Nakai Fetataiaki​—Pauaki Kia he Atua?

Taha ni e kupu he tali ko e nakai. O mai a a tautolu ke kitia ko e ha.

NE PAUAKI he Atua e tau tagata oti kana ke fetataiaki ke olioli e moui mo e fiafia. Totou a tautolu ke he tufugatiaaga he tagata: “Ti pehe age ai e Atua, Kia eke e tautolu e tagata ke he ha tautolu a fakatai, ke tuga a tautolu; kia pule foki a lautolu ke he tau ika he tahi, mo e tau manu lele he pulagi, mo e tau manu huifa, mo e kelekele oti kana, katoa mo e tau mena totolo oti kua totolo ke he kelekele.” He oti e tufugatia he lalolagi, “ti kitekite e Atua ke he tau mena oti ne eke e ia, kitiala, kua mitaki lahi ni.”​—Kenese 1:26, 31.

Maeke nakai he Atua ke talahau kua “mitaki lahi” e tuaga momoko he vaha nei? Nakai fakai, “ha ko e Atua ko e fakaalofa a ia.” (1 Ioane 4:8) Kua talahaua a ia ke “nakai fakamailoga tagata” mo e “kua katoatoa ni e mitaki hana gahua; ha kua tonu hana tau puhala oti ni[,] ko e Atua kua fakamoli, nakai ha ha ia ia ha mahani kelea, ko e mahani tututonu mo e mahani hakohako ni a ia.” (Teutaronome 10:17; 32:4; fakatatai Iopu 34:19.) Ti fakaoti mai e aposetolo ko Peteru: “Ko e moli, kua iloa e au nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.”​—Gahua 10:34, 35.

Ha ko e Atua fakaalofa, nakai fakamailoga, tonu, mahani hakohako, mo e tututonu, maeke fefe ia ia ke tufuga e tau tagata mo e nakai fetataiaki ke he tonuhia ha lautolu ke olioli e loto fiafia? Ke fakaata e tau tagata ke fili mo e ke toka a lautolu he fakatokaaga nakai fetataiaki, ko e mena kehe mamao mai a ia he hana a mahani mau. Ne pauaki e ia a lautolu ke “fanau ataina mo e fetataiaki e lilifu mo e tau tonuhia.” Ka e, maaliali ni kua nakai pihia he vaha nei. Ko e ha ne nakai pihia ai?

Ko e Kamataaga he Nakai Fetataiaki

Ha kua tufuga he Atua e tau tagata ke fetataiaki kua nakai pehe e naia kua pauaki e ia a lautolu ke tatai ke he tau puhala oti. Kua kehekehe a lautolu ke he tau taleni, tau fiafia, mo e aga. Kua kehekehe foki a lautolu ke he tau tutuaga po ke pule. Ke fakatai ki ai, kua nakai tatai e tagata tane mo e fifine ke he tau mena oti, ka kua tufuga he Atua e fifine ke “lagomatai” e tagata tane. (Kenese 2:18) Kua maali foki e kehekehe he pule he tau matua mo e fanau. Ka e, pete ni ko e tau fekehekeheaki nei​—ko e tau tagata tane, tau fifine, mo e fanau​—kua lata oti ke olioli e tonuhia ke fetataiaki ne foaki he Atua ke fakamakona aki e tau matapatu manako ke fiafia. Kua lata ia lautolu ke olioli e lilifu mo e tau tutuaga tatai i mua he Atua.

Kua pihia foki e tau tama fakaagaga he Atua, ne tufuga fakamua he tau tagata, kua foaki ki a lautolu e tau kotofaaga mo e tau matagahua kehekehe. (Kenese 3:24; 16:7-11; Isaia 6:6; Iuta 9) Pete ni he pihia, ke he tau gahua ne age ki a lautolu, kua maeke ia lautolu oti ke olioli e tau foakiaga faka-Atua ma e moui mo e fiafia ke he puhala tatai. Ati fakatata ai e lautolu e nakai fakamailoga he Atua ke he puhala mitaki lahi.

Ka e momoko ke talahau, kua nakai talia he taha mena moui fakaagaga e fakaholoaga nakai fakamailoga he Atua. Ne mua atu e manako hana ke he mena ne age he Atua ki a ia, manako a ia ke he tuaga tokoluganea. He feaki e manako kelea nei, ne totoko a ia ki a Iehova, ko e Tufuga ne ha ha ai e tonuhia ke he tuaga ne mua ue atu. Ko e tama fakaagaga totoko nei he Atua ne fakahiku ke fakaohooho e tau tagata ke huhu toko e Atua ke he tau mena ne foaki e Ia ma lautolu. (Kenese 3:1-6; fakatatai Isaia 14:12-14.) Ti ko e foakiaga a Iehova ma e tau tagata ke olioli e moui mo e ke fiafia kua fehikitaki ai. Ko e agaga totoko nei, ne kitia he Fakakiteaga 20:2 ko e ‘tiapolo ko Satani,’ ne taute e fakatupuaga kelea ke nakai fetataiaki e tau tagata.

To Hiki Nakai e Tau Tutuaga?

Taha ni e kupu he tali ko e, e!

Ka ko hai ka ta mai e tau hikihikiaga kua lata? Ko e tau tagata takitaki, nakai fakauaua ke loto fakamoli, kua taufetului ke he tau senetenari ke taute pihia. Ko e kautuaga ha lautolu kua fakakaupa, ti tataki atu e tau tagata tokologa ke fakahiku kua nakai lata ke amanaki to fakaoti e lekua he nakai fetataiaki he tagata. Ka ko e onoonoaga he Atua kua fakamau he Isaia 55:10, 11: “Ko e mena tuga ne to hifo e uha mo e kiona mai he lagi, ka e nakai liu atu ki ai, ka e fakamalūaki e kelekele, ti fua mai ai, mo e gotogoto mai ai, kua tutupu mai ai e tau saito mo ia ne gana saito mo e tau mena kai mo ia ka kai. To pihia ni haku a kupu kua fina atu ai he gutu haku, nakai liu noa mai a ia kia au; ka to eke ni e mena kua loto au ki ai, to monuina foki ia ke he mena ne fakafano atu ai e au.”

Ko e mafanatia ha ia ke iloa kua talahaua e Iehova ko e Atua to fakamoli e ia hana finagalo fakamua ke foaki ke he tau tagata oti e fetataiaki ma e moui mo e fiafia! Ko e Atua he kupu moli, kua pauaki a ia ke fakamoli e mena ne mavehe e ia. Fiafia lahi ni, ha kua ha ha ia ia e manako mo e malolo ke taute ai. To taute fefe mogoia e ia e mena nei?

Ko e tali kua toka he Kautu ne kua fakaako e Iesu Keriso hana tau tutaki ke liogi ki ai: “Ha mautolu a Matua na e, . . . Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:9, 10) E, ko e Kautu he Atua ka fakaaoga e Iehova ke “tuki malipilipi mo e fakaotioti e tau kautu oti [he mogonei], ka ko ia to tumau tukulagi a ia.”​—Tanielu 2:44.

I lalo he pule he Kautu he lagi, to malikiti mai e kaufakalatahaaga fou he tagata. Hagaaki ki ai, ne tohia he aposetolo ko Ioane i loto he tohi fakamui he Tohi Tapu, ia Fakakiteaga: “Ne kitia foki e au e lagi fou mo e lalolagi fou; ha kua mole atu e lagi fakamua, mo e lalolagi fakamua.” (Fakakiteaga 21:1) To mole e tau fahi fakalialia oti he nakai fetataiaki​—ko e mativa, gagao, fakagoagoa, fili tagata, mo e falu fakamamahi foki he tagata.a

Kua molea e senetenari he hataki atu he Tau Fakamoli a Iehova e tau tagata ke he Kautu ia. (Mataio 24:14) He puhala he tau laupepa lomi mo e lagomatai fakatagata, hane fa e lagomatai fakamakutu e lautolu e tau tagata ke moua e iloilo he finagalo he Atua tuga ne fakamau he Tohi Tapu. Ti ko e gahua fakaako ha lautolu he lalolagi katoa, kua nakai ni foaki ke he tau tagata e amaamanakiaga ke moui fetataiaki mo e fiafia ke he vaha anoiha ka kua ta mai e mitaki he mogonei ni he tautaofi e fakamatematekelea he nakai fetataiaki. O mai a a tautolu ke kitia e puhala ka taute ai.

[Matahui Tala]

[Blurb he lau 5]

Ne pauaki he Atua e tau tagata oti kana ke fetataiaki he moui mo e fiafia