.
14, 15. (a) Hadia zangoromaʼö khöda wa omasi Yehowa iheta gabula dödö niha gulidanö? (b) Hadia gangetula si tola tahalö moroi ba ngawua wehede ”si so ba lewatö”?
14 Sura Niʼamoniʼö zangombakhaʼö khöda wa Yesu andrö fakhili-khili ia khö Yehowa. (Heberaiʼo 1:3) Moroi ba dandra sahöli-höli dödö nifalua Yesu, daʼö zangoromaʼö wa omasi Yehowa iheta ita moroi ba ngawalö wökhö, famakao ba faʼamate. Ba zi lö aratö, Yehowa hegöi Yesu lasusugi niha si no mate. Imane Yesu ”irugi baŵa dania, ba larongo linia dozi si so ba lewatö” ba tesusugi ira.—Yohane 5:28, 29.
15 Ngawua wehede ”si so ba lewatö” niʼogunaʼö Yesu daʼö zangoromaʼö wa lö olifu Lowalangi niha si no mate. Lowalangi Sebua Faʼabölö, Samazökhi banua awö danö, lö olifu ia waö-waö niha si no mate andrö hegöi amuatara. (Yesaya 40:26) Tenga ha lö olifu Yehowa ira, omasi ia göi itörö tödönia ira. So wanusugi si no tesura ba Zura Niʼamoniʼö, daʼö zi tobali duma-duma nifalua Lowalangi ba gulidanö si bohou dania.
HADIA ZI TOBALI FAMAHAʼÖ KHÖDA MOROI BA DANDRA SAHÖLI-HÖLI DÖDÖ NIFALUA YESU
16. Hadia zi tola laʼokhögö ono mbanua Yehowa ba zi so föna?
16 Na lö faröi ita, tola manö alua khöda dandra sahöli-höli dödö si lö irai alua, yaʼia daʼö teʼorifi ita moroi ba wamakao sabölö-bölö! Lö aratö alua Hamagedo, oya sibai dandra sahöli-höli dödö si tola taʼila. Ba ginötö daʼö, moʼahonoa fefu niha ba lö hadöi fökhö. (Yesaya 33:24; 35:5, 6; Famaʼeleʼö 21:4) Khalaigö atö hadia zalua ba ginötö daʼö, latiboʼö zörömi höröra niha, lö lafake ziʼo, kurusi roda, ba fakake niʼogunaʼö ba niha safiso. Aboto ba dödö Yehowa wa fefu niha saefa ba ginötö Hamagedo enaʼö abölö ira ba lö mofökhö, börö meʼoya halöwö nifaluara. Yaʼira dania zangehaogö gulidanö andre tobali faradaiso.—Zinunö 115:16.
17, 18. (a) Hana wa ifalua Yesu dandra sahöli-höli dödö? (b) Hana wa moguna sibai öfalua hadia niʼandrö Lowalangi enaʼö ökhamö gulidanö si bohou?
17 Itugu aro wamati nono mbanua Lowalangi ba ginötö iadaʼa, börö me no labaso dandra sahöli-höli dödö nifalua Yesu ba wamadöhö fökhö. (Famaʼeleʼö 7:9) Börö dandra sahöli-höli dödö andrö, faduhu dödöda wa ba zi so föna lö hadöi saʼae fökhö. Badaʼa aboto ba dödöda hewisa waʼebua waʼomasi Nono Lowalangi ba niha gulidanö. (Yohane 10:11; 15:12, 13) Faʼahakhö dödö Yesu daʼö zangoromaʼö khöda waʼomasi Yehowa ba nono mbanuania.—Yohane 5:19.
18 Oya ngawalö wökhö, fangabu dödö, ba faʼamate ba gulidanö iadaʼa. (Roma 8:22) Andrö wa moguna khöda gulidanö si bohou moroi khö Lowalangi. Ba daʼö, fefu niha lasöndra wamoʼahonoa simane nifabuʼu Lowalangi. Imane Maleakhi 4:2 ”ba manaoka ami simane ono zawi nibula”, omuso sibai dödöra börö me no teʼefaʼö ira moroi ba wa lö moʼahonoa. Taʼandrö sibai saohagölö khö Yehowa, mamati ita hadia zi no ifabuʼu, ba tafalua hadia ia niwaʼönia enaʼö tola takhamö gulidanö si bohou. Omuso sibai dödöda börö me no taʼila dandra sahöli-höli dödö nifalua Yesu si tobali khili-khili hadia nirasoi niha gulidanö sagötö faʼara barö wamatörö Yesu Keriso!