Iopu

23 TI tali age ai a Iopu, kua pehe age,

2 Ko e aho nai ni kua talahaua ai haku a tagi ko e fakafualoto; kua mamafa e lima kua hoko mai kia au kua homo atu ia ke he haku a tau oi.

3 Kua fia iloa e au po ke mena fe ke moua ai e au a ia; kia fina atu ni au ke he hana haeleaga!

4 Ti taute e au ki mua hana haku a taufetoko, mo e fakaloga e au haku a tau kupu ke fakatonu atu ai.

5 Ti iloa e au hana tau kupu ne tali mai a ia kia au; ti logona foki e au po ke heigoa hana ke vagahau mai ai kia au.

6 To taufetoko mai kia a ia kia au mo e hana malolo lahi? Nakai; ka e manatu mai e ia kia au.

7 Ti fakatonu mena ai a ia ne mahani tututonu mo ia; ti hao tukulagi ai au mai ia ia kua fakafili au.

8 Kitiala, kua fina atu au ki mua, ka e nakai ha i ai a ia, mo tua foki, ka e nakai kitia e au a ia.

9 Kua fina atu au ke he faahi hema ne gahua ai a ia, ka e nakai moua e au a ia; kua ufiufi ai a ia ke he faahi matau, kua nakai kitia foki e au a ia.

10 Ka kua iloa e ia e puhala kua fano ai au; ka kamatamata ai au, ti hao atu au tuga ne auro.

11 Ne tumau haku tau hui ke he hana tau tuagavē; ne fano mau au ke hana puhala, mo e nakai afe au.

12 Nakai fano kehe foki au he poaki he hana tau laugutu; kua mua haku a omaoma ke he tau kupu he hana fofoga ke he haku a omaoma kua kotofa ai e au ke eke.

13 Ka ko ia ko e taha ni hana finagalo, Po ko hai kia ke fakamafoki kehe ai a ia? Kua eke ni e ia e tau mena kua finagalo a ia ki ai.

14 Ha kua fakahoko mai e ia e tau mena ne kotofa māku. Ko e loga foki e tau mena pehenā ha ha ia ia.

15 Ko e mena ia kua fakaatukehe ai au ki mua hana; ka manamanatu au ti matakutaku ai au kia ia.

16 Ha kua fakalolelole ha Atua haku loto; kua fakaatukehe foki au ha ko Ia hana e malolo oti kana;

17 He nakai fakaoti ai au ka e nakaila hoko mai e pouli; mo e nakai ufiufi ai e ia e pouli kikio mai mua haku.