Iopu

9 TI tali age ai a Iopu, kua pehe age,

2 Kua iloa e au ko e moli ni, kua pihia, ha kua maeke fefe ke mahani tututonu e tagata ki mua he Atua?

3 Kaeke ke finagalo a ia ke taufetoko mo ia, nakai maeke kia ia ke tali atu kia ia ha kupu taha ke he tau kupu afe.

4 Kua iloilo hana finagalo, kua malolo foki hana mana. Ko hai kua fakamao hana loto ke totoko atu kia ia ka e monuina a ia?

5 Ko ia ne lagaaki e tau mouga ka e nakai iloa e lautolu, kua fulufuluhi e ia a lautolu ke he hana ita.

6 Ko ia ne lulululu kehe e lalolagi mai he mena ha i ai a ia, ti vivivivi ai hana tau pou.

7 Ne vagahau atu a ia ke he la, ti nakai hake a ia, mo e fakamau fakamailoga ai e ia e tau fetu.

8 Ne fofola tokotaha e ia e lagi, mo e fano ai a ia ki luga he tau peau he tahi.

9 Ne eke e ia a Asa, mo Kesila, mo Kima, katoa mo e tau ana ha ha i ai ke he fahi toga.

10 Ne eke e ia e tau mena lalahi nakai maeke ke kumikumi ki ai, mo e tau mana nakai ni maeke ke totou.

11 Kitiala, ne haele age a ia ki mua haku ka e nakai kitia e au a ia, ne haele atu foki a ia ka e nakai kitia e au a ia.

12 Kitiala, kua tapaki ai e ia, ko hai ke liuaki age a ia? po ko hai ke pehe age kia ia, Ko e heigoa kia e mena kua eke e koe?

13 Nakai liuaki age he Atua hana ita; to hufeilo kia ia e tau tagata ne lagomatai kia lautolu ne mahani fakatokoluga.

14 Ka e maeke fefe kia au nai ke tali atu kia ia, mo e fifili ai e au e tau kupu ke vagahau atu kia ia?

15 Ane mai kua mahani tututonu au po kua nakai tali atu au kia ia, ka e olelalo atu au kia ia ke fakafili au.

16 Ane ui age e au, ti tali mai a ia kia au, po kua nakai manatu e au kua fanogonogo mai e ia ke he haku a leo.

17 Ha kua tukimalipilipi e ia au ke he afā, mo e fakaloga noa e ia haku a tau kafokia.

18 Nakai toka e ia au, ato fakamanava ai au, ka e fakamakona ai e ia au ke he tau mena kona.

19 Kaeke ke vagahau au ke he malolo, kitiala, kua malolo ni a ia; kaeke foki he vagahau au ke he fakafiliaga, kua pehe mai a ia, Ko hai kia ke kotofa ai e aho maaku?

20 Pete he tututonu au, ka to fakahala au ha haku gutu ni; pete he hakohako e mahani haku, ka to talahaua ai au kua mahani keukeu.

21 Pete he mahani hakohako au, ka e nakai iloa au he haku agaga, kua vihiatia e au haku a moui.

22 Ko e mena taha ia, ko e mena ia kua pehe atu au, Kua fakaoti ai e ia a ia ne mahani hakohako katoa mo ia ne mahani kelea.

23 Kaeke kua matepopo fakalutukia e tagata he akau ne fahi aki, to kata a ia ke he matematekelea hana kua nakai hala.

24 Kua tuku age e lalolagi ke he lima hana ne mahani kelea; kua ufiufi ai e ia e tau mata he tau fakafili ha ha i ai; kaeke kua nakai ko ia? ti ko hai kia ia?

25 Ne mua he mafiti e tau aho haku ke he mafiti he tagata ne poi; kua mole atu ia mo e nakai iloa ai ha mena mitaki.

26 Kua mole atu ke tuga ne tau foulua holo lahi; ke tuga ne aeto foki ne lele vave lahi ke he hana tau mena kai.

27 Kaeke ke pehe atu au, to nimo ia au haku a tagi, to nakai tuai mata momoko foki au, ka e mata fiafia au.

28 Ti matakutaku au ha ko e haku a tau mamahi oti, kua iloa e au nakai talahaua tututonu e koe au.

29 Kua mahani kelea au, ti kua gahua teao ai au he ha?

30 Kaeke ke koukou ai au ke he magavai kiona, mo e fakamea e au haku tau lima ke he moli;

31 Ka to lomoki e koe au ke he luo, ti vihiatia ni au he haku tau tapulu.

32 Ha ko e mena nakai ko e tagata a ia tuga au nai, ke tali age au kia ia, mo e o fakalataha ai ke he fakafiliaga.

33 Nakai ha ha i ai foki ha fakafili ke he vaha loto ha maua, kia fakalago ai hana tau lima ki luga ia maua.

34 Kia uta kehe e ia ia au hana akau, ti aua neke fakamatakutaku mai a ia kia au ke he hana tau mena ke matakutaku ai.

35 Ti vagahau atu ai au kia ia mo e nakai matakutaku au kia ia; ha ko au, nakai pihia au kia au ni.