Fakaakoaga Fakalalolagi mo e Tau Foliaga Fakaagaga Hau

¹ He moua e fakaveaga mitaki he fakaakoaga he magaaho ne tote a koe kua foaki e tau puhala iloilo kua lata mo koe ke totou mo e tohitohi fakamitaki mo e moua e maamaaga ke he tau mena tutupu, fakamauaga tala, tau mata numera, mo e saiene. He fakatokaaga ia, maeke ia koe ke ako e puhala ke manamanatu fakamitaki, fokifoki e tau fakamoliaga, fakamafola e tau mena vihi, mo e fakagahua e tau manatu aoga. Ko e fakaakoaga pihia ka lagomatai mitaki e moui katoa hau. Maeke fefe e fakaakoaga fakalalolagi ke tatai ke he tau foliaga fakaagaga hau he moui mo e lagomatai a koe ke moua e “iloilo mo e loto manamanatu”?​—Fakatai 3:21, 22.

² Kia Aoga he Fekafekauaga he Atua: He fano a koe he aoga, kia fanogonogo he vahega mo e taute fakamitaki e tau gahua aoga ne uta ki kaina. Ka kautu e koe e totou mitaki mo e puhala fakaako, maeke ia koe ke mukamuka lahi ke kumikumi e Kupu he Atua mo e tumau a koe ke malolo fakaagaga. (Gahua 17:11) Ko e iloilo katoatoa ka lagomatai a koe ke tala age ke he tau tagata he tau feakiaga kehekehe, tau fiafia, mo e tau taofiaga kua feleveia mo koe ke he feleveiaaga. Ko e fakaakoaga ne moua e koe he aoga ka lagomatai lahi ki a koe he taute e tau matagahua Kerisiano hau he fakatokatokaaga he Atua.​—Fakatatai 2 Timoteo 2:21; 4:11.

³ Fakaako ke Lagomatai e Koe a Koe: Ka fakagahua e koe ki a koe ni, to ako foki e koe e tau puhala kua lata ke leveki aki e moui hau ka oti e aoga. (Fakatatai 1 Timoteo 5:8.) Fifili fakamitaki e tau mataulu tala hau. He nakai hagaaki mau ke he fahi kua temotemoai e tau foakiaga gahua, manamanatu ke ako e pulotu po ke puhala ka maeke ia koe ke moua e gahua kua lautonu he ha matakavi. (Fakatai 22:29) Ko e fakamahaniaga pihia ka maeke ke lagomatai e koe a koe kaeke ka fifili a koe ke fekafekau he matakavi kua manako lagomatai.​—Fakatatai Gahua 18:1-4.

⁴ He moua e fakaakoaga mitaki he fano he aoga ka lagomatai a koe ke fakalaulahi e fekafekauaga hau. Gahua fakamalolo ke moua e tau puhala kua lata ke lagomatai aki a koe he fae fakalaulahi atu ki mua he fekafekauaga a Iehova. Ti ko e fano aoga hau ka lagomatai a koe ke hokotia ke he tau foliaga fakaagaga hau.