Kua Talaga Kia e Koe he Oneone po ke he Mena Patu?
FIAFIA nakai a koe he totou e Tohi Tapu? Tuku kehe nakai e koe e magaaho ke fakaako tumau e Tohi Tapu mo e taha he Tau Fakamoli a Iehova? Ka pihia, liga logona hifo e koe ko e iloilo ne moua e koe kua lagomatai a koe ke maama mitaki e kakano ne kaputia e lalolagi he magaaho nei he tau lekua. (Fakakiteaga 12:9, 12) Lafi ki ai, kua loga e faahi kupu he Tohi Tapu ne fakamafana a koe he tau magaaho fakaatukehe ti pihia foki e amaamanakiaga ma e anoiha.—Salamo 145:14; 147:3; 2 Peteru 3:13.
Ke moua e iloilo tonu he Tohi Tapu ko e lakaaga aoga lahi ma lautolu ne manako ke eke mo tau tutaki he Keriso. Ka ko e lakaaga ni kia a ia? Nakai. Ke fakatumau ko e Kerisiano mooli—mua atu ka kamatamata e tua he tagata—kua lata he tagata fakaako Tohi Tapu ke taute taha lakaaga aoga lahi foki. Ko e heigoa e mena ia? Ke moua e tali, onoono fakakū la a tautolu ke he Lauga he Mouga, ko e lauga ne taute e Iesu he mouga ko Kalilaia.—Mataio 5:1, 2.
Kamatamata he Ua e Fale
Iloa nakai e koe e tau talahauaga he Lauga he Mouga? Moua e koe e lauga talahaua nei he tau Evagelia ha Mataio mo Luka. (Mataio 5:1–7:29; Luka 6:20-49) Na 20 ni e minuti ke totou e lauga katoa. Ka kua puke ai ke he molea e 20 e fatiakiaga mai he Tau Tohiaga Tapu Heperu ti molea e 50 e vagahau fakatai. Taha vagahau fakatai—ne putoia e talaga he ua e fale—kua uho ha kua fakaaoga ai e Iesu mo vala fakahiku he lauga haana. Ka maama e koe e kakano aoga he fakataiaga fakahiku ia, to lagomatai a koe ke kitia e puhala ka matutaki a koe ke mauokafua ko e tutaki he Keriso pete ne tau kamatamata he tua ka fehagai mo koe.
Ne pehē a Iesu: “Hanai, ka fanogonogo taha ke he haku a tau kupu nai, mo e eke ai e ia, to fakatai e au a ia ke he tagata loto matala ne fakatu e ia hana fale i luga he mena patu. Kua to mai e uha, kua lele mai foki e tau vai, kua agi mai foki e matagi, kua pehi mai ke he fale ia, ka e nakai ni veli a ia; ha ko e mena kua fakave i luga he mena patu. Ka fanogonogo foki taha ke he haku a tau kupu nai, ka e nakai eke ai, to fakatai a ia ke he tagata goagoa, ne fakatu hana fale i luga he oneone; Kua to mai e uha, kua lele mai foki e tau vai, kua agi mai foki e matagi, kua pehi mai ke he fale ia, ati veli ai, kua malipilipi ai a ia.”—Mataio 7:24-27.
Ko e Tagata ne “Keli Fakahokulo”
Ko e heigoa e kupu mooli aoga lahi ne fakaako e Iesu ke he tau tutaki haana he fakataiaga nei hagaao ke he ua e tagata ta fale? Ke iloa e tali, kumikumi fakamakutu ke he tau kupu a Iesu. Ko e heigoa ne mailoga e koe ke he ua e fale? Ne tatai e tau matematekelea he tau fale ua nei. Liga kua tatai e tau fale. Ti liga taha e matakavi ne tutū ai—liga fetataaki foki. Ka ko e taha ne talaga ke he oneone, ka ko e taha he mena patu. Maeke fēfē ke pihia? Tuga ne talahau he Evagelia ha Luka, ne “keli fakahokulo” he tagata loto matala ke hoko hifo ke he mena patu. (Luka 6:48) Ti ko e fua, ne mauokafua e fale he tagata loto matala.
Ko e heigoa e manatu ne manako a Iesu ke peehi? Ne talahau e Iesu e fakataiaga ke fakakite aki e tau gahua he tau tagata ta fale, ka e nakai ko e puhala talaga po ke matakavi ne tutū ai e tau fale po ke malolō he matagi. Taha tagata ne keli fakahokulo hifo, ka e nakai taute pihia he taha tagata. Maeke fēfē ia koe ke eke mo tagata loto matala mo e keli fakahokulo hifo? Ne fakamaama e Iesu e alito he fakataiaga he talahau: “Ko e ha ne totoku ai e mutolu au, Ko e Iki na e, ko e Iki na e, ka e nakai eke e mutolu e tau mena ne tala atu ai e au? Ko e tagata ka hau kia au, mo e fanogonogo ke he haku a tau kupu, ti eke ai e ia, to fakakite atu e au kia mutolu e tagata kua lata ki ai. Kua lata a ia mo e tagata . . . kua keli fakahokulo ia, kua toka e fakave ki luga he mena patu.”—Luka 6:46-48.
Mooli, he fanogonogo teao ke he tau fakaakoaga he Tohi Tapu po ke totou e Tohi Tapu i kaina kua tuga e ta e fale i luga he oneone—nakai keli fakahokulo. Ka kua paleko ke taute, po ke fakagahua e tau fakaakoaga ha Iesu. Kua putoia e keli fakahokulo ke hoko ke he mena patu.
Ti kua mauokafua a koe he eke mo tutaki he Keriso po ke nakai, ne falanaki ni ke he fakagahua e koe e mena ne logona e koe po ke nakai. Ka fakagahua e koe he moui haau he tau aho takitaha e tau mena ne ako e koe he fakaako ke he Tohi Tapu, kua tuga e tagata loto matala a koe ne keli fakahokulo. Ko e mena ia, kua lata he tau tagata fakaako Tohi Tapu takitaha ke fakamanou mo e hūhū ki a ia ni: ‘Ko au kia ko e tagata fanogonogo, po ke tagata ne omaoma? Kua totou mo e fakaako teao kia e au e Tohi Tapu, po kua muitua kia e au e tau poakiaga he Tohi Tapu ka taute e tau fifiliaga?’
Tau Fua Mitaki he Keli Fakahokulo
Manamanatu ke he mena ne tupu ki a José. Ne feaki he tau matua haana a ia ke fakalilifu e tau tuaga he mahani mitaki he Tohi Tapu, ka e nakai fakaako e ia e Kupu he Atua ma haana ni. “He magaaho ne toka e au e fale,” he talahau e José, “ne lali au ke mahani mitaki, ka kua agaagai au he tau kapitiga mahani kelea. Ne kamata au ke fakaaoga e tau tulaki, taute e mahani feuaki, ti latau tumau mo e falu.”
Fakahiku, ne fifili a José ke hiki e puhala moui haana ti manamanatu lahi mahaki ke fakaako e Tohi Tapu. “Taha e mena ne omoomoi lahi au ke hiki,” he talahau e José, “ko e totou mo e maama e Lauga he Mouga ne taute e Iesu. Ka e fai magaaho au ke taute e tau hikiaga ke he aga fakatagata mo e puhala moui haaku. Fakamua, ne matakutaku au ke he tau mena ka manamanatu e ‘tau kapitiga’ haaku ki a au, ka e kautū au ke he matakutaku ia. Ne oti e pikopiko mo e vagahau kelea haaku ti kamata ke finatu ke he tau feleveiaaga he Tau Fakamoli a Iehova. Ne ako e au tuga ni he mavehe e Iesu, ko e moui mukamuka mo e fakagahua e fakatonuaga he Tohi Tapu kua tamai mooli e fiafia tukulagi.”—Mataio 5:3-12.
Ko e heigoa e tau fua mitaki ka keli fakahokulo a koe ke ta e fale he mena patu—kakano, ka fakamakutu a koe ke fakagahua e tau mena ne totou e koe he Kupu he Atua? Ne pehē a Iesu: “Ti hoko mai ai e fakapuke, kua fafati lahi mai e vailele ke he fale ia, ka e nakai maeke he gahuahua ai ni; ha ko e mena kua fakatu tuai ki luga he mena patu.” (Luka 6:48) Mooli lahi, kaeke kua talaga fakamitaki e koe he fakagahua e mena ne ako e koe, to nakai ni kaumahala e tau kamatamata tuga e afā ke moumou e fale haau ka e nakai maeke foki ke gahuahua mo e lulululu ai. Ko e manatu mafanatia ha ia!
Ko e tutaki ko Iakopo, ko e matakainaga ha Iesu, ne totoku taha monuina foki ma e tau tagata fakaako Tohi Tapu ne nakai ni ko e tau tagata fanogonogo ka e ko e tau tagata omaoma ke he Kupu tohi he Atua. Ne tohia e Iakopo: “Kia eke a mutolu mo tau tagata omaoma ke he kupu, ka e aua neke fanogonogo hokoia ki ai. . . . Ko ia kua kikite ke he fakatufono kua katoatoa e mitaki ha i ai e tokanoaaga, mo e tumau ki ai, kua nakai fanogonogo fakanimonimo e tagata ia, ka kua eke e ia e gahua, to monuina e ia ke he hana omaoma.”—Iakopo 1:22-25.
Mooli ai, ko lautolu ne fakagahua e fakatonuaga he Tohi Tapu kua fiafia mooli. Kua foaki he fiafia pihia ke he tau tutaki he Keriso e malolō ke tumau ke he tau kamatamata tuga e afā ne lauia ke he tua ha lautolu mo e ke he fakamooliaga he tukuleleaga ha lautolu ke he Atua.
Ko e Heigoa Haau ka Taute?
He magaaho ne taute e Iesu haana a Lauga he Mouga, ne peehi e ia ko e fekafekau ki a Iehova ko e Atua ko e fifiliaga, nakai ko e mena nei mo e mena na, ka ko e mena nei po ke mena na. Ma e fakatai, ne fakaako e Iesu kua ha ha he tagata e mata kua mitaki [mukamuka] po ke mata kua kelea, ti fekafekau a ia ke he Atua po ko Mamone, ti fano a ia he puhala lautote po ke he puhala laulahi. (Mataio 6:22-24; 7:13, 14) He vala fakahiku he fakataiaga haana ke he ua e tagata ta fale, ne foaki e Iesu ke he tau tutaki haana taha foki e fifiliaga: He eke mo tagata loto matala po ke tagata goagoa.
Ka fakatumau a koe ke fakagahua loto katoa e tau mena ne ako e koe mai he fakaako ke he Tohi Tapu, kua loto matala e mena haau ne taute. E, he keli fakahokulo ke ta e fale he mena patu to takitaki atu a koe ke he tau monuina ma haau mogonei mo e anoiha.—Tau Fakatai 10:25.
[Tau Fakatino he lau 23]
Ko e mauokafua ha tautolu kua falanaki ke he fakagahua e tau mena ne ako e tautolu