Veveheaga 115

Kua Tupu Mai e Taufetoko

KO E magaaho fakamua he afiafi, ne fakaako e Iesu e fakaakoaga fulufuluola he gahua fakatokolalo he holoholo e ia e tau hui he hana tau aposetolo. Ko e magaaho fakamui ne fakatu e ia e Fakamanatuaga he hana mate ne kua tata mai. Ko e magaaho nei, mua atu ia he onoono ke he tau mena ne nakai la leva he tutupu, ko e mena ke ofo lahi ne hoko. Ne putoia e hana tau tutaki he taufetoko lahi hagaao ko hai ha lautolu ne mua! Ko e moli, kua matutaki mau e taufetoko nei.

Manatu e magaaho he mole e faliu ha Iesu he mouga, ne taufetoko e tau aposetolo ko hai ha lautolu ne mua. Ka e lafi ki ai, ko Iakopo mo Ioane ne ole ke he tau tutuaga tokoluga he Kautu, ti au atu e taufetoko he tau aposetolo. Ko e magaaho nei, ke he po fakahiku hana mo lautolu, ko e momoko ha ia ha Iesu ke kitia a lautolu kua liu taufetoko! Ko e heigoa hana ne taute?

He nakai vale ke he tau aposetolo mo e ha lautolu a tau mahani, ne liu foki a Iesu fakakakano mo e fakauka mo lautolu: “Ko e tau patuiki he tau motu kehe, kua pule kia lautolu; ko lautolu foki kua pule kia lautolu, kua talahaua a lautolu kua Totonu. Ka e nakai pihia a mutolu, . . . Ha ko hai kia kua mua; ko e tagata kia ne takoto ke kai, po ko ia ne fekafekau mai? Nakai kia ko ia ne takoto ke kai?” Ti ko e magaaho ia, ne fakamanatu e ia hana fakafifitakiaga, he pehe: “Ka ko au nai ha ha ia mutolu tuga ni e fekafekau.”

Pete ne tau nakai mitaki katoatoa ha lautolu, ne tumau e tau aposetolo mo Iesu ke he hana tau matematekelea. Ti ko e mena ia ne pehe a ia: “Tuga ne kotofa mai he haku a Matua e kautu kia au, ke pihia foki he kotofa e au kia mutolu.” Ko e maveheaga nei ha Iesu mo e hana a tau tutaki fakamoli ne matutaki a lautolu ki a ia ke fakalataha mo ia ke he pule auloa he hana kautu fakapatuiki. Ko e kaupa ni he 144,000 ka uta ke he maveheaga nei ma e Kautu.

Pete ni kua foaki ke he tau aposetolo e amaamanakiaga mitaki nei ke fakalataha mo Keriso ke he pule he Kautu, ko e magaaho tonu ia ne lahi e lolelole fakaagaga ha lautolu. “To tupetupe a mutolu oti ha ko au ni ke he po nai,” he talahau e Iesu. Ka e taha e mena, ne tala age ki a Peteru kua liogi a Ia ma Peteru, ne fakamalolo e Iesu: “Ka mafoki mai a koe, ti fakamalolo e koe hau a tau matakainaga.”

“Ma fanau na e,” he fakamaama e Iesu, “toe tote haku a nofo ia mutolu, to kumi e mutolu au, ka e tuga ne tala atu e au ke he tau tagata Iutaia, Ko e mena ke fano au ki ai nakai maeke ia mutolu ke o ki ai; pihia foki he tala atu nai e au kia mutolu. Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.”

“Ko e Iki na e, to haele atu a koe ki fe?” he huhu e Peteru.

“Ko e mena ka fano au ki ai, nakai maeke ia koe ke mui mai ainei kia au,” he tali e Iesu, “ka ko e taha aho ke mui mai ai a koe kia au.”

“Ko e Iki na e, ko e heigoa mena nakai maeke ai ia au ke mui atu ainei kia koe?” Ne manako a Peteru ke iloa. “To tuku atu e au haku a moui ke hukui aki a koe.”

“To tuku atu kia e koe hau a moui ke hukui aki au?” he huhu e Iesu. “Ko e moli, ko e moli, ke tala atu e au kia koe, ke he aho nai, ke he po nai ni, nakaila ko lagaua e tau moa, to fakatikai lagatolu mai a koe kia au.”

“Pete ni he mamate fakalataha a taua mo koe,” he totoko e Peteru, “ka e nakai ni fakatikai e au a koe.” Pete ni foki he talahau he tau aposetolo e mena taha ia, ne palau a Peteru: “Pete ni he tupetupe e tau tagata oti kia koe, ka e nakai tupetupe ai au tukulagi!”

Ne liu a ia fakamanatu he magaaho ne fakafano e ia e tau aposetolo he fenoga fakamatala ki Kalilaia mo e nakai fai kato tupe mo e kato mena kai, ne huhu a Iesu: “Ti nonofogati nakai a mutolu ke he taha mena taha?”

“Nakai fakai!” he tali e lautolu.

“Ka ko e ainei, ko e tagata ne fai kato tupe, kia uta ai e ia, ti pihia foki mo e kato,” he talahau e ia, “ko e tagata foki nakai fai pelu, kia uta a hana tapulu ke fakafua aki mai taha. Ha ko e mena tala atu e au kia mutolu, kua lata fakamoli mai kia au e mena ne tohi ha ē, Kua totou foki a ia fakalataha mo e tau tagata holifono; ha ko e mena fakahiku foki e tau mena ne tohi kia au.”

Ko e tuhi a Iesu ke he magaaho ka fakatautau a ia fakalataha mo e tau tagata kelea, po ke tau tagata matahavala. Ko e fakakite foki e ia, ko e hana a tau tutaki to feleveia mo e tau favale kelea lahi he tali mai he magaaho ia. “Ko e Iki na e, kitiala! ne ua la e pelu hanai,” he talahau e lautolu.

“Toka ai,” he tali e ia. Tuga ni ka kitia e tautolu, ha kua ha ha ia lautolu e tau pelu to fakaako fakamafiti e Iesu e taha fakaakoaga aoga lahi. Mataio 26:​31-35; Mareko 14:​27-31; Luka 22:​24-38; Ioane 13:​31-38; Fakakiteaga 14:​1-3.

▪ Ko e ha e taufetoko he tau aposetolo ko e mena ke ofo lahi ai?

▪ Taute fefe e Iesu e taufetoko?

▪ Ko e heigoa ne kua maeke ha ko e maveheaga ha Iesu ne taute mo e hana tau tutaki?

▪ Ko e heigoa e poakiaga fou ne foaki e Iesu, mo e fefe e aoga he mena ia?

▪ Ko e heigoa e mauokafua kua molea ne fakakite e Peteru, mo e ko e heigoa e talahauaga ha Iesu?

▪ Ko e ha e tau poakiaga ha Iesu hagaao ke uta e kato tupe mo e kato mena kai ne kehe mai he poakiaga fakamua hana?