Fai Mena Fakaagaaga i Ai—Ka Ko Hai?
I Europa, ne hu atu e fifine fuakau ke he fale tapu, totō e tau fua kahoa he lima haana mo e fakatokotui fakalilifu ki mua he fakatino ha Maria. I Aferika, ne liligi he magafaoa e lupo kava gin he tapa he tanuaga he fakahele he magafaoa. I Amerika, ko e tama taane fuata ne fakakanopogi mo e manamanatu fakahokulo, he amanaki ke matutaki mo e agelu leveki haana, he manatu e ia. I Asia, ne tugi he akoako e tau mena fakatai ne tā aki e tau laupepa lanu kehekehe he taute poa ke he tau agaaga he tau tupuna.
KO E heigoa he tau tagata nei ne tatai ai? Ne talitonu a lautolu oti kua fai mena moui lotomatala he takaiaga fakaagaaga kua maeke ke matutaki ki ai ti maeke ia lautolu ke lahi e fakaohoohoaga ke he tau momoui he tau tagata. Nakai ko e taofiaga foou anei ti nakai ke ofo ai foki. Ko e mena ke ofo ki ai ko e loga he tau manatu kehekehe hagaao ki a lautolu ne nonofo he takaiaga fakaagaaga.
Ne tapuaki e tau Musilimi ke he taha e Atua—ko Allah.a Ko e tau tagata ha Kerisitenitome ne pehē ko e Atua ko e Atua Tolu Taha, ko e Atua ko e Matua, Atua ko e Tama, mo e Atua ko e Agaaga Tapu. Talitonu e tau Hinitū na ha ha i ai molea e afe he tau atua taane mo e tau atua fifine. Falu tagata ne pehē kua haia e tau agaaga i loto he tau manu, tau akau, tau patuō, mo e tau vailele pauaki. Ka ko e falu kua fakaohooho he tau tohi, tau kifaga, mo e tau fakaholoaga televisoni hagaao ke he tau agelu mo e tau temoni, tau aitu mo e tau tēvolo, tau atua taane mo e tau atua fifine.
Tuga ni he loga mo e kehekehe ti nakai tatai e tau manatu hagaao ke he tau atua mo e tau mena ne tapuaki ki ai, kua loga ti kehekehe foki e tau manatu nakai tatai ke he puhala ke matutaki mo lautolu. Ka manamanatu, na tala mai ki a tautolu kua nakai hako oti e tau puhala matutaki. Manamanatu la ki ai ke he puhala nei: Ato hea telefoni a tautolu, lata ia tautolu ke iloa e tagata ka hea a tautolu ki ai ti lata ke mauokafua na fai tagata pihia mooli mo e to fiafia a ia he vilo atu a tautolu. He lali ke matutaki mo e tagata fakatai kua nakai fai kakano. Ka e mua atu e kelea ka matutaki mo e tagata fakavai ne liga fakahagahaga kelea.
Ti ko hai mooli mogoia ne ha ha ke he lalolagi fakaagaaga? Nakai ni tali he Tohi Tapu e hūhū nei ka kua fakamaama foki ko hai ka matutaki ki ai mo e ko e heigoa kua amanaki a tautolu ke moua. Matutaki atu ke totou. Liga to ofo a koe he tau mena ka fakakite mai he Tohi Tapu.
[Matahui Tala]
a Nakai ko e higoa noa e “Allah” ka ko e “Atua.”