Veveheaga 63

Falu Fakatonuaga ke Fakahako

HA HA i ai agaia ni a Iesu mo e hana tau aposetolo he fale i Kapanaumi, ti fai mena foki ke he taufetoko he tau aposetolo po ko hai ne mua ne fakatutala ki ai. Ko e mena nei liga tupu foki he liliu mai a lautolu i Kapanaumi, ka e nakai fakalataha i ai a Iesu. Ne hokotaki he aposetolo ko Ioane: “Ne kitia e mautolu taha ha ne vega e tau temoni ke he higoa hāu, kua nakai mui mai a ia kia tautolu, ti hataki e mautolu a ia, he nakai mui mai a ia kia tautolu.”

Ko e moli ko e manatu a Ioane ko e tau aposetolo ni hokoia, e matakau ka fakahigoa ko e tau fakamalolo tagata. Ti logona e ia kua nakai tonu e tagata ia ke gahua fakamalolo tagata ha kua nakai fakalataha a ia mo e matakau ha lautolu.

Ka e taha e mena, ne fakatonu e Iesu: “Ua hataki a ia e mutolu; ha kua nakai fai tagata ke eke mana he haku a higoa nai, ti maeke ia ia ke vagahau fakaave ha kupu kelea kia au. Ha ko e tagata nakai kau kehe kia tautolu, ko e kau fakalataha a ia mo tautolu. Ko e tagata foki ke atu e ia e taha kapiniu vai kia mutolu he haku a higoa nai, ha ko e ha Keriso a mutolu; ko e moli ke tala atu ne au kia mutolu, nakai moumou e ia hana taui.”

Ne nakai maeke he tagata nei ke fakalataha tino mo e mui ki a Iesu ke he hana fahi. Ne nakai la fakatu ia e fakapotopotoaga Kerisiano, ti ko e hana a nakai fakalataha mo e matakau ha lautolu ne nakai kakano ko ia he fakapotopotoaga kehe. Ne ha ha moli he tagata e tua ke he higoa a Iesu mo e kautu ai he vega e tau temoni. Ne taute e ia e mena mitaki he talahau e Iesu ti kua lata ke fai taui. Ne fakakite e Iesu ha kua taute e mena nei, to nakai moumou hana taui.

Ka e kua ka tupetupe e tagata ke he tau kupu mo e tau gahua he tau aposetolo? Ko e mena kelea lahi e mena nei! Ne mailoga e Iesu: “Ko e tagata ka fakatupetupe e ia taha he tau tagata fakateaga nai kua tua kia au, po kua laukauka e tagata ia ane pipi e makaholo ke he hana ua, mo e liti a ia ke he moana.”

Ne pehe a Iesu ke he hana tau tutaki ke utakehe mai he tau momoui ha lautolu e tau mena ne uho ki a lautolu tuga e lima, ko e hui, po ke mata he neke fakatupetupe aki a lautolu. Lauka he utakehe e mena uho nei mo e huhu ke he Kautu he Atua he kuku ke he tau mena uho ia mo e liti ki Kehena (ko e fakaputuaga veve kaka ne tata ki Ierusalema) ne fakatai ia ke he moumouaga tukulagi.

Ne poaki foki e Iesu: “A mutolu neke fakateaga a mutolu ke he taha ia lautolu nai kua fakateaga; ha ko e mena tala atu e au kia mutolu, ko e tau agelu ha lautolu ha he lagi kua kitekite mau a lautolu ke he fofoga he haku a Matua ha ha he lagi.” Ti fakatai e ia e uho ha “lautolu nai kua fakateaga” he magaaho ne talahau e ia e tagata tane ne taha e teau hana tau mamoe ti galo taha. To toka he tagata e 99 ka e kumi ke he taha ne galo, he fakamaama e Iesu, ko e magaaho ka moua a ia ti fiafia lahi ha ko ia ke fakatatai ke he 99. “Pihia foki,” he fakahiku e Iesu, “ha mutolu a Matua ha ha he lagi, kua nakai finagalo a ia kia mate taha ia lautolu nai kua fakateaga.”

Liga tokaloto e ia e taufetoko he hana a tau aposetolo, ti fakamakamaka a Iesu: “Kia ha ha ia mutolu e masima, kia mafola foki a a mutolu ia mutolu.” Ko e tau mena kai tulatula ne fakakonakona aki e masima. Ti ko e mena ia, ko e masima fakatai ke taute aki e tau kupu vagahau ke mukamuka ke talia. Ka ha ha i ai e masima pihia to lagomatai ai ke taofi e mafola.

Ha kua ha ha i ai e nakai mitaki katoatoa, ko e falu magaaho to ha ha i ai e tau taufetoko lalahi. Ne foaki mai foki e Iesu e tau matapatu fakaakoaga ke taute aki e tau mena ia. “Kaeke ke mahani kelea mai hau a matakainaga kia koe,” he talahau e Iesu, “kia fano a koe, ti akonaki a ia hoko mua ni. Kaeke ke fanogonogo mai a ia kia koe, kua moua tuai e koe hau a matakainaga.” Ka nakai fanogonogo a ia, he tomatoma mai e Iesu, “ti o ai a mua mo taha, po ke tokoua, kia fakamoli ai e tau kupu oti he talahau he tokoua, po ke tokotolu.”

Ko e tauteaga fakahiku, he talahau e Iesu, ke uta e mena nei ke he “fakapotopotoaga,” ko e pehe a ia, ko e tau leveki he fakapotopotoaga ne maeke ke taute e fakafiliaga ke he fifiliaga. Ko ia ne hala ka nakai talia ha lautolu a fifiliaga, ne fakahiku e Iesu, “kia eke a ia kia koe ke tuga e tagata kehe po ke telona.”

Ko e tauteaga he fifiliaga nei, ko e tau leveki kua lata ke pipiki mau ke he tau fakaakoaga he Kupu ha Iehova. Ti ko e mena ia, ko e magaaho ka moua a ia ne hala mo e kua lata ke fakahala, ko e fakafiliaga ‘kua fita he lili ke he lagi.’ Mo e ko e magaaho ka “vevete e mutolu ke he lalolagi,” ko e pehe a ia, kua moua a ia nakai hala, kua fita he “vevete ia ke he lagi.” Ko e tau fakafiliaga pauaki pehenai, ne pehe a Iesu, “ko e mena kua fakapotopoto ai e tokoua po ke tokotolu ke he haku a higoa, ko au ha ha i ai fakalataha mo lautolu.” Mataio 18:6-20; Mareko 9:38-50; Luka 9:49, 50.

▪ Ko e ha ne nakai lata he vaha ha Iesu ke fakatauo mo ia?

▪ Fefe e kelea he fakatupetupe a ia ne fakateaga, mo e fakatai fefe e Iesu e aoga ha lautolu ia ne fakateaga?

▪ Ko e heigoa ne liga fakalagalaga aki e fakamaloloaga ha Iesu ke he tau aposetolo ke ha ha ia lautolu e masima?

▪ Ko e heigoa e kakano he “lili” mo e “vevete”?