Kua Mautauteute Nakai a Koe ke Lalago e Tua Haau?
KUA feleveia nakai a koe mo e tuaga ne logona e koe e lata ke lalago e tua haau? Manamanatu la ke he mena ne tupu ki a Susana, ko e matakainaga fifine ne 16 e tau tau moui, i Parakuai. He vahega haana he aoga tokoluga, ne fai tagata ne talahau ko e mena nakai talia he Tau Fakamoli a Iehova e “Maveheaga Tuai,” Iesu Keriso, po ko Maria. Ne talahau foki ko e Tau Fakamoli a Iehova ko e tau tagata uliulitonu ne talia ke mamate ka e nakai talia e tuluiaga fakaekekafo. Liga fēfē e tali haau?
Ne liogi a Susana ki a Iehova ti hiki e lima haana. Kua teitei hili tuai e vahega, ka e ole a ia ke he faiaoga ke fakaatā a ia ke tutala hagaao ke he taofiaga haana ko e taha he Tau Fakamoli a Iehova. Ne talia fiafia he faiaoga. Ke he ua e faahi tapu i mua, ne tauteute a Susana ma e tau vahega, he fakaaoga e porosua ne mataulu Jehovah’s Witnesses—Who Are They? What Do They Believe?
Ne hoko mai e aho ma e fakamatalaaga. Ne fakamaama e Susana e tupumaiaga he higoa Tau Fakamoli a Iehova. Ne fakamaama foki e ia e amaamanakiaga ha tautolu ma e anoiha mo e kakano ne nakai talia e tautolu e tau fagai toto. Ti uiina e ia e vahega ke talahau e tau hūhū. Ne tokologa ia lautolu ne hiki e tau lima. Ne nava e faiaoga ke he tau tali faka-Tohi Tapu he tama fifine ke he tau hūhū.
Taha e tama aoga ne pehē, “Ne lagataha e fano haaku ke he Fale he Kautu, ti nakai taha e tupua talaga i ai.” Ne fia iloa e faiaoga ko e ha. Ne totou e Susana e Salamo 115:4-8 mo e Esoto 20:4. Ne ofo e faiaoga mo e pehē, “Ti ko e ha ne puke e tau fale tapu ha mautolu he tau tupua talaga ka e nakai talia he Tohi Tapu?”
Ne matutaki e hūhū mo e tali ke he 40 e minuti. He magaaho ne hūhū a Susana ke he vahega ko e manako nakai a lautolu ke kitia e vitiō No Blood—Medicine Meets the Challenge, ne tali oti a lautolu ē. Ti liu e faiaoga fakatoka foki taha vahega ma e aho hake. He oti e vitiō, ne fakamaama e Susana e falu puhala tului fakaekekafo ne talia he Tau Fakamoli a Iehova. Hagaao ke he mena ia, ne pehē e faiaoga: “Ne nakai iloa e au na loga pihia e falu puhala tului; ti nakai iloa foki e au e tau aoga he tului ka e nakai fakaaoga e toto. Ko e tau tuluiaga nei—kua lata hokoia ni kia ma e Tau Fakamoli a Iehova?” He magaaho ne logona he faiaoga kua fakaatā ke he tau tagata oti, ne pehē a ia, “Ka liliu mai e Tau Fakamoli a Iehova ke he gutuhala haaku, to tutala au ki a lautolu.”
Ko e fakatutalaaga ne tauteute e Susana ke 20 minuti kua hoko ke he tolu e tulā. Taha e faahi tapu he mole, ne fakamatala foki e falu tama aoga ke he tau taofiaga ha lautolu ko e tau tagata o tapu. He matahiku, ne loga e hūhū ne talahau, ka kua nakai maeke e tau fanau aoga ke lalago e tua ha lautolu. Ne hūhū e faiaoga ki a lautolu, “Ko e ha ne nakai maeke ia mutolu ke lalago e tua ha mutolu ke tuga e taha tama he Tau Fakamoli a Iehova?”
Ko e tali: “Kua fakaako mooli e lautolu e Tohi Tapu. Nakai pihia a mautolu.”
He fuluhi ki a Susana, ne pehē e faiaoga: “Kua fakaako mooli e koe e Tohi Tapu mo e lali ke taute e tau mena ne talahau i ai. Kua lata ni ke nava ki a koe.”
Na maeke ia Susana ke nakai vagahau. Ka e he vagahau, kua muitua a ia ke he fakafifitakiaga mitaki he tama fifine tote i Isaraela ne fofō he tau Suria. Ne eke mo tama fifine he fekafekau he fale he iki Suria ko Naamanu ne moua he gagao kelea e kili. Ne vagahau e tama fifine Isaraela, he pehē ke he iki fifine haana: “Ane mai kua fakalataha haku iki mo e perofeta ha ha i Samaria, po kua fakamalolo e ia a ia he hana lepela.” Ne nakai maeke e tama fifine ke taofi mai he fakamatala hagaao ke he Atua mooli. Ne takitaki atu he mena nei e iki haana ko Naamanu ke eke mo tagata tapuaki ha Iehova.—2 Patu. 5:3, 17.
Pihia foki, ne nakai maeke ia Susana ke taofi mai he fakamatala hagaao ki a Iehova mo e haana tau tagata. He fakalotomatala ke lalago e tua haana he magaaho ne paleko ai, ne omaoma a Susana ke he poakiaga faka-Tohi Tapu: “Ka kia tapu e Iki ko e Atua ke he tau loto ha mutolu. Kia mautali a mutolu ke tali atu mo e mahani molu mo e matakutaku kia lautolu oti kua hūhu mai kia mutolu ke he kakano he amaamanaki ha ha ia mutolu.” (1 Pete. 3:15) Kua mautauteute nakai a koe ke lalago e tua haau mo e fakalotomatala ka hoko e tau magaaho pihia?
[Fakatino he lau 17]
Maeke e tau koloa nei ke lagomatai a koe ke lalago e tua haau