Taofi Hifo e Matematekelea he Nakai Fetataiaki

Nakai leva to ta mai he Tufuga e fetataiaki ne kua leva e manako he tau tagata. Ato hoko mai e magaaho ia, lata ia tautolu ke taute e tau lakaaga ke taofi hifo e matematekelea he nakai fetataiaki ne hufia ai a tautolu mo e tau magafaoa ha tautolu. Tuga ne talahau e Nelson Mandela, ko e pelesiteni tuai i Aferika Toga, “ko e mena moua e tautolu mai he mena ne ha ha ia tautolu, nakai ko e mena ne mai ki a tautolu, ne vevehe kehe e taha tagata mai he taha.”

NE FAKAMOLI he fakamauaga tuai e tau kupu hana. Tokologa e tau tagata tane mo e tau fifine ne nonofogati mai he fanauaga, ne fakaaoga e tau mena ne ha ha ia lautolu, kua moua e kautuaga ne vevehe kehe a lautolu mai he atuhau ha lautolu ne talahau ke lotomatala lahi. Ke he taha fahi, ko lautolu takitokotaha ne muhu koloa mai he fanauaga kua fakahanoa e tau mena ha lautolu mo e kaumahala ke fakaaoga fakamitaki ai.

Fakaaoga Fakamitaki e Tau Mena Hau!

Kua mataala lahi e Tau Fakamoli a Iehova ke lagomatai e tau tagata ke moua e iloilo he finagalo he Atua he puhala he fakaakoaga he Tohi Tapu. Ti mailoga e lautolu, ke aoga katoatoa mai he fakailoaaga he Tohi Tapu, kua lata he tau tagata ke fai fakaakoaga. Ha ko e kakano ia, hane fakaako he Tau Fakamoli a Iehova e tau hogofulu he tau afe he tau tagata ke totou mo e tohitohi, fakalataha mo e 23,000 he tau tagata (mai he lotouho tau he 1990) he taha motu ni i Aferika Lalo. Hagaao ke he gahua mitaki ne foaki he Tau Fakamoli a Iehova, ne tohi he San Francisco Examiner: “Lata ke talahaua e mutolu a lautolu ko e tau tagata mitaki ke mumuitua ki ai. Kua totogi fakamitaki e tau tukuhau ha lautolu, leveki e tau tagata gagao, taufetului ke he nakai fai fakaakoaga.”

Ke lafi ki ai, ha ko e tau puhala fakamatala ke he toloaga, ne fakaako he Tau Fakamoli a Iehova e tau teau he tau afe he tau tagata ke fakamatala, maeke ai ke fakamatala fakamitaki ke he toloaga. Ia lautolu he tau afe nei ko e falu ne halavihu lahi e tau vagahau. Onoono la ke he tagata mai i Aferika Toga ne tohia: “Ko e koekoe haku kua kelea lahi ati fuafua kelea lahi au, mo e falanaki ke he falu ke vagahau ma haku. . . . He magaaho ne hu au he Aoga Fekafekau Fakateokarasi mo e totou e Tohi Tapu ke he tama toloaga tote . . . , ne koekoe lahi au ati nakai oti e kotofaaga haku he magaaho. He mole e feleveiaaga ne tomatoma fakamitaki mai e [matakainaga fakatonu] ki a au. Ne lagomatai mai a ia ke totou fakalahi au ki a au ni. Ne taute e au e mena nei, mai he taha aho ke he taha aho, ke totou fakalahi e Tohi Tapu mo e mekasini Kolo Toko haku.” Kua holo ki mua e tagata nei ti hane lauga he mogonei ke he toloaga ne numera ke he tau teau mo e ke he tau afe foki.

Olioli e Fetataiaki mo e Tau Matakainaga

Hagaao ke he fakaakoaga, levekiaga he tino, tuaga fakatupe mo e feoakiaga, ko e tau tutuaga he Tau Fakamoli a Iehova kua kehe mahaki. Ko e tau fekehekeheaki nei kua fakaata noa e tau tutuaga he lalolagi nakai mitaki katoatoa ne nonofo ai a tautolu. Ka e he kehe mai he falu matakau fakalotu, ko e fili ke he taha vahega tagata, feoakiaga, mo e tuaga fakatupe kua teitei uta kehe mai ia lautolu.

Kua taute e lautolu e mena nei he lali ke fakagahuahua e tau mena ne ako e lautolu mai he Tohi Tapu. Kua kuku mauokafua e lautolu e matapatu fakaakoaga he Tohi Tapu tuga anei: “Ko e mena nakai kitekite a Iehova tuga ne kitekite e tagata, ha kua kitekite e tagata ke he tino, ka e kitekite a Iehova ke he loto.” (1 Samuela 16:7) “Nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35) “Aua neke taui atu e kelea ke he kelea he taha; kia tauteute e tau mena gali ki mua he tau tagata oti kana. Kaeke kua maeke ia mutolu, kia nonofo fakamitaki mo e tau tagata oti kana.”​—Roma 12:17, 18; kikite foki 1 Timoteo 6:17-19; Iakopo 2:5, 9.

He pipiki lahi atu ke he tau matapatu fakaakoaga nei he Tohi Tapu ne hataki mai ke kaufakalataha, ne nakai fakaata he Tau Fakamoli a Iehova a lautolu ke fakagahuahua e nakai fetataiaki he fakakehe atu ke he fili vahega tagata, feoakiaga, mo e tuaga tupe. Ke fakatai ki ai, kua nakai fakaaoga e tau fua nei he fifili ko hai ka foaki ki ai e kotofaaga ke fekafekau i loto he fakapotopotoaga Kerisiano. Ko e tau matagahua kehekehe, tuga e fakaako mo e leveki, kua tokofa ni hagaao ke he lotomatala fakaagaga.​—1 Timoteo 3:1-13; Tito 1:5-9.

Ki a lautolu ne to kelea he nakai fetataiaki he lalolagi fili nei, kua hauhau ha ia ke fai tagata ke fehagai ki a lautolu ko e tau matakainaga ne fetataiaki e tau tutuaga ki mua he Tufuga ha lautolu! Fakamoli e Martina e mena nei. He tiaki he matua tane hana e magafaoa, ne feaki hake a ia he kaina mativa, taha ni e matua. Ne fa ekefakakelea a ia, tote e loto malolo hana, mo e uka ia ia ke kapitiga ke he falu. Ati hake ai e ia e aga nakai mahalohalo. Ka kua hiki ai he mogo ne fakaako Tohi Tapu a ia, ti eke mo taha he Tau Fakamoli a Iehova. Ne talahau e ia: “Lata agaia au ke tau ke he tau manamanatuaga kelea, ka kua laukauka tuai au he mogonei he fehagai mo e lekua ia. Kua tolomaki hake e lilifu fakatagata haku, ti kua tala au mo e mauokafua. Ne foaki mai he kupu moli ki a au e kakano he fai matagahua. Iloa e au, fakaalofa mai a Iehova ki a au ti kua mitaki ha e moui he mogonei.”

Ko e matakau Kerisiano he lalolagi katoa, ko e Tau Fakamoli a Iehova ne ha ha ai he tau motu ne molea e 230, kua olioli e fetataiaki ne kua kehe moli mai he lalolagi he vaha nei. Maeke nakai he ha fakatokatokaaga fakalotu foki ke talahau pihia mo e fakakite e moli he tau gahua?

E, kua moli e onoonoaga he Tau Fakamoli a Iehova. Ne talahau fakamoli e lautolu ha kua eke mai he lalolagi nakai katoatoa nei, kua nakai fakai foki ia lautolu ke uta kehe e nakai fetataiaki he tau tagata, ke tuga ne lali e falu ke taute he tau senetenari loga​—mo e kaumahala. Pete ni ia, kua fiafia a lautolu ha ko e tutuaga ha lautolu, kua lahi e mena ne taute e lautolu ke taofi hifo e matematekelea nei. Mo e tua malolo ke he maveheaga he Atua, kua fakamahino atu a lautolu ke he lalolagi fou he tututonu ka eke tukulagi e nakai fetataiaki mo mena fakamua.

E, nakai leva to foaki ke he tau tagata omaoma oti e “lilifu mo e tonuhia” ne finagalo he Tufuga ma lautolu ke olioli he vaha fakamua. Ko e manatu fulufuluola ha ia! Ka e mogonei to tupu moli ai!

[Fakatino he lau 7]

Ne taufetului e Tau Fakamoli a Iehova mo e nakai fai fakaakoaga he fakaako e tau hogofulu he tau afe he tau tagata ke totou mo e tohitohi

[Fakatino he lau 8]

Lagomatai he kupu moli he Tohi Tapu ke uta kehe e fili vahega tagata, feoakiaga, mo e tuaga fakatupe