Kotofa Age—Ko e Ha mo e Puhala Fe?

KO E kotofa age ko e mena kua leva tigahau ato tufuga e Lalolagi palaneta. Ne tufuga e Iehova e Tama fuataha haana ti fakaaoga mogoia e Tama haana “ko e [“iki gahua,” NW],” he tufuga e lagi mo e lalolagi katoatoa. (Fakatai 8:22, 23, 30; Ioane 1:3) Magaaho ne tufuga he Atua e hoa fakamua, ne tala age a ia ki a laua, “kia fakapuke foki e lalolagi, mo e kautu ki ai.” (Kene. 1:28) Ne tuku age he Tufuga ke he tau tagata e matagahua ke fakalaulahi atu e Parataiso i Etena ke kaputia e lalolagi katoa. E, mai he kamataaga, ko e kotofa age ko e puhala pauaki he fakatokatokaaga a Iehova.

Ko e heigoa kua putoia ke he kotofa age? Ko e ha kua lata e tau motua Kerisiano ke ako ke kotofa age e tau matagahua pauaki he fakapotopotoaga ke he falu, ti taute fēfē e lautolu e mena ia?

Ko e Heigoa e Kotofa Age?

“Ke kotofa age” kua kakano “ke tuku age ke he falu; ke tofi mo hukui haana; ke foaki ki ai e matagahua po ke pule.” Ti ko e kotofa age kua lata ke putoia e falu ke fakakatoatoa e tau foliaga. Kua takitaki pauaki e mena ia ke pule fakalataha.

Ko lautolu ne age ki ai e matagahua ke taute i loto he fakapotopotoaga Kerisiano kua amanaki ke fakamooli e matagahua, ke talahau e holoaga he matagahua, mo e fa mahani ke fakatutala mo ia ne kotofa age e matagahua. Ko e matagahua aoga mogoia, kua lago ke he matakainaga taane kua fifili ne kotofa age e matagahua. Kua lata ia ia ke tau fakakia e holoaga mo e foaki e fakatonuaga kaeke kua lata. Ka e liga hūhū e falu, ‘Ko e ha ne kotofa age ka maeke ia koe ke taute e gahua?’

Ko e Ha kua Kotofa Age?

Manamanatu la he tufuga e Iehova e Tama fuataha haana ti kotofa age ki a ia ke fai vala ke he matagahua tufuga ne toe. E, “ha ko e mena ne eke e ia e tau mena oti kana, ko e tau mena ha he lagi, mo e tau mena ha he lalolagi, ko e tau mena kua kitia mo e tau mena nakai kitia.” (Kolo. 1:16) Na maeke he Tufuga ke taute e ia e tau mena oti, ka kua fifili a ia ke olioli fakalataha mo e Tama haana he fakakatoatoa e gahua tufuga. (Fakatai 8:31) Ne lagomatai he mena nei e Tama ke iloa lahi e tau mahani he Atua. Kakano, kua fakaaoga he Matua e magaaho ke fakamahani e Tama fuataha haana.

He ha ha ai a Iesu Keriso he lalolagi, ne fifitaki e ia haana Matua he kotofa age e tau matagahua. Ne fakamahani tumau e ia e tau tutaki haana. Ne fakafano atu tuai e ia e tau aposetolo toko 12, mo e magaaho fakamui ko e tau tutaki toko 70 foki haana ke taki e gahua fakamatala. (Luka 9:1-6; 10:1-7) He hoko atu a Iesu ke he matakavi ia he magaaho fakamui, kua fitā e fakavēaga mitaki he fakatoka ke matutaki atu e ia. He toka e Iesu e lalolagi, ne kotofa age e ia ke he tau tutaki haana ne kua fakamahani e tau matagahua ne mua atu e aoga, putoia e gahua fakamatala ke he lalolagi katoa.—Mata. 24:45-47; Gahua 1:8.

Ko e kotofa age mo e fakamahani kua eke mo tau puhala pauaki he fakapotopotoaga Kerisiano. Ne tala age e aposetolo ko Paulo ki a Timoteo: “Kia tuku age e koe ke he tau tagata [taane] fakamoli, kua maeke ni ke fakaako atu ke he falu.” (2 Timo. 2:2) E, ko e tau matakainaga taane lotomatala ka fakamahani ki a lautolu ke maeke ke fakamahani atu ke he falu.

He kotofa age e falu gahua ne tofi ki a ia, maeke he motua ke fakalataha mo e falu ke he olioli he fakaako atu mo e gahua leveki. He mailoga kua kaupā ni e iloilo he tagata, kua lahi atu foki e kakano ma e tau motua ke ole ke he falu ke putoia ke he tau matagahua he fakapotopotoaga. Pehē e Tohi Tapu: “Ha ha i ai e iloilo kia lautolu kua fakatokolalo.” (Fakatai 11:2) Ko e fakatokolalo kua putoia e mataala ke he tau kaupāaga he tagata. Ka lali a koe ke taute ne koe e tau mena oti, to liga mategūgū a koe mo e tote e magaaho haau ma e magafaoa, ne kua lata ia koe ke fakaaoga mo lautolu. Ti ko e puhala iloilo mooli ke hahamo auloa e tau matagahua. Tuga ke fakatai, ko e matakainaga taane ne eke mo leveki he kau he tau motua. Liga ole a ia ke he falu motua ke tivi e tupe he fakapotopotoaga. He onoono ke he tau fakamauaga tupe, kua maeke e tau motua ia ke fai iloaaga a lautolu ke he tuaga fakatupe he fakapotopotoaga.

Pete ko e kotofa age kua foaki e magaaho ma e falu ke moua e lotomatala mo e iloaaga kua lata, kua fakaatā foki a ia ne foaki age e kotofa ke kitia e tau maamaaga ha lautolu kua age ki ai e matagahua. Ti, he kotofa e tau gahua kua lata i loto he fakapotopotoaga, kua maeke he tau motua ke “kamatamata fakamua” a lautolu ka lata mo tau fekafekau lagomatai.—1 Timo. 3:10.

Fakahiku, he kotofa age kua fakakite he tau motua e falanaki ha lautolu ke he falu. Ne fakamahani e Paulo a Timoteo he gahua tokoua he gahua misionare. Ne feaki he tau tagata tokoua e pipiaga tata lahi. Ne ui e Paulo a Timoteo ko e “tama moli ke he tua.” (1 Timo. 1:2) Pihia foki, ne feaki e pipiaga malolō he vahāloto ha Iehova mo Iesu, he gahua tokoua a laua he tufuga e tau mena oti ne toe. He tuku age e gahua ke he falu, kua maeke e tau motua ke feaki e fakafetuiaga mafanatia mo lautolu.

Kakano ne Fakauaua e Falu

Pete he iloa e tau fua mitaki, kua uka e falu motua ke kotofa, liga mataofi ha kua logona e lautolu kua nakai lahi e pule ha lautolu. Liga manatu a lautolu kua lata tumau a lautolu ke takitaki e gahua. Ka kia manatu, ato hake a Iesu ke he lagi, ne poaki e ia ke he tau tutaki haana ke taute e matagahua uho, pete he iloa mooli e ia to mua atu e gahua ka taute e lautolu he fakatatai ke he mena ne taute e ia!—Mata. 28:19, 20; Ioane 14:12.

Liga ne kotofa age he falu motua he magaaho fakamua ka e nakai kitia e tau fua mitaki. Kua liga logona hifo e lautolu ko lautolu ni kua maeke ke taute e gahua mitaki lahi mo e mafiti. Ka e manamanatu la ke he fakafifitakiaga ha Paulo. Ne iloa e ia e aoga he kotofa age, ka e mailoga foki e ia to nakai hokotia tumau e tau tagata fakaako ke he tau amaamanakiaga haana. He fenoga misionare fakamua a Paulo, ne fakamahani e ia a Mareko ko e fuata ne fakatauō mo ia. Ne hogohogo manava lahi mahaki a Paulo he toka e Mareko e matagahua haana ti liu ki kaina. (Gahua 13:13; 15:37, 38) Pete ia, ne fakatumau agaia a Paulo ke fakamahani e falu. Tuga ne fitā he talahau, ne uiina e ia e fuata Kerisiano ko Timoteo ke fakatauō mo ia. Magaaho ne mautali a Timoteo ke taute e matagahua uho lahi, ne toka e Paulo a ia i Efeso, he tuku age ki a ia e pule ke fifili e tau leveki mo e tau fekafekau lagomatai he fakapotopotoaga.—1 Timo. 1:3; 3:1-10, 12, 13; 5:22.

Pihia foki, nakai lata e tau motua he vahā nei ke fiu he fakamahani e tau matakainaga taane ha kua taha ia lautolu ne uka ke fakaako. Kua iloilo mo e aoga ke iloa e falanaki ke he falu mo e fakamahani a lautolu. Ka ko e heigoa e tau mena ne kua lata he tau motua ke tokaloto ka kotofa age?

Puhala ke Kotofa Age

He kotofa age e tau matagahua, kia mailoga e tau tuaga kua latatonu he tau matakainaga taane ne manamanatu a koe ki ai. Magaaho ne lata ke leveki e tufatufaaga he tau mena kai he tau aho takitaha i Ierusalema, ne fifili he tau aposetolo ‘tokofitu e tagata talahaua, kua puke ke he agaga tapu mo e iloilo.’ (Gahua 6:3) Ka ole a koe ke he tagata ne nakai falanaki katoa ki ai ke taute taha gahua, liga kaumahala a ia ke taute. Ti kotofa age fakamua e tau matagahua ikiiki. Ka fakamooli e tagata ki ai, kua liga maeke a ia ke hahamo foki falu matagahua.

Ka e lahi atu foki e mena kua putoia. Kehekehe e tau aga fakatagata mo e tau lotomatala. Igatia e tagata mo e kehekehe e tau mena iloa. Ko e matakainaga taane ne aga kapitiga mo e fiafia kua liga mitaki ke eke mo fekafekau, ka ko ia ne aga maopoopo mo e fakatokatoka kua liga aoga lahi ke eke mo tagata lagomatai ke he tohikupu he fakapotopotoaga. Ko e matakainaga fifine ne makutu he puhala fakamanaia kua liga fifili ke tukutuku e tau fiti ke lata ma e Fakamanatuaga.

He tofi ki ai e tau matagahua, fakamaama fakamahino e mena kua amanaki ki ai. Ato fakafano atu e Ioane ko e Papatiso e tau utafekau ki a Iesu, ne fakamaama e ia ki a lautolu e mena ne manako a ia ke iloa mo e puhala ke hūhū. (Luka 7:18-20) He taha faahi, ne poaki e Iesu ke he tau tutaki haana ke fakaputu e tau mena kai ne toe kua foaki fakamana e ia, ti toka e ia e tau vala tala matafeiga ki a lautolu. (Ioane 6:12, 13) Kua fakavē fakalahi ke he aga he matagahua mo e tau tuaga kua latatonu he tagata lagomatai. Ko ia ne kotofa age mo e ko ia ne uiina ke taute e matagahua kua lata ke maama e tau mena kua amanaki ke moua mo e lahi e talahauaga ke he holoaga he gahua. Kua lata ke iloa e laua e lahi he mena ka toka ke he manamanatuaga mitaki he tagata ka taute e gahua. Kaeke ko e gahua kua lata ke taute ke oti mai he aho pauaki, liga fakalagalaga lahi ka fakatutala e aho ka oti ai ti talia tokoua ka e nakai toka pulagi noa ni.

Ko ia ne moua e tofi kua latatonu ke lahi e fatifatiaga tupe, tau koloa, mo e lagomatai kua lata. Liga aoga ke fakailoa ke he falu e fakatokaaga. Magaaho ne age e Iesu ki a Peteru e “tau kei he kautu he lagi,” ne taute ai e ia ki mua he falu tutaki. (Mata. 16:13-19) Pihia foki, he falu tuaga kua liga mitaki ke fakailoa ke he fakapotopotoaga ko hai ne lago ki ai e matagahua pauaki.

Ka e lata foki ke fakaeneene. Ka lali agaia a koe ke taute e gahua kua kotofa age e koe ke he taha tagata, to fakafano e koe e manatu ki a ia, “Ai falanaki lahi au ki a koe.” Mooli ai, he falu magaaho kua liga nakai felauaki tonu e fakahikuaga mo e mena ne amanaki a koe ki ai. Kaeke ke tuku age taha atāina ke he matakainaga taane ne age ki ai e matagahua, to liga moua e ia e mauokafua mo e lotomatala. Nakai kakano mooli e mena nei kua nakai manamanatu ke he puhala kua taute aki e ia e gahua. Pete he age e matagahua tufugatia ke he Tama haana, ne putoia agaia ni a Iehova ke he gahua. Ne pehē a ia ke he Iki Gahua: “Kia eke e tau[a] e tagata ke he ha tau[a] a fakatai.” (Kene. 1:26) Ti mai he tau kupu mo e tau gahua haau, lalago e gahua kua taute, ti nava e tagata ke he haana tau laliaga. Ko e talahauaga kū ke he fua ne amanaki ke tupu mai ka lagomatai a ia. Ka nakai taute fakamitaki e gahua, ua fakauaua ke foaki falu fakatonuaga po ke lagomatai. Manatu, ko e matagahua fakahiku kua lago ni ki a koe ne kotofa age.—Luka 12:48.

Tokologa kua aoga mai he tau matagahua he fakapotopotoaga ne kotofa age he tau motua ki ai, nukua fakakite e fiafia mooli ki a lautolu. Mooli, kua lata e tau motua oti ke iloa e kakano mo e puhala ke kotofa age, he fifitaki ki a Iehova.

[Puha he lau 29]

HE KOTOFA AGE KO E

• puhala ke putoia e falu ke he olioli he fakakatoatoaaga

• puhala ke lahi e mena ka fakakatoatoa

• fakakiteaga he iloilo mo e mahani fakatokolalo

• puhala ke fakamahani e falu

• puhala ke fakatātā e falanaki ke he falu

[Puha he lau 30]

PUHALA KE KOTOFA AGE

• Fifili e tau tagata kua latatonu ma e matagahua

• Fakamaama/matutaki fakamahino

• Talahau fakatonu e mena kua lata ke fakakatoatoa

• Foaki e tau koloa kua lata

• Kia manamanatu ke he matagahua, ti fakakite e falanaki haau

• Kia makai ke taute e matagahua fakahiku

[Tau Fakatino he lau 31]

Putoia he kotofa age e tofi e matagahua mo e fakakia tumau e holoaga