Ko e Ha ke Fiafia ai ke he Lotu?

KE HE tau motu oti he lalolagi, kua ha ha i ai e fiafia ke he lotu. Ke he taha fahi, ha ha i ai e falu ne talahau fakatonu ko e nakai fai fiafia a lautolu ke he lotu. Ka e pihia tumau kia e tau logonaaga ha lautolu?

Ko e tauteaga pauaki he tagata ko e mena ke nakai fakamakona tumau e tagata mo e tau mena fakatino ni hokoia. Manako e tagata ke he tau mena fakaagaga. Ko e taha aho ke he taha aho kua ati takai ke he mouaaga he tau mena kua lata ma e fahitino, fakalataha mo e falu magaaho ke fakafiafia ai, nakai fakamakona katoa e tau manako loto he tagata. Nakai tuga e tau manu, manako e tau tagata ke iloa mena, ‘Ko e heigoa e fakatokaaga he moui?’ ‘Ko e moui ku e, ne lafi ki ai e tau mena fulufuluola ka e lafi ki ai foki e tau mena fakalialia, ko e haia ni ka e tau mena oti?’ Kua nakai kia kua huhu hifo e koe e tau huhu pehe nei?

Ka e, loga e miliona tagata ne moui ai he vaha nei ne ­tutupu hake ke he tau tutuaga ne nakai fakamalolo e taha fiafia kakano lahi ke he lotu. Ko e fakaohoohoaga ia kua liga mai he tau mamatua, mai he tau faiaoga, mai he tau kapitiga, po ke mai foki he fakatufono.

Ko Skalabrino, ko e tama tane fuata mai i Alapania, ne fakamaama mai ko e i lalo he pule he Komunisi kua fakaako e tau tagata ko e nakai fai Atua. Ke lafi ki ai, kua hagahagakelea ke tutala a lautolu ke he tau mena lotu; ka taute pihia to hoko atu ke tuku he fale puipui. Ka e, he 1991, he magaaho ne ha ha i Suisalani ha ko e tagata hola he tau matematekelea, kua tuku age ki a ia e magaaho ke fakaako e Tohi Tapu. Ne talia e ia. Ko e ha?

E, i Alapania ne logona e ia ko e fai tohi pihia tuga e Tohi Tapu, ka e nakai iloa moli e ia ha mena hagaao ki ai. Ti, ke he magaaho fakamua kua liga nakai ko e matapatu ke maama e Tohi Tapu ne omoi aki a ia. Ke he magahala ne talaage ki a ia to fakaako a ia hagaao ke he finagalo he Atua ma e tau tagata mo e ke he lalolagi, ne kitia foki e ia e mena nei mo taha puhala ke fakaholo ki mua e vagahau hana ke he matakavi ia. E, ne vave lahi a ia ke kitia ko e mena ne fakaako a ia ki ai kua fakamakona e manako malolo hana he loto ke he tau mena fakaagaaga ke he hana vala. Kua mafanatia e loto hana ke he finagalo he Atua ma e lalolagi fou ka ha ha i ai e mafola, ko e lalolagi ka momoui tukulagi ai e tau tagata mo e olioli ke he tau mena loga ne lata mo e moui. Kua mua atu e fiafia hana he magaaho ne ako e ia ko ia mo e hana a magafaoa to fai vala he lalolagi fou nei. Nakai maeke ke tokahifo e kupu mitaki ki a ia ni, ne telefoni e ia e magafaoa hana i Alapania ke talaage ki a lautolu.

Ko Aleksei, ne nofo i Rusia, kua ofo foki ha ko e iloa tonu he Tohi Tapu kua fai lauiaga ke he moui he tagata. Fakaatukehe ha ko e tau mena vihi mo e nakai maeke ke moua e fakamaamaaga ke fakamakona aki e finagalo he moui, ne fakatoka a ia ke taute e taupega. Ka e, fakamua, ne finatu a ia ki Finilani ke aahi he kapitiga. He puhala atu he tuleni, ne vagahau a ia hagaao ke he tau mena vihi hana ke he falu he tau tagata pasese. Ha ha ia lautolu ko e taha he Tau Fakamoli a Iehova, ne ole ki a ia ke fakaako e Tohi Tapu ha kua foaki e tau tali ma e tau mena vihi pihia. Kua fakauaua a Aleksei. He liu a ia he fenoga, ne moua e ia e mena taha agaia. Ko e magaaho nei ko e taha Fakamoli foki ne vagahau mo e talaage ki a ia na fa mahani foki a ia ke moua e tau mena vihi pihia ka e kua lagomatai he Tohi Tapu a ia ke kautu mai he tau mena ia. Ne fakamalolo foki e ia a Aleksei ke fakaako e Tohi Tapu. He hoko a Aleksei ki kaina, ne tagi e telefoni. Ko e taha kapitiga a ia, ne fa e fakaako mo e Tau Fakamoli mo e kua lahi e fiafia. Ko Aleksei ne kamata a ia ke mailoga ko e liga maeke moli he Tohi Tapu ke foaki e mena ne manako a ia, ka e iloa e ia ka nakai fai lagomatai to nakai maeke a ia ke moua e maamaaga ki ai. Kua talia e ia ke fakaako tumau e Tohi Tapu mo e Tau Fakamoli a Iehova, mo e kamata a ia ke finatu ke he ha lautolu a tau fakafeleveiaaga. Nakai leva ti maama e ia ko e ha a lautolu ne fakatau o e tau momoui ha lautolu mo e tau mena ne fakaako he Tohi Tapu ne fiafia lahi ai, pete ni he fehagai foki a lautolu mo e tau mena vihi ne fa mahani ke he tau tagata.

Mo e maamaaga ki loto he tauteaga he tagata, kua talahau e Iesu Keriso: “Nakai maeke e tagata ke moui ni he falaoa.” (Matthew 4:4, The New English Bible) Kua pehe foki a ia: “Fiafia a lautolu ne manamanatu ke he tau mena fakaagaga kua lata ma lautolu.” (Mataio 5:3, NW) Kua moua e lautolu e fiafia ha kua fakamakutu a lautolu ke mataala ke he manako ha lautolu, taute e tau tuaga kua lata ke fakamakona aki, mo e moua e monuina mai he Atua. Ka e pete ni he pihia, ko e manako fakaagaga ha tautolu kua nakai fakamakona ha kua fakalataha atu ni ke he tapu po ke o atu ke he falu gahuaaga fakalotu. Ko e lotu ne laulahi e taute mena fakalotu tumau ko e mena fiafia a ia ke he falu, ka e foaki nakai he mena ia e tali moli ke he tau mena vihi he moui? Pete ni he fakapuloa he lotu e taha matapatu poakiaga ne kua mauokafua, ka e ka kaumahala ke foaki e maamaaga ke he finagalo he moui, to fakamakona nakai he mena ia e manako fakaagaga hau? Ko e manatu kua mua atu foki, ko e fakagahuahua e lotu pihia to takitaki atu nakai ke moua e fakafetuiaga mitaki mo e Atua? Ka nakai ko e mena ia, to nakai moua e makona moli.

Hagaao ke he mena nai tokologa e tau tagata ne fa e kumikumi ke he falu mena ne nakai la moua ia e lautolu.

[Fakatino he lau 3]

To fakamakona moli nakai e tau manako fakaagaga hau he fakalataha atu ke he tapu?

[Fakatino he lau 4]

Tokologa ne moua he magaaho ne maama e lautolu e Tohi Tapu, kua fai kakano fou e moui