Ko e Lalolagi kua Mua he Mitaki​—Koenaia kia ko e Miti?

KAEKE ko e tutaki faka-Maseta a koe tuga ne kua fakamatala he perofeta Irana ko Zoroaster, kua fakatalitali na koe ke he aho ka liu ai e lalolagi ke he hana fulufuluola tuga he magaaho fakamua. Kaeke kua nofo a koe i Heleni i tuai, kua liga miti na koe ke hoko atu ke he Atu Motu Tomafola po ke ke kitia e liuaki maiaga he Vaha Mahuiga ne fakamaama he tagata tohia tala fakaku ko Hesiod he senetenari ke valu aki he F.V.N. Kua liga kumi agaia foki e Initia Guaraní i Amerika Toga ma e Motu Nakai Mahani Kelea. Ha kua momoui he vaha nai ha tautolu, kua liga amaamanaki a koe ko e to laukauka mai e lalolagi, kua fakaaue atu ni ke he falu manamanatu fakapolitika po ke ha ko e fua he mataala lahi e vaha fou nei ke he tau mena momoui he kelekele.

Vaha Mahuiga, Atu Motu Tomafola, Motu Nakai Mahani Kelea​—ne ha ha e tau mena nei he tau higoa loga ne fakaaoga ke fakamaama aki e manako taha ia, e amaamanakiaga ma e lalolagi ne mua atu he mitaki.

Kua moli ni, nakai ko e matakavi mitaki e lalolagi nei, ko e ha tautolu a lalolagi. Kua tupu ki mua e mahani holifono vale, tau felakutaki kelipopo matakainaga kua nakai maeke ke fai fakataiaga ki ai, kelipopoaga fakamatakau, nakai fia iloa e matematekelea he falu, mativa mo e hoge lahi, nakai fai gahua mo e nakai fia fefakalatahaaki, mo e tau mena vihi he tau mena momoui he kelekele, tau gagao ne nakai fai fakamauluaga ne fakamatematekelea ai e tau miliona he tau tagata​—ti kua tuga ko e nakai fai fakaotiaga e fakamauaga he tau malaia he magaaho nei. He manamanatu ke he tau felakutaki ne fa e latau he magaaho nei, ne pehe e tagata hokotaki Italia: “Ko e huhu ne fa mahani tuai ke hake mai he loto, kua eke ni kia ko e mahani vale e aga malolo lahi he vaha ha tautolu.” He manamanatu ke he tuaga ia, fefe hau a manatu kua aoga moli kia ke foli ke kehe mai, ke he taha mena kua mua atu he mitaki? Po kua fia loto Utopia ni e tau foliaga pihia, ko e miti kua nakai to fakamoli? Kua nonofo ka tautolu he mena kua mahomo atu mai he tau lalolagi oti ia?

Nakai ko e tau manamanatu fakaatukehe fou a nei. Kua loga e tau senetenari he miti e tau tagata ke he lalolagi kua ha ha i ai e felauaki, fakafiliaga tonu, muhukoloa, mo e fakaalofa kua pule i ai. Mai he magahala he tau vaha, kua ha ha ai e numela he tau tagata fakataitai ne fakalaulahi ha lautolu a tau manamanatu ke he tau Fahi Motu kua lata mitaki, tau lalolagi kua mua atu he mitaki. Ka e kua momoko lahi, he nakai maeke a lautolu ke fakamaama ke taute fefe a lautolu ke gahuahua mitaki.

Kua maeke nakai he fakamauaga he tau miti nei mai he tau senetenari tuai, tau Utopia, mo e tau foliaga he tagata ma e kaufakalatahaaga kua mua atu he mitaki, ke fakaako mai ki a tautolu e taha mena?

[Fakatino he lau 3]

Ko e mena nei kia kua mahomo atu mai he tau lalolagi oti?