Tau Hūhū he Tau Tagata Totou

Ko e heigoa e fakaakoaga ne foaki he Tau Fakatai 24:27?

He foaki e fakatonuaga ke he fuata taane, ne pehē e tagata tohia he Tau Fakatai: “Kia taute e koe hāu a tau gahua i fafo, mo e fakalatalata ai ke he vao; ka mole ia ti ta ai e koe hāu a fale.” Ko e heigoa e manatu kua fakakite mai he fakatai omoomoi nei? Kua lata e tagata taane ke mautauteute fakamitaki ato fai hoana a ia mo e fakatū ni haana magafaoa, he mailoga e tau matagahua ne putoia mo e kotofaaga ia.

He vahā kua mole, ne fakamaama e kupu nei he falu magaaho ke kakano ko e taane mo e matua taane kua nakai lata ke gahua tupe hokoia ka e gahua foki ke atihake, po ke fakamalolō e magafaoa haana, ma e fakatai he puhala he tau fakaakoaga fakaagaaga. Pete ko e manatu ia kua mooli lahi mo e mai he Tohi Tapu, liga nakai ko e matapatu kakano a ia he kupu tohi nei. Ko e ha? Fakatutala ke he ua e kakano.

Fakamua, ne nakai tutala e kupu tohi hagaao ke he ta ko e puhala fakamalolō, po ke fakamafana, a lautolu he magafaoa. Ka ko e kakano mooli ke ta e fale. Ko e kupu ne pehē “ta ai,” kua liga fakaaoga fakatai foki ke he puhala he kamata, po ke fakatū, e magafaoa—ko e fai hoana mo e fai fanau.

Ke uaaki, kua peehi he kupu tohi e taute fakamitaki he tau mena he puhala fakapapahi, ke tuga e pehē, “Taute fakamua e koe e mena ē; ka oti ti taute e mena kō.” Ti kakano kia mogoia e fakatai ke tuku fakamua e tau matagahua fakatupe ke he tau mena fakaagaaga? Nakai pihia!

He tau vahā Tohi Tapu, ka manako e tagata taane ke “ta ai [haana] fale,” po ke fakatū e magafaoa he fai hoana, kua lata ia ia ke hūhū hifo, ‘Kua mautauteute nakai au ke leveki mo e lalago e hoana mo e tau tama ka fanau e maua a mui?’ Ato kamata e magafaoa, kua fai gahua a ia ke taute, ko e leveki he haana tau vao po ke tau fua he fonua. Ne talahau fakamaali he Today’s English Version e kupu tohi nei: “Aua neke tā e koe haau a fale mo e fai kaina ato momoho haau a tau fonua, mo e iloa mooli e koe to maeke a koe ke leveki e moui magafaoa.” Aoga agaia nakai e matapatu fakaakoaga ia he vahā nei?

E. Ko e tagata taane kua manako ke faihoana kua lata ia ia ke mautauteute fakamitaki ma e matagahua ia. Ka malolō e tino haana, to lata a ia ke gahua. Mooli, kua nakai ni fakakaupā e gahua he tagata taane ke leveki e tau mena fakatino he magafaoa haana. Kua fakakite he Kupu he Atua ka nakai leveki he tagata taane e tau manako fakatino, logonaaga, mo e fakaagaaga he magafaoa haana kua mua haana kelea ki a ia kua nakai tua! (1 Timo. 5:8) Ti, ko e mautauteute ma e fakamauaga mo e moui magafaoa, kua lata e fuata taane ke hūhū hifo e tau hūhū tuga anei: ‘Kua mautauteute mitaki nakai au ke foaki fakatino ma e magafaoa? Kua mau amaamanaki nakai au ke takitaki e magafaoa ke he tau mena fakaagaaga? To fakamooli nakai e au e matagahua he taute tumau e fakaakoaga Tohi Tapu mo e hoana mo e fanau haaku?’ Kua peehi mooli he Kupu he Atua e tau matagahua aoga ia.—Teu. 6:6-8; Efeso 6:4.

Ti ko e tagata taane kua kumi hoana kua lata ke manamanatu fakamitaki ke he matapatu fakaakoaga ne haia he Tau Fakatai 24:27. Kua lata pihia foki he fuata fifine ke hūhū hifo ki a ia kua mautauteute nakai a ia ma e tau matagahua he hoana mo e matua fifine. Liga hūhū he hoa fuata e tau hūhū pihia foki ka manamanatu ke feaki e tau fanau. (Luka 14:28) He momoui fakatatau ke he takitakiaga omoomoi pihia ka lagomatai e tau tagata he Atua ke kalo mai he tau loto mamahi lahi mo e olioli e moui magafaoa kua monuina.

[Blurb he lau 12]

Ko e heigoa e tau hūhū hagaao ke he fakamauaga kua lata e fuata taane ke hūhū hifo ki a ia?